﻿Luk.
11.
Me sogo Jisas te bulu me deli badu pelama, te Godibolo gedu haluasa po olama, silama, te aga wali bilibo bidi mego agabolo te tama po wai, “Genuai Bidi, te nago dabolo me te Godibolo gedu haluasa po wabo sę ola mao. Te bidi Jongo aga wali bilibo bidi dabe ola manigia yao,” wali. 
Tama Jisasgo augwalibolo te po wali, “Godibolo po weyu, e tama waiyąo, ‘Dago Aya, dago homugo nago dwagi yai nogi ugwaba somainao. Dago homugo nago we bidi tonalubo sę asomainao. 
Da bidibo dononama dago homugo tubo nai mao. 
Gasa bidigo dabolo dwai sę ebaso da, dago te sela sąbo dao. Tama dago homugo nago te dago dwai sęde sali sęgę me sela sąyao. Nago da te dwai sę emainu bomona sinabo pesageba sela pigio,’ te po waiyąo,” wali. 
Te Jisasgo aga wali bilibo bidi dabebolo te po wadolama ma weyu, te po wali,” Dage me duga abagigo beba huli tomode pelama, agabolo weyu, ‘Abagi, ena te tubo nai bret negeli sela mao. 
Eno abagi me eno beba asali goli, eno maiabo nai menio,’ waibao. 
Te be tomode bidibo bidi naga abagigo po wei ponoyu, te po waibao, ‘Ena hodoligio. Be tų polo paiyai dao. Ena me, ena wai me te pibo bedugude ugwa banuama piai dao. Ena hodaluama, nage eno magi nai me magobeo,’ te po waibao. Megi da, magi yaliwe? 
Eno dagebolo obe dao, aga naga abagi goli, aga homugo eno magobeo homu yali. Tiali goli, aga abagi hale isąnama, hauwa sogo hanaludu geyu bidibaso da, te aga ma hodaluama, te tuabo nai mawaibao. Te po page tama telalubo. 
Godibolo po weyu tama tiao. Nago mu meni ebo nai sainu da, hanaludu bidama, nosali Godigo nagebolo mawaibao. Hauwa sogo gegedu bidibaso da, Godigo nagebolo ola mawaibao. Be tųba nogogo begobego udu bidibaso da, ta nagebolo dala munaibao. 
Magi baso meni. Tigidali bidigo gedu haluasa po God dali hanalu wabo bidi dabe, augwaligo te nai saibao. Te nai gegebo sę ebo bidi, agai te nai sueibao. Tama te be tųba elebo bidi, teda Godigo te bidibolo tų dalobo dao,” Jisasgo augwalibolo te po wai. 
Te Godibolo po wabode, Jisas agai augwalibolo te po me wali, “Dage meba duga ogwago sųgų tuainu hanalu badi yaide, dwai hasamani mawaibawe? Menio. 
Ba ge tuainu hanalu badi yaide, bidi gąų kelebo nai hwą mawaibawe? Menio. 
Dage dwai dwai sę ebo bidi dabe goli, duga wai dabebolo dwagi yai nai mabo dao. Dagalude bidibo Aya me aga Dwagi Yai Mobo Bidi sainu hanalubo bidibolo mu mawaibao. Tama agai te dwagi yai nai mabo kolesagago dagego mabo kolesaga aiyaba mu elaluaibao,” Jisasgo te po wali. 
Me sogo Jisasgo te po wasiąbo dwai noma haubo bidi sela sądubadi, te dwai noma haubo bidigo te bidi tagala palobadi, te bidigo nosali po ma wabo gagalali. Tama te we bidi dabego te sę ebo sulama, noma mu salio. 
Tiali goli, mebago ma “Te dwai noma tobolu bidi Belsebulgo bomo menama, te dwai noma te sela sąbo dao,” wali. 
Te bidi mebago Jisas tola sabo bono gaga muyu te aga habela palomainu, te po wali, “Godigo bomo nagebolo mani dago sumainu wida, te nago da noma sabo bomai sę me deli ela suao,” te po wali. 
Tiali goli, Jisasgo augwaligo ebo homu koneama, te po wali, “Te deli bulu tǫ kantri pedai bidi hani si ma bugulama, te boi hwįbaso da, teda polo tama te bulu tǫ pedai dolaibao. Ma, te deli ayago togwali hani sibi tomode bugulama digi hwįbaso da, teda te deli hani sibi bidibo page dolaibao. 
Tama te Satango hani bage si bugulama, hwįgi sogo da, teda magi ilama agai te tobage sę ebo bomogo te nai dabe tonalugi dawe? Dagego enabolo dwai noma haubo tobolu bidi Belsebulgo te enabolo bomo mawai digi eno te sę ebao, te po dagego obao. 
Mu tama ena te Belsebulgo bomo ena dali elalubaso, eno te dwai haubo noma bidi dabe sela sąsą bilibao te homu ebaso da, teda dego dage wali pabo hani bage augwali me te tau sabo sę egi dawe? Tiali goli, te duga hani dabego digi te dagebolo te po dolo ola mobaso, te dagego konebao, augwaligo te agai bomogo te sę ebo menio. 
Te sę ebogo te dagego geda muani sę te ola mobao. Dagego geda mubo po obao. Eno e sę ebo te Godigo bomogo naga te dwai haubo noma bidi dabe sela sąsą bilibo dao. Te sę ebogo te Godigo we bidi tonalubo sę dage pageba asai elalubo te ola mobao,” wali. 
Jisasgo te po ma wadolali. “Bomai bidi me deligo aga te boi hwįbo bainat hwą te nai dabe dali te aga bede sisi elalu, aga be tonalubadi yaide, te bede mubo nai dabe bugagia munalubo da. 
Tiali goli, te boma pai bidi me deli pedelama, te boi sulama te bidi dali hwįnama, te bidigo bomo aiyaba elalubaso da, teda te be page bidi aga tobade tiąduali te boi hwįbo nai dabe tigidali te bomai bidigo sela pabo dao. Tama te be page bidigo polobadu wi sali nai te bomai bidigo ma selama, tama dobabo dao. 
Bidi mebago ena dali homu muisąbo bidi da, te bidigo ena dali te boi bidi tiwai te ebao. Ena sipsip tonalubo tau sisąbo bidi da, te agai eno sipsip dabe osalubo bidi tiwai eyu te ebao,” Jisasgo te po wali. 
Jisasgo te po wabo ma gagalali, “Te dwai nomago bidi me taga pelama, wa pai buluba toma nabo pesage gegegi pobao. Tiwai pesage me susiąbaso da, aga homugo tama te ebao, ‘Ena taga soali beba ma geasa paibao.’ 
Tama tibaso, bugagia ma dodolama, pobele bage meni yai beba ma pabo ąǫ te bidi pageba peyu te ebo dao. 
Tama ma pelama, te 7 te tama dwai haubo noma bidi dabe agai odasa asobo da. Tama te gasa dwai noma haubo bidi dabego dwai dwai sę ebo kolesaga te ebogo te hasia dwai mobo haubogo ebo dwai kolesaga aiyaba elalubo dao. Augwali asama, aga dali te bidi ma te tuagasobao. Tama tibaso, polobadu yali sę tagalama, ugwanu mu te egi pobao,” Jisasgo te po wali. 
Te Jisasgo te genuai we bidi hani tomode te po dagayu, te po obadi yaide, te we me deli augwali tomode bididuali wego te po dagą olama, te tiwai po wali, “Nage ame nenama negali we da, bugai homu ebadi bogo dao,” te po wali. 
Tiali goli, Jisasgo wei ponoyu, te po wali, “Te mu dao. Tiali goli, Godigo po odama, wali pabo we bidi augwali dwagi yai homu mu ebadi bogo dao,” wali. 
Te we bidi umabo Jisas odoga sagasobaso, agai te po wali, “Dage megi e sogo bidalubo hani we bidi dabe da, te dwai mu da. Dagego enabolo te ‘Godigo bomode te bomai sę ebao te koneainogo te sę ola mao,’ po wabo yabao. Tiali goli, dagego te bomai sę yabo dąį tiwai ilibo dagego me sugobeo. Menio. Te Godigo te profet bidi Jonabolo polobadu yaligia enabolo me te sę ebo dagego sueibao. 
Polobadu Godigo po ola mabo bidi Jona aga isali tiwai. Tama ma hodolama, agai Godigo po te moni hanu te be nani nogi Ninive tede bidali we bidibolo Godigo po pusigi pali. Tama te tiwai ena te Godigo Bidi Mu te dage megi bidibo bagebolo pedelaibao. 
Te Godigo te we bidi augwali po tų ilabo dąį ilali side, te e tǫ pedai saut badu bidali genuai nogi yai we kwin agai te megi e sogo bidalubo we bidi dabego dwai sę yali po hania hanilama pusaibao. Magi baso meni. Te kwin we bogo badu mu bidali goli, te aga polobadu te Juda dabego king bidi nogi Solomongo dwagi yai kolesaga ebo po odai hagede, digibulu buludu genuai bulu tonalubo we asai dao. Tiali goli, eno Solomon aiyaba elalualio. Eno nogigo me agai nogi aiyaba elaluali goli, dagego eno po odobe dao. Tama dagego eno po odisąbaso, te Godigo te we bidi po tų ebo sogo te genuai wego ‘Dagego te dwai sę te yaliao’ po waibao. 
Polobadu Godigo po pusa mabo bidi nogi Jona agai te Ninive we bidibolo Godigo po pusa mobadi yaide, augwaligo odama, dwai dwai sę tagalai dao. Tama eno Jona aiyaba elaluali goli, dagego eno po odobe dao. Nosali Godigo we bidi po tų ela mabo sogo te Ninive we bidigo dagebolo ‘Dwai sę dagego te yaliao’ po waibao,” Jisasgo te po wali. 
Jisasgo te po ma wadolama weyu te po wali, “Te bidi dabego te lam sole udulama, te be dedageba aiya muyu, ma te baket me deli tomoba dualogobeo. Menio. Te tebol daiba ugadu munama, tama te be tomoba asobo bidi dabego te sole sumainu, sole mubo tebol daiba mubo dao. 
Naga tigigo sole te naga gedu da. Naga gedugo be ula bugagia suyu, naga homu kolesaga dwagi yai yaibao. Tiali goli, naga gedu doyu da, teda nago homu kolesaga me te be hulia selama dwaibao. 
Naga tolalubo sole ula sula sidali weyu, bugagia tonalu dua yao. Tiyu nagede te elalubo ula te be hulia sai pedelabuo. 
Te naga tigide tigidalide te genuai ula usu nai eladu da, te me badu hulia sisąma, te naga tigi tigidalide ula naga usu nai elaluaibao, te lam sole ula elalubogia yaibao,” Jisasgo te po wali. 
Te Jisasgo te po silama, Farisi bidi mego agai beba aga dali nai tuagasao wali. Tama tibaso, Jisas te be tomoba pelama, nai tuainu dugulaluali. 
Jisas agai te Farisi dabego nogo wę telabo sę wali pisąma, nai polo tubaso, te Farisi bidi noma sai. 
Tama Genuai Bidigo te po wali, “Dage Farisi dabego te kap dabe me, pou dabe me te eda badu bulu badu meda elalubaso, te bugagia dua digi me te ąįde telabo dao. Tiali goli, dagego homude dwai sę yabo konealubao, gasa bidigo nai sulama, eno somainawe homu ebo bage dao. Tama te ebogo homu dwai dao ola mabo dao. 
Dage da, te mu umawai bage te yabao. Te nai dabe bulu badu nigali Godigo te nai dabe tomo badu me nigibe homu eba, agawe? 
Tiali goli, te duga munalubo pou dabe, kap dabe tomode munalubo nai dabe te nai meni yai bidi dabebolo menama, dagego te tiwai kolesaga eyu da, te dage magi dwai meda meni yai wiegi yai mu ma yaibao. 
Dage Farisi dabego duga gide ebo yalawai nai dwasianunu selama, Godibolo mabo dao. Te tama sę da dagego ebadi goli, te dagego doloba pai kolesaga ebo tagalu, te sęgę sai we bidi tau sabo menio, me dagego te God godolo mu ebo kolesaga ebo menio. Te tama tebo sę ebogo dage dene genuai mu saibao,” wali. 
“Dage Farisi dabe, dage dua dao. Te dage te Juda dabego bomo yai po ola mabo beba pelama, te nogi elalubo bidi duayabo pesageba dugawai homu ebo dao. Me ma, we bidigo maketde dage sulama, genuai bidi dao omaina homu ebo dao. Tama te ebogo dage dene genuai mu saibao. 
Dage dua tama dao. Dage da, te isai bidi te gų pagede pubulai madi elalubo te konesiąma, te bidi dabe te daide ugadu bilibo tiwai ebo dao. Te dage bulu badu tonobo te wiegi yai da homu ebao. Tiali goli, tomo badu da, dage mu dwaliao. Tama dagego gasa we bidi meda ilibo sę yai dao. Te sę ebogo nosali dage dene geswai saibao,” Jisasgo te po wali. 
Te Juda dabego bomo yai po ola mabo bidi mego agabolo te po wali, “Po ola mabo bidi, nago te tama po wabogo te dago nogi me dolobao.” 
Jisasgo wei ponoyu, te po wali, “Dage te bomo yai po ola mabo bidi dabe me nosali dene genuai saibao. Dagego gasa we bidi tudiba sęgę yai walu mu te abilibo ąǫ te ebao. Tiali goli duga nogo dwasianu debalama, tau sabe dao. 
Polobadu duga nǫųgo God aga po pusa momainu tagala palali profet bidi dabe ela muai dao. Tama dagego te pubulali madigi gų page ma aulubao. Tama te ebogo dage nosali genuai dene saibao. 
Tama tibaso, Godigo dwagi yai kolesagago te po polobadu wai dao, ‘Te eno po pusa maiabo profet bidi dabe me, te eno po pusigi pomainu tagala palobo te aposel bidi dabe me, te eno augwalibolo tagala palaibao. Tama telama, augwaligo te bidi dabe me badu elu, me badu olo sesanama, osogo elaibao,’ te po wai dao. 
Tama tibaso, megi bidalubo bage te tigidali Godigo po pusa mabo bidi dabebolo polobadu bidali we bidigo yali sę wei siyu, dene saibao. Te Godigo e tǫ nigali sogo gagalasa asali, te megi e bidibo sogoba usu nagasu, te yali dwai sęgę te megi bidalubo we bidi dabede wei ponaibao. 
Polobadu augwaligo te Godigo po pusa mani profet dabe ela muani. Te bidi me nogi Abel elali. Te sogode gagalasa elala asali, te siminagasu, te bidi Sekaraia ela muani. Te bidi Sekaraia te Moni Lotu Be tempel tomoba pelama, dolalugi pali. Aga te Godibolo nai ula mabo sia nogobo alta pesage pagede bidali. Te habu mu selali pesage si tomo agebelede bidibadi yaide, augwaligo aga ela muani. Te tiali pode eno mu tama obe dao. Te tiali wei siyu megi bidibo we bidi dabe augwali moni dene mu saibao. 
Dage bomo yai po ola mabo bidi dabego te mu po dualigi menigi sogo da, teda te we bidigo bugagia konegi da. Tiali goli, dagego te po dualali. Dagego te po bugagia odisąwai, gasa we bidigo odainu sinabadi yaide, dagego augwali togolaliao,” Jisasgo te po wali. 
Te Jisas te bulu tagalama pobaso, te bomo yai po ola mabo bage me, te Farisi bage me, augwaligo agade dwai homu eyu, te aga nogi dolobo posobo po wabo gagalali. Augwaligo agabolo te haniani po hauwa bage mu hanalu walio. 
Te augwaligo te bidi Jisasgo wabo po me geda mubo wenaga suai hagede, te hanalubo po hauwa bage unula dogia sąwanio. 
