﻿Luk.
7.
Te Jisasgo we bidibolo te po pusa silama, nosali Kaperneam be nani tomoba pali. 
Te Rom ami genuai bidigo te 100 ami bidi dabe tonalubo bidigo te aga dali homu kęą pelama sę ebo bidi isai hagede seanio. 
Tama te ami genuai bidigo Jisas te Kaperneam hanude bidibo po odama, te Juda dabe tobolu bidi me badu tagala palali. Jisas asama, aga sę ebo bidi dwagi yai ma ilaimainu, te bidi dabebolo Jisas oda sigi piąo wai. 
Tama te Juda tobolu bidi dabe Jisas pageba sabolama, Jisasbolo hanalua suali. Augwaligo agabolo te po wali, “Te Rom ami genuai bidi dwagi yai bidi da. Agai da Juda dabe dali homu kęą pabo da. Agai dago bomo yai po ola mabo be sę ebo agai masigigo da tau sali. Tama tibaso, nago agai dwagi yai sę wei ponao,” augwaligo te po wali. 
Tama Jisas augwali hodobo pali. Jisas te bidigo be pąde asobadi yaide, te bidigo aga abagi dabe tagala palama, Jisasbolo te po wagi pali, “Genuai Bidio, nage eno beba asomaina homu ebo tiwai egobeo. Ena geswai wiegi yai bidi menio. Ena genuai bidi meni yai baso, nage eno beba asobo usu egobeo. 
Tama tibaso, ena me ena digi nage pageba asobo homu ebeo. Tiali goli, nago po naga wao, eno sę ebo bidi dwagi yai eyu gesa paibao. Ena me gasa bidi dabego bomo dologode bidibo bidi dao. 
Ena me te ena genuai nogi elalubo bidigo tonaluyu bidibo dao. Tama eno digi te ena ami bidi dabe te ena dologode augwali bidibo dao. Tama eno me delibolo te po weyu, ‘Nage pao’ obaso da, teda aga pabo dao. Tama eno gasa bidi me dali te po weyu, ‘Nage asa’ wali da, teda aga asobo dao. Tama eno ena sę ebo bidibolo te po weyu, ‘Nago te sę yao’ obaso, teda agai te sę ebo dao,” te Rom ami genuai bidigo te po wai. 
Tama te po wali Jisasgo odama, noma sali. Tudiba begelama, aga wali asali we bidibolo te po wali, “Te Israel bage tomode me Godibolo tama tiwai homu ebo bidi eno me suai menio. Megi dagebolo te mu po obe dao,” te po wali. 
Te ami genuai bidi aga po sela asali abagi dabe te ami genuai bidigo beba ma begasa pelama, te sę ebo bidi bugagia ma bidibo suali. 
Te bidi tau sali, te sogo do Jisas be nani me nogi Nainba pali. Aga wali pali bidi dabe me, umabo we bidi me aga dali pali. 
Te be naniba sabaligi pobadi, te isai bidi me deli te pubaligi peyu tolasa soabo sualio. Te isali bidi wilawe wego ogwa deli digi tama pubaligi su sobaso, aga ida me we bidi me hauwa wali asali. 
Tama Genuai Bidigo te wilawe we sulama, moni hobede mu eyu, “Gela wagio” wali. 
Nosali Jisas aga pelama, te isai bidi muani ni gologobe wa diąbadi, te ni gologobe wa tolasa asali bage dolaluali. Tama “Ogwa bidi, hodaluao, eno mu po nagebolo tama obe dao,” Jisasgo te po wali. 
Tama te isali bidi hodaluama, po wabo gagalobadi, Jisasgo aga idabolo ma mani. 
Tama te tigidali we bidi moni wi elama, augwaligo Godigo nogi ugwaba sali. Augwaligo te po wai, “Moni Godigo po ola mabo bidi da tomode megi e pedaligulai yabao. God aga we bidi tau sagasu, te asai yabao.” 
Jisasgo te tiali po tigidali Juda dabego buluba me, te bogo badu elalua pabo buluba me, pela silali. 
Te Jon aga wali bilibo bidi dabego Jisasgo ebo sę suali po Jonbolo pusa mani. 
Tama Jon aga wali bilibo bidi si i wali. Tama te bidi sibolo “Genuai Bidibolo hanalugi pao,” wali, “‘Nage Jongo te nosali asaibao wali bidi dawe, ma gasa bidi me asobo dago tonaluaibawe?’” Jongo tama Jisasbolo wao po wali. 
Tama tega si Jisas pageba asiyu, “Te we bidi baptais mani bidi Jongo dadi si nage pageba nage te asaibao wali bidi nage tama dawe, ma gasa bidi me tonaluagawe, po omainu dadi si tagala palalio,” te po wali. 
Te sogo naga tama Jisasgo olo gasi me, dwai gasi mu me, te dwai noma bidi elalubo bidi me dwagi yai ma ilali. Tama gedu widai we bidi me gedu ma pedalali. 
Te po obaso, Jisasgo augwalibolo te wei ponoyu te po wai, “Dage pelama, Jonbolo te tigidali sę dagego odali po me te suali sę me te po tigidali agabolo wagi pao. Dagego e subao, te gedu widai bidi dabe augwali gedu usu ma iliyu, te sągą dwai bidi dabe augwali bugagia ma bilibo dao. Te oiyabe yai bidi dabe augwali tigi wiegi yai pedaliyu, tama olo degai bidigo po ma odobo dao. Te isai bidi dabe augwali ma hodaluyu, tama te magi nai meni yai bidi dabe augwaligo te Godigo wiegi yai gesi po odobo dao. 
Tama bidi enade homu si isiąma tama ena aga tudiba musiąbo bidi, te bidi aga wiegi yai homu pemene yao,” Jisasgo te po wai. 
Tama tede bidali we bidibolo Jisasgo te po hanalu wali,” Polobadu dage te bidi meni yai buluba pali, te bidi Jon dagego sugi pali, te dagego magi nai sugi paliwe? Ma, dagego te awi dili me deli, te waligo memenege ilibaso sugi paliwe? Menio. 
Te menio. Magide suainu pai dawe? Wiegi yai ugwa gudali bidi dagego sugi paliwe? Te menio. Te tobage ugwa gudalubo bage, te doado bage umabo munalubo dabe, augwali te genuai gavman tuni bidigo wiegi yai be dabede bidibo dao, te bidi meni yai bulude meni. 
Tiali goli dage magi baso pai dawe? Ma, te Godigo po pusubo profet bidi me deli sugi pai dawe? Awe, eno dagebolo obao, e Godigo po pusubo profet bidigo da, agai te gasa te Godigo po pusali profet bidi dabe te tigidali aiyaba elalualio. 
Te Jon agade te gasa profet bidigo Godigo wali po polobadu asęai dao, ‘Suao, te eno po pusabo bidi tagala palobaso, tama aga nage asabo digi polasa paibao. Agai nago tų sisi iligi paibao.’ 
Ma wadolu, Jisasgo te po wali, “Eno dagebolo obe dao, e tǫde ame nabo we bidi tigidali Jongo aiyaba elalualio. Tiali goli, te Godigo obo tomode bidibo moni nogi meni yai bidi me agai nogigo te Jon aga moni nogi aiyaba elaluaibao,” Jisasgo te po wali. 
Te bidi Jongo baptais mani we bidi dabe me, te baptais sali te takis sabo bidi dabe me, augwaligo Jisasgo wali po odolama te homu yai, Godigo mu po dolo wali da homu yalio. 
Tiali goli, te Godigo augwali tau sainu yali homu Farisi sibi dabe me, Juda dabego bomo yai po ola mabo bidi dabe me, augwaligo te homu sela sąnama, “Jongo da baptais mabo hagelabo,” te po wai dao. 
Ma wadolu, Jisasgo te po wali, “Dage megi bidalubo bage magideba usu nagawe? Dage magi nai tiwai yagawe? 
Dage da, te maketde gagali ebo wai puluba ąǫ, te elaluba. Te wai puluba mego hai ulugu weyu, ‘Dago ona sulubadi goli, dagego tęąbi ebe. Me ma, dago gela obadi goli, dagego gela wabe.’ Magi baso meni. 
Te we bidi baptais mabo bidi Jon asama, nai gisilu, bomai wę gisilu yali goli, dagego te agade ‘Aga da, te dwai noma bulalubo bidi dao,’ te po wali. 
Me ma, ena Godigo Bidi Mu asama, nai tuyu, ąį tuyu ebadi goli, dagego enabolo ‘Buluba sela sąwai bidi dabe, takis sabo bidi dabego abagi dao,’ wai dao. Me dagego enade ‘Bomai ąį me nai e tudu gebo dwai bidi dao,’ wai dao. 
Tiali goli, Godigo po wali pabo we bidi dabebolo Godigo kolesaga mu augwalibolo mu ola mabo dao,” Jisasgo te po wali. 
Te Farisi bidi mego Jisas agai beba nai tuagasomainu eyu, i wali. Tama Jisas agai beba pelama, nai tuainu, ni nami daide dulalu tiąluali, Juda dabe augwaligo nai tubo sę ebogia. 
Te be nanide dwai dwai sę idubo we me deli bidai. Te wego Jisas te Farisi bidigo bede bidibo po odama, masigigo nigai genagi deli denami yai wel pągąnalubadi, te beba sisali. 
Jisasgo sągą pagede tudi badu dolaludu, gela weyu, aga gela guago Jisas sągą sawali nadugwali. Tama te we aga bobobage tobolu nisigo Jisasgo sągą sawali holama, sągą sawali si nono nenama, te denami wel aga sągąde pilali. 
Tama Jisas i wali Farisi bidigo aga homude ‘E bidi Godigo po ola mabo bidi tigi sogo da, teda te mena tama bilibo wego ena dią yagasobo we homu egi dao, ma mena tama bidibo we yaliwe wagi dao,’ te Farisi bidigo te homu yali. 
Jisasgo te Farisi bidibolo te po wali, “Saimon, nagebolo eno pusabo po me deli elalubao.” “Tisa bidi, enabolo pusao,” Saimongo te po wali. 
Jisasgo tama gagalali, “Gasa bidigo bidi me sibolo mone negeli mani. Bidi mebolo 100 kina mobadi, mebolo 10 kina mayu yali. 
Tama nosali tega sigo te mone wei ponabo ąǫ isąbaso, agai mone negeli si sela sąwani. Mena bidigo te mone negeli munani bidi dali homu mu kęąluaibawe?” 
Saimongo te po wali, “Eno homugo mone genuai mu sali bidigo te bidi dali homu mu kęąluaibao,” wali. “Nago po dolode walao,” Jisasgo te po wali. 
Te sogo naga Jisas te we pageba ugwaba begegi soyu, Saimonbolo te po walio, “E we nago subawe? Ena nago beba asali goli, nago ena bugagia gesesiąwai, eno sągą ąį tela yabo ąį me mawai meni. Tiali goli, e wego gela guago eno sągą sawali ąį tedalama, aga bobobage tobolu nisigo eno sągą holali. 
Nago beba ena asobadi, dwagi yai homu elama, nago ena nono nabe. Tiali goli, e wego da, ena asobode gagalama eno sągąde nono nabo togobeo. 
Nago wel eno toboluba me mube. Tiali goli, e wego dwagi yai denami welgo eno sągą sawali usu nani. 
Eno nagebolo obe dao, agai enade mu tia pabogo agai dwai dwai sę yali mu sela sąwani nama e ola maniąo. Mego ena dali homu dwasianu kęąluba, ta dwai dwai sę yali dwasianu sela sąwani te ola mobao,” Jisasgo te po wali. 
Tama Jisasgo te webolo te po wali, “Nago dwai dwai sę yali polo sela sąwani,” wali. 
Me badu ni namide dugulaluali we bidi augwa homugo te po wali, ‘E niwai bidi yaliwe? Agai we bidigo dwai dwai sę yali sela sąbo dao,’ augwaligo te po wali. 
Tiali goli, Jisasgo te webolo “Nago enaba homu beagasaligo nage sana palali dao. Nage dwagi yai homu dali pao,” wali. 
