﻿Amos.
3.
Dage Israel, dage tigidali hani Genuai Bidigo dage Isipde ma dobola selama, odasa asali, dagego agai dagebolo mabo po odiąo. 
Agai te tiwai po obao, “Te haniani we bidi hani hauwa te tigidali tǫde elalubao. Tiali goli, eno dage Israel hani deli naga te ena hani da wainu dąį ilama, dią selama, te eno dage bugagia tonalubao. Tama tialima, eno suali, dagego dwai sę ebo kolesaga te genuai ebaso da, teda eno dagego te dwai sę tigidali wei ponoyu, te dageba dene mabo sę yaibao,” te po obao. 
Te hasia bolo bidi si dugulama, po mia sisąwai, magi ilama te bidi augwa si talua gasaba pobaso usu yaibawe? Menio. 
Te bomai hasa laiongo te hasa me deli te buside sisąbaso, magi baso agai i waibawe? Te ogwa bidi bomai hasa laion me deli te masigi dedage tomode bididu, te aga hasa me ela tusiąbadi, agai i waibawe? Mu menio. 
Te bidigo te ba kę hanisiąbadi, te ba te kę tomoba pogowe? Woo, pogobeo. Te hasa me deli te kę tomoba pisąbadi, magi ilama te kę pedegalugowe? Woo, tegobeo. 
Te bu wabo nai biugel te taun me deli tomode bu obaso, te boi hwįabo bidi asobao po pusubo tiwai ebo si da, te hanu we bidi augwa wi homu yaibao, agawe? Magia, wi yaibao. Te tiwai naga, te taun me deli dolobaso, dagego homugo Genuai Bidi Godigo te dolabo nai tagala palai dao homu ebo da, agawe? Magia, tagala palai dao. 
Mu tamao, tigidali sę God Genuai Bidigo yabo homu ebo sę, agai aga sę bidi dabebolo hasia po pusaibao, te profet dabeba waibao, tama nosali agai wali po gilama te sę ebo dao. 
Te bomai hasa laiongo i bomonama wabo odobo si da, te bidi aga wi homu ebo meni da, agawe? Awe, aga wi yaibao. Te God Genuai Bidigo po bidi me deliba pusubaso, te bidigo te po pusubo meni da, agawe? Menio. Agai pusaibao. Te Amosgo wali po dao. 
Te taun Asdot king bidi bidibo pesage genuai bede bidalubo bidi dabeba, me te kantri tǫ Isipba i waliyu, te augwaliba te tama po walao, “Dage tigidali pelama, te Samaria hanu pąde elalubo bulu duba sisinigi pelama, te subigila tedelama bilalubo we bidi suao, te augwaligo ebo te tobage dwai kolesaga dabe sueibao.” 
Genuai Bidigo te tama po wali, “Te Samaria we bidi augwaligo te nai wi siyu, hwįbo kolesaga eyu, te nai hauwa selama, te augwa bomai be dabe pągąnani. Augwa te doloba pai kolesaga me konebeo. Mu menio. 
Tama tibaso, te boi bidi hani me deli asama, te Samaria bagego tǫ kantri tomode bilama, tama te taun bomai obo dabe dolama, tama augwaligo te genuai bomai be dabe aluama, tama tomode elalubo nai doado bage tigidali saibao,” po wai dao. 
Te Genuai Bidigo po ma weyu, te po wai, “Te bomai hasa laiongo sipsip kibu me deli ela tubaso, te sipsip tonalubo bidigo te sipsip ma dobola sainu ebaso da, teda agai te tigi pedai naga munalubo sueibao, te sągą dili si, ma olo pedai, te tama sueibao. Te Godigo te tobage kolesaga tiwai te Samaria hanude bidibo Israel we bidiba yaibao, te hanu te Israelgo genuai tǫ kantri elalubao. Te we bidi augwa wiegi yai homu pemene elalu bidai, augwali te dolaibao. Te augwali dwasianu hani dabe naga te bugulama me bidaibao. Te taun wiegi yai doado bage tigidali dolai tiwai elalu, te pibo sai bet nigali sągą me badu naga elalubo tiwai yaibao,” wai dao. 
God, Genuai Bidi Tigidali Bomo Elalubo Bidigo, agai te tiwai po wai, “Dagego olo bugagia munama, te Jekopgo bulai wąį nǫų dabe augwaliba te po walao. 
Eno te Israel dabeba augwa yali dwai sę wei ponobo sogo, teda eno te taun Betelgo alta sai dabe dolaibao. Tama eno te tigidali altade elalubo gąų yai nai kom dabe alueibao, tama te kom gąų dabe te tǫba tutula palaibao. 
Te eno te bidi dabe augwa te kedau sogo bidainu sę yani wiegi yai be dabe dolaibao, te augwa giliga posolo ebo side bidainu sę yani, te tobage sawi yai be me dolaibao. Te be dabe augwa te moni hasa elefan kelego au ilali, augwaligo te tigidali alulama, olo nai hogomu tiwai pedelaibao. Te tigidali genuai be dabe me mu dolaibao,” Genuai Bidigo te po wai dao. 
