﻿Luk.
24.
Te Sabat sogode olo bidama, te sogo kigamu Sande kigamu augwali te we dabe gų pageba ma pai. Augwaligo te dwagi yai denami yai nai me, wel dabe me sela pai, polobadu augwaligo sisila muai. 
Tama augwali te gų pageba sabolama, te gų page sunumi dąų wali genuai masigi augwaligo suali, te gų page sunumide munalubo sube, te masigi augwaligo hogogo bele pelama bogo badude munalubo suai. Tama tibaso, te we dabe augwali te gų page tomoba pai. 
Tiali tama, augwaligo Genuai Bidi Jisas tigi munalubo subeo, te ola be masigi tomode. 
Te we dabe augwaligo te tiwai subaso, tama augwali homu hauwa mu yai. Tama augwali we dabe kolesaga tųą pelama, umula pela muai. Tama augwaligo tonalubadi yaide, bidi si polo pedelama, tede dolaluali. Te bidi sigo ugwa da mu udula pela muai. 
Tama te we dabe augwali wi elama, augwa gesabidi tǫba tonolaluai. Tialima, te bidi sigo augwalibolo te po wai, “Magi baso dagego te bidibo bidi te isai bidi gų pagede gegebawe? Te Jisas ede bidibeo. Jisas ma hodaloai dao. 
Dagego Jisas agai dagebolo mani po ma kone palao, Jisas Galili bulude bidiyu te po wai, ‘Ena da te Godigo Bidi Mu dao. Tama augwaligo ena te dwai sę ebo bidi dabego nogoba mawaibao. Tama augwaligo ena te age sai nide elama, tama sela sogo gų pagede munaluama, ma hodaluaibao,’ agai te po wai,” te bidi sigo te po wai, te we dabebolo. 
Tama te we dabe augwaligo Jisasgo polobadu wali po ma augwaligo koneai. 
Te we dabe augwali ma pai, tama augwaligo Jisas wali pabo bidi nogo si olama, sągą badu deli bidi dabebolo te augwaligo odali po dali, suali sę dali pusali. Tama augwaligo gasa we bidi dabebolo me te yali sę po wai. 
Tama te po wagi pali we dabe augwaligo nogi e dao. We me nogi Maria, te Makdala bulu we dao. Te we me aga nogi Joana. Te we me aga nogi Maria, aga ogwa nogi Jems. Te we dabe augwali bidai, augwali te we dabe dali gasa we dabe me bidai, te we dabe augwaligo te po Jisas aga wali pabo bidi dabe dali wai. 
Tiali goli, Jisasgo bidi dabe augwaligo homu te we dabego wali po olo tama me te obao, homu yai. Tama augwaligo te we dabego po homuba dąų olama mube, augwaligo homugo tibo po wabao homu yai. 
Tialima, Pita polo pelama, gų page sugi pai. Tama Pita te gų pageba sabolama, tudi basia selama, te masigi tomoba suai. Tama agai suali, te wiegi yai telela ugwa dabe naga munalubo suai. Agai Jisasgo tigi sube. Tibaso, Pita beba ma pelama, te pedelali sęde aga homu hauwa mu yai. 
Te sogo digi tamao, bidi me si te dwasianu bulu me nogi Emeus teba painogo augwali si te tųdu pai. Te bidi si Jisas wali pabo bidi si dao. Te tų Jerusalem tagalama, Emeusba pabo tų te pąde naga. 
Te bidi si te tųdu pai, tama augwali sigo tigidali sę Jisas dali pedelama yali sę te po mimi pai. 
Te bidi si te po ola peyu, augwa hasi hanalua peyu, pai. Tama Jisas aga digi te bidi si pąde pedelama, augwali hodobo pai. 
Te bidi si augwaligo gedugo Jisas suali, tiali goli augwaligo konebe, e Jisas te yaba, te homu ebe, te bidi sigo. 
Te Jisasgo augwali sibolo te po wai, “Dage si magi po ola peyu pobawe?” te bidi si dali Jisasgo te po wai. Tama te bidi si dolaluai, tama augwa si homu sęgę mu yai. 
Tama te bidi me nogi Kliopas, te bidigo Jisasbolo te po wei ponoyu, te po wai, “Gasa bulu bidi dabe hauwa augwali megi Jerusalem bulude bidibao. Tama nage deligo nago te sę Jerusalemde pedalobo nago subewe?” te bidigo Jisas dali te po wai. 
Te bidi agai tama wai, tama Jisasgo augwali sibolo hanalu wai, “Magi sęwe?” Tama te bidi sigo Jisas dali te po wai, “Te sę te Nasaret bidi Jisasde pedalai. Te bidi Godigo nosali yabo sę po wabo bidi, Godigo po ola mabo bidi. Tama te bidigo agai bomai sę dali, bomai po dali Godigo gedude dali, te we bidigo gedude dali te sę yai,” te bidi sigo Jisas dali te po wai. 
“Tama te pris tuni bidi dabe dali, te tobolu bidi dabe augwaligo te bidi te moni gavman tunibolo augwaligo nogoba muai. Tama gavmanigo po weyu, ‘Te bidi elao,’ te po wai. Tama augwaligo te bidi ni pedaide elai. 
Tiali goli, polobadu dago homu tama yai, te bidigo agai da Israel we bidi te Rom gavman nogode bidali tagalama, agai da tonalumai yaibao. Dago te homu polobadu yai dao. Tiali, menio. Tama gasa po me tama telaluaio, te sę pedelai, tama megi te bidi duba elali, sela sogo bidibao,” te bidi si Jisas dali te po wai. 
“Te sę eyu, gasa sę me pedelali, megi. Tama megi da hani we dabe me badu augwaligo da midigi sabo sę yai. Kigamu mu te we dabe augwali te bidi muani gų pageba augwali pai,” te po Jisas dali te bidi sigo wai. 
“Tama augwaligo Jisasgo tigi subeo. Tama augwali ma asai, tama augwaligo te po wai, ‘Dago Godigo sę ebo ensel bidi dabe naga sualio,’ tama te ensel bidi dabe augwaligo te po wai, 
‘Te Jisas aga ma bidibao,’ wai. Tama da tomode bidi meba augwali pelama, te gų page sugi pai. Tama augwaligo te we dabego wali po tiwai tama suali. Tiali goli, Jisas aga tigi te augwaligo subeo,” te bidi sigo Jisas dali te po wai. 
Te Jisasgo te tama po augwali sibolo wai, “Ao, dage sigo homu kolesaga meniwe? Dage sigo homu te polobadu Godigo sę nosali pedelabo po ola mani bidigo po naga konealuai dawe?” Jisas po augwali si dali wai. 
“Magi basowe tama tiyu dage sigo koneai meniwe, Godigo sa muani bidi Krais aga dene bolo selama, isilama, tama nosali aga genuai nogi mu saibao,” Jisasgo te po wai. 
Tama Jisasgo Mosesgo asęani pode gagalama, tama tigidali Godigo sę nosali pedelabo po ola mani profet bidi dabego po Jisasgo te bidi sibolo ola mawai. Tigidali po buku dabede wali po Jisas aga tigide digi yali sę po wai. Te Jisas aga dali po page mu te bidi si dali ola mawai. 
Te augwali pelama, te bidi si pabo bulu teba sabolai. Tama Jisas agai mu pabo ąǫ naga yai. 
Tialima, te bidi sigo Jisas “Pigio,” te po wai, “nage dadi si dali bidao,” wai. “Giliga iba dega sainogo ebo, tama pąde digi tama be hulia saibao,” wali. Tama tibaso, Jisas augwali sigo be tomoba pelama, augwali si dali bidai. 
Nosali augwali nai tuainogo, tama Jisas augwali si dali dulaluai. Tama Jisasgo te giguai nai bret selama, Godibolo hanaluyu usu da wai, tama te nai togolama, augwali sibolo mawai, Jisasgo. 
Jisas agai tama tiwai tama augwali sigo gedu pedelebo tiwai ilali, tama te bidi sigo Jisas koneai. Tama Jisas polo hagawai, tama te bidi sigo Jisas ma subeo. 
Tama te bidi si augwa hasi po weyu, te po wai, “Dadi si tųdu asai, tama Jisas agai dadi si dali po ola asai, tama Jisas agai bukude po page dadi si dali hania ola mawai, te sogo dadi sigo homu mu hogodaluai,” te bidi sigo te po wai. 
Te bidi sigo te po wai, tama te sogo tama te bidi si augwa si Jerusalem buluba ma pai. Tama te bidi sigo te Jisasgo bidi nogo si olama, sągą badu deli bidi augwalibolo te bidi sigo te bage aga abagi dabe dali augwali deliba sisinama, bidalubo suai. 
Tama augwaligo te bidi sibolo te po wai, “Mu tamao, Genuai Bidi ma hodaloai, aga ma pedalobo Saimongo suai,” augwaligo te bidi si dali te po wai. 
Tama augwali sigo te tigidali sę augwali sigo tųde suali po augwali dali wai. Tama te bidi sigo te po wai, “Jisas agai te giguai nai bret togolama, da si mawai, tama dadi sigo te sogo megi koneai, te Jisas dao,” augwali sigo te po wai. 
Augwaligo te po odubadi, tama Jisas aga te augwali tomoba polo dolagasai. Agai augwalibolo, “Homu tegaluama, bugagia bidiąo,” wai. 
Tialima, augwali gegemani siyu, augwali homu hogodaluai, tama augwali wi yai. Augwali te homu yai, augwaligo Jisas isi bidi subo, tama tiyu augwali wi yai. 
Tama Jisas agai augwalibolo te po wai, “Magi baso dagego homu hogodalualiwe? Magi baso dagego homu si ebawe?” Jisasgo te po wai, aga bidi dabe dali wai. 
“Dagego eno nogo sągą suao. Ena ena digi bidibao. Dagego nogo ena tigiba munama, suao. Isi bidi da, mi meni yai, dili meni yai. Tiali goli, ena da dili dali, mi dali elalubao,” Jisasgo te po aga bidi dabe dali wai. 
Jisasgo te po olama, tama aga nogo dali sągą dali augwali bidibolo waselai. 
Augwaligo Jisasbolo homu munama, te Jisas dao augwaligo me konebe. Augwali dwagi yai homu mu yai digi, augwali noma sai. Tama Jisas agai augwalibolo te po wai, “Tama dagego tubo nai ede me munalubowe?” Jisasgo augwalibolo hanalu wali. 
Tama augwaligo siade ulai sųgų dage te Jisas manio. 
Tama Jisas agai te sųgų selama, tubo tama augwaligo suai, Jisas wali pabo bidi dabego. 
Te Jisasgo augwalibolo te po wai, “Polobadu ena dage dali bidibadi, tama eno dagebolo wai dao, tigidali po te polobadu bidi Moses bidibo side asęani, te polobadu Godigo po pusa mani bidi dabego asęani bukude me, te buku nogi Sam tede me asęani po me, te enade asęani po tigidali nai igilama mu walaibao wai,” Jisasgo te po wai. 
Tama Jisasgo augwalibolo homu ula ilai, tama augwaligo Godigo asęani po page hania konemainogo yai. 
Tama Jisasgo augwalibolo te po wai, “Godigo bukude tama te tobage po wai, ‘Godigo sa muani bidi Krais dene polo selama, isilama, tama sela sogo aga gų pagede bidama, 
tama hodaluama, tama aga nogigo bomogo aga sę ebo bidi dabe augwaligo agai po tigidali bidi hanibolo ola mawaibao, te we bidi augwaligo homu begelemainogo yaibao. Augwaligo homu begelama, tama Godigo augwaligo yali dwai dwai sę sela sąwaibao. Te Godigo sa muani bidi agai sę ebo bidi dabego te tobage po tigidali bidi hanibolo wagi paibao, te sę augwaligo Jerusalem bulude gagalaibao.’ 
Te po bukude asęai dao. Tama dagego eno te yali sę tigidali suali, eno wali po tigidali odali. Tama dagego we bidibolo eno wali po me, yali sę po me, te pusa mawaibao. 
Te nai polobadu eno Aya God agai dagebolo mawaiba wali nai, te eno megi dagebolo tagala palaibao. Tialima, dage te Jerusalem hanude bidiąo. Dage bidibadi, tama te dagaludu bomo dageba dulaibao,” Jisasgo augwalibolo te po wai. 
Te Jisasgo agai bidi dabe augwali odasa, bulu me nogi Betani pąba sabolai. Tama Jisas agai nogo ugwaba selama, tama bugai homu ilabo po augwalibolo wai. 
Tama agai te bidi dabebolo te po madubadi, tama Jisasgo augwali taga pai, tama Godigo Jisas dagaluba sela holai. 
Tama te bidi dabe augwaligo Jisasgo nogi ugwaba munama, tama dwagi yai homu mu eyu, Jerusalem buluba ma geasa peyu yai. 
Tama tigidali sogo augwali te Moni Lotu Be tempel te be tomoba pelama, tama augwaligo Godigo nogi ugwaba mu sai, Jisasgo sę ebo bidi dabego tama tiwai, God dali. 
