﻿Maika.
4.
Te me sogo si deli te nosali pedalubo side te bulu du, te Genuai Bidigo be elaluali madi, te daide mu elalu, te gasa bulu du tigidali aiyaba elalueibao wai. Tama we bidi hani hauwa teba sisinagasaibao. 
Tialima, augwa te po waibao, “Asiąo, da te Saion bulu duba holinao, te Genuai Bidigo bulu du dao. Da te Israelgo Godigo beba pelama, te agai dago emainu homu ebo kolesaga ola momainao, tialima te aga digi sa muani sunumidu da bilaibao.” Augwaligo te po waibao. Te magi eyu, augwaligo te tama po waibawe, Jerusalem da, te Genuai Bidigo agai bomai po te we bidi dabe ola mayu, te agai po augwaliba pusa mabo pesage dao. 
Genuai Bidigo te tigidali kantri we bidi hanigo po tų ebo dodolama, te augwa deliba bugagia bidimainu yaibao. Te agai te digibulu elalubo bomai tǫ kantri me, te Israel pąde elalubo tǫ kantri dali, te po tų dodolobo po miaibao. Tama te augwa moni bainat hwą dabe siade ulama, hamago haluama, te gi tǫ elibo ain tama nigilaibao. Me te augwa kapago nigai sesemone ene hamago haluama, te wain bono gi sę yabo hwą ge tama nigaibao. Tama tigidali we bidi hani augwa hasi te munu me ma hwįsąma, te hwįainu usu siyu ma egobeo. 
Tama tigidali bidi deli deli te augwa wain bono gi, me ni fik kaya gi pąde bugagia bidalu, te mena bidi me deligo augwali wi ilabo sę me iligobeo. Te Tigidali Bomo Elalubo Genuai Bidigo te po dąų waliyu, wai dao. 
Te tigidali hani bulu bage deli deli augwa te tibo godiba lotu weyu, te augwali wali pabo dao. Awe, tiali goli, te da Israelgo te lotu Godiba waibao, te dago sesemane bidada peyu, bidada pabo Genuai Bidi da, te aga deli naga wali pabo dao. 
Genuai Bidigo te po wai, “Te eno augwali dwai dene menama, te gasa bulu tǫ kantriba te kalabus sę emainu tagala palali we bidi dabe, te nosali, te bodolu mani sogo pedalubo si, te augwali eno ma deliba sisinaibao,” te po wai. 
“Te hani bidi te dwasianu naga dao, te augwali te augwa page bulu digibulu bidali, te bilabo usu meni yani, tiali goli te eno ma gagalama, te augwali bomai hani we bidi pedalumainu ilaibao,” wali. “Tialima, ena te augwa king te Saion bulu dude sesemane bidada peyu, bidada paibao,” wai dao. 
Taun Jerusalem, God nagede bidiyu, te naga we bidi dabe tonalubao, te kibu sipsip page bidigo te sipsip dabe tonalubo tiwai ebao. Tialima, nosali nage te polalubo taun pedaliyu, te hasia polasa tǫ kantri elaluali tiwai ma pedelaibao. 
Jerusalem, magi baso nage gela genuai obawe? Magi baso nage te wego wai ame nainu tudi eliyu, tigi dene ebo tiwai ebawe? Nago king meni da, agawe? Nago kolesaga page koneai bidi dabe isila pai da, agawe? 
Tialima, dage Israel we bidi dabe, dage i hai weyu, gela weyu, tama te wego wai tega painu te tigi dene ebaso, subigila bebegeli bilibo tiwai yao. Magi baso meni, megi dage te taun tagalama, te kala elalubo pesagede bididuaibao. Te dage augwaligo te Babilonba sela paibao. Tiali goli, nosali Genuai Bidigo dage te boi bidi dabego nogode ma dobola saibao wali. 
Megi da, te boi bidi hauwago te dage dali hwįainu sisinanio. Augwaligo posobo po te tiwai obao, “Tegobao, dago te Jerusalem mu dolama, tama suao, aga te tiwai naga me elalua pomainu yaibao,” obao. 
Tiali goli, te hani bidi dabego te Genuai Bidigo homu kolesaga konesąwai. Te Genuai Bidigo augwali sisinama, te augwaliba dwai dene maiabo te augwaligo konesiąma wali, te bidigo te bo elalubo wit sisinama, te agaga pelama, te wit nai ge sainu ebo tiwai gilama yaibao. 
Genuai Bidigo te po wali, “Dage Jerusalem we bidi dabe, dage pelama, te duga boi bidi dabeba dwai dene magi piąo. Te eno dage te bulmakau me deligo te gąų ain, me sągą bras te bomo elalubo tiwai pedalumainu ilaibao,” wali. “Tialima, dagego te we bidi hani hauwa agamainu yaibao. Te boi bidi dabego te hwįyu sali tigidali nai doado bage, te dagego selama, enaba mawaibao, te tigidali tǫde Genuai Bidi dao,” te po wai. 
