﻿2 Tesalonaika.
3.
Abagi dedeo, dago po me deli elalubuo. Te po e dao, dagego Godibolo gedu haluasa po da tau somainogo wao. Tama God agai da tau selama, tama dago Genuai Bidi Jisasgo po te tigidali buluba polo sela pelama, we bidi hauwa augwaligo te po odama, tama Genuai Bidigo nogi genuai emainao. Te pogo dage tomode sę polo yali tiwai gilama gasa bulude emainogo, dagego Godibolo po hanalu wao. 
Dagego koneai, bidi hauwa augwaligo Godigo dwagi yai po odoyu, homude dąų wabeo. Tama tibaso, te tobage mu dwai sę ebo bidi dabe augwaligo da Godigo po sela pabo bidi dali dwai sę idali weyu, dagego te sęde me Godibolo gedu haluasa po wao. 
Awe, we bidi mebago dwagi yai kolesaga mu ebo menio. Tialima, Genuai Bidi Jisas agai da dali dwagi yai kolesaga naga mu ebo dao. Tama tibaso, da we bidi agade homu dąų olama bidibaso, te usu yaibao. Agai dage bomo menama, tama dage tonaluyu, tama dwai haubo bidi Satan agai dage dali dwai kolesaga me egobeo. 
Tama me, Genuai Bidigo da ola menama, tama dago dagede te konebao, tigidali kolesaga dago dagebolo yao te po wali, te sę dagego megi me ebo dao, tama nosali me dagego tama naga tiwai sę yaibao. 
Dago homugo Genuai Bidi Jisasgo dagego homu kolesaga dodolomainogo yai. Tama agai te sę dage dali eyu, tama dagego Godigo dage dali dwagi yai homu eyu, godolo mu ebo sę page mu koneaibao. Tama agai dagego homu kolesaga dodolama, tama Krais agai moni sęgę tolaluyu, aga bomo elama dolaluali sę page dagego te me mu koneaibao. Tama koneama, dagego te sę tiwai gilama eyu bidao. Dago dage dali te homu eyu, dago Godibolo gedu haluasa po wabo dao. 
Abagi dede, dago Genuai Bidi Jisas Kraisgo nogide, dago po bomo elama, dagebolo obao, dagego suali abagi agai tubo nai sabo sę ebo hagelayu, olo bidiyu, tama agai dagego dade sali po wali pisąbaso da, dagego te tobage bidi sula tagalao. 
Polobadu da dage dali bidibadi, tama da olo bidai menio. Tama dagego koneai, dagego dago yali kolesaga tiwai gilama tama dagego tama tiao. 
Tama da dage dali bidibadi dago dagego nogode tubo nai olo me sabe. Menio. Dago abeleyu naga yai. Dago sę bomo elama, tama siade me hulide me te sę dene hauwa mu eyu, tama dago dagebolo naga sęgę maidali weyu tiwai dao, dage habuge idali weyu. 
Da da, dagego tubo nai masiąbo bidi menio. Da da, dagego po ola mabo bidi dabe dao. Tama tibaso, dago dagego nai olo sobaso, te usugi da. Tiali goli, te menio. Dago te tubo nai sabo sę ebo dagego suali. Tama dagego dago yali kolesaga wali pomainogo te sę dago yai dao. 
Polobadu da dage dali bidibadi, tama dago e bomo yai po dagebolo maiyu tama wai, niwai bidi sę ebo hagelabo homu eyu sę isiąwani te bidibolo tubo nai magio. 
Magi baso dago te po waliwe? Dago odali, dage tomode bidi meba tubo nai sabo sę isiąma olo bidibo po dago odalio. Augwaligo sę me ebo menio, tigidali sogo. Augwali olo biliyu, gasa we bidigo ebo sę suyu, tama augwaligo te po ola bilibo dao. Tama dago augwaligo te dwai sę ebo po odama, tama dago dagebolo te nai magio po ma obao. 
Te Genuai Bidi Jisas Krais agai nogigo bomogo dago te tobage sę ebo bidi dabe augwalibolo po mobo mayu, bomo elama te po obao, augwali nagame elama, bugagia bidiyu, sę eyu, tama augwa digi nai sela tumainogo yao. 
Eno abagi dede, dage dwagi yai sę ebo bage, dagego dolo dwagi yai kolesaga ebo hagela egimio. 
Tama niwai bidi me deligo dago megi asęna tolali po tigidali wali pisąbaso da, te bidi dagego sulama, koneao. Tama dage te bidigo ebo kolesaga sulama, sula tagalao, digibulu bidao. Tama aga yali dwai kolesagade hale emainao, aga homu begelemainogo tama tiao. 
Tiali ma, dagego homugo aga dali boi bidi yabo homu egimio. Te menio. Dagego homugo dago abagi dao te homu elama, tama dagego agabolo po mobo ola mao. 
Te Genuai Bidi Jisas aga dwagi yai homu nagame ebo page bidi mu dao. Tama dago homugo sesemane sogo aga digi dage dali bidiyu, tama dage dwagi yai homu nagame emainogo yao. Tama dago homugo haniani sę dagebolo pedalubaso da, teda agai dage dwagi yai homu nagame emainogo yao. 
Ena Pol ena digi eno te po dage tao olama, asębao. Te eno tigidali pas asębo silagasu, eno tama po naga asębo dao. 
Eno homugo Genuai Bidi Jisas Krais agai da olo mu tau sabo dwagi yai kolesaga dage tigidali dali bidao. Te tama dao. 
