﻿1 Korin.
14.
Te gasa we bidi dali wiegi yai homu eyu godolo ebo kolesaga da te polalubo kolesaga elalubaso, te dagego bomo eyu te kolesaga bugagia wali pao. Tama tiyu, dagego te Tedali Mobo Bidigo maiabo tau mabo bomo sabo homu bomo eyu godolo tigidali sogo iduao. Tiali goli te maiabo bomo dabe tomode te Godigo po gasa we bidi dabebolo pusubo bomo te polalubo bomo elalubaso, dagego te bomo sabo homu hasia yao. 
Magi baso meni, te tǫde bidibo we bidigo konesiąbo po wabo bidi agai te we bidibolo te po wagobeo. Menio. Agai te po wabogo te Godibolo naga wabo dao. Magi baso meni, te we bidi augwaligo agai wabo po page konegobeo. Te Tedali Mobo Bidigo bomogo te agai te geme dualali po page wabo dao. 
Me ma, Godigo po pusubo bidi, agai po te we bidibolo weyu, tama te pogo augwa homugo God dali kęą pabo kolesaga tebolo bomo mabo dao, tama augwaligo kolesaga wiegi yai emainu homu hodolama, tama augwali homu nagame ilibo dao. 
Te tǫde bidibo we bidigo konesiąbo po wabo bidi, te aga digi naga tau sabo dao. Tiali goli te Godigo po pusubo bidigo, agai te Godigo po odobo we bidi hani sese tau sabo dao. 
Eno homugo dage tigidaligo te we bidigo konesiąbo pogo po omainogo te homu godolo ebao. Tiali goli eno homugo te Godigo po dagego pusumainogo te homu mu godolo ebao. Magi baso meni, te Godigo po hania pusubo bidi agai te we bidi tau sabo sę ebogo te we bidigo konesiąbo pogo po wabo bidigo tau sabo sę aiyaba elalubo dao. Tiali goli, te we bidi augwaligo te po page hania konemainogo eyu, bidi mego te po page begeleyu da, teda te usu da, te po pusubo bidi dali te we bidigo konesiąbo pogo po wabo bidi dali sigo tau sabo sę te tiwai si dao. 
Eno ama dedeo, dagego te po homugo bugagia koneao. Ena te dage bidibo madi aselama, tama eno po te we bidigo konesiąbo gasa pogo naga wainogo eyu da, tiali goli te Godigo enabolo waselali po meba te eno dagebolo wasiąyu, ma eno wiegi yai kolesaga dagebolo masiąma, ma te Godigo po eno pususiąma, te eno dage me po ola masiąbaso da, teda eno te we bidi konesiąbo pogo wabogo dage bugagia tau sogobeo. Mu menio. 
Te bidibo ula meni yai nai, te ona me gita, te tiwai naga elalubao. Te agai haniani po dolo bugagia wasiąbaso da, teda dago magi ilama te agai dogonide wabo po bugagia odaibawe? Te usu egobeo. 
Ma, te ami enesigi bidi dabe augwaligo te bu wabo nai biugel bu wabo odobo si, augwaligo konebo dao, te hwįabo sogo asai dao, te homu yaibao. Tiali goli ami bidi me deligo te biugel naigo dolo hwa wasiąbaso da, teda dego te wąbi hwįabo sisi elaluaibawe? Bidi meni. 
Dage me, dage te tiwai gilama naga yaibao. Dagego duga lotude te bidi dabego konesiąbo gasa pogo po obaso da, magi ilama augwaligo te po page koneaibawe? Menio. Teda dagego po olo madi hagagi paibao. 
Mu tama, te haniani we bidi hani augwaligo te haniani po hauwa e tǫde elalubao, dago te haniani po nedebo usu egobeo. Tiali goli te po me deli olo me elalubeo. Te tigidali pogo te page elalubao. 
Tialima, te bidi me deligo pusubo po page eno me konesiąbaso da, te agai homugo ena te gasa digibulu bidibo bidi hani da homu yaibao. Tama eno me eno homugo te po wabo bidi te gasa digibulu bidibo bidi hani da, te homu ebo dao. 
Dagego me dagego te we bidigo konesiąbo pogo po weyu da, teda dage tama tiwai ebo dao. Tialima, dagego te Tedali Mobo Bidigo olo maiabo tau sabo bomo dabe sainogo homu godolo yaligo da, teda Godigo we bidi hani bugagia dolalumainao homu eyu, dagego te augwali wiegi yai mu tau mabo bomo sabo homu bomonama eyu, tama te Mobo Bidibolo te bomo da mao weyu bidiąo. 
Tama tibaso, te we bidi dabego konesiąbo pode po wabo bidigo, agai te po begelabo bomo somainogo eyu tama agai Godibolo te bomo ena mao po hanalu wao. Tama tiyu, tama agai te bomo sobaso da, teda agai te aga gasa pogo wabo po begelama, tama gasa we bidi augwaligo te po page hania koneaibao. 
Magi baso meni, eno te da we bidigo konesiąbo pogo Godibolo po weyu da, teda eno mobo bidigo me te gedu haluasa po wabo, tiali goli tebogo eno homu kolesaga tau sabo meni, te olo elaluaibao. 
Tama eno magi egowe? Te eno ena homu ogwa wai dali te da we bidi konesiąbo pogo Godibolo po weyu aga nogi ugwaba saibao, tama ena homugo kone paliyu tama waibao. Eno aga nogi ugwaba sabo tęąbi po te konesiąbo pogo te eno homu ogwa waigo weyu, tama te eno homugo dali me te tęąbi po waibao. 
Te nago tama tisiąma, tama naga homu ogwa waigo naga te lotu wabo sogode nago Godibolo puba hwi po weyu da, tama tede bidibo olo bidi me deligo te po konesiąwani da, teda magi ilama agai te nago puba hwi po walide te “Amen, mu dao” po agai wagowe? Te usu me egobeo. Agai nago te wali po me konegobeo. 
Mu tama, nago Godibolo po wali te wiegi yai wali, tiali goli nago te po waligo te gasa bidi homu tau siyu bomo me mabeo. 
Dagego te da tǫde bidibo we bidigo dena homugo konesiąbo pogo me sogo Godibolo po wabo dao. Awe, te usu da. Eno me hauwa sogo tama tebo dao, tama te sęde eno dage aiyaba elalubo dao. God agai te pogo po wabo bomo ena mobaso, eno agabolo puba hwi po wabo dao. 
Tiali goli te Godigo po odobo we bidi sisinibode, eno homugo te eno te augwaligo konesiąbo po hauwa mu wagobeo. Menio. Eno homu e tiwai dao, te dena pogo weyu, eno augwali tau siyu, te ola mabo po bugagia ola momainogo eyu, te eno dwasianu pogo hania waibao, te usu dao. 
Eno ama dedeo, dagego te haniani sęde dagalabo homude dage te wai puluba tiwai me bidilamuo. Menio. Te dwai kolesaga ebode dage te dwasianu wai puluba bidibo tiwai bidao, te dwai kolesaga egimio. Tiali goli duga haniani sę ebo dagalabo homude, dage te genuai bidi tiwai pedaliąo. 
Te Godigo bomai pode augwaligo te tiwai po polobadu asęai dao, te gasa konesiąbo pogo wabo kolesagade, “Genuai Bidigo te po wai, ‘Te gasa po wabo bidigo pedauwalide, tama te gasa bidi hanigo pedauwalide te eno po e we bidi hanibolo mawaibao. Tiali goli tebogo me usu egobeo, te augwaligo eno po wali me pogobeo,’ agai te po wai.” 
Tama tibaso, dago koneani, te da tǫde bidibo we bidigo konesiąbo gasa pogo po wabo kolesaga da, te muani sa dao, te Kraisba augwa homu tigidali musiąwai bagego augwaligo te tobage po wabo odoyu, tama augwaligo Godigo bomo meba sueibao. Me ma, te Godigo po pusubo kolesaga da, te me te muani sa dao, tama te po odoyu bugagia wali pabo we bidi augwaligo tedu koneaibao, augwaligo augwa homu tigidali te Kraisba mu muai dao. 
Tama tibaso, te dage Godigo po odobo we bidi tigidali dage deli madi sisinama, tama dage te sogo po wabo bage tigidaligo we bidigo konesiąbo gasa gasa pogo po weyu, tama bidi mebago konesiąma, tama Kraisba augwa homu musiąwani bidi dali, augwali te tomoba asiyu da, teda augwaligo dagede te po waibao, “Dage esela pobao” waibao. 
Tiali goli, dage tigidali deli deligo Godigo po dena pogo pusubaso, tama Kraisba augwa homu musiąwani bage, ma bugagia konesiąwani bidi me deli, aga te tomoba asobaso da, teda dage tigidaligo pogo te bidi homude enaibao, tama dage tigidaligo pogo aga po tų ela mabo tiwai eyu tama aga koneaibao, Godigo gedude aga dwai sę yali sęgę elalubao. 
Tama tigidali po aga homude geme dualaluali, te agai hania pusaibao. Tama aga ge neyu, aga gesabidiba basi gulama, tama God nogi ugwaba siyu, tama hanilama te po waibao, “Mu tama, God te dage tomode bidibao,” agai te po waibao. 
Ama dedeo, dagego magi yaibawe? Dage lotu po wainogo eyu sisinibo sogo, dage tigidali deli deligo te duga hasi tau sabo sę elalubao. Me deligo te Godigo nogi ugwaba sabo balia weyu, tama me deligo te dage po ola mabo sę eyu, tama me deligo te Godigo agabolo tamadi mani po, tama agai te po pusaibao. Tama me deligo te dago konesiąbo gasa pogo po weyu, tama mego te po begelebo sę elalubao. Dagego ebo sę tigidali ebogo te dage Godigo po odobo we bidi tau siyu bomo momainogo iyąo. 
Tama mebago te da tǫde bidibo we bidigo konesiąbo pogo po wainogo homu ebaso da, teda sigo ma selago naga yao. Te usu dao. Tama augwaligo po hodobo me olamuo. Menio. Me deligo bolo po hasia olama, tama gasa aga po nosali weyu yao. Tama bidi me deligo te augwaligo wali po page begelemainao. 
Tama te po begelabo bidi meni baso da, teda te we bidigo konesiąbo pogo po wabo bidi te dage Godigo po odobo we bidi sisinani sogo po wabo pedauwali pania sao. Agai aga digi homu tomode God dali naga aga po mimainao. 
Tama te Godigo po pusubo bidi si ma sela, augwaligo te Godigo po pusumainao. Tama gasa bage augwaligo te pusali po dagaloyu tama osola suyu miao. 
Tama me deli dulaluali bidibolo, tama Godigo Mobo Bidigo po me deli agabolo te sogo naga ola mani po wainogo ebaso da, teda te hasia doligulama po wabo bidi, te aga wabo po silao, te Godigo agabolo po tamadi mani bidigo te mani po omainao. 
Te kolesaga ebogo da, teda dage tigidali deli deligo Godigo po pusagameo, tama dage tigidali we bidigo koneama kolesaga selama, tama dage tigidali bomo somainogo yaibao. 
Te Godigo po pusubo bidi dabe augwaligo augwa Godigo Mobo Bidigo nogode sali po pusubo bomo augwa digi tonalumainao. 
Magi baso meni, Godigo te da dago lotu po wabode te subigila ebo homu me ilibo meni. Te menio. Agai da deli homude naga nagamea homu elama bidimainogo ilibo dao. Te Godigo po odobo we bidi sisinibo sogo te we dabe sibigo po me olamuo, augwali pedauwali naga pania sao. Da Godigo po odobo we bidi hani te tigidali tǫde bidiyu, da tigidaligo tama naga tebo dao. Te we dabe sibi augwali te Godigo po odobo we bidi tomode me polalugobeo. Augwali te dologode bidao, te Juda dabego bomai pode wali po gilama yao. 
Te we dabe sibi augwaligo te lotude odali po me deli page koneainogo da, teda augwaligo augwa bidibolo augwa bede hanalu wao. Ma, te Godigo po odobo we bidi sisinibo sogo wego po obaso da, agai te dolo isąwai hale ilibo kolesaga ebao. 
Awe, eno koneani, te dagego eno megi tama wali po bolobo dao. Te dage tomode te dage deliba sisinibo sogo te we mebago po pusubo dao. Magi basowe? Dage te Godigo wiegi yai gesi po page bage dagede da agawe? Dagego naga te Godigo po siyu, tama gasa we bidi augwali meni yaiba agawe? Te meni. Dagego te tigidali gasa tǫde bidibo Godigo po odobo we bidi hani augwaligo ebo kolesaga wali peyu, tama te we dabe sibigo lotu po obadi po pusubo habu selao. 
Tama bidi me deli aga homugo digi aga te Godigo po pusubo bidi da te homu ebaso, ma aga digi homugo te Godigo Tedali Mobo Bidigo agabolo te Godigo we bidi tau sabo sę agabolo mani, te homu eyu da, teda aga koneao, te po eno dagebolo megi asęani te Genuai Bidigo bomai po dao. 
Tiali goli aga te tiwai homu me isąyu da, teda dago me aga te Godigo po pusubo bidi da te homu me egobeo. 
Eno ama dede dabeo, eno wali po page e dao: dagego te Godigo po pusubo sę emainogo eyu duga homugo bomo elama godolo yao. Tama me, dagego te da tǫde bidibo we bidigo konesiąbo gasa gasa pogo te Godigo nogi ugwaba sabo sę te habu munu me selamu dao. 
Tiali goli dage deliba sisinama tama lotu po obadi, te subigila egimio, te sę dodolama tama wiegi yai naga pedalomainao. 
