﻿Pitago Hasia Pas Deli Asęani.
1.
Ena da Pita da, te Jisas Kraisgo tagala palai bidi me deli dao. Tama te dage haniani gasa tedali bulude bidibo we bidibolo eno e pas asęna tolobao. Dage meba te moni tǫ nogi Pontus tede bidibao, meba te moni tǫ Galesiade me, meba te moni tǫ Kapadosiade me bidibo, meba te moni tǫ Esiade me bidibao, meba te moni tǫ nogi Bitiniade me, dage te tǫde bidalubo, tede osogo bidibo we bidi tiwai bidibao. 
Dago Aya God agai dage polobadu mu konebaso, agai dage hagea sai dao. Tama agai Mobo Bidigo dage doloba pai mu iliyu, tama dage wiegi yai kolesaga naga eyu bididuyu tama dage Jisas Kraisgo po odoyu, agai aga kanemego dagego yali dwai sę sela sąmainogo, God agai dage koneyu polobadu hagea sai dao. Tama eno homugo God agai olo tau sabo kolesaga dage dali genuai mu elama, tama dage bugagia mu bidao. 
Te dago dena Genuai Bidi Jisas Kraisgo Aya God aga nogi dago ugwaba sinao. Agai da moni homu dene mu eyu, tama da tau somainogo, agai Jisas Krais te isai bidi dabe bidibo digi tomodu ma hodolali. Tebogo dabolo te gesi noma ula mawai. Tama menama, da dwagi yai homu eyu, bugagia tonaluyu bidalubao. 
Aga bidibo digi dage maiabo nai agai dagala munama, megi bugagia tonalubo dao. Tama agai dagebolo maiabo nai te gamonabo nai dao, te dwai sęgo dolisiąbo nai dao, te nai munu me mobia pogobeo. 
Tama dagego duga homu tigidali te Krais agaba mubaso, God agai bomogo dage bugagia tonalubao. Tama nosali te tigidali nai silabo bodolu mani sogo pedalobo si, agai te we bidi ma dobola sabo kolesaga polobadu sisi ela muani te sogo waselaibao. Tama tibaso, megi agai dage bugagia tonalubao. 
Tama agai dage dali te sę ebode dage moni dwagi yai homu mu ebo dao. Godigo te dage usu sabo sę pedalama gogolama, tama dage homu osogo dene ebao. Tiali digi, dage moni dwagi yai homu mu ebo dao. 
Tama te haniani dene mabo sę augwaligo page elalubao. Dage duga homu tigidali Godiba muani sę, te sę usu somainogo te dene mabo sę dageba pedalobo dao. Eno megi te wiegi yai kapa nogi gol te naide po digi po begelama obao. Augwaligo te kapa gol te tǫde diganama, tama te dwai nai sela sąwainogo augwaligo te gol siade ulubo dao. Siago uludama, tama nosali te wiegi yai kapa gol naga pedalama, augwaligo saibao. Tama te gol te osogo wiegi yai nai dao, te tǫde elalubo nai dao, tama nosali te nai mu dolaibao. Tiali goli dagego duga homu tigidali Godiba mubo sę te wiegi yai mu dao, tebogo te kapa gol aiyaba elalubo dao. Tialigo da, dagego konealubo po dąų wabo kolesaga usu selama, tama usu baso, te Jisas Krais aga ma asobo hanilabo sogode te Godigo dagego nogi ugwaba mu siyu, dagebolo dwagi yai genuai nogi mawaibao. 
Tama dagego duga gedugo aga munu me susiąwai digi, dagego Kraisde dwagi yai homu eyu godolo ebo dao. Dagego megi me aga susiąbadi digi, dagego duga homu tigidali agaba muyu, tama wiegi yai homu mu ebo dao. Tebogo te tigidali gasagi yai dwagi yai homu ebo aiyaba elalubo dao. Tama te dagego wiegi yai homu ebo te genuai mu dao, augwaligo Godigo bidibo digide ebo wiegi yai homu ebo sabi si dao. Tama tialigo da, dagego pedauwaligo tede po wabo usu egobeo. 
Tama God agai dage ma dobola saibao homu eyu, megi dagego Krais susiąbadi digi dagego duga homu tigidali agaba muyu, tama God agai dage ma dobola sabo sę eyu bididubao. 
Te Godigo dage ma dobola sabo sę, polobadu mu te sęde te Godigo nosali yabo sę po pusabo profet bidi dabe augwaligo te sęde bomo eyu osola suali, te sę pagede dua dua eyu hanalu wali, augwaligo te sę page kuna konemainogo yai. 
Tama Kraisgo Mobo Bidi agai augwaligo homu tomode hanilama, te po widu geai, “Te Godigo sa muani nosali asaibao wali bidi Krais agai dene selama, tama nosali agai te genuai bomo yai ula me saibao,” te po wai. Tama augwaligo te pode homu konea peyu, te po hanalu wai, “Te sę nisu pedalaibawe, mena side pedalaibawe?” te po wai. 
Augwaligo te po hanalu wali digi, tama God agai augwalibolo waselama, tama augwaligo koneai, augwaligo po pusubo sęgo augwa digi tau sabo sę meni, te dage nosali bidabo we bidi tau sabo sę dao. Tama augwaligo te sę eyu, augwaligo te polobadu sogo mu pusali po dagego tamadi odali. God agai aga Tedali Mobo Bidi aba tagala palama, tama agai gasa bidi dabe tau siyu, augwaligo Godigo dwagi yai po dagebolo pusagasai. Tama te sęde te Godigo dagalude sę ebo ensel bidi dabe augwaligo bomo eyu, te sę page kuna koneaio homu ebo dao. 
Te God agai dage dali te sę yaligo da, te bidi me sę yai hagede aga ugwa sugwa sabo tiwai, dagego duga homu bugagia dodola selama dąų wao. Tama dage deli deli duga digi bugagia tonaluao, te homu kęnai we bidi bidao. Tama te Jisas Krais aga asobo hanilabo sogo agai dagebolo te wiegi yai olo tau sabo sę mawaibao. Dagego tede duga homu bugagia dąų olama, dwagi yai homu eyu tonaluao. 
Dage Godigo po wali pabo we bidi bidibaso, dagego God konesiąbadi polobadu yali dwai dwai kolesaga wali ma pigimio. 
Te menio. Te dage i wali God aga da, te tedali mu doloba pai bidi bidibaso, dage me tigidali kolesagade mu doloba pai we bidi bidao. 
Magi baso meni. Te Godigo bukude e po asęani, “Ena tedali mu doloba pai bidi bidibaso, teda dage tedali mu doloba pai we bidi bidao.” 
Tama nogi yai bidi dali, nogi meni yai bidi dali God agai po tų ebo sogode dagalama egobeo. Te meni. God agai we bidi po tų eyu osola subo si, agai augwaligo yali sę naga osola subo dao. Tama tibaso, dagego agade dago Aya waligo da, teda dage e tǫde osogo bidibadi, agade wi eyu aga dologode bidao. 
Magi baso meni. Dagego wąįgo dagebolo polobadu ola mani bidabo kolesaga te usu isiąbo kolesaga dao. Tama dagego koneai, God agai dage te usu isiąbo kolesagade ma dobola siyu, agai te mobi elama damua pabo nai mego agai dage ma abela sabeo, te dila pai kapa si nogi gol dali silva dali si, te tobage gamonasiąbo naigo dage ma sabeo. 
Te meni. Te Kraisgo kanemego agai dage abelama, tama ma dobola selama, tama megi dage olo mu bidibao. Tama aga kaneme te dila pai nai mu dao. Krais aga te wiegi yai kibu sipsip wai tiwai bidali, te sipsip wai aga tigi dwai naigo doloyu husugu yai digi te menio, te Godibolo te ofa mabo sipsip usu dao. 
Tama God agai e tǫ nigisiąbadi, polobadu mu agai aga koneama tama te sę yabode sa muani. Me ma megi e nosali sogo agai aga dage tobade waselai dao. 
Tama tiyu, Godigo aga te gų pagede ma hodolama, agabolo genuai ula yai nogi mawai dao. Tama tiwai ebaso, agadu dagego duga homu tigidali Godiba muyu agade mu dąų wali. Tama duga homu tigidali Godiba munama, tama agai dage dali wiegi yai sę yabo sogo dagego dwagi yai homu eyu tonalubo dao. 
Te dagego Godigo wiegi yai mu po bugagia wali peyu tama duga homu kolesagade elaluali dwai kolesaga sela sąnama, tama dagego duga hasi we bidide dwagi yai homu ebo gagalali. Tama tiyu, megi dage bomo eyu, homu mu elaluyu duga hasi godolo mu yao. 
Awe, duga hasi godolo mu yao. Magi baso meni. Dagego te gesi noma bidabo ula sai dao. Tama te dagebolo te gesi noma bidabo ula mani nai te gamonasiąbo nai menio, te gamonabo nai mu dao, te Godigo bidabo ula mabo bidada peyu, bidada pabo po, te pogo dagebolo te gesi noma bidabo ula mawai dao. 
Tama Godigo pode te bukude asęani po me deli e dao, “Te tigidali we bidi osogo naga bidibo dao, te noswai tiwai. Tama augwaligo genuai nogi me te osogo naga elalubo dao, te noswai aga duduli tiwai. Te noswai holama, sasia peyu, aga duduli me tegasa dulaibao. 
Tiali goli te Genuai Bidigo po bidada peyu, bidada pabo dao,” te po asęani. Tama te po da, te augwaligo dagebolo pusagasali wiegi yai gesi po dao. 
