﻿Habakuk.
3.
Profet Habakukgo Genuai Bidiba gedu haluasa po weyu, e tiwai wali. Te gedu haluasa po wali te bidi dabego te balia pode ma usųbo po wabo si, teda augwaligo te hobede ebo kolesagade wali pabo balia po wali pomainu yao. Tama te musik wabo tonalubo bidigo te gita elibo bidi dabeba po walama, te gita eliyu balia po omainogo yao. 
Genuai Bidio, te nago bomogo yali sęde po eno odolama, te ena noma siyu, nage dologode bidabo homu ebao. Te polobadu nago yali genuai genuai sę dabe, eno homugo nago te tiwai bomai sę dabe te nago da megi bidibo sogo ma emainu homu ebao, te megi e sogo bidibo bidi dabe augwaligo nago te tebo sę ebo kolesaga sulama konemainao. Mu tama, nago dade sębę ebo page elalubao, tiali goli, nago te hobede ebo God da, te eno nagebolo hanalubo, te nago da hobede elama, tama da tau sao. 
Godigo te tǫ Idom bulude bidali tagalama, te aga ma asalio. God te wiegi yai doloba pai kolesaga tigidali mu ebo God, aga te Paran tǫ pedai bulu dude bidali hogodama, asali. Agai bomo te be posali ula tiwai pedelama, tama te dagalu tigidali pedai badu mesega salio. Tebogo te tigidali tǫde we bidigo agai te genuai nogi ugaba sabo homu ebo sę ilalio. 
Te aga asidubadi, te agai nogode duala sali bomogo genuai ula te be sele tiwai eyu, tigidali habuba pelama, mu usu nanio. 
Agai te haniani gasi dabe te pabodu polasa tagala palali. Me agai te we bidi dabe ela mubo genuai gasi te aga wali nosali asalio. 
Te aga dolugulubo sogo da, tigidali tǫ midigi eyu, mumunu ebao. Agai te we bidi dabe augwali subo sogo da, augwali te ibaba kila sesa peyu, midigi sabo dao. Te genuai bomai bulu du dabe te alua pelama, tulaluaibao. Te polobadu aga bilali dwasianu bulu du dabe augwali te aiyaba kilasa dulubo dao. Genuai Bidigo ebo kolesaga dabe te sesemane sogo elalua paibao. 
Te tǫ kantri Kusan name ugwa be dabe eno suali, te mu dolai elaluali. Te Midian dabego ugwa be dabe te degasa pai elalua palio. 
Genuai Bidio, nago wali tagala palama, tama nago te ąį dabe me, tamu ąį dali, te bomo elama, pedalumainu yali. Te nago augwalide wado homu eyu, te tiwai yali da, agawe? Te nago naga we bidi dabe augwali tau siyu aselama, te boi bidi dabe aiyaba elaluali sogo, te pǫ de tulubo tulubage si te nago boi hwįbo nai, te kibu hos dabe me te karis dabe tiwai gilama yalio. 
Nago naga enesigi dodola munama, tama nago te po obaso, tama nago ene dabe te nago enabo dąį ilali bulu dolo palio. Te bulu du dabego nage subo sogo da, augwali midigi yai dao. Nago genuai ąį te tǫba tula palobo sogo, tama agai te genuai ąį gamia nigai dao. Te ąį genuai bomo elama asalio. Te tǫ dologo badu elalubo ąį dabego me kidagalo weyu, te ge bo dabo ugwanu holama, te dagaluba usu nai dao. 
Te nago ene dabe enama, augwali polo pabo side te gegemani eyu, ula mu ebo dao, tama giliga de polua si te dagalude bilisiąbadi, osogo olo dolaluali. 
Nago wado homu ebo genuai mu te tigidali tǫ kantri bulu we bidi dali elaluali, tama nage te tǫ daide ugwadu biliyu, tama tigidali bulu we bidi agawalio. 
Nago tama tiali, te naga we bidi dabe ma sainogo yali, te nago sa muani king dali sainogo yali. Nago te dwai sę ebo bidi dabego tobolu bidi bomonama elama, tama nago te agai bidi hani mu dolai dao. 
Te boi bidi dabe, augwali te genuai wali asobo tiwai yali, te da gasaba tedela palainogo tiali. Augwaligo da aiyaba elalualide wiegi yai homu pemene yali, te dwai sę ebo bidi dabe geme duala selama, te magi nai meni yai we bidi augwaliba dwai sę yainu tonalubo tiwai ebao. Tiali goli, nago te boi bidi dabego ami tobolu bidi kepten te aga ene dabego digi ma enanio. 
Nage te naga hos kibu dabe tudide dugulasali, tama augwali te tamu ąį daidu agaga palio. Tama tiali sęgo te tamu ąį dini genuai hogodomainu ilalio. 
Eno te sę yali po tigidali odama, te ena midigi salio. Ena wi elama, te eno pedauwali me didibili yali. Eno nogo sągą bomo kimi meniama isali, te ena bomo meni yanio. Eno koneani, te God aselama, te da dolobo bidi dabe te dwai dene ilaibao, tibaso ena dua digi bidiyu, tama te sogo pedalubo tonalubao. 
Te ni kaya fik dabego te du walisąbaso, me te ni wain dabego me te wain du walisąbaso, tama te ni oliv dabego me te du wai walisąma, tama te gide nai meni yai elalu, tama te kibu sipsip tigidali isibadi elama, tama te kibu bulmakau dabego be dabe me olo mu elaluyu da, 
teda te sęgę tigidali pedalali goli, te tagalao, te eno Genuai Bidide wiegi yai homu pemene elama, bugai haliga yaibao. Magi baso meni, Genuai Bidi aga te God da, tama aga da, te ena ma dobola sabo bidi dao. 
God eno Genuai Bidi da, agai enabolo bomo mobao. Agai eno sągą bomo ilali, te bulu du polo holobo uni hasa dia dabego sągą tiwai ilama, tama agai ena te bulu du dabe daide ugadu bugagia bilimainogo yai dao. 
