﻿Jutgo Asęani Pas.
1.
Ena Jut da, ena te Jisas Krais agai sę ebo bidi da, tama ena Jems aga amanu dao. Tama eno e po dage Godigo i wali we bidibolo asęna tolobao. Tama God dago Aya agai dage dali dwagi yai homu eyu, tama godolo mu ebo dao. Tama Jisas Krais me agai dage palibo dao. Augwali sigo dage dali tama tiyu, tama dage bugagia bidibao. 
Te eno homugo Godigo agai homu dene eyu tau sabo kolesaga me, te dage homu nagamea ilabo kolesaga me, te agai dage dali dwagi yai homu eyu godolo ebo kolesaga me, te kolesaga sela dagebolo geninama mu pedalaibao, te eno te homu ebao. 
Eno abagi mu dede, hasia eno homugo te Godigo da tigidali ma dobola sabo sęde eno po dagebolo asęna tolabo homu bomo yai. Tiali goli, eno homu hasegelali, tama megi dagebolo gasagi yai po asęna tolobao. Magi baso meni, gasa bidi dabe augwali dage Godigo we bidi hani tomoba geme asai, te sa asobo bage tiwai asai. Te polobadu te deli sogo naga te God agai aga po te aga we bidibolo mu mawai dao. Tama te po e dao, te dago te God dali Jisas dali augwali side konealubo po dąų wao. Tiali goli, te geme asai bagego augwaligo ebo dwai dwai kolesaga bolainogo augwaligo te Godigo mani po hasegelali, tama tibo po dagebolo ola mayu, “Woo, te God agai da olo tau siyu, tama dago ebo dwai sęgę sela sąbaso, teda dago dwai dwai penani ebo kolesaga eyu da, te usu da,” augwaligo te tibo po ola mabo da. Tama tibaso, eno megi dagebolo e po asęna tolali, te dage bomo elama tama te Godigo mani po bugagia tonaluyu paliąo, augwaligo te po dolidali weyu yao. Tama augwaligo te tobage tibo po weyu, augwaligo te Jisas Kraisde hogwa sabo po wabo dao. Augwaligo dago Polalubo Bidi, te dago Genuai Bidi deli naga tudiba mubo dao. Tama polobadu mu Godigo po asęani bidi augwaligo te po asęani, te God agai te tobage dwai dwai sę ebo bage sa munama tama sęgę mawaibao, te po te bukude asęani. 
Te Godigo polobadu mu yali sę po te dagego gisiga koneai digi, eno dagego ma konealumainogo eyu e po ma obao. Polobadu agai te Israel bidi hani tau siyu, tama augwali kalabus togaluyu elama, tama Isip tǫ tagalama odasa pai. Tiali goli nosali augwali meba agai wali poba augwa homu tigidali musiąwai, tama te po wali pisiąbaso agai augwali doloyu ela silai. 
Tama te ensel mobo bidi meba me, augwalide ma kone palao. Te ensel mobo bidi meba augwaligo te Godigo augwaligo nogoba mani tonalubo bidi sę hagela eyu, tama te sę tagalali. Tama agai augwalibolo mani bidabo madi, te me augwali hagelama, tagalalio. Tama Godigo augwali dila pai aligabo bonogo nogo dunama, kalabus ilama, bida bida peyu bidibo, tama augwali te a bulu hulia sai digi tede mu dąų olama bidibao. Tama augwali te a hulia sai digide bidiyu, tama augwali Godigo genuai bodolu sali te tonaluyu bidibadi, tama te moni po tų ebo sogo pedalaibao. 
Te polobadu elaluali moni hanu si me, te nogi Sodom dali, Gomora dali, te hanu side pedalali dwai sęgę dagego ma konea palao. Tede bidali bage me, te hanu si pąde elaluali dwasianu bulude bidali bage me, augwali tigidaligo te ensel mobo bidi mebago yali dwai dwai penani ebo sę tiwai yali. Augwali penani sęde bidaluali, tama augwaligo homu hodaloama, tama augwali te sę bomo elama eyu pobeasa pali. Tama tibaso, Godigo augwali te moni sia te dagaludu tagala palali, tama augwali te siago ela silai. Tama dago augwalide te yali sę sulama, tama dago koneai dao, te tobage dwai dwai sę dago ilamuo, da te dene sidali weyu. 
Tama te dage tomoba geme duala sagaselama bidibo bidi dabe augwaligo me te tobage dwai dwai kolesaga ebo dao. Haniani na eyu, augwali homu hodoliyu, tama augwaligo meda yai kolesaga augwa tigide ebo dao. Tama augwaligo dago Genuai Bidigo augwali tonaluabo bomo sela sąyu, tama augwaligo te Godigo dagalude bidibo ensel mobo bidi dabe dali me nogi posobo po wabo dao. Te ensel dabe augwaligo ula yai bomo elaluali goli, te bagego nogi posobo po augwalide widu gebao. 
Augwaligo te posobo po olamuo. Suao. Polobadu te ensel mobo bidi dabego polalubo ensel nogi Maikel, agai te dwai haubo mobo tuni bidi Satan dali augwali si po konila yai, te isai bidi Mosesgo tigi hagede konila yai. Tama te sogo Maikel agai te Satan dwai nogi posobo po me wabeo. Te meni. Agai Satanbolo te po wai, “Genuai Bidi aga digi nage osola sulama, tama sęgę mawaibao,” te po wai. 
Tiali goli te tibo po ola mabo bidi dabe augwaligo te page konesiąwai naide te dwai posobo po wabo dao. Me ma, augwaligo te dwai sęde kuna koneani. Tama koneyu, te homu kolesaga meni yai bulu hasa tiwai bidiyu, tama augwaligo magi magi dwai sę edubadi gebo dao, tama te tobage dwai kolesaga ebaso augwali mu dolama dene saibao. 
Augwali hobedagia bidibao. Augwali te polobadu mu bidali dwai sę yali bage tiwai ebo dao. Te polobadu bidali bidi nogi Kein, te Adam aga ogwa, te bidi aga pali dwai tų te augwali megi te tųdu bilibo dao. Tama te dwai bidi me aga nogi Balam, agai yali sę tiwai eyu, tama augwaligo masigi sabo pesą eyu, gasa we bidibolo dwai sę yabo po hwa po mabo po wabo dao. Tama augwaligo te polobadu bidali bidi me nogi Kora agai yali sę tiwai ebo dao. Te bidi Kora agai te Godigo wali po odobo hagela eyu, tama te po sela sąbaso, nosali dene mu sai. Tama e bidi dabe me augwaligo te tobage po sela sąbo kolesaga ebaso, tama augwali me mu doloyu hagawaibao. 
Te dage deliba sisinama, tama ‘Da deli hani dao,’ te homu eyu, dagego nai tubo dao. Awe, tiali goli te tibo po ola mabo bage augwali me te nai tubo madiba aselama, tama augwaligo dagego ebo kolesaga dolobo dao. Augwali te gudubo ugwa dwai meda ilibo nai tiwai dao. Augwaligo dage dali nai tubadi, te augwali wi isąyu tama augwa hasi naga kisasa bidiyu, tama te nai tubode gasa we bidi tau sisąyu, augwaligo te nai subigila tuyu ebo dao. Augwali te tulubage tulisiąwai pǫ tiwai dao, tama waligo augwali pona palobaso tedela pabo dao. Tama augwali te ni aga du walobo sogo walisiąwai ebo, te tobage ni tiwai dao. Tama augwali te page sasia pai ni tiwai dao, te bidigo te ni page guda sąwai. Tama augwali te tiwai bidiyu, du walobeo, we bidi tau sabo sę dwagi yai ebo menio. 
Tama te moni tamu ąį bǫį dini wadolama nosali asiyu, tama te ąį dinigo meda yai pesa hania pedalobo dao, te ąį sanide. Tama te tiwai te bidi dabe augwaligo te hale ilibo kolesaga hania ebo dao. Augwali te dagalude elalubo hǫ meba tiwai dao. Te tobage hǫ osogo ula eyu, ma sula siyu ebo hǫ dabe dao. Te hǫ pabo te bugagia dolo pabo menio. Tama Godigo te dwai sisi mu a bulu hulia sai digi sisi yai elalubo, tama te tibo po ola mabo bidi augwali te hulia sai bulude sesemane sogo bidada peyu, bidada paibao. 
Te polobadu bidi Adam aga ogwago ogwa tama nedada peyu, te nogo a olama me badu nogo deli wali, te bidi mego ogwa te Inok da, aga polobadu mu bidai bidi dao. Tiali goli, agai te sogo polobadu te megi bidibo tibo po ola mabo bagede te po wai, “Suao, Genuai Bidi aga ensel mobo bidi umabo mu dali asaibao. 
Tama aselama, tama agai te we bidi tigidali osola sueibao. Tama osola sulama, agai augwaligo aga tudiba muani bidi tebolo augwaligo sęgę hania ola mawaibao. Tama augwaligo Godigo po oda tagalama te dwai sę eyu, tama te God tagalali bagego dwai sesena pai nogi posobo po agade odu geai. Tama te yali sę tigidali me, te wali dwai po tigidali me wei ponoyu, tama Godigo augwali dene mawaibao,” te bidi Inok agai te po polobadu wai. 
Te dage tomode bidibo tibo po ola mabo bidi dabe, augwali te tigidali pedalobo naide hagela homu eyu, tama sesemane sogo augwaligo gasa we bidide dwai homu naga ebo dao. Tama augwaligo tigigo ebo kolesaga hodolama, tama augwaligo te kolesaga naga wali pabo dao. Augwaligo genuai po weyu, tama augwa nogi augwaligo ugwaba sabo dao. Te gasa we bidi dabebolo augwaligo po mumubo po weyu, tama te bagego nai dabede pesą elama sabo dao. 
Te bidi dabe augwaligo te dwai sę yali goli, dage da, dage abagi dabe mu, te dago Genuai Bidi Jisas Krais agai po sela pabo bidi dabego dagebolo polobadu pusali po te dagego te po ma koneao. 
Te sę pedelasiąbadi tama augwaligo dagebolo te po wai, “Te nosali te tǫ dali, dagalu dali si silibo sogo te pąba yagasobadi, tama bidi mebago Godigo da ola mabo wiegi yai doloba pai kolesagade gisugu wagasobo bidi dabe pedalaibao. Tama augwaligo Godigo po tudiba muyu, tama bomo eyu, augwa tigigo tǫde ebo dwai dwai kolesaga naga wali paibao,” te po augwaligo wai dao. 
Te tiwai asobo bidi dabe augwaligo dage Godigo po wali pabo we bidi hani tomode si pedebo bage dao. Tama augwaligo e tǫde ebo kolesaga naga wali peyu, tama Godigo Mobo Bidi agai augwali dali hodobo bidibo menio, te mu dao. 
Tiali goli dage abagi dabe mu, dagego te Godide konealubo po bugagia dąų olama, tama bidigo aga be bugagia sę ebogia tama duga digi duga homu kolesaga dąų olama te sęde bomo yao. Te konealubo po te gasagi yai tedali mu dao. Tama te Godigo Mobo Bidigo dage te gedu haluasa po wabo tau siyu, tama dagego te po sesemane sogo bugagia dąų weyu yao. 
Tama God agai dage dali dwagi yai homu eyu godolo mu ebo dao. Tama tibaso, dage duga ebo kolesagade bugagia tonaluyu tama dage aga pąde mu bidaluao. Tama tiyu, te dago Genuai Bidi Jisas Krais dagego tonaluao, te agai dage dali homu dene eyu, tau siyu elama tama agai te dagebolo te bidada peyu, bidada pabo ula mabo sogo te dagego bugagia tonaluyu bidiąo. 
Te dage tomode te we bidi meba augwaligo te tibo po ola mabo bagego wabo po odama, tama megi augwali te Godigo pode homu si ebo dao. Tama tibaso, dagego augwali dali homu dene eyu, tama tau somainogo te augwalibolo te homu bega sabo po wao. 
We bidi mebago te dwai dwai sę ebo kolesaga ma gagalama, tama augwali te sia tomoba tuloluali bidi tiwai da. Tama tibaso, augwali te moni sia dabo buluba nosali pidali weyu, dagego augwali polo tau siyu ma sao. Te we bidi meba gasagi yai dao. Augwaligo augwa tigigo tǫde ebo dwai dwai kolesaga naga wali pobaso, dagego augwali dali homu dene eyu tau sao. Tialima, dagego augwaligo ebo dwai kolesaga wai selama gagaidali weyu dage dua eyu, wi yao. Augwaligo dwai dwai kolesaga ebogo augwaligo gudubo ugwa dabe meda ilali. Te ugwade me dage boi bidi homu mu eyu yao. Tiali goli te hobedagia bidibo we bidi tau sao. 
Te God agai bomo elalubaso, agai dage bugagia tonaluyu, dage me tulalugobeo. Tama agai dage tau siyu, tama dage dwai sę me isiąwai, dwagi yai homu pemene mu eyu, tama agai dage aga moni ula elaluyu gegemani ebo madigi teba sela pabo usu yaibao. 
Tama God agaduba deli naga bidibo dao. Agai da tau siyu ma dobola somainogo, tama agai dago Genuai Bidi Jisas Krais e tǫba tagala palali. Tama tibaso, dago Godigo nogi ugwaba sinao. Awe, tama tiyu, God aga polalubo tuni bidi bidimainao, tama aga genuai bomo mu dali, agai moni ula dali si elalubaso, tama dago aga nogi ugwaba sinao. Te tigidali sogo polobadu aga tama bidai, te megi me aga tama bidibao, te tigidali sogo nosali God aga tama bidada peyu, bidada paibao. Te po mu po dao. Tama dao. 
