﻿2 Korin.
2.
Tama tibaso, ena homugo digi eno te po wai: ‘Te eno hasia asęna tolali pas te Korin bagego selama, tama augwali homu sęgę eyu bidali. Te ena augwali pageba pelama, tama augwaligo ebo kolesagade te augwaligo dwai sę yali po olama, tama augwali homu sęgę ma ilibo te eno hagela ebao,’ eno dage dali te homu yai dao. 
Magi baso meni. Te eno dagebolo homu sęgę mayu da, teda dego te eno homu wiegi yai pemene iligowe? Te eno dage homu sęgę ilai digi da, teda ena wiegi yai homu pemene ilabo bidi menigi da. 
Dage we bidigo te wiegi yai homu pemene enabolo mabo bage dao. Tama ena dage pageba pelama, te eno homu sęgę sidali weyu, te delide naga polobadu eno te pas asęna tolama tama dagego sali. Eno dage tigidalide te tiwai homugo koneai: te eno nai me delide te wiegi yai homu pemene ebaso da, teda dage tigidaligo me wiegi yai homu pemene teba ebo dao. 
Mu dao, polobadu eno pas dageba asęna tolali, te sogo eno homu sęgę genuai badi, dene dali elaluali, tama ena gela hauwa dali weyu bidali. Eno te pas asęna tolali te eno dageba homu sęgę mawainogo ebeo. Menio. Eno te pas polobadu asęani te dagego ena konemainogo yali, eno dage dali dwagi yai homu eyu godolo ebo kolesaga te genuai mu dao. 
Te dage tomode polobadu dwai penani sę eyu homu sęgę ilali bidigo, agai te homu sęgę enabolo naga me mabeo. Menio. Agai te homu sęgę meba te dage tigidaliba manio. Eno te po bomo elama wabo te ena hagela ebaso, tama eno te po wai, “Meba dao.” 
Te dagego eno hasia asęna tolali pas po nedeyu, tama dagego eno po wali peyu te bidi buluba sąyu yali. Tama aga dali te sę ebogo te dwai dene te dage hauwa bidigo te bidi agaba wei ponani, te tibogo aga usu ilai, te bidigo ge neyu homu begelai dao. 
Tama tibaso, dagego gasa kolesaga me megi iyąo. Te dagego agai sęgę sela sąnama, tama aga homu nagame ilao. Tiyu genuai homu sęgę mugo te bidi aiyaba mu elaluabuo. 
Tama tibaso, eno homugo dagego te duga ebo dwagi yai homu eyu godolo ebo homu te agabolo bugagia ola mao. 
Polobadu eno te pas asęna tolali, te dage eno usu naga sai. Eno koneainogo yali, dagego te tigidali naide eno po wali pogowe naga suainogo yai dao. 
Tama dagego bidi me deligo sęgę sela sąbaso da, teda eno me eno tagalaibao. Awe, te eno sela sąbo gasa bidigo yali sę sęgę elaluyu da, te eno Krais gedude te sęgę sela sąbao, te dage tobade tau siyu tiaibao. 
Eno te dago aga sęgę sela sąbo homu yali, tiyu Satango da tibo po ola menama tama da aiyaba elaluidali weyu tiaibao. Dago agai te we bidi dolabo dwai homu kolesaga koneai dao. 
Polobadu gana ena pelama te Troas hanuba pedalama, te gesi wiegi yai po Kraisde pusainogo yali, tama Genuai Bidigo te po pusubo tų dalalio. 
Tiali goli eno te moni homu tagalama, te homu nagame me elalubeo. Magi baso meni, te eno ama Taitus aga dage bidiboba pelama bidali, tiali goli aga ma asama eno aga me subeo. Tama tibaso, eno te Troas bage augwali tagalama, te Taitus gegegi peyu, tama ena asama te Masedonia moni tǫ pedaiba sabolai dao. 
Tiali goli te Masedonia tǫde eno Taitus sulama, tama agai dagede dwagi yai po olama, megi eno usu da weyu Godibolo po odu gebao. Sesemane sogo agai da tau selama, tama dago Kraisgo bomode te wąbi hwįani usu yai. Tama dago sę ebode te Godigo po pusali, tama te bidi dabe augwaligo Krais konea sabo dao. Te koneani kolesaga te pusu ebo nai tiwai denami te tigidali habuba pabo tiwai ebao. 
Mu tama, dena digi te pusu yai denami ebo nai te Kraisgo selama tama Godibolo mabo tiwai dao. Te denami te Godigo augwali ma sabo tų tomode bidibo we bidi dabe augwaliba me, tama te bidi dolabo tų tomode bidibo we bidi dabe augwaliba me te denami pedalobo dao. 
Te bidi dolabo tų tomode bidibo hanigo te odobo denami te isabo denami odobo dao, tama augwali te isabo madi pedalaibao. Tama te Godigo augwali ma sabo tų tomode bidibo hanigo te odobo denami te bidibo ula sabo denami odobo dao, tama agai te bidibo ula augwaliba pedalomainogo yaibao. Te sęde Godigo da tau sisąyu tama dago te sę ebo usu egowe? Mu menio. Tialima aga da tau mu sabo dao. 
Tiali goli, da te bidi hauwa augwali tiwai me ebeo, augwali tedali tedela pelama, te Godigo pode masigi sabo bisnis sę tiwai me ebo, te tiwai dago egobeo. Menio. Dago te sę Godide sali, tama dago te Godigo sęde tibo po subigila me wagobeo. Menio. Dago sę dolasa mu tigidali ela pobao. Da te Krais dali wadolama, tama homu mu naga eyu, tama God gedude dago agai po te we bidi dabebolo pusubo dao. 
