﻿Sekaraia.
10.
Te gide nai dabe pedalubo sogo dagego te Genuai Bidiba hanaluyu, te agai tulubage tagala palomainu emainao. Genuai Bidigo te pǫ hauwa dabe tagala palama, te tulubage tulumainu ilibaso, tama te nai dabe pedelama holobo dao. 
Te bidi dabe augwaligo te augwa bede munalubo tibo god dabeba me, te mena sę page konea pabo bidi dabeba me hanalu te nosali mena sę dabe pedelabo po omainu ebo dao. Tiali goli, augwaligo tibo po wei ponoyu, te dwai po augwaliba wabo dao. Bidi mebago te na yali po page pusali, te augwaligo me dage tibo po ola mobao. Augwaligo te tama po weyu, te dage nagame yai homu saibao po wabo, tiali goli te menio. Te haliga sęgę me elaludalio. Tama tialima, te we bidi dabe tedela palama, te hagawai sipsip kibu wai tiwai yali. Augwa polalubo tuni bidi meni baso, tama augwali sęgę elaluai dao. 
Genuai Bidigo te po wali, “Te gasa tǫ pedai kantri bidi dabego eno we bidi dabe augwali tonalubo te eno hagela eyu haliga sębę ebao. Te eno augwaliba dwai dene mabo sę yaibao. Te Juda we bidi dabe augwali te eno we bidi dabe dao. Te ena Tigidali Bomo Elalubo Genuai Bidi, ena digi te eno augwali bugagia tonalueibao, te bidi mego aga kibu sipsip hani tonalubo tiwai gilama yaibao. Te Juda dabe da, te hwįbo bomai hos kibu tiwai pedelaibao. 
Tama te Juda hani augwaligo digi te tuni bidi king dabe me polalubo bidi dabe pedalu, te ami polalubo kepten bidi dabe me pedalu yaibao. 
Tama tibaso, te Juda dabego te boi bidi dabe aiyaba elalubo sę eyu, te ami bidi dabego te taun sunumi dabede te tǫ pude te boi bidi aiyaba agabo tiwai yaibao. Te Genuai Bidi augwali dali bidibaso, te augwaligo hwįbo bomo eyu, te hos kibude dugayali boi bidi dabe me augwali aiyaba elaluboba usu naibao,” wali 
“Te eno Juda we bidi augwali te bomai we bidi pedalumainu ilama, tama eno te Israel we bidi dabe ma dobola somainu yaibao. Eno augwali hobede mu ebaso, tama eno te tigidali we bidi ma selama, te augwa page buluba ma odasa asaibao. Te eno augwali sela sąsiąwai we bidi bidibo tiwai elama, te augwali bugagia bidalueibao. Magi baso meni, ena God te augwaligo Genuai Bidi dao. Tama tiyu, eno augwaligo gedu haluasa po wabo odaibao. 
Te Israel we bidi dabe augwali te bomai ami bidi dabe tiwai pedalubaso, te augwali te wain ąį tubo bidi dabego homu pemene ebo tiwai yaibao. Te augwaligo nosali ame nabo wai dabego te wiegi yai sę Genuai Bidigo augwa bulai wąį dabede yali sę homu kone ma palama, te wiegi yai homu pemene mu yaibao,” wali. 
“Te eno ena we bidi dabe augwali tigidali i ola bilama, te augwali sisinaibao. Te eno augwali ma dobola selama, te augwali polobadu bidali tiwai gilama hauwa mu pedelaibao. 
Mu tamao, eno augwali gasa tǫ kantriba gugula palama, teba bidigi pomainu ilali. Augwali te digibulude bidaluali, tiali goli augwaligo ena homu kone palobo sę me gegeda palogobeo. Te hani dabe augwa wai puluba dabe dali te augwali bugagia mu bidama, te tigidali deliba sisinama, te augwa page buluba ma asaibao. 
Te Isip tǫde me Asiria bulu tǫde bidali we bidi augwali, te eno augwali ma odasa aselama, te augwa bulu tǫba ma bidagasaibao. Eno te tǫ dąį kidilama, tama augwaligo te Gileat tǫ pedai me te Lebanongo tǫ pedai me sigi pomainogo yaibao. Tama te we bidi dabe hauwa mu te tǫde pągąnalueibao. 
Te eno augwali augwa page bulu muba ma odasa asaibao. Te Isip dabe me Asiria dabego te augwali asabo sunumi te moni ąį biksigo panibo tiwai ebaso da, teda eno augwali hani si aiyaba elalueibao. Te Isip dabego bomo menia selama, tama genuai pabo ąį Nail sula sabo tiwai yaibao. Tama eno te Asiria dabego genuai bomo aiyaba elalueibao. 
Te eno we bidi dabe augwali te bomai we bidi dabe pedalumainu ilaibao. Tama augwali ena dologode bidiyu, te eno po wali peyu bilibo sę yaibao. Ena Genuai Bidigo eno te po wai dao,” wali. 
