﻿Matyu.
4.
Te sogo Jisas baptais selama, tama Godigo Mobo Bidigo Jisas te bidi meni yai buluba odasa pali, te Satango aga dwai sę yanama sinawainogo yai. 
Tama Jisas nai tusiąbadi aga te bidi sese si siade me hulide me bidai. Tama nosali aga nasi yai. 
Tama te usu sabo bidi agaba pedelama, tama aga dwai sę tomoba kegainu agai te po wali, “Nage te Godigo Ogwa da wida, teda nago po obadi e elalubo masigi dabego te begelama, te tubo nai bret pedalomainao, nago tumainogo yao,” te po wai. 
Tiali goli Jisasgo e tiwai wali, “Godigo po bukude te po asęani, ‘Te tubo nai bretgo naga te bidi bidabo ula magobeo. Te bidigo bidibo ula te Godigo pedauwalide pedalobo tigidali pode sabo dao.’” 
Agai te po obaso, tama Satango aga selasa te moni wiegi yai tedali hanuba pali, tama aga te Moni Lotu Be tempel pedu te ugwaba mu dodolali. 
Tama agai agabolo po weyu te po wali, “Nage Godigo Ogwa da wida, teda nage te Moni Lotu Be pedu tedu aiyaba a tǫba samonao. Godigo po bukude te po wai, ‘Agai aga ensel mobo bidi dabebolo nagede po olama, tama nage augwaligo nogo daide ugwaba saibao. Tiyu te nago sągą te masigigo me selidali weyu tama tiaibao,’ te po asęani,” Satango te po wai. 
Jisasgo agabolo te po wali, “Tiali goli te bukude te po ma wai, ‘Nago Genuai Bidi God olo subigila usu sigio, sinagio. Aga te nago God dao.’ Te po elalubao,” wali. 
Te Satango Jisas ma selama, tama te bulu du me ugwanu yai me deli teba sela holai. Tama Satango agabolo te tǫde genuai ula yai bomo me, te tǫde tigidali elalubo wiegi yai nai dabe dali tigidali agabolo ola mani. 
Tama agai Jisasbolo te po wali, “Tama nago kidu sugunama tama basi gulama, ena dologoba peyu enabolo lotu po obaso da, teda eno te tigidali nai nagebolo mawaibao,” wali. 
Tama Jisasgo aga dali te po wali, “Satan, nage gedao. Godigo po bukude te po wai, ‘Nago naga Genuai Bidi God dali naga lotu po weyu, aga dologode bidao. Tama nago agai sę deli naga dąų olama yao.’ Te po elalubao,” Jisasgo te po wali. 
Tama te Satango Jisas aga taga pali. Tama ensel mobo bidi dabe meba aselama Jisas tau sai. 
Te Jisasgo te po odali, augwaligo Jon te we bidi baptais mani bidi kalabuside muani po wali, tialima aga Galili moni tǫ teba pai. 
Tama aga te Nasaret hanude osogo bidama, tama tedu pelama, te Kaperneam buluba pelama bidigi pai. Te Kaperneam hanu te sigi wę sesegede elaluali, te Sebulun bidi hanigo tǫ me te Naptali bidi hanigo tǫ me te tǫ si te badu elalubo dao. 
Tama tiyu, te po me deli te Godigo po polobadu pusali profet bidi Aisaiago pedauwalide wali po usu nani, tama Aisaiago te po wali, 
“Tama te Sebulun hanigo moni tǫ badu, me te Naptali hanigo moni tǫ te badu me, te sigi węba pabo tų badu, te Jordan pabo ąį badu, te Juda hani isiąwai bidi dabe hauwa bidibo tǫ nogi Galili, 
te tǫ tigidalide bidibo we bidi augwali hulide bidaluali, tama augwaligo te genuai ula nanobo suai dao. Te we bidi augwali te isabo be hulia sai digi bidaluali tama te wiegi yai ula augwaliba pedelai dao.” 
Tama te sogo Jisasgo agai po pusubo sę ebo gagalai. Agai te po oduali, “Dage dwai kolesaga yalide ge neyu, homu geasa piąo. Te Godigo te we bidi tonalubo sę yabo sogo pąde dao.” 
Te me sogo Jisas te Galili sigi wę sesegedu pobadi, tama agai te augwali ama name si suali, te bidi me nogi Pita, me aga ama, Andru, augwali sigo te sųgų sabo wa te sigi węba sąbo sę yai. Te augwali sigo te sųgų selama mone sabo bisnis sę yai dao. 
Jisas agai augwali sibolo te po wai, “Dage si ena wali asao, tama eno dage si te bidi sabo sę ola mawaibao.” 
Tama polo augwali sigo te sųgų sabo wa tagalama, tama Jisas aga wali pai. 
Tama Jisas aga ma pobadi, tama agai gasa ama name si me suali, te Jems, te Sebedigo ogwa, te aga ama Jon dali. Te augwali si augwa si aya Sebedi dali te moni gebade bidibadi, tama augwa te sųgų sabo wa dodolobo sę iduai. Tama agai augwali si i wai. 
Tialima tama polo augwali sigo te augwa si aya me te geba me tagalama, tama Jisas wali pai. 
Te Jisas aga te moni tǫ Galili te tigidali sesege badu aga biligi pai. Agai aga ola mabo po te Juda dabego bomo yai po ola mabo be tomode te we bidibolo ola mawai. Tama ola mayu, agai augwalibolo te Godigo we bidi tonalubo sęde te gesi dwagi yai po pusali, tama te tigidali haniani gasi dabe me te tigidali dwai naigo te tigi dolai we bidi augwali tigi usu ma ilai dao. 
Tama augwaligo agai te sę yali po tigidali te Siria genuai tǫde bidibo we bidibolo me te po pusai. Tama te po augwaligo odama, tama augwaligo te tigidali dwai gasi haniani eyu, te dwai dene sali bidi dabe me selasa asali, tama te dwai noma bidi elalubo bidi me, te esela pabo bidi dabe me, tama te sągą dili bomo isai bidi dabe me, te sela asai. Tama agai augwali wiegi yai ma ilai dao. 
Tama te genuai we bidi hani hauwa, te genuai tǫ Galilide bidibo we bidigo me, te Dekapolis tǫde bidibo we bidigo me, te moni hanu Jerusalem we bidigo me, te Judia genuai tǫde bidibo we bidigo me, te Jordan pabo ąį te tǫ u badu bidibo we bidigo me, te tǫ tigidalide bidibo we bidi mebago naga te aga wali pai. 
