﻿Mak.
16.
Sabat sogo bidama silai madi, tama Maria te Makdala tǫ we, te gasa Maria dali, aga da te bidi Jems aga ida, tama te gasa we nogi Salome, te we sela augwaligo te wel me te gasa wiegi yai denami ebo nai me abelai. Augwaligo te Jisas tigiba piligi pabo homu yai, aga tigi polo daumua pidali weyu tama yai. 
Te kigamu mu te wik polasa gagalobo sogo augwali te gų pageba pai. 
Tama pobadi augwa hasi po mia siyu, te po wai, “Dego da tau selama, tama te gų page paniani masigi hogogo bele pogowe?” Magi baso meni, te masigi te genuai bage mu dao. Tama pąba sabolama, tama augwaligo tonono pobadi, tama augwaligo suali, te gų page paniani masigi te me elalubeo. Menio. Bidi me deligo te masigi hogogo bele pai. 
Augwali te gų page tomoba pobadi, tama augwaligo te gesi ogwa bidi me deli te dolo nogo badu dualalubo suai. Aga te bobage tedela ugwa gudai elaluai. Tama augwali noma siyu midigi siyu wi yali. 
Tama agai augwalibolo te po wai, “Dage midigi siyu noma me selamuo. Eno koneani, dage asali te Nasaret bidi Jisas gegagasali, aga augwaligo te ni pedaide walali. Aga hodalualio! Aga te ede me bidibeo! Te augwaligo aga muani pesage te elalubo suiąo. 
Tiali goli dagego te aga wali pali bidi dabebolo wagi piąo, tama Pitabolo wao, ‘Jisas aga te dage asabo madi te Galili tǫba polasa pobao. Te agai polobadu wali po tiwai gilama, te dagego aga te Galili tǫde sueibao,’” agai te po wai. 
Tama te we dabe augwali te gų page tomoba pali te buluba solama, tama augwaligo te gų page tagalama wi soai. Augwali didibili elama, tama augwali homu te midigi siyu dwai noma sali. Tama augwaligo te bidi me deli dali te po deli me wabe, magi baso meni, te augwali wi yai. 
Jisas te kigamu mu te sę polasa gagalobo sogo tede hodaluali. Tama aga hasia te Makdala bulu we Mariaba pedelai. Te we polobadu Jisasgo te dwai haubo noma bidi te nogo a naga olama me badu si elalubadi sela sąwani te we dao. 
Te we Maria agai Jisas sulama, tama aga pelama, te Jisas dali wali bilali bidi dabebolo te aga suali po wagi pai. Te bidi dabe augwali homu sęgę elama, tama augwali gela weyu bidaludai. 
Maria agai te po augwalibolo wai, “Jisas aga te bidibo ula elalu bidibo tama eno sualio.” Tama augwaligo te po odama, tama augwaligo homu te poba dąų me wabeo. 
Tama nosali te wali pali bidi sigo te moni hanu Jerusalem tagalama, tama te sunumidu pai. Tama Jisas te gasagi yai hasegelama, tama augwali siba pedaligi pai. 
Tama augwali sigo aga sula koneama, tama augwaligo te po te gasa wali pali bidi dabeba pusugi pai. Tiali goli augwaligo te augwali sigo wali poba homu dąų me wabeo. 
Nosali badu te wali pali bidi dabe nogo si olama sągągo deli te augwali dugulama nai tubadi, tama Jisas te augwaliba pedalai. Te augwaligo agai wali poba augwa homu dąų me wasiąbaso, tama agai augwaliba wado ilali. Magi baso meni, augwaligo olo te palialu, tama te we bidi augwaligo suali, aga te ma hodaloai yali po wabo te augwaligo homu teba dąų me wabeo. 
Tama agai po augwaliba weyu, te po wai, “Dage te tigidali tǫ habu pedaiba pelama, tama te enade gesi wiegi yai po te tigidali we bidiba pusa mao. 
Te enade konealubo po dąų olama, tama aga homu enaba tialuyu tama te baptais sabo bidi, aga te Godigo ma dobola selama, tama aga bidi da waibao. Tiali goli te enade te konealubo po dąų me wasiąwani bidi, aga te po tų ebo sogode hagawaibao. 
Godigo te bomai sę meba te enade homu dąų wabo bidi dabego nogode pedalumainu ilaibao. Te eno nogide augwaligo te dwai haubo noma bidi dabe sela sąbo sę yaibao, tama augwaligo te bidi dabego odisąwai gesi noma po te pusuyu yaibao. 
Te augwaligo augwa nogo te bidi gąų kelebo dwai hasamaniba mubaso, ma te konesiąbadi augwaligo te bidi isibo nai tubaso da, teda te hasamanigo me te isibo naigo me augwali dologobeo. Tama augwaligo nogo te gasi sai we bidiba mubo si da, tama te gasi sai bidi dabe usu ma yaibao,” Jisasgo te po wai. 
Genuai Bidi Jisas agai po augwaliba pusa silama, tama Godigo aga selasa te dagaluba holai. Tama megi da, aga te Godigo dolo nogo badude dualalu bidibao. 
Tama te wali pabo bidi dabe augwali pelama, tama augwaliba te ola mani po te tigidali tǫ pedai badu pelama, te po pususu biligi pai dao. Tama Genuai Bidi te augwali dali sę eyu, tama te augwaligo nogode te haniani bomai sę ebogo agai hania hanilali, te augwaligo ola mabo po te mu po naga dao. 
