﻿1 Korin.
9.
Te gasa we bidi me tau siyu tama augwali dolidali weyu, eno te gasa kolesaga me ebo dao. Ena olo mu bidibo dao, te gasa bidigo enabolo “E tiwai kolesaga yao” te po wabo usu egobeo. Tama me ena te Godigo po sela pabo sę bidi mu dao. Aga te gų pagede hodaluama tama nosali eno digi gedugo ena dago Genuai Bidi Jisas mu suai bidi dao. Te eno dago Genuai Bidi tobade sę yaligo tama te sęde naga dage te God wali pabo we bidi pedalali. 
Te bidi meba augwaligo ena te Godigo po sela pabo bidi meni da homu yali, tiali goli tagalao, duga koneani, ena te Godigo po sela pabo bidi bidibo. Suao, ena te Genuai Bidigo po sela pabo sę bidi bidibao, tama te koneabo sę te dagede elalubao. 
Te bidi mebago eno dagede masigi sisąbaso ena te Godigo po sela pabo bidi meni da wabo si, tama eno e tiwai po te augwaliba wei ponobo dao: 
te eno ebo sęde te Godigo po odobo we bidi augwaligo augwa doado bagego ena tau sobaso da, te dolo dawe ma meniwe? Te dolo mu dao. 
Te gasa Godigo po sela pabo sę ebo bidi dabe augwali deli deligo te Godigo po wali pabo we kęnama, tama augwali te po pusubo sę eyu gasaba bilibadi te augwa we augwali dali hodobo pabo dao. Te dago Genuai Bidi Jisas aga ama dedego badi, te Pitago me te tama tebo dao. Tama ena me, eno we elalugi sogo da, teda eno me te tiwai eyu da te usugi mu da. 
Te gasa Godigo po sela pabo sę ebo bage tigidali augwaligo te Kraisde po pusubo sę sesemane sogo ebaso, tama augwa nogogo te masigi sabo sę ebo meni. Te ena me Barnabas da sigo naga te tiwai me ebo usu meniwe? 
Mena bidi te ami sę ebo bidigo tama aga digi te aga tubo nai abelegowe? Te menio. Mena bidigo te gi bulama tama aga te gide bulali nai sabo meniwe? Me ma te bidi mego te kibu meme dali sipsip dali hani tonaluyu tama aga digi te augwaligo ame pę me tugobewe? Woo, te tiwai menio. Agai te nai meba tueibao. 
Te eno tede bidigo homu naga wali pelama tama eno te tiwai po wabowe? Meni. Te bomai pode me te sę ebo bidigo aga pe masigi sabode te tiwai page elalubo po me elalubao. 
Mosesgo te bomai pode te tiwai po asęani elalubao: “Te dagego wit ge dagalomainogo eyu tama te bulmakaugo te wit sągągo agabo sę ebaso, teda nago te aga pedauwali me paniamuo,” po wai. Te Godigo te bulmakau dabe augwa tubo nai sabode naga homu koneama wali dawe? 
Menio, te agai te po bidi dabolo me wali homu ebao. Awe, te po asęani te da tobade wali dao. Magi baso meni. Godigo te tiwai kolesaga emainogo yai: bidigo te gi tǫ elibo sę eyu, tama bidigo te gide inaiani nai sabo sę ebo bidi me, augwali si augwa yali sęde te nai sabo homu elama tama te sę ebo dao. 
Tialima, dago te Godigo po dagebolo pusubo sę yali, te dago te dagego homu noma bidi mobo tomode te ge bulali tiwai yai. Tama tibaso, dagego dabolo te tigi tau sabo nai naga mobaso, te dolo dawe ma meniwe? Te dobu si ebode te dage sǫą paliwe? Te meni. 
Te dagede bidi mebago te tigi tau sabo nai sabo usu ebo da wida, teda eno me te nai sigi sogo da, te usu mu egi dao. Te nai dago sabo usu yaiba wali goli, te dago me sabeo. Menio. Dago te we bidigo Kraisde wiegi yai gesi po odobo sunumi te panibo te dago hagela homu yai. Tama tibaso te haniani sęgę dabe dago tolobo dao. 
Te Moni Lotu Be tempel, te bede sę ebo bidi dabe, augwaligo te bede augwa nai sela tubo dao. Tama tiyu te Juda we bidi augwaligo te Godibolo maiabo nai magaselama, tama te be tomode te alta saide te nai Godibolo mabo sę ebo bidi dabe augwaligo da te alta saide ulubo nai hasa mi meba te sela tubo dao. Tama tiyu augwaligo augwa nai abelebo menio, te augwaligo Godigo sę ebode augwa nai tama sabo dao. 
Tama te tiwai naga dago Genuai Bidigo te bomai po muani: te Godigo wiegi yai gesi po pusubo sę ebo bidi dabe, te sęde augwaligo te wiegi yai gesi po sabo we bidigo tigi tau sabo nai meba somainogo yao. 
Tiali goli ena digi eno te tama tiwai nai me deli sisąwai dao. Tama megi me eno te nai saiba olama eno e po me asębeo. Menio. Te ena bolo hasia isimainao wai! Eno masigi sisąbadi te sę ebo dao. Tama eno te sęde wiegi yai homu pemene ebao. Tama bidi me deligo enabolo masigi mayu eno te wiegi yai homu pemene ebo page te dagala samainogo me egobeo. 
Eno te Kraisde wiegi yai gesi po pusubo, tede eno te ena nogi ugwaba sabo te usu menio. Te menio. Eno sunumi gasa me elalubeo. Dago Genuai Bidigo enabolo te sę naga mawai dao. Tama eno te wiegi yai gesi po pususiąyu da, teda ena hobedagia mu bidaibao. 
Te ena homugo digi eno te sę egi da, teda eno te sęde sabo usu egi da. Tiali goli, eno homugo te sę eno yabo homu me isąbaso da, teda Godigo te sę enabolo emainu mawai dao. 
Tama tibaso, te sęde eno mena nai saibawe? Te eno sabo nai te e tiwai elalubao: te eno sainu elalubo nai te Godigo wiegi yai gesi po pusubo sęde sabo elalubo, te eno me sabo meni. Menio. Eno te wiegi yai gesi po pusama tama eno augwaliba olo mabo dao. Tama tede eno dwagi yai homu pemene ebo usu baso, te wiegi yai gesi po olo pusubo kolesaga da eno sabo nai tiwai dao. 
Ena da te bidi me deligo olo sę ebo bidi me bidainogo me bidibe. Tiali goli te ena homugo ena digi te ena te tigidali bidi dologoba muyu, tama ena augwaligo olo sę ebo bidi tiwai bidainogo homu elama ebao, te eno bidi hauwa sabo homu elama tibo dao. Augwali Jisas wali pabo bage pedalomainogo eyu ena tama ebo dao. 
Tama eno te Godigo wiegi yai gesi po te Juda dabebolo pusubadi, ena te augwali tiwai bidibo dao. Ena digi ena te Mosesgo mani bomai po dologoba pabe, tiali goli eno te bomai po dologode bidibo Juda bidi dabe sainogo eyu tama ena augwali tiwai gilama te bomai po dologode bidibo dao. 
Te Juda hani isąwai bidi dabe, augwali te Mosesgo mani bomai po meni yani bidi dabego gedude, ena te Mosesgo mani bomai po meni yani bidi tiwai pedalali, te bomai po meni yani bidi dabe sainogo tama tiali. Tiali goli eno te Godigo bomai po tagalainogo ebeo. Menio. Eno te Kraisgo bomai po wali pabo dao. 
Te Kraisde konealubo po dąų wabo bomo meni yani we bidi augwali eno tau sainogo eyu, tama ena te bomo meni yai bidi tiwai bidibo dao. Eno te tigidali sunumidu te gasa bidi dabego ebo kolesaga tigidali usu siyu, tama augwali tiwai bidibo dao. Augwali meba eno ma dobola somainogo tama ebo dao. 
Eno te sę tigidali ebo te Godigo wiegi yai gesi po pusubo sę te ugwaba somainogo ebo dao, tama te wiegi yai gesi pogo dabolo mabo dwagi yai nai meba me eno somainogo eno te tiwai sę ebo dao. 
Megi eno te po digi po begelama obao. Te udabo ususu si ebo bidi dabe te tigidali augwali udulama, tama te geanani bidi deligo naga te dwagi yai nai sabo dao. Te dagego konebewe? Tialima, dage me te tiwai bomonama Godigo po bugagia mu wali piąo, agai te dagebolo dwagi yai sę emainogo yao. 
Tama tigidali bidigo te nai sainogo homu eyu udabo da, te augwaligo homu dali, te augwaligo tigigo ebo kolesaga dali, te tigidali augwaligo aiyaba elaluyu bugagia tonalubo dao. Te bidi dabego tama tiyu te geanani bidigo sabo dwagi yai nai sainogo tebo dao. Tiali goli te nai polo dolobo nai naga dao. Me ma, dago Godigo po wali peyu te me dolisąbo nai sabo sę ebo dao. 
Tama tibaso, ena digi me, ena te dwagi yai nai me sainogo eyu tama ena udabadi te eno gasaba tonono peyu me udagobe. Eno nogo wąbi hwįainogo, te eno nogo subigila sąnama olo dali nogo me sągobeo, tama te wali naga me eligobeo. 
Menio. Eno te ena tigiba mu eliyu tama aga ena homu wali pomainogo ebo dao. Magi baso meni. Eno te Godigo wiegi yai gesi po te gasa we bidi hauwabolo pusubo dao, te augwaligo te po bugagia wali pomainogo ebo dao. Tiali goli nosali ena digi te eno te po bugagia wali pisąyu tama ena tulaluidali weyu, tama eno bomonama te eno ebo kolesaga bugagia tonalubo dao. 
