﻿2 Pita.
3.
Eno abagi dede dabe mu, megi eno e asęna tolobo te eno pas si dao. Tama eno dagebolo asęna tolali pas side te dagego homu wiegi yai ilimainogo hodolobo po wai dao, te po dagego ma koneiąo. 
Tama eno homugo dagego te nosali pedalabo nai po ma konemainogo homu eyu, te wiegi yai tedali profet bidi dabego pusali po dao. Tama te Genuai Bidi te da ma sali bidi agai aga bomo yai po olama, tama te dugaba tagala palali sę bidi dabego pedauwalidu wali po odoyu, tama te po me dagego homude dąų olama ma koneiąo. 
Hasia dagego tebolo koneiąo: tama te tǫ de dagalu si me te tigidali nai silibo sogo, te posobo po wabo bidi dabe augwali pedalama, tama augwa bomonama naga te homugo ebo dwai kolesaga naga wali paibao. Tama augwaligo posobo po e tiwai po weyu, “Aga ma asabo po wali dawe? 
Tama aga menade bidibawe? Aga asobeo. Tama te dago wąį dabe isali sogo tama dąį elama megi tama bidada asobo sogo, te tigidali nai Godigo nigali sogo, te tiwai polobadu elaluai dao, hasegelebeo,” augwaligo te tobage po waibao. 
Tama tiyu, augwaligo homugo te Godigo polobadu yali sę konebo hagela homu yai dao. Te polobadu mu Godigo po obaso te dagalu pedalama elaluai, tama tǫ te wę tomodu pedalama, tama te wę tomode te tǫ elaluai dao. 
Tama nosali te wę te tǫde te genuai asama, tama te sogo tǫde elaluali nai tigidali mesegelama dolai. 
Tiali goli, megi Godigo pogo naga te dagalu me tǫ me sa munama, tama te dolobo sia dabo pedalobo tonaluyu bidibao. Tama te dagalu de tǫ sigo te Godigo po tų te agai po tudiba muani we bidi augwali te po tųba pedalobo tonalubao, tama te we bidi augwali dolaibao. 
Tiali goli, abagi dede dabe mu, dagego homugo te po me deli gegeda pigio. Te po e dao, te Genuai Bidigo gedude be deli sogo siade te kibu be hauwa mu 1,000 tiwai te si dao, tama te kibu be hauwa mu 1,000 wabo kibu be te deli sogo siade tiwai si dao. Te Genuai Bidigo homude te si te deli tigi tiwai dao. 
Tama tede konesiąwai bidi mebago homu te Genuai Bidi agai te po dąų wali sęde te sę dua dua eyu polo egobeo. Tiali goli te menio. Agai dage bugagia tonaluyu bidibo dao. Agai homugo te we bidi me deli hagaidali te tonaluaibao. Agai homugo tigidali we bidi augwa homu begeleyu te dwai kolesaga ebo tagalamainogo, te aga tonalubo dao. 
Tiali goli te Genuai Bidi asobo sogo mu asaibao, te nai wi sabo bidi geme asobo gilama. Tama te sogo dagalu kulukulu genuai olama tama hagawaibao. Tama te giliga dali, polua dali, te hǫ dabe tigidali, te siago dela silaibao. Tǫ me, te tigidali nigali nai elalubo me, te siago tigidali daibao. 
Tama te nai dabe tigidali tama tiwai ela silaibao. Tama tibaso, dage kone paliąo, te dage magi we bidi megi bidaibawe? Dage te wiegi yai tedali kolesagade biliyu, tama Godigo kolesaga naga tigidali wali piąo. 
Tama tibadi, te dagego te God aga sę yabo sogo asobo tonaluyu, tama dagego bodolu pedelaiba weyu, tama sę bomonama selebo sę yao. Tama te sogo te dagalu sia dela silama, tama posolo yai siago mu te dagalude elalubo nai dabe tigidali delama, tama te wę tiwai begelama pedalaibao. 
Tiali goli Godigo te gesi dagalu dali gesi tǫ si nigabo po dąų wai, tama doloba pai kolesaga naga tede bidaibao. Tama dago te nai naga tonalubo dao. 
Abagi dede mu, dagego te gesi nai pedalobo tonalualigo da, teda dagego bomo eyu, te meda meniama tama magi dwai sę me isąma bidiyu, tama God dali dagego deli homu elama bidao. Tama nosali te sogo Godigo dage osola suyu, dage te tiwai bugagia bidibo agai sueibao. 
Tama Genuai Bidigo me tonaludu tama agai da dali dua ebao. Tama dagego te kolesaga ebode tama kone palao, te agai da ma sainogo ebao. Tama Godigo wiegi yai homu kolesaga te dago dwagi yai ama Polbolo menama, tama agai me te tobage po dagebolo asęna tolai dao. 
Agai tigidali pasde agai te sęde te tobage po naga wabo dao. Tama meba po te pasde elalubo te po page polo hania pedalobo meni, te dago bugagia hania koneainogo sinabo sę ebo dao. Tama te bugagia dolalusiąbo bage, te konesiąwai bidi dabe, augwaligo te po hasegelebo dao, te augwaligo te gasa po te Godigo bukude elalubo po te me hasegelebogia. Tama tebo bidi dabe augwali augwa digi dolaibao. 
Abagi dede dabe mu, dagego te tibo po ola mabo bage nosali pedalabo te polo konealigo da, teda dagego duga digi bugagia tonaluao. Tiyu te bomo yai po sela sąbo tibo po wabo bidi dabego dage te geda muani poba kegelama tama dage pasega sąyu tulaluidali weyu, bugagia suiąo. 
Me ma, dage te dago Genuai Bidi me te da ma sali bidi Jisas Kraisgo olo tau sabo kolesagade bidiyu, tama dagego aga koneanio. Tama dagego te olo tau siyu mabo kolesaga me mu siyu, tama dagego Krais aga konebo kolesaga hauwa siyu bidiąo. Tama agai te genuai ula yai bomai nogi megi elalubao, tama te nogi sesemane sogo mu bidada peyu, bidada paibao. Mu dao. 
