﻿Godigo Sęba Tagala Palai Bidigo Po.
5.
Tiali, bidi me deli augwali dali bidali. Agai nogi Ananaias, agai wego nogi Safaira. Augwali sigo gasa kolesaga yali. Augwali sigo tǫ gasa bidi togwa menama, abelali. 
Tiali goli, te tǫde sali mone bogea siyu, me badu augwali sigo dualali. Agai wego me te kolesaga koneai. Agai me badu masigi te Jisasgo tagala palai bidi augwalibolo magi pelama, te po wai, “Te tǫde sali masigi tamanu dao.” 
Pitago agabolo te po wai, “Ananaias, magi baso Satango dwai kolesaga elama, nago te tǫ abelali masigi bogea siyu tama me badu dualama, te Godigo Dwagi Yai Mobobolo tibo po waliwe? 
Te tǫ polobadu te nago tǫ mu da. Te tǫde magi sę yabo me naga homu naga da. Te tǫ me bidigo abelama, mone sabo me, te tiabo me naga homu naga da. Te tiali, nago mena homu elama, te mone me badu bogea sabo sę elama, tibo po waliwe? Nago bidi dabebolo naga tibo po wabe. Meni. Nago Godibolo tibo po wali,” Pitago te po wai. 
Ananaias te po odama, polo tama tǫba degasa dulama, te aga polo tama isalio. Tama gesi ogwa bidi dabe aselama, augwaligo te bidi te nami ugwade belama, tolasa pelama, pubaligi pai. Tigidali we bidigo te yali sęde po odama, wi mu yali. 
Te nosali nai po sela wai madigi, Ananaias aga we te be tomoba asali, tiali agai aga bidi isali po agai odobe. 
Pitago agabolo hanalu wai, “Te tǫ abelali masigi, te tamanu dawe?” te po wai. Ananaiasgo wego te po wai, “Te tǫ abelali mone tamanu dao,” te po wai. 
Tiali goli, Pitago te po wai, “Magi baso dage sigo homugo te tibo po waliwe, te Godigo Dwagi Yai Mobo usu saliwe? Nago bidi pubulali bidi dabe tųba dolagasobo side, nage me tolasa paibao,” te po wai. 
Tama te we polo tama te bidi Pita sągą pagede degasa pelama, te aga isali. Te gesi ogwa bidi dabe te be tomoba asai. Augwaligo te we isai munalubo suali. Sulama, augwaligo te we tigi tolasa pelama, aga bidi muani madigi pubaligi pali. 
Tigidali we bidi Jisasgo po wali pabo bidi te po odali, tama augwaligo moni wi mu yalio. Te olo bidi dabego me sulama, wi mu yali. 
Te tibo sogo Jisasgo tagala palai bidi dabego te we bidi tomode augwaligo bomai sę mu yalio, te bidi noma sabo sę me. Tigidali bidi Jisasgo po wali pabo bidi Moni Lotu Be tempel beba sisinagasai, sesemane sogo, te Solomongo Be Mabode. 
Godigo po wali pisąbo bidi augwaligo wi elama, te bagede nagulagasobeo. Tigidali we bidi augwaligo te po wai, “Te hani da, dwagi yai bidi dabe dao.” 
Tama tialima, umabo we bidi augwaligo Jisasgo po wali pelama, tama augwaligo Genuai Bidigo haniba nagulagasalio. 
Jisasgo tagala palai bidi dabego bomai sę mu ebaso, tigidali we bidigo augwa ama me, abe me gasi baso, gologobe wade munama, tų sesegeba selasa asali. Augwaligo homugo Pita te tų sesegedu biliyu, agai giligade bilibo noma te gasi yai bidi tigiba bogibaide ma dwagi yai ilimainu. 
Jerusalem pąde bida bida pabo we bidigo gasi yai we bidi me, dwai mobo haubogo tuai we bidi me, Jisasgo tagala palai bidigo dwagi yai ma ilimaio olama, magasali. Tama augwali tigidali dwagi yai ma yali. 
Te side te pris hani tobolu bidi dede, agai abagi solo dede, augwaligo lotu hani nogi Sadyusi, augwaligo te Jisasgo tagala palai bidi dabebolo dwai homu mu yali. Tigidali we bidigo te Jisasgo tagala palai bidi dabe dali dwagi yai homu ebaso, te Sadyusi dabego moni sębę elama, elainu yalio. 
Augwaligo te Jisasgo tagala palai bidi dabe tulama, kalabus beba muani, dwai sę ebo bidi dabe dali hodobo te kalabus beba muani. 
Tiali goli, te hulide Godigo ensel bidi deligo te kalabus be tų dayagasali. Tų dayagaselama, te Jisasgo tagala palai bidi dabe buluba tagala palama, augwalibolo te po wai, 
“Te dage Moni Lotu Be tempel teba dolaligi pelama, we bidibolo te gesi kolesaga po tigidali ola mao,” te po wai. 
Tama Jisasgo tagala palai bidi dabe augwaligo te po wali pelama, kigamu hulide te Moni Lotu Be tempel tomoba pelama, tigidali we bidibolo te po ola mabo gagalali. Te pris tobolu bidi dali, agai abagi solo dabe dali, augwaligo te Juda bidi monu dabe i olama, te kaunsilde moni po tų miainu yai. Augwali deliba sisinagaselama, augwaligo enesigi bidi dabe te kalabus beba tagala palama, “Te Jisasgo tagala palai bage eba odasa asao,” wali. 
Tiali goli, augwali te kalabus beba sabolama, Jisasgo tagala palai bidi dabe te be tomode bidibo sube. Tama tibaso, te bidi dabe kaunsilba ma pelama, augwalibolo te po wai, 
“Te da te kalabus beba sabolama, dago suali, be tų palialubo suali, te kalabus bidi tonalubo bidi dabe tonalubo suali, te be tųde. Tiali goli, te be tų dalama suali, te be tomode te bidi menio,” te po wai. 
Tama te Moni Lotu Be tempel genuai enesigi bidi dali, te pris genuai bidi dabe dali, augwaligo te po odama, augwaligo moni homu yali. Augwaligo te po wai, “Te magi sę yaliwe?” 
Bidi me deli te be tomoba aselama, agai augwalibolo te po wai, “Odao. Dagego kalabusiba muai bidi dabe, augwaligo te we bidibolo po ola mobao, te Moni Lotu Be tempel, tede dolalubo,” wali. 
Tama te po obaso, te genuai enesigi bidi dali, agai enesigi bidi dabe dali, augwali pelama, Jisasgo tagala palai bidi dabe odasa asali. Augwali sesali sogo elebeo. Wi elama, augwaligo homugo “Dago te bidi dabe elebaso, te we bidigo masigi sąnama, da elaibao,” te homu yai. 
Augwaligo te bidi dabe te be tomoba dodoligi pali, te kaunsil dabe gesabide. Tede dolalubadi, te pris tobolu bidigo augwalibolo te po wai, 
“Te dago dagebolo Jisasgo po pusamuo olama, habu selai. Dagego homugo te da olo nai dao. Megi dagego tigidali we bidi Jerusalemde te Jisasgo po ola mawai. Dagego homugo dago Jisas elama, isilai,” agai te po wai. 
Te tiali goli, Pita dali, me badu Jisasgo tagala palai bidi dabe, augwaligo te po wei ponoyu, te po wai, “Te dago dagego wali po wali pogobeo. Godigo dabolo mani genuai po mu dago wali paibao. 
Dago wąį dabe augwaligo polobadu Godibolo lotu po wai dao. Tama dagego Jisas te ni pedaide neligo enama, isalio. Tiali goli, dago wąįgo God, te Godigo digi Jisas ma hodolali. 
Tama Godigo selama, ogwaba pelama, Jisas te Godigo dolo nogo badu bidibo, moni nogi elalubaso. Tama tede bidibo, te we bidi tobolu elalubo bidi da, te tau sabo bidi da, te Israel we bidi augwaligo homu begelama, Godigo augwaligo yali dwai sę dabe sela sąmainu ebao. 
Tama te Jisasgo polobadu yali sę te we bidigo konemai hagede, dago tede po sagwa mabo bidi dabe da. God agai po wali pabo we bidibolo te Dwagi Yai Mobo Bidi mabo da. Te Godigo Dwagi Yai Mobo Bidi me, te Jisasgo ebo sę konebo da, te sęde po sagwa mabo dao,” Pitago te po wai. 
Te kaunsil dabego Pitago po odama, moni sębę mu yali. Augwaligo homugo ‘Dago te Jisasgo tagala palai bidi dabe elaibao’ homu yai. 
Tiali goli, bidi me deli augwali tomode bidali, te Juda dabego kaunsil bidi doligiluali te Farisi bidi sibi bidi, te bidi nogi Gamaliel. Te bidi agai Mosesgo bomo yai po pusubo bidi, tigidali we bidi augwaligo bugagia konemai hagede, tama te we bidigo te dwagi yai bidi mu augwaligo aga dali dwagi yai homu elama, te bidi nogi ugwaba sali. Te bidi Gamaliel te kaunsil tomode dolaluyu tama te po wali, “Te Jisasgo tagala palai bidi dabe gasa habuba osogo pomainao.” 
Augwali teba pelama, agai te kaunsil dabebolo te po wai, “Dage Israel bidi, dagego te bagebolo ebo sę dua yao. 
Polobadu te bidi nogi Teudas dią holama, te po wali, ‘Ena genuai bidi mu dao.’ Tama bidi hauwa 400 aga wali pai. Tiali goli, gasa bidigo te bidi elebaso, aga wali pali bidi me badu wi pela silali, te agai sę silali. 
Tama nosali te Galili tǫ bidi Judas, agai nogi sabi bidi dią holali, te gavmanigo we bidi nogi sabo side. Agai te homu yai tigidali bidi selama, gavmanide moni haųwa hwįebao. Tiali goli, gavman bidigo enesigi bidigo aga elebaso, aga wali pali bidi wi pela silali. Tama te bidi si augwaligo yali sę tuloluali. 
Tama megi Jisasgo tagala palai bidi dabede, dagego te dwai sę elamuo. Olo bidimainao. Tama bidigo ebo sę dali kolesaga side sę eyu da, te polo sia saibao, tega sigo sę tuloluai tiwai. 
Tiali goli, te sę Godigo bomogo ebo sę eyu da, teda dagego te sę aiyaba elalubo usu egobeo. Dagego ‘Te bidigo sę naga dao’ wagi sogo da, teda dage God dali hwį egi da,” te bidi Gamaliel agai te po wai. 
Te kaunsil dabe augwali Gamalielgo wali po wali pali. Augwaligo Jisasgo tagala palai bidi dabe i olama, “Asao.” Augwaligo enesigi bidigo bįgo elemainu, tama augwaligo bįgo elali. Te kaunsil dabego augwalibolo te po wai, “Dagego Jisasgo nogide po munu ma pusulamuo,” te po wai. Te po olama, augwaligo te bidi dabe olo tagala palali. 
Tega sigo te kaunsil be tagalama pali. Tama te kaunsil bagego elali goli, mu ma bugai homu yali. Tama augwaligo te homu yali, ‘Da Jisasgo po wali pobaso, Godigo usu da olama, da te bidigo gedude naga moni hale mu selama, Jisasgo sę tau sali,’ te homu yai. 
Tama te Moni Lotu Be tempel tede me, te we bidigo bede me, augwaligo sesemane sogo te Dwagi Yai Po te we bidibolo pusa mayu ola mani, te Jisas da, Godigo sa muai bidi Krais dao po wai. 
