﻿Maika.
6.
Genuai Bidigo te Israel po tų ilibo dagego odiąo. Genuai Bidi, nage aselama, augwali po tų yagasao, tama te bulu du dabe te po tų ebo odobo jas bidiyu, tama augwaligo te nago po dagalaibao. 
Dage te bulu du dabe, dage te tǫ page dąų waliyu, te tǫ sesemane bidada pidu, bidada pabo nai dabe, dagego te Genuai Bidigo po tų ebo odiąo. Magi baso meni. Genuai Bidigo aga we bidide po olama, waibao. Agai po te Israel dabeba kisilama waibao. 
Tialima, Genuai Bidigo te tiwai po obao, “Eno we bidi dabeo, eno mena dwai sę dageba yaliwe? Eno mena sę elama, dageba sęgę maniwe? Ae, tegoba, dagego enaba po wei ponao,” te po obao. 
“Eno tama te eno dage kalabus togolama, te dage Isipde selama, te dage odasa asali. Tama eno te Moses nigilali, me Aron, me Miriam me, te tama bage polasa peyu, te dage sunumi ola mawai dao. 
Eno we bidi dabeo, te dwai sę te polobadu Balak te Moap kingo te dageba dwai sę yainu yali, te homugo koneao,” wali. “Te Balam, te Beorgo ogwago wali po, te Balakbolo wei ponani po, te homu kone ma palao. Tama eno yali genuai sę tigidali me te homu koneao, te bulu Sitim dagego tagalama, te bulu Gilgalba sobadi, te sę yali. Dagego te eno sę yali dabe koneao, tialima, te eno dage tau siyu yali sę dabe, te dagego ma koneao,” God Genuai Bidigo te po megi obao. 
Te ena te dagalude Genuai Bidi Godiba lotu wainu asobo sogo da, teda eno mena nai sesaibawe? Eno aga gesbidide kidu sugunama, eno magi maiabo nai elaluaibawe? Te eno wiegi yai bulmakau wai mu selama, te siaba ulugi pabo ofa yaibawe? Ma, eno te kibu be me deli elalubo dwagi yai kau kibu wai dabe sesiyu, tama siago dela silibo ofa mobaso da, teda te usugowe, ma meniwe? 
Eno te hauwa umabo tausen tausen sipsip omai sela asiyu, ma te eno wel botol hauwa umabo mu tausen sela asobaso da, teda Genuai Bidigo wiegi yai homu pemene egowe, ma meniwe? Ma, te ena gomunai ogwa elama, te Godigo eno dwai sęgę sela sąmainu ofa ebaso, te usu egowe? Menio! Eno homugo yali sę dabe sela sąwainogo eyu, eno te ena tigigo sali wai te ofa mawaibawe? Menio! 
Genuai Bidigo dabolo te wiegi yai kolesaga yabo po walio. Tama agai homugo dago te tiwai kolesaga naga emainu yai. Dago te doloba pai kolesaga wali pao, te gasa bidi dabe homu dene eyu, tau sao, te dena homu kolesaga digi tegaluama, te dena God dali deli haliga elama bidiyu, tama aga wali pabo usu dao. 
Te dago Genuai Bidiba wi homu ebo, te wiegi yai homu kolesaga dao. Genuai Bidigo te Jerusalemba i weyu, te tama po wai, “Dage te taunde bidibo we bidi dabe, dagego odiąo, te dage dene mabo bomo elalubo bidigo wabo po sao,” wai dao. 
“Te dwai sęgę sai bidigo bede te wiegi yai sawi yai nai hauwa elaluali, augwa te tibo sę ebo kolesagade augwaligo salio. Augwaligo maketde te nai dabe dolo si me dagalisąbaso, eno te dwai kolesaga hagela homu mu ebao,” wali. 
“Eno te tibo sę eyu, te skel dagalubo sę ebo bidi dabego dwai sęgę me sela sągobeo,” wali. 
“Te Jerusalemde bidibo mone hauwa elalubo bidi dabego te magi nai meni yai bidi dabego doado bage anoma elama, sali. Te dage tigidali te tibo po wabo bidi naga dao,” wali. 
“Tama tialima, megi da, eno dagego te dwai sę ebo sęgęde homu kone palama, tama eno dage dolobo sę gagalama yaibao,” po wai dao. 
“Te dage nai tuyu da yaibao, tiali goli, dage nai sili bidaibao, dagego tabi habuge yaibao. Tigidali nai dagego selama, te beba sisinani, te bugagia me munalugobeo. Te nai me deli bugagia elalubaso da, teda eno te boi bidi dabego hwįagasomainu elama, te augwali dolaibao. 
Tama tibaso, te gi sę dagego yaibao, tiali goli, tede nai dagego me sogobeo. Te oliv wel sabo sę dagego yaibao, tiali goli dagego tigide me piligobeo. Te wain dagego nigaibao, tiali goli te wain wę dagego me tugobeo. 
Dagego te king Omrigo dwai kolesaga wali pali, me aga ogwa king Ahapgo kolesaga me wali pai. Dagego augwali sigo polobadu te yali tobage kolesaga tiwai yali, tialima te eno dage dolaibao, te gasa bidi hani bagego dage tudiba muaibao. Te tigidali bulu pedaide bidibo hani bidigo te dageba gesabidi tuluga selama, tama dwai posobo po waibao,” wai dao. 
