﻿Hibru.
2.
Te Godigo Ogwago genuai nogigo te ensel mobo bidi dabego nogi aiyaba elalualigo da, teda dago te dago odali mu po tagalaidali weyu, dago ma bomonama tama te odali po homugo bugagia dąų ola sao. 
Magi baso meni. Polobadu Godigo po meba te ensel mobo bidi dabebolo pusama, tama augwaligo te we bidibolo ma pusali. Tama pusama, tama te po Godigo bomonama bugagia dąų walali. Tama tiyu, tama bidigo te po bolama tama te po sela sąwani bidi tigidali, augwali te dwai dene mu te augwa yali dwai kolesaga usu nama sai dao. 
Tiali goli megi da, Godigo da ma sabo sę yali, tama agai te sę yali te genuai nai mu dao. Tama tibaso, dago Godigo te sę yali po oda tagalama tudiba muani da, teda da wi peyu, tama te dwai sę yalide te dene sabo sę te mena tama geda saibawe? Te usu munu egobeo. Hasia Genuai Bidigo digi po pusuyu, tama agai da ma saibao homu yai. Tama agai po odali bidi dabe augwaligo dabolo te po mu po naga dao hania ola mawai dao. 
Tama ebadi, God me agai te po te haniani bomai sęgo me tama agai haniani bomo yai idualigo te po mu po dao dabolo hania ola mani. Tama tiyu, agai te Mobo Bidigo olo mabo haniani wiegi yai sę ebo kolesaga te we bidi dabe augwaliba dobayali, te God aga digi homugo tama tiai. 
Eno megi asębo po, te we bidigo gesi kolesaga eyu bidibo te nosali pedalabo po obao. Godigo te ensel mobo bidi dabego te kolesaga ebo dodolama tonalumainogo teba me mubeo. Menio. 
Te Godigo po bukude asęani po me delide te bidi me deligo te po pusai, “God, bidi dabe augwali te magi nai da weyu, tama nago augwali homugo konebo dawe? Magi baso nago augwali tonalubo dawe? Augwali tǫde bidibo bage naga dao. 
Te osogo naga, nago augwali te ensel mobo bidi dabe augwali dologoba muai. Nago augwalibolo genuai bomo me, genuai nogi mawai, tama te kolesagago nago augwaligo nogi ugwaba sai. 
Nago te tigidali nai augwali dologoba muani, te nai tigidali augwaligo tonalumainogo tiai.” Awe, Godigo te tigidali nai bidi dologoba munama elaluai. Tama agai te nai me deli te olo me augwali dologode elalumainogo me ebeo. Tiali goli megi dago me susąbadi digi te tigidali nai bidi dologode elalubeo. Menio. 
Tiali goli dago Jisas konebao. Polobadu osogo naga Godigo aga nogi te mobo bidi ensel dabego nogi dologode bidimainogo ilali, te Godigo wiegi yai homu eyu, te olo mu tau sabo kolesaga pedalomainogo me te tigidali bidi tau siyu isainogo tiai. Agai te dene tolama isali, tama Godigo aga nogi ugwaba selama, tama genuai bomo me genuai nogi agabolo mawai dao, tama megi aga te tiwai bidibo dago konebao. 
God aga te tigidali nai nigai bidi, tama agai tigidali nai bugagia bidimainogo tonalubo dao. Tama agai homugo aga wai puluba hauwa te dagaluba odasa pelama, tama bugagia mu aga dali bidimainogo yai. Tama tiyu, agai dene Jisasba pedalobo gogolali, tama te dene yaligo te Jisas te we bidi augwali hasia mu polasa pabo augwali ma sali bidi usu mu ilali. Godigo te kolesaga yaligo, te dolo mu yai. 
Dago koneani, te tigidali we bidi te magi dwai sę isąma wiegi yai pedalomainogo ilali te bidi aga Jisas dao, tama te magi dwai sę me isąyu te wiegi yai pedalali we bidi te tigidali augwaligo aya te Jisasgo aya me te deli naga dao. Tama tibaso, Jisasgo te we bidi augwali nogi weyu, “ama” wai, tama agai augwali te tiwai nogi ebo te aga hale me ebeo. 
Te Jisasgo da “ama” wabo pode augwaligo polobadu e po bukude asęai dao, “God, eno nago nogi te eno ama dede augwalibolo pusaibao. Awe, te eno nago nogi ugwaba sabo tęąbi weyu, te genuai po miyu sisinibo madi tomode te po pusaibao.” 
Tama agai po ma wali, “Te eno digi agade konealubo homu mu dąų waibao.” Tama agai po ma weyu te po wai, “Ena digi bidibo, suao. Tama Godigo ena mani we bidi dabe, augwali me ena dali bidibao, te wai dabe tiwai bidibao.” 
Tama te agai “wai dabe” wabo we bidi dabe augwali te tǫde we bidi bidai, te da tigidali tiwai yai. Augwali tama bidaligo da, Jisas me te bidi augwali tiwai mu gilama pedalai, te aga tigi isimainogo yali, tama te isibogo agai te bomo elalubo bidi agai te bidi isimainogo ebo bidi te agai bomo dolaibao. Te bomo elaluali bidi te Satan dao. 
Te we bidi augwali isibode wi yai. Tama augwali te tǫde bidali tigidali sogo, te isibode wi ebogo augwali kalabus elaluai. Tama augwali te kalabuside bidibo sela sąwainogo eyu, Jisas aga e tǫde isai dao. 
Mu tamao, agai te ensel mobo bidi dabe tau sainogo te sę me ebeo. Menio. Agai te sę yali te Abrahamgo hani augwali tau sainogo te sę yai dao. 
Tama tibaso, te tigidali naide aga te tigidali we bidi tiwai mu pedalomainogo tiali. Magi basowe? Agai tama tialigo da, tama aga te God dali we bidi dali tomode dolalubo pris tobolu bidi bidabo te usu igibu tama Godigo sę tolaluaibao. Agai te we bidi homu dene eyu, tau sabo wiegi yai kolesaga eyu, tama aga te Godiba aga homugo kęą pai bidi bidai. Tama tiyu, agai te Godigo te tigidali we bidigo dwai sę yali sęgę sela sąwainogo eyu, te aga ofa ilali te usu yai dao. Tiali goli aga te we bidi tiwai mu pedaligi menigi da, teda te sę tigidali ebo aga usu menigi da. 
Aga digi te dene tolali, te Satango aga dwai sę ebo kolesagaba kekainu eyu te usu sabo sę tigidali agaba pedalali, tiali goli aga dwai sę me ebeo. Tama tibaso, megi te usu sabo sę te we bidi dabe augwaliba pedalobo si te agai augwali tau sabo usu dao. 
