﻿Profet Amosgo Buku.
1.
E po da, te bidi Amosgo pusali po dao. Amos aga te Tekoa taun bidi da, tama aga te sipsip kibu hauwa page bidi me deli bidai dao. Godigo agabolo te Israel hanide e po mani sogo, aga te nade subo nai tiwai gilama yali. Te sogo Usia te Juda tǫ kantri king bidibo sogo, me te Jeroboam, te Joasgo ogwa, te Israel tǫ kantri king bidali. Te sogo Amosgo te nade subo nai tiwai sulama da, teda nosali badu te kibu be si bidama da, te genuai tǫ mali yai. 
Te Amosgo e bukude wabo po page e tiwai dao, Genuai Bidi te Saion bulu dude bidiyu, te agai i hai genuagia mu udubao. Awe, aga tede te Jerusalem moni taunde bidiyu, sębę ebaso, te agai dogonigo hwą bomonama obao. Tama tibaso, te sipsipgo tuabo wiegi yai nosai dabe sasia pobao, me te Karmel bulu dude elalubo ni yabe dabe, tigidali wa pobao. 
Genuai Bidigo wabo po e dao, “Hauwa sogo te Damaskus hanu we bidi, te Siria tǫ kantri bage, augwaligo dwai sęgę sabo sę idu geai. Tebode augwaligo dwasianu toma me nabeo. Menio. Augwaligo te Gileat tǫ we bidi dabe dali dwai sębę eyu mu dolali, tialima, mu tama, eno te Damaskus dabeba dwai dene mu mabo sę yaibao,” wali. 
“Awe, eno isi te king Hasaelgo sę yani genuai wiegi yai beba te sia tula palaibao, tama te isigo te king Benhadatgo taun ulaibao, te bomai obo elalubo taun dao. 
Eno te Damaskus genuai taun te genuai sunumi dąų walobo ain ba dabe te togolama, mimia sąwaibao. Tama eno te Odogo Bulu Avende bidali we bidi tigidali sela sąnama, ela gudulubadi, tama eno te tǫ kantri Beteden king bidi me ela gudulaibao. Tama te Siria hani bage te tǫ kantri Kirba kalabus paibao, te giliga pedalubo badu elalubao.” Te po da, Genuai Bidigo po dao. 
Genuai Bidigo wabo po e dao, “Hauwa sogo te taun Gasa we bidi dabe, te Filistia tǫ kantri bage, augwaligo dwai sęgę sabo sę idu geai. Augwaligo te tebode dwasianu toma me nabeo. Menio. Te Gasa dabego te bulu hani bage me deli sese selama, te kantri tǫ Idomba kalabus sę emainogo sela pali. Tialima, mu tama, eno te Gasa dabe augwaliba dwai dene mu mabo sę yaibao. 
Tialima, eno te isi Gasa taun obo tomoba tula palaibao, tama te isigo te taunde bomai be dabe ulaibao. 
Te Filistia tǫ taun dabede eno tama tiaibao, eno te taun Asdot hani bage tigidali ela gudulama, tama eno te Askelon king me ela gudulaibao. Tama eno te taun Ekronba me te dwai sęgę mabo sę ilama, tama te Filistia tǫde bidali we bidi dabe sese eno ela mu silaibao.” Te po da, Genuai Bidi Godigo wai po dao. 
Genuai Bidigo wabo po e dao, “Hauwa sogo te taun Tair we bidi dabego dwai sęgę sabo sę idu geai. Augwaligo tebode dwasianu toma me nabeo. Menio. Augwaligo te Israel we bidi hani me deli sese ela gudulama, te tǫ kantri Idomba kalabus sę emainogo sela palio. Polobadu augwaligo te Israel hani bidi augwali dali te po me deli dąų walama, te augwa hodobo deliba bugagia bidinao wali, tiali goli augwaligo te dąų walali po bolali. Tama tialima, te mu tama, eno te Tair dabeba dwai dene sęgę mabo sę yaibao. 
Eno te Tair taun obo dabeba te isi tula palama, tama te taunde bomai be dabe te isigo dela silaibao,” te po wai. 
Genuai Bidigo wabo po e dao, “Hauwa sogo te Idom tǫ kantri we bidigo dwai sęgę sabo sę idu geai. Augwaligo te tebode dwasianu toma me nabeo. Augwaligo te Israel hani we bidi dabe pobeasa pali, te augwa ama dabe digi te augwali bobage hwą ge bainatgo elalio. Te augwali hobede eyu, tau sabo homu eyu, tama augwali tagalabo homu dwasianu me ebeo. Mu menio. Augwaligo haliga sębę ebo wado yabo homu sębę genuai mu elama, posolo mu yai, tama te haliga sębę yali me silibeo. Te me elalualio. Tialima, mu tama, eno te Idom dabe augwaliba dwai sęgę mabo dene mu ilaibao. 
Eno te isi aiyaba tula palama, tama te Teman taun, me Bosra taun sigo elalubo bomai be dabe te isigo domainu ulaibao,” te po wai dao. 
Genuai Bidigo wabo po e dao, “Hauwa sogo te Amon we bidi dabego dwai sęgę sabo sę idu geai. Augwaligo te tebode dwasianu toma me nabeo. Menio. Augwaligo te tǫ dage me badu sainu, boi hwįbo sę ebadi, te tǫ Gileat bulude augwaligo te wai haliga elalubo we dabe haliga hwągo aluali. Tama tialima, mu tama, eno te Amon dabeba dwai sęgę mabo dene mawaibao. 
Eno te moni taun Raba aiyaba isi tula palama, tama te taun bomai be dabe isi ulaibao. Te ami bidi augwa boi hwįbo sogo, te i hai bomonama weyu, tama te hwįbo bomai pedalu, te bomai wali me deli te dwai sogo pedalubo tiwai yaibao. 
Te boi bidi dabego te Amon king aga ofisa bidi dabe dali, augwali te gasa buluba kalabus igi painu sela paibao.” Te po da, Genuai Bidigo po dao. 
