﻿2 Korin.
10.
Te dage tomode bidi mebago po kisila ena dali weyu te po wai, “Pol aga da dali bidiyu, tama aga digi aga aiyaba elaluali, tiali goli aga digibulu bidibo sogo te agai po bomai asęna toloyu da dali wabo dao,” te po wali. Tiali goli ena Pol eno homugo te dagego Kraisgo homu kolesaga hasia bolo kone palao, te aga digi aga homu aiyaba elaluama tama te bidi dabe augwali dali nagame yai kolesaga yai, tama eno me te tobage homu eyu, dagebolo e mobo mabo po megi obao. 
Eno e tama tiwai po dagebolo obao: nosali ena dageba pedalobo si, teda dage dua dao, tiyu eno dagebolo sesena pai po mayabuo. Tiali goli eno homugo eno po te bidi mebago da te tǫde kolesagade biliba homu ebo bidi dabe augwalibolo hanilama bomo elama te sesena pai po pusabo homu ebao. 
Mu tama, da te we bidi tomode e tǫde bidibo dao, tiali goli Godigo pode boi bidi homu ebo bidi dabe dali hwįbode dago te tǫde bidigo wąbi hwįbo tiwai me ebo meni. 
Tigidali wąbi hwįbo nai dabe dago tolalubo, te tǫde nai tiwai me elalubeo. Menio. Te Godigo bomo elalubao, te boi bidigo bomai obo alubo usu yaibao. 
Dago augwaligo da dali konila po wabo page pedeyu, tama augwaligo wabo po aiyaba mu elalubo dao. Tama tigidali kolesaga ugwadu mu dolaluyu tama te God koneainogo homu ebo bidi dabego tų palialubo, te me dago hųgibo dao. Tama da tigidali bidigo homu kolesaga dago kalabus ilama, te Kraisgo homu kolesaga wali pomainogo ebo dao. 
Tama da sisi elama dage tonalubao. Te da dagego bidibo digi sabolama, tama dagego dago po tigidali wali pobaso da, teda dago te dage tomode bidibo te po sela sąbo bidi augwalide po tų dodolama tama augwali tigidalibolo dwai dene wei ponaibao. 
Dagego te duga gedude elalubo nai bugagia suiyąo. Te dage tomode bidi me deli aga homu aga digi te Kraisgo bidi bidiyu da, teda aga digi homu kone ma palama tama aga te tiwai koneaibao, aga digi te Kraisgo bidi da homu yali da, teda da me te Kraisgo bidi bidibao, da aga dali tiwai si mu dao. 
Magi baso meni. Dago Genuai Bidigo dabolo te sę emainogo te genuai nogi dabolo mani, te dago dagego Kraisde homu tialubo kolesaga ebode dąų walomainogo yali. Te dage dolomainogo eyu agai te bomo dabolo mabeo. Tama eno dena te sęde dena nogi ugwaba mu sali goli, tede ena hale me sogobeo, te dolo dao, dago dena sę bugagia yaibao. 
Tiali goli dagego eno asęna tolobo pasgo te dage olo wi ilibo homu ebo te eno hagela homu ebao. Dagego te tama egimio. 
Mu tama, bidi meba augwaligo enade tama tiwai po obao, “Awe, te agai asęna tolobo pasde sęgę yai po elaluyu, tama bomo elalubo po me elalubo dao. Tiali goli aga digi sabalobo si tama dago aga digi suyu bomo meni yani, tama agai po te olo nai tiwai dao.” Te tama po wabo dao. 
Te po wabo bidi dabe, augwaligo e tama tiwai homu bugagia kone palao: da digibulu bidiyu tama dago pas naga asęnama dagebolo tolobo po, te po dali, te da asama dage dali bidiyu ebo kolesaga dali, te si tiwai si mu yaibao, te tedali gasagi yai menio. 
Te dago dena digi dali te augwali digi augwa nogi ugwaba sabo bidi dabe dali si dago osola sulama, tama da augwali tiwai si da po wagobeo. Te po wabo dago hagela homu ebao. Magi baso meni. Te bidi dabego augwaligo ebo kolesagago naga te augwa kolesaga usu sabo dao. Me deligo aga ebo kolesaga te gasa bidi mego ebo kolesagade usu sabo sę ebo dao. Te tama tebo bidi dabe, augwaligo bugagia konesiąbaso, wiegi yai koneai kolesaga me elalubo menio. 
Tiali goli da dali, God agai te dago sę yabo madi sesegede dąį ilali. Te dąį ilama, tama dage Korin bulude bidibo we bidi dage te dąį tomode bidibao. Tama dago ebo sęde dago dena sali dąį edelama tama dago dena nogi ugwaba me sogobeo. 
Tama dage te dąį tomode bidaligo da, teda da pologi solama tama Kraisde wiegi yai gesi po dageba sela asali sogo, te sogo dago dena sę yabo madi dąį mu edelebeo. 
Dago te Godigo mawai dąį bolama, tama te gasa bidi dabe augwaligo yali sęde te dago dena digi dena nogi ugwaba me sabo meni. Te menio. Dago homugo te tiwai bomo ebo dao: te dagego duga homu tigidali Kraisba mubo kolesaga bomo yai pedalobo si, tama dago sę genuai dage tomode pedalomainogo eyu, te dena dage tomode Godigo sę yabo dąį usu nama tama te genuai mu pedalaibao. 
Tama tiyu, dago dage tagalama, tama te Kraisde wiegi yai gesi po te dage u badu elalubo me badu tǫde bidibo we bidibolo sela pabo usu yaibao. Te elama, tama dago gasa bidigo te gasa dąį ilali tǫ tomode yali sęde te dago nogi olo ugwaba me sogobeo. 
Awe, te meni. Te Godigo po bukude po me deli e tiwai elalubao, “Te nogi ugwaba sabo homu ebo bidi, agai te dago Genuai Bidigo yali sęde po weyu, tama Genuai Bidigo nogi naga ugwaba sao,” te po asęani. 
Magi baso meni. Dago koneani, te bidi aga digi aga nogi ugwaba sabo, te bidi aga nogi te God gedude me elalugobeo. Mu menio. Te dago Genuai Bidigo bidi me deligo nogi ugwaba siyu, te dwagi yai bidi da obaso da, te bidi naga nogi mu elaluaibao. 
