﻿Jon.
4.
Te sogo Farisi bage augwaligo po me deli odai, “Jisasgo te we bidi hauwa selama, tama augwali aga wali pobaso, augwaligo baptais sali. Tama Jisas agai te sęde Jon aiyaba elaluai,” te Farisi bage augwaligo te po odai. 
(Tialima, Jisas aga digi agai te we bidi baptais mabeo. Jisas aga wali pabo bidi augwaligo naga te we bidi baptais mawai.) 
Jisasgo koneai augwali Farisi bagego te po odama, dwai homu yai. Tama tibaso, Jisas aga te Judia tǫ pedai taga pelama, te Galili tǫ pedaiba pai. 
Tama Godigo homu wali peyu, te tų Jisas aga pali tų te Samaria tǫ pedai tomoba pabo tų dao. 
Tama tilama, Jisas pelama, Samaria bagego hanuba sabolai, augwaligo te bulu nogi Sikar wali. Te tǫ te polobadu mu bidai bidi Jekopgo aga ogwa Josep mani tǫ te pąde tama dao. 
Ąį sabo tǫ dedage polobadu Jekopgo nigai, te bulude elalubuo. Jisas pelama, aga tigi dene baso, te ąį sabo tǫ dedage pąde dugulaluai. Te giliga tomo yagasobode. 
Jisas aga wali pabo bidi augwali te be nani nogi Sikarba pelama, nai abelegi pai. Tama Samaria we me deli asama, ąį tuagasu asai. Jisasgo te webolo po weyu, te po wai, “Aį ena mao, ena tueio,” te po wai, Jisasgo. 
Te Samaria we noma siyu, agai Jisasbolo te po wai, “Ya, nage Juda bidi dao, te ena Samaria we dao. Magi baso nago te po obawe, ‘Aį ena mao, ena tueio,’ magi basowe?” te Samaria wego te po wai, Jisas dali. (Magi basowe? Juda bidi dabe augwali Samaria bidi dabe dali kisasa gelasa bilibo menio.) 
Jisasgo te webolo po wei ponoyu, te po wai, “Nago te God agai te we bidibolo olo mabo nai konegi sogo da, tama ena mena bidigo nagebolo ‘Aį ena mao, ena tueio’ obao konegi sogo da, te si nago konegi sogo da, teda nago ena hanalu olama, eno nagebolo te bidabo bomo elalubo ąį mao wagi da,” Jisasgo te po wai. 
Te wego Jisasbolo te po wai, “Genuai Bidio, nago ąį tuabo nai meni. Tama te ąį tubo dedage aba mu dao. Tama tiyu da, nago te bidabo bomo elalubo ąį menade saibawe?” te wego Jisas dali te po wai. 
“Dago wąį Jekopgo te ąį dedage dabolo polobadu mawai dao. Tama aga dali, aga wai dabe dali, aga kibu bulmakau sipsip dali tamago tuai ąį dao. Tialima, nago homu nago Jekop aga aiyaba elalualiwe?” te wego Jisas dali te po wai. 
Jisasgo po wei agabolo ponoyu, te po wai, “Tigidali bidi te ąį naga ede tuyu da, augwali ąį nogone ma yaibao. 
Tialima, bidi me deli eno mabo ąį tuyu da, tigidali sogo te bidi ąį nogone ma egobeo. Te ąį eno mawainogo ebo ąįgo da, te tama tiaibao, te ąį da bidabo bomo mabo wę ulu pedalubo ąǫ te bidi tigi tomode tiwai yaibao. Tama te ąį tigidali sogo pedaliyu, te bidi mu bidada peyu, mu bidada paibao,” Jisasgo te po wai. 
Tama te wego Jisasbolo te po wai, “Genuai Bidio, nago te ąį enabolo mao, tama nosali ena ąį nogone ma idalio, tama ena eba ąį ma tuagasidalio,” te Jisas dali Samaria wego te po wai. 
Jisasgo te webolo te po wai, “Nago bidibolo i wagi bilama, tama dage si eba asiąo,” wai. 
Wego po wei ponoyu, te po wai, “Ena bidi menio.” Jisasgo agabolo te po wai, “Nago ‘Ena bidi meni,’ obawe, te nago mu po wabuo. 
Magi basowe? Polobadu nago bidi a naga dao. Tama te bidi megi nage dali bidibo bidi da, te naga bidi menio. Nago po te mu tama dao,” Jisasgo te po te we dali wai. 
Wego Jisasbolo te po wai, “Genuai Bidio, megi eno koneanio, nage da te Godigo nosali yabo sę po ola mabo profet bidi deli dao. 
Polobadu da Samaria dabego wąį dabe augwali te bulu duba sisinama, tama lotu po wai dao. Tialima, dage Juda dabego te po wabo dao, ‘Te tigidali bidigo lotu po wabo bulu te Jerusalemde, tede naga wao,’ dagego te po wabo dao,” te wego te po wai. 
Jisasgo te webolo te po wai, “Nago eno po mu po dao olama, konealuao. Me sogo deli pedaliyu, tama dagego te Ayabolo lotu po te bulu dude wagobeo. Tama dagego Jerusalem tede me lotu po wagobeo. 
Dagego konesiąwai naibolo lotu po wabo dao. Da Juda dabe dago lotu po wabo da, te dago koneai bidibolo lotu po wabo dao. Magi basowe? Godigo we bidi ma sabo sę page te da Juda dabe tomode pedalaibao. 
Tialima, te sogo pedaliyu da, megi tama pedalalio, tama tigidali bidigo lotu po mu wabo bidi dabe da augwali lotu po augwa mobo bidigo waibao, augwa dolo ebo kolesagago me lotu po waibao. Tama Aya Godigo te tobage bidi gegebo dao, agabolo lotu po omainogo. 
God da, te mobo bidi dao. Tama bidigo agabolo lotu po weyu da, te bidigo aga mobo bidigo waibao, aga dolo ebo kolesagago me lotu po waibao,” Jisasgo te po wai. 
Te wego agabolo te po wai, “Eno koneanio, Godigo sa muani bidi asaibao, augwali aga nogi Krais tama wai. Aga asobo sogo da, te agai dabolo tigidali naide po ola mawaibao,” wali. 
Jisasgo te we agabolo te po wai, “Te ena tama dao, megi nage dali eno te po obao.” 
Te Jisasgo te po obadi yaide, tama aga wali pabo bidi dabe augwali ma begasa asai. Tama augwali Jisasgo te Samaria we dali po mibo subaso, augwali noma sai. Tialima, bidi me deligo te webolo “Nage magi nai saiwe?” wabeo. Augwaligo Jisasbolo “Nage te we dali magi baso po obawe?” hanalu wabe. 
Tama te wego te aga ąį tubo nai tagalama, tama te we aga hanuba ma pai. Tama te wego te we bidi dabe augwalibolo wagi peyu, te po wai. 
“Dagego bidi me deli suagasiąo. Agai eno polobadu yali sę po tigidali enabolo wai. Te bidi te Godigo sa muani asaibao wali bidi Krais te yaliwe?” te wego te po te we bidi dabe dali wai. 
Tama te we bidi dabe augwali te hanu tagalama, aselama, Jisas bidibo digi asai. 
Te we bidi dabe augwali asodubadi Jisas wali pabo bidi augwaligo Jisas dali te po wai, “Po ola mabo bidi, nage nai tuao,” wali. 
Tialima, Jisasgo augwali aga wali pabo bidibolo te po wai, “Eno nai meba elalubo te dagego konebeo.” 
Tama tibaso, augwa hasi po wai, “Bidi me deligo aga nai magasaliwe?” Jisas wali pabo bidi augwaligo te po miai. 
Jisasgo augwalibolo te po wai, “Eno nai da, e tama dao: eno ena tagala palali bidigo homu wali pabo dao. Tama eno agai ena nogoba muani sę polo silaio,” Jisasgo te po wai. 
Jisas agai giba ela mubo po digi po weyu, te po wai, “Dagego tama wabo dao: ‘Polua me si me si elalubo, tama te nai sabo si te pedalaibao,’ Tialima, eno dagebolo obao, dagego tonono biliyu, tama dagego te gi dabe bugagia suiąo. Nai inawai yabowe naga, dagego suao. Te asobo we bidi augwali te inawai nai tiwai dao. 
Nai sabo bidi da, te bidi aga masigi sabo sę eyu, aga masigi sabo dao. Tama elama, nai polobadu bulali bidi dali, te inawai nai sabo bidi dali, augwa talua si dwagi yai homu yaibao. Tama te tiwai, niwai bidigo we bidi eno po ola mayu yali bidi, augwaligo homu enaba muani, te bidi te nai sabo bidi tiwai dao. Godigo te bidibolo dwagi yai nai mawaibao. Tama te we bidibolo eno po polobadu wagi pali bidi me, te bidi te nai bulali bidi tiwai dao. Tama te bidi dali, te we bidi enaba sisinibo bidi dali, augwali si talua dwagi yai homu mu yaibao. Augwali sigo wali po odali we bidi augwali bidada peyu, bidada pabo bulu selama, bidaibao. 
Te tiwai eyu, tama tǫde bidibo we bidigo polobadu wali po mu po tamao, ‘Bidi me deligo gi nai bulai, tama gasa bidi mego agai te nai sai.’ 
Tama te tiwai eno dage tagala palali da, te dage we bidibolo eno po pusugi pomainogo yai. Polobadu dagego te sę isiąwai. Tialima, gasa bidigo dene yali sęde te nai megi dagego sabao,” Jisasgo te po wai. 
Te hanude bidali Samaria we bidi dabe hauwa augwaligo te wego wabo po odai. Tama te po odobaso, augwaligo augwa homu tigidali Jisasba muani. Te wego te po wai, “Agai enabolo eno polobadu yali sę po tigidali mu wai.” 
Tama tibaso, Samaria we bidi dabe augwali Jisas bidibo digi aselama, tama augwaligo Jisasbolo hanaluyu, po bomo elama wai, “Nage da dali bidao.” Tama tibaso, Jisas augwali dali si sogo te bulude bidai. 
Tama aga tede bidibadi yaide, we bidi hauwa augwaligo Jisas aga digi wali po odolama, tama augwa homu tigidali agaba muani. 
Tama augwaligo te webolo te po wai, “Megi dago nago po naga odolama, tama dena homu tigidali te bidiba mubo menio. Dena digi agai po odolama, tama dago homu tigidali agaba mubao. Te bidigo naga agai tigidali tǫde we bidi ma dobola sabo bidi dao,” te Samaria bage augwaligo te po wai. 
Te si sogo bidali silalio, tama Jisasgo te Samaria bulu tagalama, tama aga Galili tǫba pai. 
(Polobadu Jisas aga digi po weyu, te po wai, “Godigo po ola mabo bidi aga page bulude nogi menio,” Jisasgo te po wai dao. Tama te po wali goli, Jisas te Galili tǫba pai.) 
Tama Jisas pelama, Galili buluba sabolai. Tama Galili bage augwaligo Jisas asobaso dwagi yai homu yai. Magi basowe? Augwali meba pelama, Jerusalem bulu sabolama, bo disąwai nai tubo side tigidali sę Jisasgo te sogo yali sę augwaligo suai, polobadu. 
Jisas te Galili tǫ tomoba pelama, tama aga te Kana be naniba sabolai. Te bulude polobadu Jisas agai ąį mugo te pusu ebo ąį wain nigai. Tama te be nani me nogi Kaperneam te digibulu gana. Tama Kaperneam bulude genuai gavman bidi bidai, te bidi aga ogwa gasi yai. 
Tama te gasi yai ogwa aga aya agai Jisas Judia tǫ tagalama, Galili tǫba asali po odai. Tama tibaso, te bidi Jisas bidibo digi pelama, tama Jisasbolo hanaluyu, po bomo elama wai, tama Jisas te agai ogwa Jisasgo geselemainogo yai. Aga homu Jisas te Kaperneamba pelama, tama agai ogwa ma geselaibao. Te gasi yai ogwa pąde tama isainu elalubo wai. 
Tama Jisasgo te gasi ogwa aga ayabolo te po wai, “Dagego te eno haniani bomai sę ebo susiąwai goli dagego duga homu tigidali enaba muao.” 
Te genuai gavman bidigo te po wai, “Genuai Bidi, nage Kaperneam buluba polo dulao. Eno ogwa isidalio,” te po Jisas dali wai. 
Jisasgo agabolo te po wai, “Nage pao. Naga ogwa da, bidibadi paibao.” Te bidi Jisasgo wali po aga homu te poba munama, tama pai. 
Aga begasa aba pidubadi yaide tama aga sę ebo bidi dabego aga tiąba wagasai. Tama augwaligo agabolo te po wai, “Naga ogwa bidibuo,” wai. 
Tama agai augwalibolo hanalu wai, “Nisu te ogwa dwasianu usu yaliwe?” te po wai. Tama augwaligo te po wai, “Do giliga tomo ebo, te sogo tama aga tigi posolo silalio,” te po wai. 
Tibaso, aga ayago koneai, do tama te sogo Jisasgo agabolo “Nago ogwa gasi silama, tama bidibadi paibao” wai dao. Agai te homu yai. Tama te bidi dali aga bede bidibo bage dali, augwaligo augwa homu tigidali Jisasba muani. 
Polobadu Jisas Judia tǫ tagalama, tama Galili tǫba sabolama, tama bomai sę eyu, te agai ąį mugo pusu ebo ąį wain begelama nigai. Tama megi me agai Judia tǫ tagalama, Galili tǫde bomai sę me yai, te gasi yai ogwa hodolai. 
