﻿Dwagi Yai Gesi Po Makgo Asęani.
1.
E po da te Jisasde gesi dwagi yai po dao. Jisas da, te Godigo te we bidi tau sainu dąį ilai bidi Krais da, te God aga ogwa dao. 
Te gesi dwagi yai po pusubo sę e tiwai hasia bolo pedelai elaluali. Godigo agai Kraisde wali po te Godigo po pusa mabo profet bidi Aisaiabolo polobadu mu pusali. Tama Godigo agabolo po olama, tama te profet bidi Aisaiago Godigo po te bukude asęai. Te bukude asęani po tomode Godigo aga ogwabolo te po wai, “Edao. Eno po sela pabo bidi tagala palama, tama aga nage pabo badu poligi soaibao. Agai te nago pabo tų sisi yaibao,” te po wai. 
Godigo te polasa pabo bidide te po me wai, “Bidi meni yai bulude aga i bomonama weyu, te po waibao, ‘Te dago Genuai Bidi aga pabo tų sisi eiyąo, te agai dage tonalubo sę yabo sunumi bugagia dodolao,’ te polasa pabo bidigo te po waibao,” Godigo te po olama, tama bidi me deligo te po bukude asęani. 
Te po polobadu obaso, te gesi dwagi yai po pusubo sę te tiwai nosali gagalali, te we bidi baptais mabo bidi Jon dią holali side. Tama te bidi meni yai bulude pedelama bididu, tama Jongo e po te agaba asali we bidibolo pupusu pai, “Te dagego duga yali dwai sęde ge neyu tama homu begeleąo, te Godigo dagego dwai sęde sali sęgę wei ponogobeo, sela sąwaibao, te eno dage węgo baptais mawaibao,” Jongo te po wai. 
Tama te Judia tǫ pedai provinsde bidali we bidi dabe umabo mu Jon pageba sisinigi pai, te Jerusalem moni hanu we bidi dabe umabo me agaba asali. Tama augwali deli deligo augwa dwai sę yali sęgę hania hanilama, tama te po wai, “Eno dwai sę dabe yai dao.” Tama tibadi Jongo augwali te Jordan pabo ąįde baptais mani. 
Tama Jongo gudubo ugwa te moni kibu kamel nisigo nigai dao, tama aga tabide te kibu wali kukulu gudai. Tama aga te bulu tomode bidibo kuli mano me hanamu dali si tuyu bidai dao. 
Tama agai po bomo elama pusuyu, te po wai, “Te ena tudi badu asobo bidi me deligo, tama agai bomogo te eno bomo aiyaba elaluaibao. Ena wiegi yai bidi weyu, tama ena aga sę ebo bidi bidiyu, ena duagulama te eno agai sągą nadoba bono me pisagagobeo. 
Eno dage węgo naga baptais mani dao. Tiali goli agai dagebolo Godigo Tedali Mobo Bidi dobawaibao, dage dali bidimainu tama tiaibao,” Jongo te we bidi dabebolo te po wai. 
Te side Jisas te Nasaret dwasianu hanu te Galili tǫde bidali taga soyu asali. Tama Jongo aga te Jordan pabo ąį tomode baptais mani. 
Tama polo aga te we tagasu, te bulu wę sesegeba doligulubadi, tama agai te dagalu dala pabo suali, tama te Godigo Tedali Mobo Bidi te ba hi tiwai gagalasa agaba dulali. 
Tama te dagalude pedauwali me delidu bomonama i weyu, te po wai, “Nage eno Ogwa dao. Eno nage godolo mu ebao. Eno homu nagede wiegi yai ebo dao,” te po wai. 
Tama te po ola silama, tama polo te Godigo Tedali Mobo Bidigo bomonama te Jisas bidi meni yai buluba polo tagala palai. 
Tama aga te bidi meni yai bulude bididubadi, te bidi sese si sogo bidali, tama te usu sabo dwai mobo bidi Satan asama, tama sesemane sogo aga usu sagasali, Jisasgo dwai sę emainogo tama usu sali. Tama Jisas te bulu hasa dabe dali bidali. Tama Godigo dagalude sę ebo ensel mobo bidi dabego aga tau sali. 
Te Jongo te gavman bidi Herotbolo “Dwai sę egio” po obaso, te Herot sębę eyu, tama agai Jon kalabusiba muani. Tama te sogo Jisas te Galili moni tǫ pedai tomoba pelama, tama Galili tǫde biliyu, agai Godigo gesi dwagi yai po pusa mena mena bilai, te po wai, 
“Te megi da, te bodolu sogo mu pedalubao. Te Godigo te we bidi mu tonalubo sogo pąba yagasalio. Tama tibaso, dagego duga yali dwai sęde ge neyu, tama homu begelama, tama duga homu te gesi dwagi yai poba begi pao,” Jisasgo te we bidi dabebolo te po pususu bilai dao. 
Te Jisas te Galili sigi ąį sane sesegedu pobadi, tama agai te Saimon aga ama Andru dali si suali. Augwali si te sigi węba te sųgų hagani togobo wa sąbo sę iduai. Augwali sigo te sųgų sabo sęde te mone sabo bisnis sę eyu bidai. 
Tama Jisasgo augwali sibolo te po wai, “Dage si ena wali asiąo, tama eno dage sibolo te bidi sabo sę ola mawaibao, te sali bidi dabe ena wali asomainogo yaibao,” te po wai. 
Tama polo te augwa si te sųgų hagani togobo wa tagalama, tama Jisas aga wali pai. 
Aga dwasianu ma pelama gana, tama agai Jems suali, te bidi Sebedigo ogwa, te aga ama Jon dali bidibo suai. Augwali si me te augwa gebade bididu, te sųgų sabo hagani togobo wa dodolobo sę idubadi suali. 
Tama agai augwali si polo i olama, tama augwali sigo te augwa si aya Sebedi te gebade te aga sę bidi dabe dali bidibadi taga peyu, tama augwali si te Jisas wali pali. 
Te Jisas dali, aga bidi me si me si dali, augwali te Kaperneam hanuba pelama, tama teba sabolali. Tama te Sabat sogo dwasianu Sarere Jisas te Juda dabego bomo yai po ola mabo be tomoba polo pelama, tama agai po te we bidi augwalibolo ola mani. 
Tama augwaligo agai po odama, tama augwali moni noma siyu, tama midigi sai. Magi baso meni. Agai augwali te Juda dabego bomai po koneani bidi dabego kolesaga ola mabo tiwai gilama me ebeo. Menio. Agai augwali te nogi dali bomo dali si elalubo bidigo kolesaga ola mabo tiwai mu yai. 
Te sogo bidi me deli te augwaligo bomai po odobo lotu be tomode bididuali, tama agade te dwai haubo noma bidi elaluali. Agai bomonama i weyu, te po wali, 
“Te Nasaret hanu bidi Jisas, nago da dwai mobo dabebolo mena sę yainogo asaliwe? Te nago da dolainogo homu eyu, asai dawe? Eno nage koneani, nage te Godigo gasagi yai tedali wiegi yai bidi dao,” te po wai. 
Tiali goli Jisasgo te dwai mobobolo te po wai, “Nago pedauwali pania selama, tama te bidi nago taga soayu, buluba soao,” te po wai. 
Tama te dwai mobogo te bidigo tigi omagia mu didibili ilai, tama i wabogo po dagą genuai mu olama, tama te bidi taga palio. 
Tama tigidali we bidi augwali noma siyu, tama augwa hasi tomode digi po miani, “Te e da mena sę dawe? Te gasagi yai gesi ola mabo po dao,” te po wai. “Te bidigo bomo elalubaso, tama agai te dwai haubo noma bidi dabeba po pusubaso, tama augwaligo agai po odali,” te po wai. 
Tama agai yali sę po Galili tǫ pedaiba polo pelama, te we bidi tigidaligo odali. 
Te bidi Jisasgo te dwai mobo bidi sela sąnama, tama te Juda dabego bomai po odobo lotu be taga pelama, tama te Saimon dali Andru dali sigo be tomoba pali. Tama Jems me Jon augwali si me hodobo pali. 
Tama Saimon aga au te be tomode te pibo be saide pila muai, te tigi posolo gasi elaluali. Tama te we gasi elalubo po augwaligo te Jisasbolo polo wali. 
Te po olama, tama Jisas agaba pelama, tama aga nogo tola sigi pelama, hodolali. Tama te tigi posolo gasi agade elaluali tagalama, tama te wego augwali nai sisi ilibo sę yai. 
Te be pio eyu, giliga dega sigilubode, te we bidi augwaligo te gasi yai we bidi dabe me, te dwai haubo noma bidi elalubo we bidi dabe te augwaligo agaba selasa asai. 
Tama te hanude bidaluali we bidi tigidali augwali te be sunumi pąba sisinani. 
Tama agai te gasi haniani elaluali we bidi hauwa usu ma ilili pali. Tama agai te dwai haubo noma bidi hauwa elaluali te sela sąwani. Tama te sę ebadi, te dwai haubo noma bagego aga Godigo Ogwa da konebaso, augwaligo tede po waidali weyu, agai augwalibolo habu selibo po bomonama wai. 
Te sogo kigamu digi mu aga hodaluama, tama agaduba buluba dią solama, tama te bidi meni yai madiba me pelama, aga Godibolo po wainogo yai. 
Tama nosali, Jisasgo Godibolo po me odubadi, tama Saimon dali aga abagi solo me augwaligo Jisas gege pai. 
Augwaligo aga gegela sulama, tama augwaligo te po wali, “Te tigidali we bidi augwaligo nage gegainogo ebo dao,” te po wai. 
Tama agai augwaliba te po wali, “Te tagalama, te da meba te gasa pąde elalubo buluba pinao. Eno po augwaliba me pusainogo. Te sęde naga ena asai dao,” te po wai. 
Tama olama, aga te Galili tǫ pedai tigidaliba pelama, tama agai te wiegi yai po te augwaligo bomai po odobo lotu be dabe tomode pusuyu, tama agai te dwai haubo noma bidi dabe sela sąyu yai. 
Te oiyabe gasi yai bidi me deli agaba asama, bomonama hanalu wagasali. Aga kidu sugunagasama, tama Jisasbolo te po wai, “Te nago homugo usu dao wida, teda nago ena wiegi yai ma ilama, tama ena te meda meni yai tiwai ma bidaibao,” te bidigo te po wai. 
Tama Jisasgo aga homu dene mu ebaso, tama agaba nogo munama diąyu, tama agabolo te po wai, “Awe, eno homugo nage gasi usu ilaibao. Tama nage wiegi yai pedalao, te meda meni yai bidi bidao,” te po wai. 
Tama megi naga tama te oiyabe gasigo agade elaluali taga palio, tama aga wiegi yai pedelali. 
Tama Jisasgo te bidi tagala palobadi agabolo po bomonama weyu, te po wai, 
“Bugagia dua dao. Nago bidi me deli dali eno nagede yali sę po me wagio. Menio. Nage dolo pelama, tama nago tigi te pris bageba waseligi pelama, tama agai nago tigi osola sumainao. Tama tilama, tama polobadu Mosesgo wali po gilama Godibolo nai ofa yao. Tama tiyu, te bidi dabego koneyu, te nago gasi silali, nage te meda meni yai bidi tiwai megi ma bidibao, te homu augwaligo yaibao,” Jisasgo te po wai. 
Tiali goli te bidigo Jisasgo agaba wali po wali pisąma, agai te sę yali po tigidali we bidi dabeba subigila pususu bilali, te tigidali hanuba pususu bila silali. Tama tibaso, te we bidi umabo augwali agaba asidali weyu, Jisas aga te hanu dabe tomoba hania pabo usu ebeo. Menio. Aga te hanu bulu badu naga bidali, te bidi meni yai madi naga bidai. Tama te tǫ pedai tigidali habu badu we bidi dabe te aga bidibo madi naga asiyu yai. 
