﻿Luk.
15.
Te takis sabo bidi dabe dede, dwai kolesaga ebo bage me, augwali hauwa Jisas pageba asali, agai ola mabo po odainu hagede yali. 
Tama te Farisi bidi hani dabe me, te Juda dabego bomo yai po koneani bidi dabe me, augwaligo hagelabo po weyu, te po wai, “E bidigo te dwai sę ebo we bidi pagebo dao, augwali hodobo beba pelama, nai tugi pabo dao,” wali. 
Augwaligo te po obaso, tama Jisasgo augwalibolo e po begelama pusuyu, te po wai, 
“Dage tomode bidi mego te kibu sipsip bidi sese nogo a naga te 100 elalubadi, tama te sipsip me deli hagabaso, te bidigo mena sę yaibawe? Te kibu sipsip page bidi agai te bidalubo sipsip te tubo nai sabo madide osogo taga pelama, tama te hagawai sipsip gegegi paibao, nono ebo menio, bugagia gegebo. 
Gegegi pelama, subaso, teda dwagi yai homu eyu, te kibu sipsip nagede auwasa paibao. 
Tama pelama, aga beba sabolama, aga hani bidi dabe me, abagi dabe me i olama, deliba sisinama, augwalibolo te po waibao, ‘Ena dali dwagi yai homu yao. Eno kibu sipsip hagawai. Te eno gegelama, eno salio. Dagego ena dali dwagi yai homu yao,’ te sipsip page bidigo te po waibao. 
Eno dagebolo obao, te tiwai te doloba pai we bidi hauwa olo bidibadi, teda dagalude te ensel dabe dwagi yai homu ebo dao. Tialima, dwai sę ebo bidi me deli aga homu begelama, te aga dwai sę yali tudiba mubaso da, teda te dagalude ensel dabego te moni dwagi yai homu pemene mu yaibao,” Jisasgo te po wali. 
Jisasgo te po me wali, “Me ma, we mego mone ge nogo si elalubadi, te mone ge me deli te be tomode hagabaso, tama te wego magi sę yaibawe? Te wego sole domonama, te hagawai masigi te be tomode gegebo gagalaibao. Tama agai te be hogomu poalama, te pobele bage dabe deliba sisiniyu, gegaibao, nono ebo menio, bugagia gegebo. 
Gegelama, subaso, teda dwagi yai homu eyu, aga hani dabe me, abagi dede me i olama, deliba sisinama, augwalibolo te po waibao, ‘Ena dali dwagi yai homu yao. Ena hagawai masigi ma sali,’ te wego te po waibao. 
Eno dagebolo obao, dwai sę ebo bidi me deli aga homu begelama, dwai sę tudiba sąbaso da, teda Godigo ensel bidi dabe augwali dwagi yai homu mu ebo dao, te wego te hagawai masigi ge gegelama ma sali gilama tiwai,” Jisasgo te po wali. 
Te Jisasgo te we bidi dabebolo po me weyu, te po wai, “Te bidi mego ogwa si bidali. 
Tama te i badu bidigo aga ayabolo te po wali, ‘Aya, nago doado bage dobayao. Eno nosali saibao homu yali doado bage enabolo megi tama mao,’ te nosali sabo hagela ebo homu elama, te po wali. Te i badu bidigo te po olama, aga ayago aga doado bage tigidali aga ogwa sibolo dobolama, mani.” 
“Te dwasianu bidama, i badu bidigo aga sali doado bage munama, tama gasa bidigo abelama, te i badu bidibolo masigi dabe mani. Tama te i badu bidi aga doado bagede sai mone tigidali selama, gasa digibulu tǫba mu pelama, bidigi pai. Tede bidibadi, aga dwai dwai haniani sę eyu, hagoma homu ebo kolesaga elama, aga mone tigidali besela sąnama dolama tagalalio. 
Tama aga mone tigidali sia sali. Masigi sia selama, tama te sogo te tǫde moni nasi yali. Tama te gesi bidi nai meni yai bidi bidali. 
Nai meni baso, aga tede bidali tǫ page bidi me deli pageba pali, tubo nai sabo sę emainu yai. Tama te tǫ page bidigo te gesi bidi aga giba tagala palali, te aga kibu tonalubo sę emainu yai. 
Tama te gesi bidi moni nasi baso, agai te homu yali, ‘Eno te kibu dabego tubo ni du dabe tugi sogo da, teda usu igi da,’ wali. Tialima, bidi mego agabolo tubo nai mabe.” 
“Te aga homu kolesaga ma hasegelama, aga tedali homu ma yali. Aga te homu yali, ‘Eno aya aga sę ebo bage augwaligo tubo nai hauwa mu munalubadi goli, ede ena nasigo tama isaibao. 
Ena edu taga pelama, eno aya pageba paibao. Teba pelama, eno agabolo te po waibao, “Aya, eno Godigo gedude dwai sę yali, nago gabidide me eno dwai sę yalio. 
Hasia ena nago ogwa bidali goli, ma eno dwai kolesaga yali. Te megi nago enabolo ogwa olamuo. Enawe nago sę ebo bidi bidagawe?” ’ te gesi bidigo te homu yali.” 
“Te homu elama, te bulu taga pelama, tama pelama, aga aya pageba painu yai. Tialima, digibulu aga tomode asodubadi, aga ayago aga asobo suali. Tama ayago agabolo homu dene eyu, aya aga ogwanu pageba udulama pali, te nogogo pageali, te gesabide nono nani. 
Tama te gesi bidigo aga ayabolo te po wali, ‘Aya, eno Godigo gedude dwai sę yali, nago gabidide me eno dwai sę yalio. Ena gesuai bidi menio, dwai bidi dao. Tama tibaso, nago enabolo te ogwa da po olamu dao,’ te po wali. 
Tiali goli, aga ayago aga wabo po togwali, te sę ebo bagebolo te po wali, ‘Polo pao, te dwagi yai bobobage ugwa sela asao, aga tigide bulao. Dwagi yai nogo mou sela asao, aga nogode holoyu yao, sągą nadoba me aga sągąde buluyu yao. 
Te sa muani kibu kau wai selama, elao. Da dwagi yai homu eyu, genuai nai tuinao,’ wali. 
‘Magi baso meni. E bidi eno ogwanu isigi pai tiwai yai goli, tama megi ma bidibao. Aga hagawai, tama megi eno ogwanu ma sualio,’ ayago te po wali. Tama olama, augwali genuai dwagi yai homu ebo gagalali.” 
“Te bidigo gomunai ogwa gide bidali, te i badu bidi beba asali sogode. Tama te gomunai bidi aga be pąba asiyu, te tęąbi eyu habidi elebo odali. 
Te tęąbi ebo po odama, agai te sę ebo bidi me deli i olama, agabolo hanaluyu, te po wai, ‘Te dagego e tęąbi magi baso ebawe?’ te gomunai bidigo te tama po hanalu wali. 
Tama te sę ebo bidigo agabolo te po wei ponani, ‘Te nago amanu ma asali. Nago aya aga ogwanu sese ma asobaso, agai te sa muani tuabo kibu kau wai elao tuinao wali, dabolo,’ te sę ebo bidigo te po wali. 
Tama te po odama, te gomunai bidi sębę yali. Be tomoba pabo aga hagela yali. Aga aya te be bulu badu asai, aga homu dene baso, ‘Nage be tomoba asao’ wedu gebadi. 
Aga ayago ‘Nage asao’ wali goli, te gomunai bidigo aga ayabolo te po wei ponani, ‘Nage eno wabo po homugo suao. Kibu be hauwade eno nago sę yalio. Nago enabolo wali po eno sela sąbe, odalio. Ena tama tiali goli, ena dali, eno abagi dede da moni nai tumainu, nago kibu meme wai naga ena munu me mabe. 
Tiwai goli, u bidi nago ogwanu, agai nago mani doado bage te penani sęde bilibo we dabede olo silama, bidali. Aga te dwai sę yali goli, aga eba ma asobo si, naga sa muani tuabo kibu kau wai ela mani, tumainu, nage dwagi yai homu ebaso,’ te gomunai bidigo te po wali.” 
“Tama aga ayago te gomunai bidibolo te po wei ponai, ‘Eno ogwa, tigidali sogo nage ena dali bidibo dao. Eno doado bage tigidali nago nogode mawai dao. 
Megi da dwagi yai homu eyu, tęąbi yabo si dao. Magi baso menio. E bidi nago amanu aga isigi pai tiwai yai yali, tama megi ma bidibao. Aga hagawai, tama megi eno ma suali,’ te ayago te po wali,” Jisasgo te po wai. 
