﻿Efesus.
4.
Te God agai dage Kraisde wadolomainogo agai dage Juda hani isąwai we bidi i obaso, te eno dagebolo homu hodolobo po megi obao. Tama ena Genuai Bidi Krais agai sęba munama, tama eno te sę eyu, tama augwaligo ena kalabus beba muai goli, eno bomo eyu dagebolo e homu hodolobo mobo mabo po obao. Te dage agai we bidi hani tomoba asomainogo Godigo dage i wali. Tama te sogo agai dage aga usu ni ola mani. Tama dagego agai wali po bugagia wali peyu, te usu niba dolo mu kadu wao. Dagego aga tama wali peyu da, te usu mu dao. 
Dagego tama kolesaga wali peyu, duga digi duga nogi ugwaba sisiąma, tama imila pai we bidi mu bidiąo. Tama bidigo dage dali dwai kolesaga ebaso da, te dagego te sę emainu sulama tona tagalao, wei sigimio. Tama tiyu, dagego duga abagi dabe dali wiegi yai homu elama godolo mu yao, tama augwaligo mabo sęgę te dagego tolao. 
Tama Godigo Mobo Bidi agai dage homu kęnai we bidi dabe nigilibaso, te kolesagago agai dage te bonogo kebo tiwai elama tama dage deli hani tiwai mu bidibo dao. Tama tibaso da, dage bomo elama sę dene eyu te deli hani kolesaga dąų ola selama bidao. 
Tama da Godigo po wali pabo we bidi da tigidali deli tigi tiwai elalubo, tama te Godigo Mobo Bidi me te deli naga bidibo dao. Tama tiwai elalubaso, Genuai Bidi agai da i wali sogo te sogo te po wai, “Te ena ma asobode homu konea paluyu, tama dage ena tonaluao,” te po deli naga dao. 
Tama dago Genuai Bidi deli naga elalubao, tama Kraisde dago konealubo po deli naga elalubao, te baptais sabo kolesaga me te page deli digi naga elalubo dao. 
Tama te God me deli digi naga bidibo, te da tigidali tǫde hani bidi dabe dago Aya deli aga dao. Tama agai tigidali bidi aiyaba elaluama tama agai nogi dali bomo dali te ugwadu mu elalubao, tama tiyu agai sę tigidali we bidi tomode eyu, tama tigidali bidi tomode bidibo dao. 
Te Krais agai da deliba sisinama, tama agai da deli tigi tiwai nigilai goli, tama agai da usu selama, nedama, tama aga homu wali peyu agai da deli delibolo haniani sę yabo homu kolesaga agai dabolo dobawai dao. 
Tama polobadu augwaligo Godigo po bukude te Krais agai yabo sęde e tobage po asęani, “Agai te genuai boi bidi hani nogo dunama, kalabuside muainu dagalu sigiba mu sela holai dao. Tama tilama agai wiegi yai nai dabe bidi dabebolo olo mani,” te po augwaligo polobadu asęani. 
Tama te “dagalu sigiba mu holai” po magi baso waliwe? Woo, te page e dao, hasia bolo aga aiyaba mu dulai dao, e tǫba sabolama, tama tǫ tomoba aga dulai dao. 
Tama hasia dulali bidi, aga me te nosali ugwaba holali bidi dao. Aga holali, te dagaluba holai, tama te dagalu ela soali, te sigiba mu holali, agai te tigidali bulude elalubo sese isąwai nai tigidali te ma siminainogo aga holali. 
Tama aga digi agai naga agai te wiegi yai nai dabe bidi dabebolo e tiwai olo mawai: te agai meba bidi augwalibolo Godigo po sela pelama pusigi pabo sę yabo bidi nigilai. Bidi me badubolo agai wabo po ola mabo bidi te sęba muai. Bidi meba augwaligo Godigo wiegi yai po pusa mabo sę yabo bidi nigilai. Tama me badu bidibolo te Godigo we bidi hani tonalubo sę dali te Godigo po ola mabo sę dali emainu agai te sę augwalibolo mawai dao. 
Tama agai dabolo te haniani wiegi yai sę yabo homu kolesaga magi baso dobabo dawe? Te Godigo we bidi hani augwaligo we bidi tau sabo sę ebode bugagia sisi elama bidimainogo agai tebo dao, te Kraisba augwa homu tigidali muai we bidi hani augwali Krais aga tigi tiwai bidiyu, augwali geninama eyu bomo siyu bugagia bidimainogo agai te dwagi yai sę yabo homu kolesaga dabolo tama dobabo dao. 
Tama tiyu, tama we bidi tau sabo wiegi yai sę dago me ela pidubadi geyu da, teda da tigidaligo bomo yai homu Kraisde dąų wabo sę deli homu kolesaga naga mu eyu, tama dago Godigo Ogwa bugagia konea silimainogo tiyu dago deli homu kolesaga naga agade mu yaibao. Tama tiyu, te da Godigo hani we bidi mu pedalaibao. Tama tiyu, da Godide wiegi yai kolesaga ebo we bidi mu te Krais aga tiwai mu elama bidaibao. Tama aga dago usu ni mu tiwai da, agai usu niba dolo pedaliyu da, teda da aga dali usu mu yaibao. 
Tama da Godigo hani we bidi mu bugagia pedalama, tama te Godigo pode da te homu subigila pabo wai puluba tiwai ma bidigobeo. Te eno po digi po me megi obao. Te geba, te geba moni sigi ąįdu pobadi, wali asiyu te ąį dini me te bomo yai wali me augwali sigo te geba subigila bega sąyu sela sąbo dao. Tama te tiwai bidi muma sabo tibo po wabo bidi augwaligo ili po weyu, tama bidi hauwa augwaligo homu polo tulalubo dao. Tama tiyu, te bidi muma sabo bidi augwaligo te we bidi te gasa dwai sę ebo tuba kegebo dao. Tiali goli, da Godigo hani we bidi mu bugagia pedalama bidibaso, tama te bidi muma sabo dwai bidi dabe augwaligo wabo tibo pogo da tulalugobeo. 
Te menio. Da Godigo we bidi hani tomode dena abagi dabe augwali dali wiegi yai kolesaga eyu godolo mu elama, tama Godide mu po naga wao. Tama tiyu, tama da te tobage wiegi yai sę idubadi, tama da Kraisde mu dąų waibao. Aga te dago tigigo tobolu bidi aga deli dao. 
Tama aga te dago tobolu bidiyu, tama da agai tigi tiwai bidibaso, teda agai da nogo sągą gedu tigide elalubo te tigidali agai tonalubo dao. Tama aga da tigidali tonalubaso, tama da tigidali bugagia deli tigiba wadolama, tama te dili dabe wadolobo nai augwaligo te tigi deliba bugagia dąų wabo dao. Tama dago tigi deli badu sę ebo augwa hasi tau sabo sę ebo si, tama te tebo kolesaga te tigigo ebo wiegi yai kolesaga genuai eyu, tama te wiegi yai kolesaga eyu godolo mu ebaso da, tama te tigi genuai bomo selama wiegi yai mu pedalobo dao. 
Tama tibaso, eno po me deli dage dali wainu obao. Te ena da Genuai Bidigo po wabo bidi bidibaso, dage tau somainogo eno te po bomo elama obao. Odiąo. Dagego te Godigo po odisąbo bidi dabego ebo kolesaga munu me ma wali pelamo dao. Augwaligo homu kolesaga da te olo habuge naide naga te homu ebo dao. 
Tama tiyu augwaligo homu kolesaga dwai eyu, be hulia sabo tiwai ebo dao, augwaligo ebo homu te kedu meni yai homu kolesaga dao. Tama te Godigo mabo bidada pabo ula augwaligo sogobeo. Magi baso meni. Augwaligo bomo elama konebo hagela homu eyu, tama augwali munu me konesiąyu bidibo dao. 
Augwaligo te haniani dwai dwai kolesaga ebo tomoba mu peyu tama augwaligo homu mu hodaloyu tama dwai meda yai haniani kolesaga mu ebo dao. Sesemane sogo augwaligo te sę yaio homu ebo dao. Tama tiyu tama augwali hale munu me ebo menio. 
Tialima, dagego te tobage dwai sę emainogo gasa bidi dabe augwaligo te Krais aga kolesaga page dagebolo ola mabeo. Te tiwai si menio. 
Tama augwaligo dagebolo agade po olama, tama dagego mu odali. Tama dage Jisasde wadolama, tama augwaligo agade mu po dagebolo ola mani dao. 
Te mu po da wali po e tiwai dao: polobadu dagego duga dwai dwai sę yabo homu kolesagade biliyu bidai dao. Tama te sogo te dwai homu kolesagago dage tonaluyu, tama dagebolo te dwai dwai sę yao po weyu yai. Tama tiyu, te dagego te dwai sę ebode godolo emainogo tama te dwai sę yabo homu kolesagago tibo po weyu, dagego homu hodolai dao, tama dage te dwai sę ebo tųdu pai dao. Tama te dwai sę ebogo te dwai sę yabo homu kolesaga doloyu yai. Tialima megi dagego te polobadu yai dwai homu kolesaga mu sela sąyao. 
Tama tilama, dagego homu kolesaga dali mobo dali wiegi yai gesi mu ma pedalama bidiąo. 
Tama dagego dwai meda yai kolesaga ebo tagalama, tama dagego wiegi yai gesi kolesaga eyu tama dage te gesi noma bidi tiwai pedalao, te aga tigi wę paluai bidigo aga gesi ugwa gudubogia tiwai yao. Tama dage te gesi noma bidi tiwai pedaloyu, tama God aga digi agai te dage gesi noma bidi nigali, tama dage God aga homu kolesaga tiwai mu pedalainogo nigali. Tama tibaso, gasa we bidi augwaligo dagego Godigo po odoyu bidibo sumainogo te dagego bugagia bidiąo. Tama tiyu, dage gasa we bidide te wiegi yai dolo mu kolesaga naga eyu, tama God agade te dagego aga pabo tųdu naga peyu yao, aga gedude doloba pai we bidi mu bidiąo. 
Te God agai dage te gesi noma we bidi nigaligo da, teda dagego dwai tibo po wabo kolesaga tagalama tama munu me egimio. Te menio. Tama dage tigidaligo duga hasi tomode mu po naga wao. Magi baso meni. Dagego koneani, da tigidali te deli tigide naga wadolama bidibo dao. 
Tama me sogo dagego homu sębę eyu da, teda dua dao, te dagego sębę ebo homugo dage te dwai sę ebo kolesaga tomoba kekeidali weyu. Tama te giliga piode dega sigi pisiabadi te homu sębę polo tagalama silao. 
Dagego tisiąwani da, te sębę me elalubadi, tea te dwai haubo noma bidi dabe augwaligo tobolu bidi tebolo te dagego sunumi dalaibao, agai dage dwai sę tomoba kegaibao. 
Tama te polobadu nai wi sidu geai bidi agai te nai wi sabo sę tagalama silao. Megi aga digi doloba pai sę yao. Tama agai aga digi nai sabo sę aga nogogo digi eyu, tama aga digi tau siyu, te nai meni yai we bidi me tau siyu yao. 
Tama dagego dwai meda yai po me wagio. Menio. Dwagi yai po naga weyu, te bomo kimi meni yai we bidi augwali bomo somainu te bomo mabo po wabo usu dao. Tama tiyu, dagego te Godigo olo tau mabo wiegi yai kolesaga te dagego po odobo we bidibolo tama mao. 
Tialima dagego tisiąwani da, dwai meda yai po weyu da, teda dagego te Godigo Mobo Bidi dwai homu dene mu ilaibao. Tama te dwali dao. Te Godigo Mobo Bidi aga wiegi yai tedali mu dao. Tama God agai dage ma dobola sai hagede te dage hagea siyu sa mumainogo eyu agai dagebolo aga Mobo Bidi mawai dao. Tama te Godigo Mobo Bidi dage dali bidibaso, dagego mu konebao, te God agai dage olo mu bidabo bidi nigilabo sogo te nosali mu pedalaibao. Tama tibaso, dwai po weyu aga dwai homu dene mu iligio. 
Tama dagego boi bidi homu ebo me, te wado po weyu tama homu sębę ebo me, te genuai po daga wabo me, te posobo po me, te moni dwai homu ebo me, te tigidali dwai kolesaga ebo tagaliyu sela sąyao. 
Te tobage dwai kolesaga munu me egimio. Te menio. Tama dagego duga ama dede dali deli homu eyu dwagi yai tau sabo sę yao. Tama duga hasi dali homu dene eyu, augwali godolo mu yao. Tama duga hasigo dwai sę dagebolo ebaso da, teda dage sębę egio, te dagego augwali godolo mu eyu augwaligo yali dwai sę sela sąyao. Te Krais agai dage tau selama tama Godigo dagego yali dwai sę sęgę sela sąwai dao. Te tiwai kolesaga dagego me tiao. 
