﻿Matyu.
12.
Te po olama nosali me sogo Sabatde Jisas te tubo nai wit gi tomodu pai. Tama aga wali pabo bidi dabe augwali nasi ebaso, tama augwaligo te wit ge selama, tama augwaligo tuai. 
Tama te Farisi bage augwaligo te kolesaga ebo sulama, tama augwaligo agabolo te po wai, “Suao, te kolesaga nage wali pabo bidi dabe augwaligo ebo, te Sabat sogode habu selai dao,’ wali.’ 
Tama Jisasgo augwalibolo te po wai, “Te dagego te dena nǫų bidi nogi Devitgo yali sę po dagego nedebewe? Me sogo aga me, aga dali bidali bidi dabe me, augwali nai sili bidibadi tama moni nasi ebaso, tama Devitgo Godigo lotu be tomoba pelama, te Godigo gesabide muani bret selama tuali. Aga hani dabego me tuali. Tiali goli, te bret te habu selai elaluai, tama te pris dabego naga tubo usu yaibao, te bomo yai pode te po wai. Tiali goli te bret augwaligo me tuali digi Godigo gedude dwai sę ebeo. Dagego te asęani po nedebewe? 
Ma dagego te bomai po asęani bukude elalubo po me deli nedebewe? Te po e dao, te pris bidi dabe, augwaligo te Moni Lotu Be tempel tomode te Sabat sogo tigidali me augwa sę ebo dao. Tama tiyu, augwaligo te Sabat sogo sę egio wabo bomo yai po augwaligo bolobo dao. Tiali goli Godigo augwalibolo sęgę magobeo. Dagego te po nedebewe? 
Eno megi te Moni Lotu Be tempelde po wali. Tialima eno dagebolo obao, te ede megi elalubo nai, agai te Moni Lotu Be tempel te aiyaba elalubo dao. 
Tama bukude Godigo wali po me deli augwaligo asęani, ‘Eno te dagego enabolo olo mabo nai ofa te godolo ebo menio. Dagego gasa we bidi dali homu dene eyu tau sabo kolesaga ebo, te eno godolo ebo dao.’ Tama dagego te po page bugagia konegi sogo da, teda dagego te dwai sę meni yai bidi dabebolo sęgę magi menigi dao. 
Magi baso meni. Ena da, te Godigo Bidi Mu da. Ena da te Sabat sogode te genuai bidi dao. Tama tibaso, bidigo Sabatde mena sę yagameo wabo po te eno digi waibao,” Jisasgo te po wai. 
Te Jisas aga te badu bidali tagalama, tama augwaligo Juda dabego bomo yai po ola mabo be tomoba pai. 
Tama bidi me deli tede bididuai, te bidi aga nogo dili bomo isai elaluai. Tama bidi meba augwaligo Jisas po tų ilainogo homu elama, tama augwaligo aga hanalu wai, “Ma, dago te Sabat sogode te gasi yai bidi usu ilibaso, te bomo yai po bolaibawe ma meniwe?” te po wai. 
Tama Jisasgo augwalibolo te po wai, “Te dage tomode bidi me deli agai kibu sipsip me deli elaluyu, tama te sipsip te dedageba Sabat sogode tulaluai yaibaso da, te bidigo te sipsip ugaba ma kegelama ma saibawe, ma meniwe? Ao, te Sabat sogo digi te ma saibao. 
Tama te bidi da, bidigo da te sipsip aiyaba mu elalubo dao. Tama tialigo da, dago te Sabat sogode we bidi tau sabo dwagi yai sę eyu da, teda tama tiyu dago te bomo yai po bologobeo, te usu dao.” wali. 
Tama te po olama agai te nogo dwai bidibolo te po wai, “Nago nogo dodolao.” Tialima agai nogo dodolali, tama nogo wiegi yai ma pedelai, te gasa me nogo tiwai yai. 
Tiali goli te Farisi dabe augwali te be tagalama, tama augwali deliba sisinama po miyu, tama Jisas elabo po miai dao. 
Tiali goli Jisasgo augwaligo te po wabo koneama, tama agai te bulu tagalama gasaba pai. Tama te we bidi hauwa aga wali pai, tama agai augwali tomode tigidali gasi we bidi usu ma ilai dao. 
Tama augwali usu ma ilama, tama agai augwalibolo agai nogi me agai ebo bomai sę po te gasa we bidibolo pusidali weyu habu selai dao. 
Tama tebogo te po me deli te Godigo te agai po pusali profet bidi nogi Aisaiago pedauwalide wali po usu nanio. 
Te po e dao, “E bidi da, te eno sę ebo bidi dao, eno aga sa muai dao. Eno aga godolo mu elama, tama eno homu aga dali wiegi yai ebao. Te eno Mobo Bidi te agaba mubaso, tama agai te doloba pai kolesaga ebo te po te gasa Israel hani isąwai bidi dabe augwalibolo te po pusaibao. 
Tiali goli agai te konila ebo po me te genuai po dagą me wagobeo. Te augwaligo agai pedauwalidu genuai dagą olama i wabo te genuai tųde me odogobeo. 
Te awi dili me deli dwasianu togwa painogo yali, te tigidali me agai togwa pogobeo. Tama te lamde mubo hobi dwasianu bogoli idubo, te me agai tigidali te isiligobeo. Menio. Agai te tobage bomo kimi meni yai we bidi tau sabo sę iduaibao, tama bomonama elama, te doloba pai sęgo te dwai sę aiyaba elaluaibao. 
Tama te gasa hani dabe, te Israel hani isąwai we bidi dabe augwaligo konealubo po agade dąų olama tonalueibao,” te bidi Aisaiago te po polobadu asęnama, tama Jisasgo te po usu nanio. 
Tama te sogo augwaligo bidi me deli agaba sela asali, tama te bidide dwai haubo mobo bidi bidai. Aga gedu dali pedauwali dali te si pania sai. Tama Jisasgo aga usu ma ilali, tama te pedauwali pania sali bidi po ma weyu gedu ma pedeyu yai dao. 
Tama tigidali genuai we bidi hani augwali noma mu sai, tama augwaligo te po wai, “E bidi da aga te Devitgo Ogwa yaliwe, ma meniwe?” 
Tiali goli te Farisi dabe augwaligo te po odolama, tama augwaligo te po wai, “Woo, te dwai haubo mobo bidi te Belsebulgo bomode naga te bidigo te dwai haubo sela sąbo dao. Te Belsebul aga te dwai haubo mobo bidi dabego tobolu bidi dao,” te Farisi bagego te po wai. 
Tama agai augwaligo homude ebo kolesaga koneama, tama agai augwalibolo te po wai, “Te tuni bidigo bomo tomode bidali bidi dabe augwali hani si te bugulama, tama augwa hasi wąbi hwįyu da, teda te hani si dolaibao. Tama te hanu me delide bidali bidi dabe, ma te deli bede bidali hani, te augwali te si bugulama, tama augwa hasi wąbi hwįani da, te hanu ma te be me elalugobeo, te tulolueibao. 
Tama tibaso, Satango te Satan aga ma sela sąyu da, teda aga hani te buga sai elaluai dao. Tama agai tonalubo hani augwali bomo me elalusiąbaso, te dolaibao, te tulolueibao. 
Te mu tama te Belsebulgo ena tau sobaso tama eno te dwai haubo mobo bidi augwali sela sągi sogo da, teda dego te dage wali pabo bidi dabe augwali tau selama, tama augwaligo te dwai haubo mobo bidi augwali sela sągowe? Tama tiyu da te duga digi duga hanigo po tų ilibo dao, te dage geda muani po hania ola mawaibao. 
Tiali goli, Godigo Mobo Bidigo ena te dwai haubo mobo bidi sela sąyabo bomo mabo dao. Tama tibaso dagego koneiąo, te Godigo we bidi tonalubo kolesaga te dageba asai dao. 
Tama te sę e tiwai dao. Te bidi me deli aga te bomai bidigo be tomoba pelama, tama agai bede elalubo doado bage sai hagede, agai te bomai bidi aiyaba elaluama, tama te dila pai bonogo te bidi kęyu bolo yao. Agai tama tilama, tama agai te bidigo bede munalubo nai dabe saibao,” wali. 
“Bidigo ena dali abagi me wasiąbo, te bidi aga eno boi bidi dao. Bidigo nai ena dali sisinisąbo bidi, te bidi agai te nai subigila sąsą bilibo dao. 
Tama tibaso, eno dagebolo obao, te Godigo te we bidi augwaligo dwai sęgę ebo te tigidali me te posobo po me, te sela sąbo usu yaibao. Tiali goli bidigo te Godigo Mobo Bidibolo posobo po obaso, te bidigo sęgę te Godigo me sela sągobeo. 
Tama bidi mego dwai po me deli te Godigo Bidi Mu dali obaso da, teda Godigo te bidi agai sęgę te sela sąbo usu yaibao. Tiali goli bidigo dwai po te Godigo Mobo Bidi dali weyu da, te bidi agai sęgę te megi e tǫde bidibo sogo me te nosali me munu me te sęgę me sela sągobeo. Te sęgę me elalua peyu, bidada paibao,” Jisasgo te po wai. 
“Te wiegi yai nigo da, te nai me wiegi yai walaibao. Ma, te dwai nigo da, teda te nai me dwai walobo dao. Tama te bidi dabe augwaligo te nai bolo sulama, tama augwaligo koneaibao, te ni wiegi yai yaliwe ma dwai yaliwe naga osola subo dao. 
Dage te dwai bidi dabe, dage te dwai hasamani dabe tiwai dao. Tama tialigo da, magi ilama dagego wiegi yai po waibawe? Tama bidigo pedauwalidu te tiwai po aga homude elalubo po pusubo dao. 
Wiegi yai bidigo homude te wiegi yai po hauwa elalubo dao. Tama agai kolesaga wiegi yai pedalobo dao. Bidi dwaigo agai homude dwai homu kolesaga hauwa elalubo dao. Tama tiyu, agai dwai kolesaga pedalobo dao,’ wali.’ 
“Eno dagebolo obao, te genuai po tų pedalobo sogo te Godigo te we bidi dabe augwaligo tigidali subigila wali dwagi yai sę isiąbo po te po tų ebode dagalaibao, tama te pode sęgę mawaibao. 
Tama naga pode digi te Godigo nage doloba pai bidi nogi poaibao, te nago yali kolesagade te sęgę sisąwai bidi dao. Tama naga pode naga digi te agai nage dwai bidi nogi poaibao, tama nage sęgę mawaibao,” Jisasgo te po wai. 
Tama agai te po obaso, te Juda dabego bomo yai po page ola mabo bidi meba me, te Farisi dabe meba dali augwaligo te po agabolo wai, “Po ola mabo bidi, dago homugo nago bomai sę me deli ebode, tama dago sumainogo nago te sę yao,” te po wai. 
Tiali goli agai po wei augwalibolo ponoyu bomonama te po wai, “Te God tagalama tama dwai sę ela bilibo megi bidibo we bidi hani dabe, augwaligo te bomai sę ebo suainogo i wabo dao. Tiali goli, eno dagebolo te bomai sę me deli eno ola magobeo. Te polobadu Godigo po pusali bidi profet Jona agade pedelali bomai sę tiwai naga pedelama, tama dagego te sueibao. 
Tama polobadu te tiwai yai te bidi Jona sela sogo giligade me sela sogo hulide te genuai sųgų haliga tomode bidai, tama te tiwai yali gilama naga te Godigo Bidi Mu aga me te sela sogo giligade me sela sogo hulide e tǫ tomode bidaibao, te isai we bidi bidibo madide. 
Tama Godigo we bidi augwali dagalobo sogode te Ninive hanu we bidi dabe augwali te po tųde dolaluyu, tama dage megi bidibo we bidibolo te augwaligo dwai kolesaga yali po pusaibao. Magi baso meni. Polobadu mu Godigo po pusa mani bidi nogi Jona agai te Ninive we bidibolo Godigo po pusa mobadi yaide, augwaligo odama, dwai dwai sę yalide ge neyu, tama tagalama homu begelai dao. Tiali goli Jona aiyaba elalubo bidi me deli pedelama, tama megi dage tomode bidibao. 
Tama polobadu bidali te genuai bidi nogi Solomongo wabo wiegi yai kolesaga ebo po odai hagede, digibulu bulude bidiyu genuai bulu tonalubo we asai dao. Tiali goli Solomon aiyaba elalubo bidi me deli pedelama, tama megi dage tomode bidibao. Tama dagego agai po odisąbaso, te Godigo te we bidi po tų ebo sogo te digibulu bulude asali genuai wego ‘Dagego te dwai sę yai dao’ po waibao,” Jisasgo te po wai. 
Jisasgo te po ma gagaliyu, te po wali, “Te dwai noma haubogo bidi me tagalama, te dwai tulubage meni yai buluba toma nabo pesage gegegi pabo dao. 
Tiwai pesage me susiąbaso da, aga homugo tama tebao, ‘Ena taga soali beba ma geasa paibao’ homu yaibao. Tama aga pelama, te be sugi pali, augwaligo bugagia dodolama, pobele bage meni yai au ma ilai beba ma pabo ąǫ te bidi pageba, dwai noma ma peyu tebo dao. 
Tama aga pelama, gasa dwai noma te a naga olama me si sigi pali. Tama te gasa dwai noma haubo dabego te dwai dwai sę ebo kolesaga tebogo te hasia dwai mobo haubogo ebo dwai kolesaga aiyaba elalubo dao. Tama augwali aga dali aselama, tama augwali tomoba pelama, tama augwali te bede bidibo dao. Polobadu te bidi dwai bidai, tiali goli megi me te aga dwai mu bidibao. Te tiwai naga megi e sogo dwai sę eyu bidibo we bidi augwalibolo me te tiwai sę pedelaibao,” Jisasgo te po wai. 
Jisasgo po te we bidi augwalibolo madubadi, tama aga ida ama dede dali augwali aselama, bulu badu dolaluagasai. Augwaligo aga dali po miainogo asai. 
Tama bidi me deligo agabolo te po wai, “Odao, naga ida me naga ama dede augwali bulu badu aselama dolalubao, tama augwaligo nage dali po miai hagede ebao.” wali. 
Tiali goli Jisasgo po wei te bidibolo ponoyu te po wai, “De aga eno ida dawe? De eno ama dawe?” Jisasgo te po wai. 
Tama agai aga wali pabo bidi dabe nogo du eyu, te po wali, “Suao, eno ida me eno ama dede dali, te e dao. 
Eno Aya dagalude bidibo bidi agai homu wali pabo we bidi da, te eno ama dabe me, abe dabe me ida dabe dao,” Jisasgo te po wai. 
