﻿Matyu.
3.
Te nosali augwali te Nasaret hanude bididubadi te Jon, te baptais mabo bidi aga pedelai. Aga te Judia tǫ tomode te bidi meni yai bulude bidali, tama agai te po augwalibolo pusali, 
“Dage dwai kolesaga yalide ge neyu, homu geasa peyu bidiąo. Magi baso meni. Te dagalude bidibo bidi God agai we bidi tonalubo sę yabo bomo te pąba asai dao, dage te bomo dologoba asiąo,” te po wali. 
Jon da, te agade Godigo te aga po pusali bidi Aisaia te profetgo pedauwalide wali po usu nani bidi dao. Aisaiago polobadu e po weyu asęani, “Te bidi meni yai bulude bidi me deligo i weyu, bomonama te po obao, ‘Genuai Bidigo asabo tų sisi ilao. Aga tų dabe dodolao,’” te po asęani. 
Jongo te moni kibu kamel nisigo te augwaligo nigai bobage ugwa munama, tama agai tigide te kugulu gudai. Tama agai te mano tiwai nai me te mege ąį te nai si tuyu bidai. 
Tama te sogo te Jerusalem moni hanude bidai we bidi dabe me, te Judia genuai tǫ we bidi me, te Jordan pabo ąį pąde bidali we bidi me, te augwali tigidali Jon bidibo digi asai. 
Tama augwaligo augwa yali sęgę dabe pusuyu, tama Jongo augwali te Jordan ąįde baptais mani. 
Tiali goli Jongo suali, te lotu po wabo bidi hani si te Farisi bage me te Sadyusi bage me te augwali me baptais somainogo asali, tama agai augwalibolo te sesanobo po weyu te po wali, “Dage te dwai hasamani dabego wai dabe, te Godigo te dwai sę yali we bidibolo dene ilabo sogo mu asaibao. Tama tialima mena bidigo dage dali po obaso, tama megi dage wi painogo ebawe? 
Tama dagego homu kolesaga begelebaso da, teda dagego dwagi yai kolesaga naga yao. Tama tiyu da, dagego duga homu kolesaga mu begelali te dago hania koneaibao. 
Dagego eno pode geda siyu, dagego homude te homu me egimio: ‘Te Abraham da, te dago aya da, tama tibaso da bugagia bidibao, te dago dena homu magi baso begelaibawe,’ te wagio. Eno dagebolo te po obao, God agai da e masigi dabego te Abrahamgo wai pedala wali da te pedalobo usu yaibao. 
Tama megi te sigi hwą ni pagede muai elalubao, te ni gelemainogo. Tama te nigo wiegi yai nai du walisiąbaso da, te tobage ni tigidali augwaligo gelama siaba sąwaibao.” 
“Te eno dage olo ąįgo baptais mabo te dage homu begelai elalubo te dąį tiwai dao. Tiali goli ena tudi badu nosali asobo bidi, te agai bomogo eno bomo aiyaba elaluaibao. Ena da, te wiegi yai bidi meni, tama tiyu eno agai sągą nadoba tolabo te usu egobeo. Agai dage te Godigo Tedali Mobo Bidi me te sia dali si dagebolo mawaibao, te baptais mabo sę tiwai. 
Te nai dagalobo bidi tiwai agai aga savol te aga nogode tolalubao, tama agai te tubo nai wit ge dagalobo sę emainogo ebao. Tama agai te wit hogomu te tigidali sela sąwaibao. Tama agai te wiegi yai wit ge naga aga wit ge muabo beba sisinaibao. Tiali goli agai te dwai wit hogomu te isisąbo siaba ulaibao,” Jongo te po wai. 
Te Jon agai te we bidi baptais mabo sogo Jisas aga te Galili genuai tǫ tagalama te Jordan węba pai. Aga Jonba pali, tama aga te Jon nogode baptais sainogo tiwai. 
Tiali goli Jongo aga te paliainogo yali, tama te po wali, “Te ena nago baptais mabo te usu egi dao. Tiali goli nage enaba asalio,” te po wai. 
Tiali goli Jisasgo agabolo po wei ponoyu te po wali, “Woo, te nago eno wabo po wali peyu, te sę yao. Tama tiyu, te dago doloba pai kolesaga naga usu nama inao,” te po wai. Tama tialima Jongo agai po wali pai. 
Tama Jisas baptais selama, tama polo aga te wę tagalama te wę sesegeba holai. Tama dagalu tomode buga palima, te Godigo Mobo Bidi te aiyaba dulubo te agai suali, te ba hi tiwai tama aselama, te Jisasgo tigiba bidagasali. 
Tama pedauwali me delide te dagaludu i weyu, te tiwai po wai, “Te aga eno Ogwa dao. Eno aga godolo mu ebao. Tama eno homu agade te pemene wiegi yai ebo dao,” te po wai. 
