﻿Polgo Galesia Dabeba Pas Asęani.
1.
Ena da Pol da. God agai ena tagala palali, eno agai po wagi pomainogo yai. Bidigo ena tagala palobeo, bidi mego ena te po wagi pabo sęba mubeo. Te menio. Te God dago Aya dali te agai te gų pagede ma hodolai bidi Jisas Krais dali, augwali sigo ena te sęba muai dao. 
Tama ena dali, ena dali bidibo ama dabe tigidali dali, dago te pas dage Galesia tǫ tomode bidibo Kraisgo po wali pabo we bidibolo asęna tolobao. Tama asęnama, tama dwasianu hani deli delibolo te po asęna tolobao. 
Tama dago homugo God dago Aya dali, dago Genuai Bidi Jisas Krais dali, te augwali sigo dagebolo olo tau sabo sę eyu, dage dwagi yai homu elama bidao. 
Tama Krais agai te dago Aya Godigo homu wali peyu, tama aga digi aga bidibo ula olo mayu, agai dago yali dwai dwai sęgę te sela sąwai. Tama tiyu agai homu da e tǫde megi elalubo dwai kolesagade sela pomainogo yai. 
Tama agai te sę ebaso, dago God agai nogi sesemane sogo ugwaba mu sao. Eno homugo dago tama wainao. 
Tegoba! Dagego yali sęde ena noma mu salio. Dagego magi yaliwe? Te Krais agai dage olo tau siyu, tama God agai dage i wai dao. Tiali goli polo tama dagego te sę tagaluyu, tama dagego gasagi yai po wali pabo gagalali. Tama te gasagi yai po dagebolo pusali bage augwaligo “Ao, e po Kraisde dwagi yai gesi po mu dao,” wali. 
Tiali digi gasa wiegi yai po me elalubeo. Mu menio. Bidi meba augwaligo dagego homu kolesaga gasaba hasegelabo homu eyu, tama augwaligo te Kraisde wiegi yai po gasaba begelainogo yai. 
Tiali goli, dago digi, ma Godigo sę ebo ensel bidi me deligo digi te dagebolo dago polobadu wali gesi wiegi yai po hasegelama, gasa po weyu da, teda da te moni sia dabo buluba pao, te eno homugo. 
Dago te po polobadu wai dao, tama megi me eno ma obao, niwai bidi agai te dagego polobadu odali dwagi yai po wasiąyu da, tama agai gasagi yai po dagebolo obaso da, teda te po wabo bidi aga te siaba pao, hagamainao. 
Te eno te tobage bomai po weyu, te we bidi augwaligo ena dali dwagi yai homu emainogo wabeo. Te menio. Eno homugo God agai ena dali dwagi yai homu yaibao. Eno te tobage po weyu, we bidi augwaligo eno nogi ugwaba sao, eno te homu ebowe? Woo, te menio. Eno te we bidi te enade homu bega sabo po wagi sogo da, teda ena Kraisgo sę ebo bidi bidigi menio. 
Ama dedeo, dagebolo eno mu po obao, e wiegi yai gesi po eno polobadu dagebolo wali po page te bidi mego pedalomainogo ebeo. 
Tama eno te po bidi mede sabeo. Tama bidi mego te po enabolo ola mabeo. Mu menio. Jisas Krais aga digi enabolo te po ola mayu waselai. Tama te koneama, ena da Godigo tagala palai po wagi pabo bidi mu dao, te dagego koneaibao. 
Te eno polobadu yali kolesaga te ena Juda bidi hani dali bidibadi yali sę po, te po dagego polo odai dao. Tama eno Jisas konesiąbadi, te Juda bidi hanigo Godibolo lotu wabo sę eno wali pai dao. Tama te tiwai bidibadi, te sogode eno Kraisgo po wali pabo bidi hani elala bilaluai, tama eno te hani tigidali mu ela silainu homu eyu bidaluali. 
Tama augwali dali homu dene isiąbadi eno te sę yai. Tama me, te ena gesi bidi bidibadi, dena Juda dabego wąįgo yali kolesaga wali pabo homu ebode, tede te Juda hani tomode elaluali gesi bidi tigidali eno ena abagi dede te dena wąįgo kolesaga wali pabo sęde augwali aiyaba elaluali. Te Juda dabego ebo sęde eno bomo mu elama, tama Juda hani tomode nogi sai. 
Tiali digi, polobadu eno idago ena ame nesiąbadi, tama Godigo ena te sogo sa muai dao. Tama tiyu, agai ena dali aga dwagi yai homu eyu, olo tau siyu, tama ena ame nenama, tama aga bidi mu pedalumainu ilama, tama agai ena i wai, eno agai sę emainogo yai. 
Tama agai ena i olama, tama agai eno homu mu hasegelainogo eyu, tama agai homu ‘Megi eno Polbolo eno ogwa waselaibao,’ te homu eyu, tama te sogo agai aga ogwa Jisas enabolo waselai. Tama eno te Juda bidi hani isiąwai we bidibolo te bidi Jisasde gesi dwagi yai po pusigi pomainogo eyu, God agai ena i olama, tama ena gasa bidigo bidibo digiba pabeo, agai enabolo te sę page ola momainogo eyu teba pabeo. Te menio. 
Tama Godigo ena i wasiąbadi, agai gasa bidi dabe aga po sela pabo bidi dabe nigilai dao. Augwali Jerusalem hanude bidali. Tama Godigo enabolo aga ogwa waselama, tama nosali ena augwali dali te sęde po miainogo ena Jerusalemba pabeo. Te menio. Eno te bidi meni yai tǫ Arebia teba osogo bidigi pai. Tama nosali te tǫ tagalama, tama ena te Damaskus buluba bidigi pai. 
Tama nosali kibu be sela bidama, tama ena Jerusalem hanuba pai, tama Pita dali po miainogo yai. Tama ena aga dali bidibadi, Sarere si te me deli tama sogo tede bidai. 
Tama ena tede bidibadi, te Godigo po sela pabo bidi tigidali eno subeo. Te dago Genuai Bidi Jisas aga amanu Jems deli naga bidibo eno suai, Pita dali. 
Tama eno megi dage dali asęna tolobo po, te eno te yali sęde tibo po dage dali wagobeo. God agai koneani, e po mu po naga dao. 
Tama Jerusalem tagalama, tama nosali ena ma te tǫ Siria dali te Silisia te tǫ siba pai. 
Tama te sogo te Kraisde wadolama te Judia tǫde bidali we bidi augwaligo ena gesabi susiąma, 
tama gasa bidigo enade wali po naga odai. Tama augwaligo enade te po wai, “Polobadu te bidi Pol agai da elebo sę yai, dago Jisasde konealubo po doloyu yai. Tiali goli aga homu begelama, tama megi aga biliyu, agai we bidibolo te po wabo dao, ‘Te Jisasde konealubo po te po mu po dao.’” Augwaligo enade te Godigo ena homu hasegelali po odali. 
Tama augwaligo enade te po odoyu, tama augwaligo Godigo nogi ugwaba sai. Tama tibaso, te sęde dagego koneagameo, Godigo digi te eno dagebolo ola mani gesi dwagi yai po agai enabolo ola mawai dao. 
