﻿Mak.
9.
Te po silama, tama agai augwalibolo te po wai, “Eno mu po dagebolo obao, te ede dolalubo bidi dabe meba te augwali me isisąbadi, tama te Godigo te we bidi tonalubo sę te aga bomo dali pedalubo augwaligo sueibao,” agai te po wai. 
Nosali te Sarere deli bidai madi, Jisasgo Pita me Jems me Jon selama, tama agai augwali te ugwanu holai bulu du me deli te bageba odasa holali. Tama augwa naga tede bidaluali. Tama augwali gedude Jisasgo tigi hasegelama, tama aga gasagi yai pedalai. 
Tama agai ugwade te dula gegemani ebo tiwai pedalali, tama te nala nisi tedela tiwai mu yai. Te tǫde bidi me deligo ugwa te tiwai gilama pedalubo usu me egobeo. 
Tama te polobadu bidali bidi si Elaija dali Moses dali si pedalama, tama augwali sigo te Jisas dali po mibo te augwaligo suali. 
Pitago te sulama, tama agai Jisasbolo weyu, te po wai, “Tisa, po ola mabo bidi, da ede bidibo, te wiegi yai ebao. Dago te bola yano be sela sę yainogo, te me deli nago, te me deli Mosesgo, te me deli Elaijago dao,” Pitago te po wai. 
Magi baso meni, te augwali wi mu ebaso, te agai mena po wagawe weyu, te Pitago konesiąma te homu yai. 
Tama te dagalu pǫ me deli pedelama, te augwali mesega sagasali. Tama te pǫ tomodu te pedauwali me delidu te po waida wai, “E bidi da, te eno Ogwa da, eno aga godolo mu ebao. Dagego agai po odiąo,” wai. 
Tama polo tama, te augwaligo tonono bilali, tama augwaligo te gasa bidi me si te subeo, polo pali. Te Jisas agaduba deli naga te augwali dali bidibo suali. 
Augwali te bulu dude bidali tagalama tama aiyaba dudulayu, tama Jisasgo augwali habu seleyu, te tiwai po wai, “Te dagego suali sę, te dagego bidi me delibolo munu me wasiąma, te ena Godigo Bidi Mu te gų page tagalama ma hodalobo sogoba usu naibao,” wali. 
Tama tibaso te po augwa homuba dąų ola selama, tama augwa hasi digi te e tama po miani, “Te gų page tagalama ma hodaluaiba po wali, te mena sę dawe?” te po miani. 
Tama augwaligo agabolo hanalu wali, “Magi baso te bomai po page koneani bidi dabe augwaligo te po weyu, te hasia bolo te Elaija asaibao, tama nosali naga te Godigo tagala palabo bidi asaibao, te po magi baso wabo dawe?” augwaligo te po hanalu wali. 
Tama Jisasgo augwalibolo te po wali, “Awe, mu tama, te Elaija bolo hasia asama, tama te Godigo tagala palabo bidi asobode te tigidali nai ma dodolagasomainu yaibao. Awe, eno dagebolo obao, Elaija te asalio. Tama te bidi dabe augwa homugo digi wali peyu, augwaligo dwai sę aga dali yali, te Godigo po bukude polobadu asęani po tiwai gilama yai dao. Tiali goli te Godigo po bukude te ena Godigo Bidi Mude magi po tede elalubawe? Te po e tiwai dao, ena te dene hauwa toloyu, tama te bidi dabego ena tudiba muaibao,” Jisasgo te po wai. 
Augwali pelama, tama te bulu du pageba dulama, te wali pabo bidi dabe meba bidalubo madi sabalubadi, tama te genuai we bidi hani te augwaliba sisinai elalubo suai. Tama te Juda dabego bomai po page koneani bidi dabe meba augwaligo te wado po konila po augwali dali oduai. 
Te po odobo we bidi tigidali augwaligo te Jisas asobo sulama, tama polo te augwali midigi siyu te noma sali. Augwali te aga pageba udada pelama, tama augwaligo siade da po aga dali wali. 
Tama agai te aga wali pabo bidi dabebolo hanalu wali, “Dagego te konila po wabo te bomai po page koneani bage dali te mena pode obawe?” te po wai. 
Tama te we bidi hani tomode bidali bidi me deli agai te po Jisasbolo wei ponoyu, te po wai, “Tisa, po ola mabo bidi, te eno ogwade te pedauwali panialubo dwai haubo noma bidi me deli elalubaso, tama eno aga te nageba odasa asai. 
Te hauwa sogo te dwai haubogo aga dąų olaluyu, tama agai aga te tǫba sądubao. Tama aga pedauwalide te pesa dini pedaliyu, tama aga kele penane dagana selama, tama aga tigi te tigidali boma peyu didila pai. Tama eno te nage wali pabo bidi dabebolo te dwai haubo sela sąyao po hanalu wali, tiali goli te augwaligo usu ebeo.” Te bidigo te po wai. 
Jisasgo te po odama, tama agai te we bidi augwalibolo wai, “Te dage hani we bidigo enade konealubo po dąų olama, duga homu enaba tialubo menio! Nisu naga sogo ena dage dali me bididuaibawe? Nisu naga sogo te eno dagego sęgę tolomainogo ebawe? Dagego te ogwa enaba odasa asao,” wali. 
Tama augwaligo te ogwa agaba odasa pali. Te dwai haubogo Jisas sulama, tama polo te ogwa degelainu mu yali, tama te wai te tǫba degasa dulama, tama hogogo bele pelama, tama te dini pesa me deli te aga pedauwalidu pedalali. 
Tama Jisasgo aga ayabolo hanalu wali, “Nisu naga sogo aga te tiwai elaluai dawe?” Tama agai te po wai, “Te aga dwasianu elalubadi te tama tiai elaluai dao. 
Tama hauwa sogo te dwai haubogo aga te siaba sąyu, te węba sąyu yai, tama aga ela muabo homu yai. Tiali goli te nago usu ilabo homu yaiba wida, teda nago da homu dene elama, tama da tau sao!” wali. 
Jisasgo agabolo te po wali, “Awe, mu da, te nago enade te po wali, ‘Nago usu yaiba wida,’ nago te po wali. Tiali goli te tiwai meni. Te nago enade konealubo po dąų olama, tama nago homu enaba tialubo usu elalu da, te nago tigidali nai sabo te usu yaibao.” 
Tama polo te ogwa aga ayago i weyu, te po wai, “Eno nagede konealubo po dąų wali, tiali goli tede ena te habuge tiwai yai! Nago ena tau sao!” 
Jisasgo te genuai we bidi hani augwali sisinagasobo suali. Tama tibaso agai te dwai haubo bidiba wado iliyu, te po wali, “Nage te pedauwali pania sai, me nage te olo degai haubo bidi, eno nagebolo obe dao, nago te ogwa taga pao! Tama nage aga tomode munu ma bidilamu dao,” te po wai. 
Tama te dwai haubogo te dwai i weyu, tama agai te ogwa degelai sedu genama, tama te dwai haubogo te aga taga peyu tama palio. Tama te ogwa te isai bidi tiwai munaluali. Tama bidi hauwa augwaligo te po weyu, “Aga te isali dao,” wai. 
Tiali goli Jisasgo aga nogo tola selama, tama aga hodolobaso, tama aga doligulalio. 
Nosali Jisas te be tomoba pelama, tama te aga wali pabo bidi dabe naga bidalubadi tama augwaligo agabolo hanalu wali, “Magi baso dago te dwai haubo sela sąwainu yali te usu meni yaniwe?” 
Tama agai te po augwalibolo wai, “Te Godibolo gedu haluasa po wabogo naga te tobage dwai haubo noma bage sela sąbo te usu yaibao. Te gasa sę ebogo da, te usu me egobeo,” te po wai. 
Augwaligo te bidali bulu taga peyu, tama augwali te Galili tǫ tomoba pali. Tama Jisasgo te aga menade bidibo, te we bidi augwaligo aga koneidali homu yai. 
Magi baso meni, agai te aga wali pabo bidi dabe ola mabo sę yainogo yai. Tama agai augwalibolo te po wai, “Te augwaligo ena Godigo Bidi Mu te bidi dabego nogoba muaibao. Tama augwaligo ena ela muaibao. Augwaligo ena ela munama, tialima sela sogo bidama nosali te ena ma hodaluaibao,” te po wai. 
Tiali goli augwaligo te po page konesiąwai. Tama augwaligo agabolo hanalu wabo wi yalio. 
Tialima, augwali te Kaperneam hanuba sabolali. Augwali te be tomoba pela siali madi, tama Jisasgo aga wali pabo bidi dabeba hanaluyu, te po wai, “Te da asobadi, te sunumide dagego duga hasi mena po miai dawe?” 
Tiali goli augwaligo po me wabeo. Magi baso meni, te sunumide augwaligo te augwali tomode de polalubo bidi bidaibawe te po miai. 
Tama aga duagulama, tama te wali pabo bidi nogo si olama sągągo si bidi i wai. Tama agai augwalibolo te po wai, “Te bidi me deli aga te polalubo bidi bidabo homu ebaso da, teda aga te nosali sabi badu mu bidama, te tigidali bidi tau sabo sę ebo bidi tiwai bidao,” wai. 
Te po olama, tama agai te dwasianu wai me deli selama, tama aga te augwali tomode dolalumainogo ilali. Tama agai aga nogo tolasa, tama augwalibolo te po wai, 
“Te bidigo eno nogide homu kone palama, tama te tiwai dwasianu ogwa wai me deli tau sobaso da, te agai ena tau sobao. Tama ena tau sabo bidi, agai te ena naga tau me siyu me ebeo. Menio. Agai te eno Aya me tau sobao, agai ena tagala palobaso te ena asai dao,” Jisasgo te po wai. 
Te aga wali pabo bidi me deli, aga nogi Jon, tego agabolo weyu, te po wai, “Tisa, po ola mabo bidi, te bidi me deligo nago nogide te dwai haubo noma bidi sela sąbo sę ebo dago suali. Tiali goli aga te da wali me asobeo. Tama tibaso, dago aga habu selali,” te po wai. 
Jisasgo agabolo te po wai, “Dagego te aga habu me selamuo. Te bidi me deli agai eno nogide te bomai sę me ebaso da, teda agai polo tama te eno nogi posobo po me wainogo me egobeo. 
Te dade boi bidi homu me isiąbo bidi da, aga te dago abagi dao. 
Te bidi me deligo dage sulama, tama agai te homu elama, ‘Eno te Kraisgo bidi dabe tau saiba’ homu elama, tama agai te kapde wę dage mobaso da, teda eno mu po dagebolo obao, te bidigo nosali sabo wiegi yai nai da, te me hagagobeo,” Jisasgo te po wai. 
Te Jisasgo po me weyu, te ola mabo po wai, “Te bidi me deligo e tiwai wai pulubago enaba homu begagaselama, te konealubo po dąų olalubadi, te aga dwai sęba tulalumainu iligi sogo da, teda te tebo bidigo dwai sęgę mu sigi da. Tama aga te tiwai dwai sę te wai dali idali weyu, te bidi dabe augwaligo te bidigo magede moni sęgę yai masigi te bonogo kęnama, tama aga te tamu ąį moni ge tomoba sela sąyu aga tede isigi sogo da, teda te usigi dao. Te sę agaba pedaligi sogo da, aga te wai dali dwai sę isiąma tama moni dene sigi menigi da. 
Tama tibaso, dage deli delide e tiwai dao. Te nago nogogo te nage dwai sęba tulalumainu ilibaso da, te nago te nogo aga togolama sela sąyao. Teda nago nogo deli naga elaluyu, tama nago te dwai sę isiąbo te sesemane sogo bidada pabo ula sabo, te usu dao. Tiali goli nago nogo si me elaludu da, tama augwaligo dwai sę eyu, nage te genuai dene mu siyu bidada pabo te isisąbo sia dabo madi teba peyu da, te dwai mu dao. 
Te bulude te dwasianu isisąbo kigi dabe te augwa tigide elalubao, tama te sia dabo munu me sula sogobeo. 
Tama naga sągągo te nage dwai sęba tulalumainu ilibaso da, nago te sągą aga togwama sela sąyao. Teda nago sągą te deli badu naga elaluyu, tama nago te dwai sę isiąbo te nago te bidabo ula mu saibao, te usu dao. Tiali goli nago sągą te si elaludu da, tama augwaligo dwai sę eyu nage te genuai dene mu siyu bidada pabo te isisąbo sia dabo madi teba peyu da, te dwai mu dao. 
Te bulude te dwasianu isisąbo kigi dabe te augwa tigide elalubao, tama te sia dabo munu me sula sogobeo. 
Ma, nago gedugo nage te dwai sęba tulalumainu ilibaso da, te nago aga gudama sąyao. Teda nago gedu deli naga elaluyu, tama nago te dwai sę isiąbo te sesemane sogo bidada pabo ula sabo, te usu dao. Tiali goli nago gedu si me elaludu da, tama augwaligo nage dwai sęba tulalumainu iliyu da, augwaligo nage te dwai isisąbo sia dabo madi saoba sąwaibao, te dwai mu dao. 
Te bulude te dwasianu kigi dabe te augwali tigide bidalu te augwali me isisąma, tama te sia dabo te me sula sogobeo,” Jisasgo te po wai. 
Te agai po me weyu, te po wai, “Te bidi mego tamu aga tubo naide mubo tiwai gilama, Godigo te we bidi dabeba te dabo sia mawaibao. 
Tamu te wiegi yai nai dao. Tiali goli, te tamu te halia pobaso da, teda dagego mena tiwai ilama tama te tama ha ma elalugowe? Te usu egobeo. Te tamude elalubo tubo nai te pusu tiwai gilama, tama dage bugagia bidiąo, duga hasi nagamea homu eyu tama bugagia bidiąo,” Jisasgo te po wali. 
