﻿Jems.
5.
Megi eno te dage walu hauwa munalubo bidi dabe dali te po obao. Dage dwai homu eyu, te hwa weyu, gela weyu yao. Dagebolo moni dwai sęgę dali, dene dali si tamadi pedalaibao. 
Tama dagego te wiegi yai walu dali te au dobage te nai dabe tigidali te dolama, tama damua pai dao. Tama dagego te ugwa dabe me tigidali, te asibago me te sagado dabego tula silai. 
Tama dagego te wiegi yai kapa nogi gol te golgo nigali nai dali, te kapa nogi silva si te wiegi yai nai dabede nai yogo ebo homu eyu, te nai dabe olo munaluyu, te yaba yai. Tama te nai si yaba ebo gilama te dagego dwai sę ebo te hania pedaliyu, tama te naigo dagego tigi te sia ulubo tiwai yaibao. Dagego megi bidiyu, te walu me te mone ge hauwa sisinibao. Tiali goli te Genuai Bidi aga ma asobo sogo pąde dao. Tama tibaso, megi da te nai deliba sisinabo sogo menio. 
Te po bugagia odao. Te sę ebo bidi dabe augwaligo te dagego moni gide dagego nai sabo sę yai. Tama dagego augwali ili po weyu, te augwali maiabo mone ge bogia siyu, tama meba duga geme halobageba dualobo dao. Odao. Dagego te geme dualali masigigo agai i olama, dwai po dage dali wabo tiwai po wabo dao. Tama te sę bidi dabe augwaligo masigi habuge eyu, dwai homu eyu, tama augwaligo i wabo te dagalude bidibo Genuai Bidi agai odalio, God aga tigidali bomo page bidi mu dao, te aga digi augwaligo gela wabo po odalio. 
Tama tigidali sogo dage e tǫde bidibo sogo, dagego dwagi dwagi yai nai siyu, tama dage homu dwagi yai naga eyu bidai. Tama dage nai hauwa tuyu genuai bidi nisai, tama dage elabo bodolu te pąba pedalai dao, te nisai genuai kibu tamadi elabo bodolu pąba pedalobo tiwai dao. 
Dagego te wiegi yai doloba pai bidi dabe po tų elama, te bidi dabe augwali ela muai. Tama dagego augwali dali te dwai sę ebadi yaide, augwaligo dage dali po wei ponobo usu ebeo. 
Eno ama dedeo, te walu hauwa munalubo bage augwaligo tama tiyu, dagego homu dąų olama, dagego te tigidali sęgę toloyu, tama te Genuai Bidi Jisas ma asobo tonaluao. Dagego koneani, te gi page bidigo te aga gide bulali nai dwagi yai holobo tonalubo dao. Tama te bidigo homu dąų olama, moni homu esiąyu, te tulubage dali te giliga dali sigo sę usu ela silibo si, tama te bidi aga te gide te wiegi yai nai sabo dao. 
Dagego me tama duga homu kolesaga dąų olama, te tigidali haniani sęgę tolao. Tama te Genuai Bidi ma asobo sogo te pąba yagasobao. Tama tibaso, dwagi yai homu eyu, dagego homu kolesaga dąų olama tonaluyu bidao. 
Eno ama dedeo, te po tų ebo bidi Jisasgo dagebolo dwai dene wei ponoidali weyu, duga hasi te gasa ama dabe dali wado po weyu, augwali dali te posobo po olamu dao. Dagego e po odao. Te po tų ebo bidi Jisas te be tų bulu badu dolagasai elalubao. 
Ama dede, dagego te polobadu Genuai Bidigo nogide po pusali bidi profet bage augwali dali yali te sę homugo koneao. Te bage dali gasa bidi dabe augwaligo boi bidi homu eyu, augwali dali dwai sę yai. Tiali goli te profet bidi augwaligo homu kolesaga dąų olama, te sęgę bugagia tolai dao. Tama dagego augwaligo te yali kolesaga suyu, te kolesaga dagego usu ni tiwai dao. Tama dage te usu niba kadu wao. 
Tama te tiwai augwaligo te sęgę polobadu bugagia tolai baso, megi dago tama po wabo dao: “Te homu kolesaga dąų olama te sęgę tolali bidi dabe, te bidi megi augwaligo homu wiegi yai eyu bidibao.” Tama gasagi yai bidi me agai nogi Jop, agai yali sę po dagego odai. Te genuai sęgę hauwa te agabolo pedalali digi te agai bomo eyu dolalu, te sęgę te aiyaba elaluai. Tama nosali Genuai Bidigo dwagi yai kolesaga aga dali yai, te me dagego koneai. Tama te bidi Jopde yali sę po odama, tama dago koneani, Genuai Bidi agai da hobede mu eyu, tama sesemane sogo agai da homu dene elama, da agai dwagi yai homu eyu, da olo mu tau sabo dao. 
Ama dedeo, dagego polasa te yabo sęgę sę e dao: Dagego te God aga bidibo madi dagalu me, tǫ me, te gasa nai me nogi eyu, tama dagego te po wabo dao te pogo dąų wagimio. Tama dagego “Awe” weyu duga wabo po dąų walomainu, “Awe” naga wao, te usu yaibao. Me ma, dagego mu po weyu, “Menio” weyu, duga wabo po dąų walomainu, “Menio” naga wao, te usu yaibao. Bidi mego aga wabo po dąų walomainu Godigo nogi weyu da, te bidibolo Godigo sęgę mawaibao. Tama Godigo dagebolo sęgę maidali weyu, dagego te Godigo nogi olo nogi igio. 
Te dage tomode bidi me deli aga te sęgę tolobawe? Tibaso da, agai te Godibolo gedu haluasa po hanalu wao, Godigo aga tau somainogo. Ma, bidi me aga homu dwagi yai eyu bidibawe? Te homu ebo bidi agai te Godibolo wiegi yai homu elama, tęąbi po weyu, Godigo nogi ugwaba sao. 
Tama dage tomode ama me deli aga te gasi saliwe? Tama tibaso da, agai te Godigo po odobo we bidi tomode bidibo tobolu bidi augwali i wao. Tama augwali aselama, augwaligo te Genuai Bidi Jisasgo nogide te bidi tigiba te wel muagasiyu, tama Godigo te gasi sai bidi tau somainu augwaligo Godibolo gedu haluasa po hanalu waibao. 
Tama augwaligo Godibolo te konealubo po mu dąų olama gedu haluasa po weyu da, te Genuai Bidigo te gasi bidigo gasi usu ilama ma hodolaibao. Tama te gasi bidi agai dwai sę meba yaibaso da, te Genuai Bidigo te dwai sę tigidali sela sąwaibao. 
Tama tibaso, dagego duga dwai sę yali te duga ama dabebolo pusao, te duga hasi tau somainogo Godibolo te po hanalu wao, te God agai dage dwagi yai ma usu ilimainogo yao. Tama tiyu, te doloba pai bidigo gedu haluasa po wabode bomo elaluyu, tama agai te gedu haluasa po wabogo te we bidi tau sabo sę ebo usu yaibao. 
Te polobadu bidai bidi nogi Elaija aga doloba pai bidi bidiyu, tama agai gedu haluasa po wabode bomo elaluali. Tama agai Godigo nosali yabo sę po augwalibolo pusuyu bidai. Tiali goli Elaija aga te da tiwai bidi bidai. Tama bidiyu, agai Godibolo gedu haluasa po bomonama wai, te tulubage tuluidali weyu, tama te tulubage dagalude tulisiąbadi kibu be sela olama, tama te polua a naga olama, me badu nogo deli olo bidai. 
Tama nosali agai Godibolo po ma hanalu obadi, tama dagaludu te tulubage tagala palama, tama tulubage tuluyu, te tǫde nai ma holai. 
Eno ama dedeo, dage tomode ama me deli agai te Godigo mu po tagalobaso da, tama ama me bidigo te ama ma oda siyu da, 
tama te gasa bidi ma oda sali ama agai koneama te homu yao: tama te bidi mego te dwai sę yali bidi tau siyu, tama te dwai sę yali bidi agai te dwai sę ebo tų tagalama tama te bidi God pageba ma asobaso da, te bidigo te dwai sę yali bidigo mobo ma sai, tama te bidi agai te dwai sę eyu te dwai sęgo aga ela mugobeo. Te dwai sę yali bidi tau sabo kolesagade Godigo te dwai sę ebo bidigo dwai sę hauwa sela sąwaibao. Te tama dao. 
