﻿Matyu.
20.
“Magi baso menio. Te Godigo we bidi tonalubo kolesaga te bidi me deligo tǫ hauwa elalubo bidigo yali kolesaga tiwai dao. Te kigamu digi mu te bidigo aga du walobo bono gide sę yabo bidi sesa biligi pai. 
Te augwaligo te mone ge nogo si sabo usu da olama, te mone ge nogo si te sogode saiba po usu da obaso, tama agai wain bono du giba sę egi pomainogo augwali tagala palai. 
Tama te giliga nanobode aga asiyu suali, te bidi meba olo te bidi sisinama bidibo digi dodolalubo suai. 
Agai augwalibolo te po wai, ‘Dage me pelama, te wain giba sę egi piąo, tama te sę ebogo sabo mone tiwai usu nama, te eno dagebolo mawaibao,’ wali. 
Tama po obaso, augwali pai. Tama te giliga tomode me te be pio ebode me aga ma peyu, tama naga tiwai. 
Tama be pio giliga dega sabode aga ma pelama suali, te bidi dabe meba olo dodolalubo suai. Tama agai augwalibolo te po wai, ‘Magi baso dage moni e giligade olo mu dolaludubadi geaniwe?’ te po wai. 
Tama augwaligo po wei ponoyu, te po wai, ‘Te dabolo sę maiabo bidi me menio.’ Tama agai augwalibolo te po wai, ‘Dage me te wain giba pelama, sę egi piąo.’ 
Tama te be pio yai digi, tama te wain bono du gi page bidigo te aga sę ebo bidi dabe tonalubo bidibolo te tiwai po wai, ‘Nago te sę egi pali bidi dabe augwali i olama, mone mao. Nago te nosali badu mu sę yagasali bidi dabe gagalasa, tama nago augwali mone mena mena pelama usu nigibu, tama te polasa kigamu sę egi pali bidi dabe mone simaniyu augwali mone nosali mao,’ te po wai. 
Tama i olama, tama te giliga dega sigi pabode sę gagalama yali bidi dabe, augwali pedalama, tama augwali deli deligo te mone ge nogo si, nogo si mone ge sai. 
Tama te sę kigamu digi polasa pelama sę gagaligi pali bidi dabe, te augwali aselama, te augwaligo homugo te augwali mone hauwa saibao homu yai. Tiali goli menio. Augwaligo me te mone ge nogo si, nogo si, mone ge naga sesa palio. 
Augwaligo te mone selama, tama augwaligo te gi page bidi dali dwai homu eyu, po wabo gagalali. 
Augwaligo dwai homu eyu, te po wai, ‘Te nosali mu aselama sę yagasali bidi dabe, augwaligo sę te hauwa sogo ebeo. Tiali goli dago kigamu mu sę egi pali te megi e sogoba usu nagasobao, tama giligago da tigide ulali dene yalio. Tama tiali digi nago augwalibolo mani mone te dabolo megi e mani mone tiwai si manio,’ wali. 
Te gi page bidigo augwali tomode bidi me delibolo po wei ponai. Agai te po wai, ‘Abagio, eno nage dali dwai sę ilibeo. Te dadi sigo te mone ge nogo si sabo po dodolama, usu da po wai meniwe? 
Nago naga mone selama, tama nage pao. Eno homugo te eno nagebolo mani mone, tiwai naga eno te nosali sę yagasali bidi agabolo mawainogo ebao. 
Te mone te eno sę ebo nai dao. Ma, eno te ena monede digi te tiwai homu egobewe? Eno wiegi yai kolesaga aga dali ebaso, nago homu dwai ebawe?’ gi page bidigo te po wali,” Jisasgo te po wai. 
Te Jisasgo te po silagasu wabo po weyu, te po wai, “Awe, tama tiwai te nosali mu yali bidi dabe augwali te pologi soaibao. Tama te polali bidi dabe augwali nosali badu ilaibao,” te po wai. 
Te Jisas te moni hanu Jerusalemba pobadi, te aga wali pabo bidi dabe nogo si olama sągągo si bidi dabe augwali naga agai selama, tama olo we bidi tagalama tedali pai. Te tųdu pelayu, Jisasgo augwali dali po weyu, te po wai, 
“Odiąo, te megi da te moni hanu Jerusalemba holobao. Tama tede augwaligo te Godigo Bidi Mu te pris tobolu bidi dabebolo badi, te bomo yai po page koneai bidi dabe dali, augwaligo bomoba aga mawaibao. Tama augwaligo aga po tų ilama, tama aga ela muabo po mia saibao. 
Tama augwaligo aga te Juda hani isąwai bidi dabe augwaliba mawaibao, te bagego agabolo te dwai usubo sę eyu, te posobo po weyu, tama aga bigo eliyu elama, tama aga ni pedaiba daganama, te neligo enama isaibao. Tama bidama, te sela wali sogode te aga ma hodaluaibao.” Jisasgo te po agade tiaibao olama te po wai. 
Tama te sogo te bidi Sebedi aga ogwa sigo ida, te we aga ogwa si dali te Jisas pageba asai. Tama te we aga te tǫba kidu sugunama, tama agabolo te nai me deli sainu te po agabolo te po hanalu wagasai. 
Tama Jisasgo agabolo te po wai, “Nago magi nai godolo ebowe?” wali. Tama agai Jisasbolo te po wai, “Nago po obaso da, teda eno e ogwa si te nago we bidi tonalubo madigi nage pąde dulalumainogo, te me nago dolo nogo badu bidiyu, te me nago pobase nogo badu bidiyu emainao.” Te bidi sigo idago te po wai. 
Agai te tiwai po obaso, tama Jisasgo te po wei ponoyu, te po wai, “Dage sigo te nai po page bugagia konesiąma dagego te hanalu obao. Dage sigo eno te ąį tuainogo ebo kapde te ąį dage sigo me tubo usubo gilama, te eno sabo dene tiwai gilama te dage sigo sabo usu egowe?” Tama augwali sigo agabolo te po wali, “Te da sigo tubo usu yaibao.” 
Tama Jisasgo augwali sibolo te po wai, “Mu dao, te dage si eno kapde ąį tueibao. Tiali goli de mu te eno dolo nogode me pobase nogode me dua yabo, te sę eno egobeo. Menio. Te tobage bidi dabe bidabo bulu dabe te eno Ayago naga augwali dua yabo digi sisi yai elalubao,” Jisasgo te po wai. 
Tama te nogo si bage augwaligo te po wabo odolama, tama augwaligo te ama name si dali dwai homu eyu, wado po weyu yai. 
Tiali goli Jisasgo augwali i olama, tama aga pageba asobo si, tama agai te po wai, “Dagego koneani, te Israel hani isąwai bagego tuni bidi dabe augwaligo bomonama augwa hani we bidi dabeba sęgę muyu, tama naga tiyu augwali tonalubo dao. Tama me te genuai bidi dabe augwaligo bomo mu elama, te we bidigo augwaligo po wali pomainogo ebo dao. 
Tiali goli te tobage sę ebo kolesaga dage tomode me elalugobeo. Menio. Te bidi mego aga te genuai bidi te dage tomode bidainogo da, aga te dagego sę ebo bidi bidao. 
Tama bidi me aga te dagego genuai polalubo bidi bidainogo da, aga te dagego masigi sisąbo sę ebo bidi tiwai bidao. 
Te tiwai naga gilama te Godigo Bidi Mu aga te bidi mego tau somainogo me asobeo. Menio. Aga asali te augwali digi tau somainogo asali, tama agai bidibo ulago te we bidi hauwa mu ma abelemainogo asai dao,” Jisasgo te po wai. 
Te augwaligo te Jeriko hanu tagalama, te Jerusalem hanuba pabo ma gagalali. Tama we bidi hani genuai mu augwaligo Jisas wali aselawai. 
Tama gedu widai bidi si te tų pąde dulalulai. Tama te bidi sigo Jisas asobo po odama, tama te bidi sigo bomonama i weyu te po wai, “Genuai bidi, nage te polobadu bidali bidi Devitgo hani bidi dao, nago dadi si dali homu dene eyu, da tau siyu yao,” wali. 
Tama te we bidi augwaligo te bidi si hagea siyu, po bomonama penane pania sao po wai. Tiali goli te bidi sigo po dagą geninama mu weyu, bomonama te po wai, “Genuai bidio, nage te polobadu bidali bidi Devitgo hani bidi, nago dadi si homu dene elama tau sao.” 
Tama Jisas pelama, sagia sigi pelama dolaluali, te bidi si i weyu te po wai, “Dage sigo homugo eno magi sę dage sibolo emainogowe?” 
Tama te gedu widai bidi sigo agabolo te po wai, “Genuai bidio, da sigo homugo nago da si gedu ma pedalao,” wali. 
Tama Jisasgo augwali si homu dene yali, tama agai nogo te bidi si geduba muani, tama megi naga tama te bidi sigo gedu pedama wiegi yai ma yai. Tama augwali sigo Jisas aga wali pai. 
