﻿Daniel.
7.
Te hasia mu wabo kibu bede te Belsasar te king Babilonde bidali, ena Daniel eno te na ebo tiwai nai te hulide suali. Tama eno te na yali po te buku me delide asęani. Na te tiwai dao. 
Wali te tigidali badu asiyu, tama te genuai tamu ąį dini hodolali. 
Tama gasagi gasagi yai moni hasa te kibu tiwai dabe me si me si te tamu ąį bikside pedelai. 
Hasia pedelali te laion yowi tiwai, tama te genuai ba kemodagego bogo tiwai elaluali. Eno tonono ebadi, tama eno suali, augwaligo aga bogo sela sąnama, tama augwaligo aga te bidi yaligia sągą sigo dodolobo suali. Tama augwa te bidigo homu kolesaga tiwai agaba mawai. 
Tialima, eno suali, te si wali te kibu tiwai hasa te aga pilamubo suali, tama te genuai hasa me deli te nogi augwa te bea wali. Agai te gasa hasa me deligo punali dili sela te aga pedauwalide habilaluali. Tama te po me deli agade pedalu, te tiwai po wali, “Iya, tegoba, holaluao, te mi hauwa tulama, nago tabi pągąyao,” wai. 
Eno me tonono ebadi, tama eno gasa genuai hasa te uni pusi te nogi lepat tiwai suali. Te naigo bogo te me si me si aga tudide elaluali, tama aga tobolu te me si me si elaluali. Tama augwaligo agabolo te tigidali nai tonaluabo bomo mawai, te eno suali. 
Eno te sogo hulide ma tonono ela bilibadi, tama eno te me si me si wali te hasa suali. Iya, aga gesabidi te mu dwai elama, tama aga bomo genuai mu elaluai, tama ena agade wi dwai mu yalio. Agai genuai ain kele elalu, tama agai te tigidali bage tulama, dolobo sę mu yai. Tama nosali aga agalama, tama mimia sabo kakali tulaluali. Te kibu tiwai moni hasa te gasa eno suali hasa dabe tobage tiwai meni, magi baso meni, aga tobolude te nogo si gąų elaluali. 
Eno te gąų dabede homu kone paluyu ebadi, gedu dolo mu ponama, te nogo si gąųba tonalubadi, tama eno te dwasianu gąų me deli te augwali tomode pedalubo suali. Te gesi pedelali gąųgo te polasa elaluali gąų sela guda sąwai. Tama te gesi gąų te komgo te bidi gedu ge dali, pedauwali dali, si elaluai. Tama aga hagoma eyu, te aga digi aga nogi ugwaba sabo po wabo eno odalio. 
Tama nade eno suali, augwaligo te king duayabo sia sai meba sela aselama, muagasai. Tama te Polobadu Polobadu Bidada Aselama, te Megi Me Bidada Peyu, Bidada Pabo Bidi aselama, te duabo sia kingde dugayagasobo suali. Agai gudali ugwa dabe te nala nisi poai mu yai, tama agai tobolu nisi te tedela mu, te meda meni yai kibu sipsip nisi tiwai yai. Tama te dugabo sia king te wil dabe elaluali, tama te dugabo sia sai tigidali badu te isi bogoli genuai elama, 
tama besela palalio. Te bidi sese umabo mu, te hauwa tausen we bidigo te Bidigo sę yali, tama te umabo hauwa milion we bidi aga pąde dolaluali. Tama mebago te buku dabe dagalama, te po tų kot hodolainu yai. 
Eno tonono ebadi, tama eno odali, te me si me si wali te dwasianu kom gąų hasago te aga digi aga nogi ugwaba sabo sę yali. Tama eno suali, augwaligo te me si me si wali hasa elama, tama aga tigi te siaba sąwani, tama siago te aga gąų kom dali tigidali dela silalio. 
Tama te bidali hasa sela, augwa bomo te augwaligo silama, tama te nai dabe te augwaligo tonalumainu ma sula tagalobeo. Tiali goli, te augwaligo te augwali polo me elisąwai. Augwaligo te augwali dwasianu sogo gogolama, bidimainu sula tagalalio. 
Eno te hulide yali nade, eno te bidi me deli te da tǫde bidi tiwai tobage suali. Aga te dagalu pǫ dabe tomode bidiyu, tama ena pąba asali. Tama augwaligo aga te Polobadu Polobadu Bidada Aselama, te Megi Me Bidada Peyu, Bidada Pabo Bidiba sela palio. 
Te Polobadu Polobadu Mu Bidali Bidigo digi aga te king pedalumainu elama, tama agaba te bomo me genuai nogi mawai. Tama aga te sesemane sogo bidada pabo te bomo elalua pabo king bidiyu, tama aga king sę ebo te munu me sia sogobeo. Tama te tigidali bulu tǫ kantri we bidi me, tigidali hani bidi me, tigidali haniani po wabo hani bulu bidi, te aga dologode naga bidaibao. 
Eno te nai dabe te nade sulama, tama ena midigi mu selama, tama homu hauwa dogia palio. 
Tialima, ena te sia king pąde dolalubo bidi dabe me deliba pelama, tama eno agaba hanalu, te na yali po page pusao wali. Tama agai enabolo te tama po wai, 
“Te genuai hasa me si me si tego dąį ilali, te bomai bulu tǫ kantri pedai me si me si pedelaibao,” po wali. 
“Tiali goli, nosali te Ugwadu Mu Bidibo Godigo we bidi augwali te king dabe tiwai pedelama, tama augwali te sesemane sogo bidada peyu, bidibo tiwai gilama yaibao,” te sia king pąde dolalubo bidigo enabolo te po wai. 
Eno te po odobo si da, tama eno te me si me si wali hasa te kuna mu ma koneabo homu yali. Aga te gasa hasa dabede te tedali gasagi yai ebaso, tama ena agade wi dwai mu yali. Agai ain kele genuai elalu, tama te aga sągąde dani dabe te bras tiwai elaluai. Tama agai te nai hauwa aluama, tama tuyu, tama te tigidali kakali agalama, te tudulaluali. 
Tama me eno te nogo si kom gąų te tobolude elaluali, te kuna mu ma koneabo homu yai, tama te dwasianu nosali pedelali kom te gąųgo te polasa elaluali gąų sela guda sąwani. Te kom gąųgo te gedu me pedauwali elalu, tama genuai po dagą mu weyu, tama aga digi aga nogi ugwaba sali. Eno te dwasianu kom gąų suali sogo, tama ena wi dwai mu yai. Eno te kom gąųde wi ebo tiwai yaligia te gasa kom gąų dabede me tebeo. 
Tama te na yalide, eno suali, te kom gąųgo te Godigo we bidi dabe dali hwįnama, tama augwali dolobo sę ebo sualio. 
Tama te Polobadu Polobadu Digi Bidali Bidi pedelama, tama te kom gąų dali kot po tų elama, te tama po wali, komgo te dwai sę genuai te Ugwadu Mu Bidibo Godigo we bidide yali dao. Tama te Godigo we bidi te king tiwai pedalabo sogo te usu niyu te pedalubao wali. 
Eno te bidiba eno te koneainu yali nai dabede po hanaluama, tama agai enabolo te tama tiwai po wali, “Te na yali po page te e tiwai dao. Te me si me si wali hasa, te e tiwai, te me si me si wali tǫ kantri pedai tama elalueibao, tama aga te gasa tigidali bulu tǫ kantride te gasagi yai tedali me elalueibao. Agai te tigidali gasa bulu tǫ kantri aiyaba elaluama, tama augwali agalama, tama augwali silimainu yaibao. 
Te kom nogo si te nogo si king augwali te bulu tǫ kantride digi pedelaibao. Nosali te gasa king pedaliyu, tama aga te polasa pedelali king dabego kolesaga tiwai egobeo, te tedali gasagi yai yaibao. Agai te king sela sela sąwaibao. 
Tama agai te Ugwadu Mu Bidibo Godiba po dwai mu olama, tama aga we bidi dabe aiyaba elalueibao. Tama agai te lotu pode bomai po hasegeliyu, te genuai side wabo te hasegelaibao. Tama agai te Godigo we bidi tonaludubadi, te kibu be sela olama, te kibu be me badu pedaiba usu nigi paibao,” wai. 
“Aga te sogo bodolu silibaso, tama Godigo te po tų kot hodolama, tama agai te kingo bomo silama, tama aga mu dolaibao,” wali. 
“Tama te Ugwade Mu Bidibo Godigo te tigidali tǫde kingo genuai nogi me bomo te aga we bidi dabeba mawaibao. Tama augwali te sesemane sogo king bidada peyu, bidada paibao. Tama tigidali bulu tǫ kantri we bidi dabe te Godigo we bidi dologode bidiyu, tama augwaligo po wali paibao,” walio. 
Te eno nade suali po tigidali te tama dao. Ena Daniel, ena wi dwai mu elama, tama eno gesabidi te hasegelama, tedela yali. Tama eno te nai dabede homu kone palobo homu mu yalio. 
