﻿Mak.
14.
Te sogo te Juda dabego olo bidiyu, te bo disąwai bret nai tuabo sogo nogi Pasova, te tuabo side te pedelabo bodolu si elaluali. Tama te genuai pris dabego me te bomai po page koneai bidi dabe augwaligo te po wai, “Mena tama tilama, te dago Jisas geme pageabi elama, tama aga ela muaibawe?” 
Augwaligo te po miyu, tama te po me wai, “Dago te tiwai sę te olo bidibo Pasova side me egobeo. Tiyu te we bidi augwaligo wąbi hwįabo sę hodolabuo,” te po wai. 
Te Jisas hogodama, te Betani be nani teba te oiyabe gasi sai bidi nogi Saimongo beba pali. Aga te tebol saide duagi pelama, tama nai tuyu bidibadi, tama we me deli asali, tama agai te gasa sawi yai botol masigide te wiegi yai denami ebo nai sanda elaluali, te nai abelabo mone te genuai mu dao. Tama agai te botol dalama, tama te denami yai sanda te Jisas toboluba gelali. 
Tiali goli meba te bidaluali bidi, augwaligo homu dwai yali. Augwa hasi po mia siyu, te tiwai po wai, “Magi baso te wiegi yai denami ebo sanda olo dali hagamainu ebowe? 
Dago te nai te bidi dabego abelemainogo egi sogo da, teda dago te mone te 300 kina sigi sogo da, tama te doado bage meni yai we bidi dabe augwaliba magi dao.” Tama te homu elama, augwaligo te webolo wado po wali. 
Tiali goli Jisasgo te po wai, “Dagego te we sęgę mabo tagalao. Magi baso dagego agabolo sęgę mobawe? Te agai wiegi yai kolesaga enabolo ebao. 
Sesemane sogo te doado bage meni yai bidi dabe te augwali dage dali bididuaibao. Tigidali sogo dagego augwali tau siduabo homu idubaso da, teda tų elaluaibao. Tiali goli te ena da, te dage dali sesemane sogo me bidigobeo. 
Te wego yabo homu yali sę, te agai te sę yalio. Agai ena tigiba te denami wel muani te ena gų pageba mumainogo sisi iliyu yai. 
Eno mu po dagebolo obao, te tigidali tǫ pedaide augwaligo te Godigo gesi wiegi yai po pusubo sę ela pabode, te augwaligo e wego te yali sęde po mimi peyu, tama augwali tede homu kone palaibao,” Jisasgo te po wai. 
Te wego te sanda nai Jisasgo toboluba gelali sogo, te sogo te 12 wali pabo bidi me deli, te Judas te Keriot bulu bidi, aga te genuai pris dabe augwali bidibo digi pai. Agai te Jisas augwali nogoba mawainu yai. 
Augwaligo te wabo po odama, te augwali wiegi yai homu pemene yai. Tama augwaligo agabolo te masigi meba maiabo po dąų wai. Tama Judasgo te me sogo te Jisas augwali nogoba muabo sunumi me deli gegebo sę ebo te sogo gagalali. 
Te Juda dabego te yis meni yai bo disąwai bret nai tuabo si pedalali. Tama te polasa gagalobo sogode augwaligo te Pasova nai tuabo sipsip kibu wai eliyu ebo dao. Tama Jisas aga wali pabo bidi dabego Jisasbolo po weyu, te po wai, “Nago homugo dago te tubo nai menaba sisi iligi pelama, tama nago te Pasova nai tuaibawe?” 
Tialima, Jisasgo te augwali si naga tagala palu, tama augwali sibolo te po wai, “Dage si te Jerusalem hanu tomoba piąo. Tama te sene wę tulama sela asobo bidi me deligo dage si te sunumide sueibao. Dage sigo aga wali piąo. 
Aga te be me deli tomoba pabo si da, teda dage sigo te be page bidi agabolo te tiwai po waiyąo, ‘Te Tisa, po ola mabo bidi, agai te po wali, “Te eno ena wali pabo bidi dabe dali te Pasova nai tuabo madi te be habu nigilali te menade elalubowe?” te po wao. 
Tama agai dage sibolo te ugwadu sigide elalubo te be habu ola mawaibao, tede te tebol sai me, duabo sai me te sisi ilai elaluaibao. Dage sigo da tuabo nai te be habude sisi ilao,” Jisasgo te po wai. 
Tialima, te wali pabo bidi si palio. Augwali si te hanuba sabolama, tama augwali sigo te Jisasgo augwali sibolo wali po tiwai gilama yai. Tama augwali sigo te tuabo nai Pasova sisi ilali. 
Te sogo be pio ebode Jisas aga wali pabo bidi dabe dali aselawai. 
Augwali te tebol saide dudulaluyu tama nai tutuladu, tama Jisasgo te po wai, “Eno mu po dagebolo obao, te dage tomode bidi me deli agai ena te ena dali boi bidi ebo bidi dabe augwaligo nogoba mawaibao. Te ena dali megi nai tubo bidi me deligo tama tiaibao,” te po wai. 
Te wali pabo bidi dabe augwali homu sęgę elama, tama augwali deli deligo aga hanalua pabo gagalali, “Te enawe?” te po wai. 
Jisasgo augwalibolo te po wai, “Te dage nogo si olama sągągo si bage te me dedeli tomode dao. Te ena dali te nogo talua te pou tomoba muyu, tubo nai sabo bidi te dao. 
Awe, mu tama, te Godigo Bidi Mu aga isaibao, te agade te tiwai po te Godigo po bukude asęani po tiwai isaibao. Tiali goli te Godigo Bidi Mu te boi bidi dabe nogoba muani bidi da, te aga hobedagia mu ebao! Te bidi aga idago aga me ame nagi menigi da, te usu egi da, aga bugagia bidigi da,” Jisasgo te po wai. 
Augwali te Pasova nai tutuladubadi, tama Jisasgo te bret me deli selama, tama Godiba puba hwi olama, tama pebedama, tama augwalibolo mani. Tama agai te po wai, “Dagego sela tuao. Te eno tigi dao.” 
Tama agai te wain wę tabiali kap me deli selama, tama Godiba puba hwi olama, tama augwalibolo mani. Tama augwali tigidaligo tede wain ąį tudu pela silali. 
Tama agai augwalibolo te po wai, “Te da, te eno kaneme dao, tama te kanemego te Godigo aga we bidi tau somainogo eyu mani po te dąų walobao. Eno te kaneme gelebogo te we bidi hauwa umabo mu tau saibao. 
Eno mu po dagebolo obao, eno te wain du kaneme ąį munu ma tusiąbadi te eno gesi ąį te Godigo we bidi tonalubo madide tubo sogoba usu nigi paibao,” Jisasgo te po wai. 
Tama augwaligo te Godigo nogi ugwaba sabo tęąbi po me deli olama, tama augwali te be tagaluyu, tama Jerusalem hanu bulu badu pelama, tama te Oliv bulu duba pelawai. 
Te Jisasgo augwalibolo te po wai, “Te dage tigidaligo ena taga peyu, tama wi paibao. Magi baso meni. Te Godigo po bukude elalubo po me deli tiwai dao, te Godigo wali po e dao, ‘Eno te kibu sipsip tonaluali bidi elibaso, tama te sipsip dabe wi tedela paibao,’ te po wai dao. 
Tiali goli ena te gų pagede ma hodaluama, tama dage asomainu ena polasa te Galili tǫ pedai teba paibao,” Jisasgo te po wai. 
Pitago agabolo te po wai, “Te e bidi tigidali augwaligo nage taga peyu wi pobaso da, tagalao, magigo meni, te eno nage taga pogobeo,” te po wai. 
Tama Jisasgo agabolo te po wai, “Eno mu po nagebolo obao, megi e sogo hulide, te ba kakaruk po si sogo wasiąbadi, tama nago ena konebeo po te sela sogo waibao.” wali. 
Tiali goli Pitago po bomo elama mu weyu, “Tagalao, te ena nage dali isibaso, te usu dao. Tiali goli eno te nage konebeo po munu me wagobeo. Mu menio!” Tama Jisas wali pabo bidi dabe tigidali augwaligo me te tiwai po naga ola pai. 
Te augwali peyu, tama te gi me deliba sabolali, te gi bulu nogi Getsemani. Tama Jisasgo aga wali pabo bidi dabe augwalibolo te po wai, “Dage ede bidaluiąo. Ena God dali po wagi painu homu ebao.” 
Tama agai te Pita, me Jems, me Jon, te bage sela selama, tama augwali aga dali pali. Megi da, te aga homu moni sęgę eyu, tama aga kone palu te aga dwai homu mu yai. 
Tama agai augwalibolo te po wai, “Te eno homu sęgę mu eyu, te pąde ena isabo homu ebao. Dage ede bidaludu tama bugagia tonaluao,” wali. 
Tama aga dwasianu pelama gana, tama tǫba basi gulama, tama agai gedu haluasa po wai. Te Godigo usu da wida, te dwai denego aga te sogo ela somainu homu yai. 
Agai te po wali, “Aya, nago te tigidali sę ebo usu dao. Eno homugo nago enaba megi te pedalainu ebo te dene dagala samainu homu ebao. Tiali goli nago te eno homu wali me pelamuo. Menio. Nago te naga homu wali naga pao,” Jisasgo te po wai. 
Tama aga ma geasa pelama, tama te wali pabo bidi dabe pila mubo suali. Tama agai Pitabolo te po wai, “Saimon, nage pila mudubawe? Nago te bodolu pąde yagasobo te tonaluabo te usu esiąyu egobe dawe?” 
Tama agai te augwali selabolo te po wai, “Dagego bugagia tonaludu, gedu haluasa po waiyąo. Tiyu te dage usu sabo naigo te dage gege asabuo. Mu tama, duga noma bidi dabe te dwagi yai sę yabo homu ebo dao. Tiali goli duga tigigo bomo sǫą pobao,” agai te po wai. 
Tama aga ma pelama, gedu haluasa po wagi pai. Te aga hasia gedu haluasa po wali tiwai ma wali, te gedu haluasa po tiwai naga Godibolo ma weyu yai dao. 
Tama aga ma aselama suali, te aga wali pabo bidi dabe augwali godege pila mubo suai. Te augwaligo gedu sęgę mu elaluai. Tama augwaligo agabolo te mena po agabolo wainogo yabo te augwaligo me konebeo. 
Jisasgo te sela sogo aga Ayabolo po wagi peyu yali silama, ma aselama, tama agai augwalibolo te po wai, “Dage pila mudu tama toma nedu edubawe? Tama dao! Suao, megi da bidi me deligo te ena Godigo Bidi Mu te dwai sęgę sai bidi dabego nogoba muaibao. 
Dage hodaluama, tama da pinao. Suiąo, te boi bidigo nogoba ena mawainogo ebo bidi te augwali aga dali asai dao,” Jisasgo te po wai. 
Jisasgo po odubadi, tama polo te Judas, te wali pabo bidi 12 te augwali me deli, aga asai. Te genuai bidi hani aga dali asai, tama augwaligo te poa pai hwą bobage hwą ge bainat me sesemone wąbi me te tolasa asai. Te genuai pris dabego me, te Juda dabego bomai po page koneai bidi dabego me, te Juda dabe tobolu bidi dabe badi, te augwaligo te tagala palobaso te augwali Judas dali asai. 
Tama te Jisas augwali nogoba maiabo bidi agai te dąį me deli augwali mawaibao po weyu, te po wai, “Te eno bidi me deliba kisa sigi pelama nono naibao. Te bidi aga te Jisas dao. Dagego aga pageabi elama tulama, tama aga bugagia amua elama, tama aga selasa piąo,” wai. 
Tialima, Judas aga sabolama, tama Jisasba polo pelama, tama te po wai, “Tisa, po ola mabo bidi,” te po wai. Tama agai Jisasba kisa sagaselama, nono nai. 
Tama tibaso, augwaligo nogo Jisasba munama, tama aga pageabi yai. 
Tiali goli te Jisas wali pabo bidi dabe pąde te dolaluali bidi me deli, agai te aga elaluali bobage ge hwą kega selama, tama te tobolu pris bidigo sę ebo bidi elama, tama aga olo togolama, tama tǫba tulaluali. 
Tama Jisasgo te asali bidi dabebolo te po wai, “Dagego ena sagasu, tama dagego te poa pai bobage hwą me sesemone wąbi me tolasa asali, te dagego nai wi sai bidi me deli sagasobo tiwai gilama yainu te yali da, agawe? Magi basowe? 
Tigidali sogode te ena dage dali te Moni Lotu Be tempel tomode dulalu, tama eno te Godigo po dagebolo ola mawai, tama dagego ena nogo tulama pageabi me ebeo. Tiali goli dagego enade megi ebo sę ebogo te Godigo po bukude elalubo po meba te mu pedalumainu ebao,” Jisasgo te po wai. 
Tama aga wali pabo bidi dabe tigidali augwaligo aga taga peyu, tama augwali wi pelawai. 
Tama gesi bidi me deli te Jisas wali asudai, tama agai tigide te tedela yai nami ugwa naga gudasa asiduai. Tama augwaligo aga pageabi elama tuali. 
Tiali goli aga te tedela nami ugwa taga peyu, tama aga tigi olo naga elalubadi te aga wi pai. 
Tama augwaligo Jisas te tobolu bidi prisgo beba odasa pai. Tama tigidali genuai pris me te Juda dabego tobolu bidi dabe me te augwa bomai po page koneai bidi dabe, te augwali aselama, te beba sisinagasali. 
Tama Pita te Jisas pabo wali pali, tiali goli aga te dwasianu digibulu gana bidai. Aga te tobolu pris bidigo be bagulali obo tomoba pai. Tama aga te enesigi bidi dabe dali dualalu, te augwaligo kedau nainu nogani siade te aga tigi kedau neduali. 
Tama te genuai pris dabego me te tigidali kaunsil dabe augwali te bidi dabe meba i olama asobo side, te augwaligo te Jisasgo yali kolesaga po pusumainu yai. Augwaligo te aga ela muabo homu ebaso, tama te dwai sę yali sunumi me deli te gegali. Tiali goli te augwaligo agai dwai sę yali te me gegebeo. 
Te bidi dabe hauwa augwaligo agade te tibo po kisilali, tiali goli augwaligo po te tiwai si me ebeo. 
Tama te bidi meba augwali doligulama, tama tibo po te Jisasba kisilama weyu, te po wai, 
“Dago odali, agai te tiwai po wai, ‘Te eno digi eno te bidi dabego nogogo sę yani te Moni Lotu Be tempel te aluaibao. Tama nosali te be eno te sela sogode gasa dodolama sę yaibao, tiali goli te be te nogogo me sę egobeo,’ agai te po wabo dago odalio,” augwaligo te po wai. 
Tiali goli augwaligo te wali po te me geda muyu, tama te po tiwai si me ebeo. Bidi mego pusali po te gasagi yai tedali dwasianu yai, tama gasa bidigo po me tedali gasagi yai po wai, te tiwai si meni. Te usu ebeo. 
Tama te tuni bidi pris mu te tomode dolaluyu, tama Jisasbolo hanalu wali, “Nago te po deli me wei begelesiąma ebawe? Te nageba kisilama wabo pode te nago magi ebawe?” 
Tiali goli Jisas aga pedauwali panialu, tama te agabolo po me deli wei me ponobeo. Te tuni bidi pris bidigo agaba ma hanalu wali, “Nage Krais, te magi dwai sę deli me isiąwai te Godigo Ogwa dawe, ma meniwe?” 
Tama Jisasgo te po wai, “Te ena tama dao. Tama nosali dagego te Godigo Bidi Mu te Tigidali Bomo Elalubo Godigo dolo nogode dualama asobo dagego sueibao. Tama aga te dagalu tomodu te pǫ me deli daidu dualasa asaibao,” wali. 
Tama Jisasgo te po wabode te tuni bidi pris bidi sębę eyu, tama aga gudaluali ugwa pisila sąyu, tama te po wai, “Dago te gasa bidigo e bidigo yali sęde po wabo me odogobeo. Te tagalao. 
Dagego odalio, agai te Godiba posobo po wai. Dagego mena homu ebawe?” Tama augwali tigidaligo te tiwai po Jisasde wai, “Agai dwai sę yai elalubaso, tama aga isimainao.” 
Megi da augwali mebago gagalama, te aga pesa sąyu yai. Tama augwaligo te nami ugwa pedaigo te aga gedu paniama, tama augwaligo aga elama, tama augwaligo te po wai, “Nago te haniani sęde koneai profet bidi tiwai eyu tama po wao. Dego nage elaliwe?” Tama te ami bidi dabego aga selama, tama aga subigila dodolama elali. 
Pita te aiyadu bidali, te be bagulali obo tomode bididuai. Tama te tuni bidi pris bidigo sę ebo we me deli asali. 
Tama te we agai te Pita aga te siade tigi kedau nedubo suali. Tama te sę ebo wego te aga dolo ponama tonalu, tama te po wai, “Nage me, nage te Nasaret bulu bidi Jisas dali bidai dao.” 
Tiali goli Pitago po weyu, menio te tiwai po wai, “Eno nago te wabo po eno me konebeo.” Tama aga te be obo sunumi pą badu buluba doligi soali. Tama ba kakaruk po me deli wai. 
Tama tede me te sę ebo wego aga ma sulama, tama agai te pąde dodolalubo bidi dabe dali po ma weyu, te po wai, “Te e bidi da, aga te Jisas wali pabo bidi me deli dao.” 
Tiali goli Pitago po ma weyu, “Menio,” wali. Nosali dwasianu bidama gana, te aga pąde dodolaluali bidi dabe augwaligo te po ma Pitabolo wai, “Mu tamao, nage te augwali hani bidi dao. Nage te Galili bulu bidi naga dao,” te po wai. 
Tialima, megi da Pitago po bomonama weyu, te po wai, “Te eno megi te mu po naga wasiąyu da, teda Godigo ena elimainao. Eno dagego te po wabo bidi me konebeo.” 
Tama polo te ba kakaruk hwa si sogo wai. Tama Pitago te Jisasgo agabolo wali po te homugo ma kone palali, “Te ba kakaruk po si sogo wasiąbadi, tama nago po sela sogo wagi soyu, nago ena konebeo po waibao,” wai. Tama Pita aga dwai gela mu wai. 
