﻿Filipai.
2.
Te dage Krais dali wadolama tama bidu, tama dagego bomo tama elalubo dao. Tama agai dage dali dwagi yai homu eyu godolo ebaso, tama dagego homu nagame elama bugagia bidibo dao. Dage agai Tedali Mobo Bidi dali deli homu eyu kisasa biliyu bidibo dao. Tama dagego duga hasi tomode te abagi homu eyu, homu dene eyu duga hasi tau sabo dao. 
Dagego tama tialigo da, eno homu dwagi yai genuai mu dagego emainu e kolesaga tama yao: te deli homu naga bugagia yao, tama duga hasi dwagi yai homu eyu godolo ebo kolesaga te dobayao, tama homu dali, homu kolesaga dali te duga hasi deli naga tiwai si naga elaluao. 
Gasa bidi tau sabo kolesaga tagalama, tama duga digide naga homugo kone paluyu, duga nogi naga olo ugwaba sabo kolesaga eyu, dage te tiwai bidilamuo. Te menio. Te imilai homu eyu, e homu yao, “Te gasa we bidi augwali dwagi yai bage dao. Ena augwali dologode bidaibao,” te homu yao. 
Tama tiyu, dagego duga digi naga tau siyu, duga nai naga bugagia tonalugimio. Gasa we bidi augwali me tau siyu, augwaligo nai me dagego bugagia tonaluiąo. 
Dagego elaluabo homu kolesaga te Krais Jisasgo elaluali homu kolesaga tiwai gilama yao. Te kolesaga e dao: 
Aga tigidali sogo polobadu God tiwai mu bididuai dao. Tiali goli agai aga digi tau somainu “Ena e tiwai bidaibao” homu te munu me ebeo. 
Te mu menio. Agai digi aga genuai wiegi yai nogi tagalama, tama nogi meni yai sęde dąų walali bidi tiwai pedalali. Aga te tǫde bidibo bidi dabe tiwai pedalama, tama bidi augwaligo suali aga be bidi mu bidai. 
Aga digi aga nogi aiyaba munama, tama Godigo po wali peyu, tama augwaligo aga ela muabo sogo usu nagasai, te dwai ni pedaide naga isali. 
Tama tialide Godigo aga ugwaba mu sela muai, tama agabolo te gasa nogi tigidali aiyaba elalubo genuai nogi mawai. 
Tama tibaso, dagalu bidi me, tǫde bidi me, tǫ dai dologo badu bidibo bidi dabe me, augwali tigidaligo Jisasgo nogi ugwaba somainogo augwali kidu sugunaibao, 
tama tigidali bidigo e po hania waibao, “Jisas Krais da, aga naga te Genuai Bidi dao.” Tama tiyu, augwaligo God Ayago nogi ugwanu mu elaluaibao. 
Eno abagi mu dede, Krais aga Godigo po mu wali pali. Tama tibaso, ena dage dali polobadu bidibadi dagego eno po wali pali tiwai gilama, te megi me, ena digibulu bidibadi te dagego bomo elama, te eno po bugagia wali pao. Te sęgę dao, olo sę mu menio. Tama tiyu, God dali duga homugo kęą pai we bidi mu bidiyu, tama te dage bidibo kolesaga wiegi yai mu sese pedalomainu bomo elama tiduao. 
Magi baso meni, te dagego aga homu wali pabo homu emainogo, te dagego aga homu wali pabo bomo me elalumainogo, te God aga digi dage tomode aga sę eyu, tama dagego homu agai hodolobo dao. 
Tama dage Godigo po tama wali peyu tama dagego elalubo sę ebadi, te duga hasi wado po wabo me, konila po wabo me, te tobage po wagimio. 
Tama dagego te sę tama eyu da, teda dage te gasa we bidigo gedude te magi sę isąwai we bidi bidiyu, tama dage te dwai sę dali dwagi yai sę dali gealusiąbo we bidi bidaibao. Tama bidiyu, dage te homu gagea pai haniani dwai dwai sę ebo we bidi tomode bidibadi goli, dage Godigo mu doloba pai wai puluba bidaibao. Tama dage augwali tomode bidibadi dagego te ho dabe hulide ula nanobo tiwai eyu bidiąo. Tama tibadi, dagego augwalibolo te wiegi yai bidibo ula elalubo po pusao. Dagego tama tiyu da, teda te Krais aga e tǫba ma asobo side eno dwagi yai homu dage dali yaibao. Magi baso meni, eno koneaibao, eno dage tomode yali tigi dene sę me te eno bomo me te olo dali ebeo. 
Dagego duga homugo Kraisde konealubo po dąų wabo kolesaga ebo, te kolesaga ebo te Godigo gedude te dagego agabolo te ofa nai mabo kolesaga ebo tiwai dao. Tama bidi dabe augwaligo ena ela mugowe, mugobewe, te eno konebeo. Tama augwaligo ena ela muyu da, teda eno kaneme dali te dagego ofa mabo nai dali te si dago agabolo mawaibao, te polobadu bidali bidi dabego te wain ąį te ofa nai daiba gelali tiwai yaibao. Awe, tama tiyu da, teda usu da, eno tede dwagi yai homu pemene ebao, tama dage dali hodobo eno dwagi yai homu ebao. 
Te tama tiwai me, dagego me te enaba pedalabo sęde dwagi yai homu pemene yao, tama ena dali hodobo dwagi yai homu yao. 
Genuai Bidi Jisasgo homu usu weyu da, te eno dage bugagia bidibowe wabo po odomainogo, eno Timoti dage bidibo digi tamadi tagala palaibao. Tama aga ma asama, dagede po enabolo olama, eno me dagede dwagi yai homu yaibao. 
Eno Timoti tiwai bidi me menio. Agai ena dali homu deli naga ebo dao. Agai dage tau sabo homu mu ebo dao. 
Tigidali gasa bidi dabe augwa naide naga homu eyu, tama tede tonalubo dao, tama augwaligo Jisas Kraisgo sęde homu eyu tonalubo menio. 
Tama duga digi Timoti mu koneai, te aga yali sę dagego osola sulama tama dagego koneai, te aga sę bugagia ebo dwagi yai bidi dao. Agai ena dali hodobo te Godigo po pusubo sę iduai dao, te aga ogwago aga aya dali hodobo sę ebo tiwai yai dao. 
Te gavman bidi dabe augwaligo ena e kalabus bedu tamadi olo tagala palogowe, ma meniwe, te eno megi konebeo. Tialima te eno nosali konebaso da, teda eno Timoti polo dage bidibo digi tagala palaibao. 
Tama Genuai Bidigo homu usu weyu da, te ena digi ena dage bidibo digi tamadi asaibao, eno megi te homu ebao. 
Eno homugo te bidi Epafroditus dage bidibo digi ma tagala palaibao. Aga dago ama dao, tama ena dali deli sęde abagi olama biduai dao. Tama gasa bidi dabe augwaligo Godigo po pusubo sę dolidali weyu tama agai ena tau siyu, tama da sigo tigi dene sę iduai dao, te ami enesigi bidigo bomo elama hwįbo tiwai yai dao. Polobadu dagego Epafroditus ena bidibo digi tagala palai, tama agai ena tau siyu ena dali bidibao. 
Agai dwai homu mu eyu, tama agai homugo aga dageba polo paio wabo. Magi baso meni, dagego aga gasi yali po odali, te po agai odali. Tama agai te po odama, tama dagego agade moni homu idali weyu aga dagede homu dene eyu dage sugi pabo homu eyu bidibao. 
Awe, mu tama, polobadu aga gasi mu yai, tama pąde mu aga isabo tiwai yai. Tiali goli Godigo aga dali homu dene eyu, tama aga tau selama aga isibeo. Tama tebode Godigo aga deli naga homu dene eyu tau sabeo. Agai ena me homu dene elama tau salio. Agai koneai, ena e kalabuside bidibaso, ena sęgę dali dene me te elalubao. Tama eno abagi isibaso, eno genuai sęgę elaluaibao. Tama idali weyu Godigo te bidi tau sabogo ena me tama tau sai dao. 
Tama tibaso, ena wiegi yai homu eyu tama eno homugo aga dage bidibo digi tagala palabo homu ebao. Tama tiyu, tama dagego aga ma subo si, teda dagego dwagi yai homu agade ma yaibao. Tama eno sęgę me te tama silaibao. 
Dage dali, te bidi Epafroditus dali, te dage tigidali te Genuai Bidi Kraisgo hani deli dao. Tama tibaso, aga dageba asobo si, dagego aga duga ama tiwai ma sao. Te tobage bidigo nogi dagego ugwaba siyu, tama augwali dali dwagi yai homu yao. 
Magi baso meni. Kraisgo sę tobade aga pąde tama isai digi dao. Agai homugo aga bidabo homu yai menio. Dage digibulu bidiyu, tama duga digi ena tau sabo usu sąbaso, agai ena tau sabo homu elama, tama Kraisgo sę ebadi pąde isai digi dao. 
