﻿Mak.
6.
Te silama tama Jisas te bulude bidali tagalama, te aga page bulu Nasaret hanu teba pali. Tama aga wali pabo bidi dabe augwali aga wali pai. 
Te Sabat sogo aga te bomai po odobo lotu be tomoba pelama, tama te we bidi augwalibolo te Godigo po pusa mani. Tama augwali hauwago agai po odolama, tama augwali dwai noma siyu midigi sali. Augwaligo te po wali, “Te bidigo te ola mani po menade saliwe? Te agade koneani elalubo kolesaga, te menagiai kolesaga dawe? Mena tama tilama agai te bomai sę ebowe? 
Te bidi aga te be sę ebo kamda bidi naga dao, te dago koneani. Aga te we Mariago ogwa, tama aga ama dede da te Jems, me Josep, me Judas, me Saimon, te tama bagego ama gomunai bidi dao. Te aga abe dabe da dali ede bidibao.” Augwaligo te tiwai po olama, tama augwaligo aga dali dwai homu ela mani. 
Tama Jisasgo augwalibolo te po wali, “Te Godigo po pusubo profet bidigo nogi tigidali bulude elalubao. Tiali goli te aga page bulude me, te aga deli kaneme hanide me, te aga be mude me, te aga nogi meni yaibao,” te po wai. 
Tama agai te bomai sę me deli te bulude me egobeo. Agai nogo te gasi bidi si selaba naga munama tama augwali wiegi yai ma ilali. 
Tama te we bidi augwaligo agade konealubo po dąų wasiąyu, tama augwa homu agaba tialusiąbaso, te aga noma siyu midigi sali. Te Jisasgo te Nasaret hanu tagalama, tama aga te bulu pedai dabeba biligi pelama, tama agai te Godigo po te we bidi dabe augwalibolo ola mena mena bilai dao. 
Tama agai te aga wali pabo bidi nogo si olama sągągo si bidi dabe i olama asali, tama agai augwali bidi si si tagala palali. Agai te dwai haubo noma bidi sela sąyabo bomo te augwalibolo mawai. 
Tama agai te po augwalibolo wai, te bilibo dono augwaligo tolasa bilao wali, tiali goli augwali te biligi pabo sogo gasa doado bage dali me sabiligio wali. Augwaligo te bret me sabiligio wali. Te wa brasbel me augwaligo me sigio po wali, tama augwaligo gudali ugwa agebelede te mone bulama me sela pelamuo. Menio. 
Augwaligo te sągą nadoba mumainogo yao wali, tiali goli augwaligo te holobo ugwa si munamuo wali. 
Tama agai augwalibolo te po me wali, “Te dage bulu me deliba sabolama tama te be me deli tomoba pobaso da, teda dage te be tomode naga bidiąo, te gasa gasa beba pigimio. Tama nosali dagego te be tagalama te dage piąo. 
Tama te meba bulude te augwaligo dage te augwa beba dage sela pisąma, tama augwaligo dagego po odisąyu ebaso da, teda dagego te bulu taga peyu, tama te dagego sągąde elalubo pobele bage sela sąyao. Tama tiyu augwaligo te augwa dage dali yali dwai kolesaga homugo kone palomainao,” agai te po wai. 
Tama tibaso te po sela pabo sę bidi dabe si si pelama, tama augwaligo te tiwai po te we bidi dabebolo haniani bulude pusali, “Dagego duga dwai sę tagalao, tede ge neyu duga homu kolesaga begeleąo,” te tobage po wali. 
Tama me augwaligo te dwai haubo noma bidi hauwa sela sanama, tama augwaligo te hauwa gasi yai bidi tigide wel munama tama augwali usu ma iliyu yai dao. 
Tama megi da, te gavman tuni bidi Herot agai te sę ebo po dabe odali, magi baso meni, te tigidali tǫ pedaide te Jisasgo nogi usu elalualio. Te meba we bidi augwaligo te po Jisasde wali, “Te we bidi baptais mani bidi Jon aga te gų pagede ma hodalualio, te aga Jisas dao. Tama tibaso te genuai bomo aga nogode pedalubao,” te po wai. 
Tama meba augwaligo te po wali, “Woo, te meni. Jisas da, te aga te polobadu bidali profet bidi Elaija dao.” Tama mebago te po wali, “Aga te profet dao, te polobadu Godigo po pusubo sę ela bilali profet dabe tiwai dao.” 
Tama te gavman tuni bidi Herotgo te wabo po odama, tama agai te po wai, “Polobadu eno bidi me tagala palama, tama agai Jon dogoni togolama tama aga isai dao. Tiali goli megi da, aga ma hodaluali dao,” te po wali. 
Polobadu Herot aga ama Filip me bidibadi, te Herotgo Filipgo we nogi Herodias dagala sai. Tama tibaso Jongo hauwa sogo te Herotbolo te po wai, “Nago te naga amago we sali, te dolo me ebeo,” wali. Tama te we Herodias agai homu dwai mu te Jon dali elama, tama aga ela muabo homu yali, tiali goli agai te tiabo sę usu ebeo. Herotgo te bidi meba tagala palama, tama augwaligo te Jon pageabi elama, tama te kalabus bede aga te sengo kęani. Tiali goli agai Jon ela mubeo. 
Magi baso meni, Herot aga te Jonde wi yai. Agai koneani, Jon aga te wiegi yai tama doloba pai bidi bidali. Tama agai te aga bugagia tonaluali. Agai te Jongo pusubo po odama, tama aga homu hauwa elama, tama aga homu sęgę iduali. Tiali goli agai te agai po odobo te godolo mu yai. 
Nosali te we Herodiasgo te tiwai sunumi elalubo pedalali. Herot aga idago aga ame nani side pedalubaso, te agai genuai nai ulaiba wali. Agai te nai da tueinu ebo te aga dali gavman sęde tau sabo bidi dabe dali tueinogo yali, tama te polalubo ami tuni bidi me, te Galili tǫde bidalubo genuai bidi dabe dali te nai da tueinogo yai. 
Tama te we Herodias aga wegi aga te nai tubo madi tomoba aselama, tęąbi yagasali. Tama Herot dali te aga dali nai tuali bidi dabe me, augwali godolo mu yali. Tama Herotgo te gesi wegibolo weyu, te po wai, “Nago magi nai saiwe? Nago enabolo po obaso, te eno nagebolo mu mawaibao,” te po wai. 
Tama Herotgo agai po dąų wabo po bomonama weyu, agai agabolo te po wai, “Mu tama dao, nago mena nai po enabolo hanalu wali, te eno nage mawaibao. Te nago eno te we bidi tonalubo te bomo tomode togolama, te nage mao po obaso da, teda eno nage mawaibao,” agai te gesi wegibolo te po wali. 
Tama te wegi buluba solama, tama aga idabolo hanalugi soali, “Te eno mena nai sai po wagawe?” Tama aga idago te po wai, “Nago te we bidi baptais mani bidi Jongo tobolu sabo po wao,” te po wali. 
Tialima, te gesi wegi polo ma te tuni bidi pageba ma asama, tama te po agabolo wali, “Megi naga tama eno homugo nago te baptais mani bidi Jongo tobolu te pou me delide munama, tama nago enabolo mao,” wai. 
Agai te tama po obaso, tama te tuni bidigo homu sęgę mu yalio. Tiali goli agai homude te agai mu po da dąų wali te aga dali hodobo te duada pelama nai tudu pabo bidi dabe gesabidide wali po, te pode homugo kone palali. Tama agai te wegigo po sela sągobeo homu yalio. 
Tialima, polo tama te tuni bidi Herot agai te ami bidi me deli tagala palama, te Jongo tobolu togogi pelama sela asomainogo yali. Te ami bidi te kalabus beba pelama, tama Jongo tobolu mage togwai. 
Tama agai te Jongo tobolu togwali te pou me delide munama, tama selasa aselama, tama te gesi wegibolo magasali. Tama te wegigo aga idabolo mawai. 
Te Jon aga wali pabo bidi dabego te wabo po odama, tama augwaligo aga tigi sagaselama, tama augwaligo te gų pageba pubaligi pai. 
Te Jisasgo tagala palali po sela pali sę bidi dabe augwaligo sę silama, tama ma begasa aselama, tama augwali Jisas dali deliba sisinani. Tama augwaligo te egi pali sę po miani, tama tigidali po augwaligo te we bidibolo ola mani po wai. 
Te we bidi hauwa eda asiyu, ugwa soyu yali, tama Jisas dali aga wali pabo bidi dabe dali augwaligo te we bidi tau sabo sę ebaso, augwali nai tuyu toma nabo sogo meni yani. Tama tibaso Jisas aga wali pabo bidi dabebolo te po wali, “Ae, tegobao, dena naga te bidi meni yaiba me deli pelama, tama dage toma dwasianu tuiagameo,” te po wai. 
Tama augwali te geba selama, tama augwali te sigi ąį daidu te bidi meni yai habu me deli badu pali. Augwa naga palio. 
Tiali goli te we bidi hauwago augwali pabo suali, tama augwaligo te augwali koneani. Tama tigidali hanu we bidi augwali teba pedai badu tǫdu udada pelama, tama augwali te Jisas pali sunumi te badu polasa pedaligi palio. 
Tama Jisas te gebadu pelama, te wę pedai badu tugi pelama, tama agai te we bidi hauwa bidalubo suali. Tama agai augwali homu dene genuai mu yali. Augwali te sipsip kibu tonalubo bidi meni yai tiwai bidaluali. Tama tibaso agai gagalama, te wiegi yai po hauwa augwaliba ola mawai. 
Te giliga dega sigulainogo yali, tama te Jisas aga wali pabo bidi dabe te agaba aselama, tama augwaligo te po wai, “Te ede da, te bidi meni yai madi tama te giliga dega sigulainogo ebao. 
Nago te we bidi augwali tagala palao. Augwali peyu, te be nani dabeba pomainao, tama augwa tuabo nai abelegi pomainogo tagala palao,” te po wali. 
Jisasgo augwaliba te po wei ponani, “Duga digi te augwali nai maiąo.” Tama augwaligo agabolo te po wali, “Te nago homugo dago te bidi sese a naga 200 kina monego dago te bret abelegi pomainogo eyu obawe?” 
Tama agai augwalibolo te po wali, “Dagego nisu naga bret munalubowe? Dage pelama sugi piąo.” Augwaligo sula selama, tama augwaligo te po wai, “Dago te bret a naga, me te sųgų si te tama elalubao.” 
Tama agai augwalibolo te po wali, “Tigidali augwali te wiegi yai nosaide wasisi pelama, duada piąo wao,” te po wali. 
Tama te we bidi tigidali augwali duada pali, tama te wasisi pelama, duada pali hani me badu te bidi sese a naga 100 bidi duada pobadi, te meba duada pali hanide te bidi si olama nogo si 50 bidi bidada pali. 
Tama agai te a naga bret dali te sųgų si me sali. Tama agai te dagaluba tonaludama, tama puba hwi po Godibolo walio. Tama agai te bret pebedama, tama te aga wali pabo bidi dabebolo menama, tama augwaligo te we bidiba dobaba pali. Tama te sųgų si me tologolama, tama te tigidali we bidiba dobaba palio. 
Tama tigidali augwali te nai tudu pali te usu mu yalio. 
Tama te bret me sųgų te me badu tigidali munalua pali, te augwaligo sisinama, tama te bonou wa basket te nogo si olama sągągo si pągąwani. 
Te bret me sųgų tuali bidi dabe, augwali te bidi sese umabo te 5,000 bidi dao. 
Te nai mabo sę silama, tama Jisasgo aga wali pabo bidi dabe augwali te asesa piąo olama, te augwali polo te gebaba holomainogo elama, tama augwali te aga asabo badu te sigi ąį pedai badu polasa te Betsaida buluba piąo wali. Agaduba digi te we bidi dabe augwa beba tagala palu pomainogo yai. 
Agai te we bidi augwali tagala palama, tama aga te bulu du bageba ugwa holai. Aga tede agaduba bididubadi te Godibolo po wainogo tiali. 
Te be pio ebode te geba te sigi ąį tomode elaluali, tama Jisas agaduba te tǫde me bididuai. 
Tama agai suali, te waligo augwali degelainogo ebaso, tama augwali te wę togobo sę dene mu yai. Te be posabo pąde, teda Jisas te sigi ąį daidu augwali bidiboba pali. Agai te augwali ela soainogo yai. 
Tiali goli te aga wali pabo bidi dabe augwaligo aga te sigi ąį daidu asobo sulama, tama augwaligo homugo aga te isi bidi me deli da te homu yai. Tama augwali homu dwai noma sabo i dali walio. 
Magi baso meni, tigidali augwaligo aga sulama, tama augwali wi mu yai. Tama polo Jisasgo augwalibolo weyu te po wai, “Dage homu tegaluiąo, bomo elama bidiąo. Te ena tama dao. Dage wi egimio,” te po wai. 
Tama aga te gebaba holama, tama augwali dali bidibo si, tama te moni wali asali sia salio. Tama augwali midigi eyu noma mu selama, tama augwaligo homu hauwa yalio. 
Magi baso meni. Te Jisasgo te we bidi hauwa tebolo bret dabe dobawali sę page tede augwaligo bugagia homu kone me palobeo. Menio. Augwa homu me hulialuama tama usu ebe. 
Te silama, tama augwali te sigi ąį nogolama, tama augwali te Genesaret pedai badu tugi pali, tama augwaligo te geba tede gebelali. 
Augwaligo te geba taga sobadi, tama polo te we bidi dabe augwaligo te Jisas sulama, tama aga konea palio. 
Tama te bidi dabe udada pelama, te pąde elalubo tigidali bulu dabeba tedela pali. Tama tigidali bagego te Jisas bidibo po odama, augwaligo te gasi yai bidi dabe te gologobe wade munama, tama augwaligo te augwali tolama tama aga pageba tolasa pelawali. 
Tama tigidali bulude me te tigidali hanude me te tigidali tǫ pedaide te Jisas sabaligi pabo digi, augwaligo te gasi yai we bidi dabe sela asama, te maket ebo pesage tomoba muagasiyu yai. Te augwaligo i bomo elama Jisasbolo weyu, tama te gasi yai we bidi dabego te agai ugwaba nogogo diąmainogo gogoliyu sula tagala wali. Tama tigidali gasi bidi dabego te agai ugwaba nogo munama, te augwali tigidali wiegi yai elama, usu ma ela pai dao. 
