﻿1 Korin.
15.
Eno ama dedeo, megi eno homugo te eno dagebolo polobadu pusali wiegi yai gesi po, te po pagede dage homu ma hodolainogo eno homu ebao. Dagego te wiegi yai gesi po salio, tama dage tede bomo elama dolalubo dao. 
Tama Godigo te wiegi yai gesi pogo naga dage ma dobola siyu wiegi yai madiba mubao. Dagego te eno dagebolo pusali wiegi yai gesi po dali duga homugo mu kęą peyu da, te pogo agai dage ma dobola saibao. Te dagego te tiwai isąyu da, teda dagego olo naga Kraisba duga homu tigidali muyu agaba tialuali. 
Te eno polasa po dagebolo hasia bolo mani, te eno me eno polobadu te po naga sali. Te po e tiwai dao: te Krais isilama dago dwai sęgę tigidali sela samainogo yali, te Godigo po bukude polobadu asęani po tama usu nani. 
Tama augwaligo aga te masigi dedage gų pageba mugi pai. Tama sela sogo wabode Godigo aga ma hodolama, tama aga me bidibao, te Godigo po bukude polobadu asęani po tama usu numainogo yai dao. 
Tama nosali aga Pita bidibo madi pedalali, tama nosali te aga sę bidi nogo si olama sągą badu si bidi bidibo madi pedalama augwaligo aga suali. 
Tama nosali ma dago ama dede hauwa dali augwaligo aga suali, te bidi sese hauwa 500 bidi augwaligo sualio. Tama te suali ama dede augwali meba nosali isiyu yai, tiali goli hauwa augwali megi me bidibao. 
Tama nosali ma Jemsgo aga suali. Tama te sogo nosali aga sęba tagala palali bidi dabego me aga sualio. Te tiwai aga isilama ma hodaluali po eno dagebolo hasia bolo ola mani. 
Tama augwaligo sula silama, tudi badu mu aga te ena geduba me pedalai, ena te wai bǫų tiwai te aga idago te ame nesiąbo sogo ame nani. 
Magi baso meni. Ena da, ena te Godigo po sela pabo bidi dabe augwali tomode te dwasianu gagayali. Tama ena te bidi augwaligo te Godigo po sela pabo bidi nogi wabo usu me egi menio. Magi baso meni, polobadu eno te Godigo po odobo we bidi hani dolobo sę hauwa mu yai dao. 
Tiali goli Godigo olo mu tau sabo kolesagago ena tau selama, tama agai ena megi bidibo tiwai ilali, ena te aga sę ebo tagala palali bidi dao. Tama agai ena olo mu tau sali wiegi yai kolesaga te olo me hagabeo. Mu menio. Eno aga sę bomo mu elama yai, te gasa Godigo po sela pali bidi dabe augwaligo yali sę eno yali sę ebogo aiyaba elaluali. Tiali goli eno ena digi me ebeo. Menio. Te Godigo olo tau sabo wiegi yai kolesaga ena dali bidiyu, agai naga te sę ebo dao. 
Tiali goli te eno ma augwaligo te gesi wiegi yai po pusali, te tagalao. Te magigo meni. Da aga tagala palali bidi tigidaligo te Kraisde po naga pusubo dao. Tama dagego te pode naga konealubo po duga homugo dąų olama tama Kraisba homu dąų elalubo dao. 
Sesemane sogo da Godigo gesi wiegi yai po pusubo bidi dabe dago te Krais isąma tama Godigo aga ma hodolali po pusubo dao. Tama tialigo da, magi ilama tama dage tomode meba augwaligo e tiwai tibo po weyu ebo dao: “Te isai bidi, aga ma hodalugobe, dago te homu ebo da,” te po wabo. 
Edao. Te isai bidi mu ma hodalobo usu menigi sogo da, teda Godigo Krais te gų pagede ma hodoligi meni da. 
Tama mu tama Godigo Krais ma hodoligi menigi sogo da, teda dago te pusubo po, te po olo nai tiwai gagagi da, tama dagego Kraisde konealubo po dąų olama agaba homugo tialubo kolesaga, te me te olo nai tiwai pedaligi da. 
Tama te tiwai da wida, teda me da te Godigo po pusubode te da tibo po wabo bidi tiwai pedalaibao. Magi baso meni, dago te Godide po weyu tama dago te agai Krais te gų pagede ma hodolali po dago hanilama hania wali. Tiali goli Godigo te isai bidi ma hodolobo meni eyu da, teda agai te Krais me ma hodolobeo. 
Awe, mu tama Godigo te isai bidi ma hodolobo meni da wida, teda Godigo te Krais me hodoligi meni. 
Tama mu tama Godigo te Krais ma hodoligi menigi sogo da, teda dagego te Kraisba duga homu tigidali mubo kolesaga ebogo te duga tau sabo usu me egi menio. Duga dwai sęgę dali bididubadi gebo dao. 
Tama me elalubao, te Kraisde konealubo po dąų olama isali we bidi dabe, augwali me hagawai dao. 
Te Krais agai da ma dobola somainogo eyu, dago dena homu tigidali agaba munama tama agaba tialuyu, tama dwagi yai homu eyu aga ma asobo tonalubo dao. Tama tebogo da e tǫde bidibo sogode naga da tau siyu da, teda da hobedagia mu bidibao. We bidi augwaligo da dali homu dene ebogo te gasa we bidide homu dene ebo sę aiyaba elaluaibao. 
Tiali goli te tiwai me egobeo. Mu menio. Te Krais isali, tama mu tama Godigo aga te isai we bidi tomodu ma hodolali. Aga te isali we bidi dabe hodalomainogo te hasia polasa hodaluali bidi aga dao. Tama te gide nai inabo hasia pedalali nai tiwai aga te gų pagede hasia mu ma pedalai dao. Tama tibaso, dago koneani, agade konealubo po dąų wali we bidi tigidali augwali me te Godigo ma hodolaibao. 
Magi baso meni, te bidi deli Adamgo yali sęde tedu te isibo kolesaga pedalali, tama te tiwai me te gasa bidi me deli Kraisgo yali sęde te isai bidi ma hodaloabo kolesaga me pedalalio. 
Te e tama tiwai: te Adamgo bulai wai augwali tigidali isibo bage dao. Tama tiali goli Kraisgo we bidi hani augwali tigidali bidibo ula saibao. 
Tiali goli da tigidali we bidi deli deli te da ma hodaluama, tama dena sogo tede te bidabo ula saibao. Te hasia bolo polalubo te Krais aga ma hodaluama tama bidabo ula sai dao. Tama nosali aga ma asobo sogo, da aga hani tigidali ma hodaluaibao. 
Tama te sogo tigidali nai silaibao. Tama Kraisgo te gavman sę tigidali silibadi, tama te haniani tobolu bidi sę ebo tigidali badi, tama tigidali bomo dola silibadi elama, tama agai aga tigidali nai tonalubo bomo me ula te Aya Godigo nogoba muaibao. 
Magi baso meni, Krais te tuni bidi bidimainu eyu, tama bidada pidubadi tama Godigo te boi bidi tigidali augwali aiyaba elaluama siligi pabo si usu nigi paibao. 
Agai te gasa boi bidi dabe augwali tigidali dolobode da, teda agai te isibo kolesaga me sia saibao. 
Magi baso meni, te Godigo po bukude te tiwai po wai, “Godigo tigidali nai te aga dologode muaibao” wai. Te asęani pode te Godigo tigidali nai te Krais dologode muaibao po wai. Tama tialima dago hania koneani, Godigo tigidali nai te Krais dologoba muani, tiali goli God aga digi te Krais dologode me bidigobeo. Menio. 
Tama nosali Godigo tigidali nai Krais dologode munama silibo si da, teda God aga Ogwa digi te God dologoba pelama, te tigidali nai aga dologoba munama, tama God te tigidali nai dali, tigidali we bidi dali tobolu bidi mu bidimainogo yaibao. 
Edao. Te Godigo te bidi dabe te gų pagede ma hodaluaibao po te mu po menigi sogo da, magi baso te meba bidibo bidigo te isali bidi tau somainogo eyu baptais sabo dawe? Te mu tama te isai bidi munu me ma hodalugobe da weyu da, teda magi baso te isai bidi dabe tobade te bidibo bidigo augwali tau somainogo eyu baptais sabo dawe? 
Tama ena dali, te ena dali deli sę ebo bage me, da me sesemane sogo bidi mebago da dolainogo ebo dao. Te isai bidi ma hodoligi menigi sogo da, teda magi baso da e tiwai bidaibawe? Te isai we bidi ma hodoligi menigi sogo da, teda te Godigo pode boi bidi homu ebo bagego da dene me maidali weyu dago e sę tagaligi da. 
Ama dedeo, te tigidali sogo te ena dali boi homu ebo bagego dene mabo homu ebaso, te tigidali sogo deli deli ena isigowe, te eno konesiąbadi ena tama bidibo dao. Te po mu po naga dao, te eno dagede ebo homu te mu tama dao tiwai. Mu tama, da tigidali dago Genuai Bidi Krais Jisasde tia selama bidibo tama eno wiegi yai homu pemene dagebolo mu ebo dao. 
Ena e moni hanu Efesusde polobadu bidibadi, te Godigo pode boi bidi homu ebo bagego ena dali dwai sę yali, augwali te bulude bidibo dwai hui digi ebo hasa dabe tiwai yali. Tama eno tǫde bidigo homu wali naga pigi sogo da, teda te sęgę tolobogo ena mena tama tau sogowe ena te homu egi da. Tama tiyu, mu tama te isai bidi dabe ma hodoligi menigi sogo da, teda “Da do ma tamadi isibaso, tagalao, dago te nai me wę me subigila tuinao,” te homu egi dao. 
Augwaligo dage te tobage tibo po ola mabo gogolamuo! Bidi me deligo te dwai kolesaga ebode polobadu wali po te mu po naga dao. Agai te po wai, “Te da dwai bidi dabe dali kisasa biliyu da, teda augwaligo dwai kolesagago dago wiegi yai kolesaga ebo dolaibao,” agai te po wai. 
Dagego te wabo pabo kolesaga tagalama tama dolo homu kolesaga yao. Dagego dwai sę ebo tagaliąo. Dagego odao. Dage tomode meba augwaligo te Godigo te isai we bidi ma hodalugobe po wabo bage, augwaligo God kuna konebeo. Te dage hale ilainogo eyu eno te po dagebolo obao. 
Tiali goli bidi me deligo te tiwai po hanalu waibao, “Te Godigo po wali pali isai we bidi dabe augwali mena tama hodalugowe? Te augwali mena tiwai tigi selama ma hodalugowe?” agai te po waibao. 
Te eno te po wei ponoyu e po obao: nage kolesaga meni yai bidi dawe? Nago hanalu wali po si te kidu meni yai po naga dao. Naga digi te nai yiyu ge bulubo naga koneani, tama te nai ge bulama tama tǫ tomode te ge peda pelama tama kulubi holisiayu da, teda te holabo yiyu aga bidabo ula me sogobeo. 
Tama nago te ge naga bulubo dao, te nosali pedalobo sese nai tigi bulubo meni. Te menio. Nago olo ge naga bulali, te yiyu ge, ma gasa nai ge me te olo ge naga bulubo dao. 
Tama Godigo digi aga homugo te yiyu gede pedelabo yabe dodolama nigali, te aga digi homugo koneama te tiwai yali. Tama agai haniani yabe te haniani nai wai tigidali deli delibolo mabo dao. 
Tigidali tǫde elalubo naigo tigi te deli nai tigi tiwai naga me elalubeo. Menio. Te bidigo tigi gasagi yai me tedali elalubo, tama hasa dabego gasagi yai me tedali, tama ba dabego gasagi yai me elalubo, tama sųgų dabego me gasagi yai tedali tigi elalubo dao. 
Tama dagalude nai dabe me tǫde nai dabe me tedali elalubao. Tiali goli te dagalude nai dabego au yali te deli tigi poai elalubo, tama tǫde nai dabego au yali te gasagi yai tedali elalubao. 
Te giligago au yali te deli tigi poai elalubo, tama poluago au yali te gasagi yai me, tama te hǫ dabego au te gasagi yai me elalubo. Tama hǫ dabego au me te gasagi gasagi yai elalubao. 
Te Godigo te isali we bidi dabe ma hodolobo kolesaga me, te tiwai naga yaibao. Te tigi dago te nai ge tiwai pubalobo, te dolaibao. Te ma hodalobo tigi te gasagi yai dao, te munu me dologobeo, te gamonabo tigi dao. 
Te tigi dago pubalobo, te sawi isąwai dwai mu yali. Te ma hodalobo tigi, te wiegi yai sawia pai mu yaibao. Te dago tǫba pubalobo tigi, te bomo me elalubeo. Te ma hodalobo tigi, te bomo hauwa elaluaibao. 
Te tigi dago pubalobo, te tǫde bidabo tigi naga pubulaibao. Te ma hodalobo tigi, te dagalude bidabo tigi elaluaibao. Te tǫde tigi elalubo, tama tibaso dago koneani, te dagalude bidabo tigi me elalubo dao. 
Te Godigo po bukude asęani pode me te tiwai po wai, “Te polasa hasia bidi, Adam, te bidibo ula elalubo bidi pedalai,” te po asęani. Tama nosali mu pedalali Adam aga te bidibo ula mabo mobo bidi pedalali. 
Tiali goli te bidibo ula mabo mobo bidi te hasia me pedalobeo. Menio. Te e tǫde bidabo ula te hasia pedalali. Tama bidibo ula ebo mobo bidi noma te nosali badu pedalaibao, aga te tǫde bidabo ula hasegelaibao. 
Te hasia polali bidi Adam te e tǫde bidibolo polali. Godigo tǫgo naga aga nigali. Nosali pedalali bidi te agade Adam si wabo bidi, te aga dagalude bidai bidi dao, tedu asai dao. 
Da tǫde we bidi tigidali, da te Godigo te tǫgo nigali bidi Adam tiwai pedalali. Tama da Kraisgo we bidi hani bage, da te dagaludu asali bidi Krais tiwai mu pedalaibao. 
Tama megi da te Godigo tǫgo nigali bidi Adam tiwai dao, dago elalubo tigi te agai elaluali tigi tiwai si naga dao. Tama te tiwai naga me dago te dagaludu asali bidi Krais aga tigi tiwai naga digi dago nosali saibao. 
Ama dedeo, eno megi wali po page e dao: te e tǫde bidabo tigi naga elalubo bidi te Godigo we bidi tonalubo madide bidibo usu me egobeo. Tama te gamonasiąbo tigide bidibo bidi me gamonogobeo. 
Dagego odiąo. Eno geme dualali po me deli dagebolo pusubao: te da tigidali me isigobeo. Tiali goli Godigo da tigidaligo tigi te hasegelama te gasagi yai tigi me pedalaibao, 
polo mu, bidigo gedu gagamu ebo tiwai, te tǫde dagalu si silibo sogo te bu wabo nai biugel po wabo sogo tiaibao. Awe, te bu wabo nai biugel po waibao, tama te Godigo po wali pali isali we bidi augwali gų pagede hodaluaibao, tama augwali munu me dologobeo, te augwali gamonaibao. Tama da me bidibo bage, dago tigi hasegelama, gasagi yai mu pedalaibao. 
Te e tiwai: te dolobo tigi, te hasegelama tama te dolisiąbo tigi pedalama, tama sesemane sogo bugagia bidimainogo emainao. Te isibo tigi te hasegelama, tama gamonabo tigi ulade bidimainogo emainao. 
Mu tamao, te dago elalubo tigi, te dolobo tigi, te hasegelama sesemane sogo bugagia bidaibao. Tama te isibo tigi te hasegelama te gamonabo tigi pedalama tama sesemane sogo bidaibao. Te tebo sogo te Godigo po bukude asęani po me deli te usu nagasaibao. Bukude te po wai: “Godigo te wąbi hwįani bomo elama, tama te isibo kolesaga te aiyaba elaluama, tama tigidali mu silalio.” 
Bukude po me e tiwai elalubao, “Nage da, isibo kolesaga, tama nago te we bidi aiyaba elaluabo sę mena elalubawe? Menio! Te mu silalio! Nage da, isibo kolesaga, te nago dene mabo bomo menawe? Te menio! Te aiyaba elalualio!” Te po bukude asęani. 
Tǫde we bidi augwaligo te isibode magi baso wi ebo dawe? Woo, augwaligo koneani, augwaligo dwai sę eyu bidibaso, nosali augwali dene saibao. Augwaligo dwai sę yali, te augwaligo mena tama koneaniwe? Te Godigo Mosesbolo mani bomai pogo te dwai sę yali page augwali hania waselebo dao. 
Tiali goli Godibolo dago puba hwi po wao! Te dago Genuai Bidi Jisas Kraisgo yali sęde, te Godigo da bomo mobaso, tama dago te boi bidi, te isibo kolesaga, te dago aiyaba elalubo dao. 
Eno ama dede muo, te da nosali ma hodaluama tama tebogo te isibo kolesaga aiyaba mu elalubaso, megi dage bomo elama bidiyu, tama wi homu eyu dwasianu ibaba kila selamuo. Te dagego Genuai Bidigo sę dene ebo, te olo me tagalogobeo, te sę ebogo aga du mu walaibao. Dagego te tiwai koneama, tama sesemane sogo dagego dago Genuai Bidigo sęde sę bomo mu yao. 
