﻿Sefanaia.
3.
Jerusalem, hobede ya, nage dolaibao, nago kolesaga Genuai Bidigo gedude dwai damua pai mu yalio. Nagede bidibo we bidi dabe augwaligo agai po sela sąbo dao. Tama augwaligo augwa hasi deli hani dali dwai sę ebo dao. 
Augwaligo bidi dabego po odisąwai, awe, augwaligo Genuai Bidigo po me odai menio. Tama augwaligo Genuai Bidigo augwali dodolomainu homu ebo hagela yai dao. Tama augwaligo agaba homu dąų olama, tama augwaligo Genuai Bidigo augwali tau somainu me hanalu wai menio. 
Te Jerusalem genuai bidi dabe augwaligo te olo we bidi dali dwai kolesaga ebode augwali te bulu laion sibi nasi ebaso bomona dagą wabo tiwai ebo dao. Tama te po tų odobo bidi dabe, augwali te uni yowi nasi genuai ebo tiwai iyu ebo dao. Tama augwaligo te hasa tulama, silama, tama augwaligo do tuabo dili me mubeo. 
Te profet dabe augwaligo augwa sę subigila eyu, bugagia ebo meni, tama augwaligo te bidi dabe augwali dolomainu ili po naga ola mayu ebo dao. Tama te pris dabe augwaligo te Godigo tedali gasagi yai be habu dabede dwai sę eyu ebo dao. Tama augwaligo Godigo bomai po hasegelama tagalali, te augwa digi augwa ma tau somainu. 
Tiali goli, Genuai Bidi Jerusalemde me bididuali. Agai doloba pai kolesaga naga ebo dao. Te agai dolo isąwai kolesaga da agai me ebo menio. Mu menio. Te tigidali sogo bubugade agai te we bidi dabe dali doloba pai po tų naga ebo dao. Agai te sę tagalobo menio. Tiali goli, te taunde bidibo dwai bidi dabego te dolo meni yai kolesaga naga ebo dao. Tama augwali tede hale dwasianu me ebeo. Mu menio. 
Genuai Bidigo e tama po obao, “Eno meba kantri dabe mu silama, te Juda hani isąwai bage, tama augwaligo genuai taun dabe dolama tagalai dao. Tama te bomai obo dabe me, be dabe me, te boi bidi tonaluyu no munalubo te sigide elalubo be dabe dolama, tagalai elalubao. Tama te bidi dabe augwali te taun sunumidu tomodu bidi dabe me bilibeo. Magi baso meni. Bidi deli me bidisąma ebaso. 
Eno homugo te eno we bidi dabe augwaligo eno te kolesaga sulama, tama augwali ena dologode bidigowe homu yali, tama eno augwali dodolomainu sula tagalogowe homu yali. Tialima, augwaligo eno augwalibolo polobadu ola mani nai dabe bugagia koneyu da, teda eno augwali me dologobeo. Me eno augwaliba dwai dene magi menigi da. Tiali goli, augwaligo eno ola mani po odobeo. Menio. Deli sogo tama augwali hogodama, tama augwaligo bomonama, augwa polobadu yali dwai kolesaga edelama mu yalio,” te po obao. 
Tialima, Genuai Bidigo aga wali asobo we bidibolo e tama po walali, “Dage homu hauwa igimio. Dagego eno te tigidali kantri we bidi po tų ela mabo te sogo deli naga tonaluiagameo. Magi baso meni. Eno augwali dali sębę elama, tama eno augwali deliba sisinagasomai elama, homu polo dąų olama, tama eno augwali dene mawaibao. Tama eno sębę te isi bogoli tiwai elama, tama eno tigidali tǫ dabe mu dolaibao,” wali. 
“Tama te sogo eno tigidali kantride we bidigo homu kolesaga hasesegele paibao. Augwaligo homu kolesaga gesi ma elama, tama augwaligo ena deliba naga gedu haluasa po weyu yaibao. Tama augwali homu deli naga elama, tama augwaligo eno po wali asaibao. 
Tama eno we bidi dabe augwali eno te digibulu kantri Kusba sela sąwani we bidi dabe, me gasa meba kantriba tagala palali, te we bidi augwaligo ena ofa dabe yabo nai sesaibao. 
Eno ede bidibo we bidi, te mu tama dao, dagego eno po mu tama sela sąwai dao. Tiali goli, eno te sę dabe pedelemainu ebo sogo da, teda dagego duga yali kolesagade hale me egobeo dao. Magi baso meni. Eno dagego te bidi dabe augwali te hamaga elama, gagea peyu yali bidi dabe sela sąwaibao. Tama dage Jerusalemde eno bulu dude bidaibao. Tama dagego tede ena dali hamaga ma eyu egobeo. 
Tama te we bidi augwali eno Jerusalemde bidimainu sula tagalaibao. Augwaligo nai dabe hauwa meniama, tama augwaligo augwa aiyaba elaluama elaluaibao. Tama augwali enaba aselama, tama augwali tau somainu enabolo hanalu waibao. 
Te Israel hani dwasianu augwali me bidibao, augwaligo gasa bidi dabe dali dwai kolesaga me egobeo. Tama augwaligo ili po olama, tama augwa abagi dabe ili po wabo sę me egobeo. Te augwali wiegila bidibo sę naga elaluaibao. Tama augwali wi ilabo bidi meni yaibao,” Genuai Bidigo te po wai. 
Dage Israel dabe, dage i olama, homu pemene ebo balia po waiąo. Dage Saionde bidibo bage, dwagi yai homu eyu, tęąbi po waiąo. Dage Jerusalem dabe, dage wiegi yai homu elama, homu pemene geninama mu iyąo. 
Magi baso meni. Genuai Bidigo te po wai dao, agai dage dene mawaibao po wai dao, tiali goli megi da, dagego dene sabo usu eyu silama, agai te po tagalali dao. Agai dagego boi bidi dabe sese sela sąwani dao. Genuai Bidi da, aga Israel dabego king dao, tama aga dage dali bidibao. Tialima, dage nai me delide munu ma wi igimio. 
Nosali bubuga me deli pedelaibao, tama te bubugade augwaligo Jerusalem dabe te tama po waibao, “Dage Jerusalem we bidi dabe, magi naide wi me elamo dao, tama dage olo dali noma sigio. 
God, duga Genuai Bidi, aga dage dali bidibao. Agai bomogo dage tau selama, tama dagego te boide dagego tobolu ela holali dao. Genuai Bidi aga dagede wiegi yai homu pemene elama, tama balia po waibao, te we bidigo lotu wabo genuai sogo ebo tiwai yaibao. Agai dage godolo mu ebao, tama agai po deli me wagobeo,” augwaligo te tobage po waibao. 
Genuai Bidigo po genina ma weyu, e tama po wali, “Eno dage Jerusalem dabe dene mawai dao, tama dagego te nai da tuyu lotu wabo genuai sogo te kolesaga dabe wali me pabo usu me ebeo. Dagego enabolo te haniani moni da tubo dali lotu po wabo sogo ebo kolesaga ebo usu me ebeo. Tama te tialigo dage hale geninama mu emainu ilalio. Tiali goli megi da, dagego hale eno silaibao. 
Suao, te sogo bubugade eno dage dali dwai sę elama, dage aiyaba elaluali te boi bidi dabe dene mawaibao. Dage meba Israel dabe gasa kantri dabeba subigila pelama, tama gasa kantride bidibao, te sipsip kibu hani subigila pelama, augwaligo sągą dola tagalali bage tiwai yali gilama yali da. Tiali goli, eno augwali duga bulu tǫba mu ma odasa asaibao. Megi da, dage meba hanigo gedude te hale mu te ebao. Tiali goli, eno te hale silama, tama dagebolo genuai nogi mawaibao. Tama digibulu tǫ we bidigo dagego nogi ugwaba saibao. 
Te asobo bubugade, eno dage te tigidali pesagede bidalubo te pesagede ma oda saibao, tama eno dage duga bulu muba ma odasa asaibao. Tama me eno dage genuai nogi menama, tama tigidali tǫde we bidigo dagego nogi ugwaba saibao. Tama te sogo eno dagego sę wiegi yai pedelemainu ilama, tama dage wiegila bidibo elaluaibao. Dagego te sę pedelebo te duga gedugo mu sueibao. Ena Genuai Bidi, eno po polo walio,” tama wali. 
