﻿Kraisgo Geme Dualali Sę Pedelabo Po Jonbolo Ola Mani.
1.
Te eno megi asęna tolobo po, polobadu te po geme dulaluai, tama Godigo te po Jisas Kraisbolo waselama ola mani. Te Kraisgo aga sę ebo bidi dabebolo te nosali gana pedalobo sę hania hanilainogo tama Godigo agabolo te sę ola mani. Tama agai aga ensel mobo bidi me deli te Jon enabolo tagala palama, tama ena agai sę bidi, tama te tagala palali ensel mobo bidigo te waselali po enabolo ola magasai. 
Tama ena Jon, eno te sę tigidali sulama, tama te po me eno koneai, tama eno hanilama te Godigo po dąų weyu, tama Jisas Kraisgo enabolo pusali po me, te pode eno te po wai dao, “Te mu po naga dao.” 
Eno e po asęani, te nosali gana pedalobo sę po dao. Tama e asęani po gasa we bidibolo nedebo bidi, te bidi dwagi yai homu pemene eyu, bugagia bidaibao. Tama aga nedebo po odobo we bidi me, augwaligo te asęani po odama, tama wali pobaso da, teda augwali me dwagi yai homu pemene eyu, bugagia bidaibao. Magi baso meni. Te sę pedalobo sogo pąba yagasai dao. 
Ena Jon, eno e po dage a naga olama me badu nogo si te Godigo po wali pabo we bidi hani, dagebolo e po asęna tolobao, te dage te genuai tǫ Esia te genuai hanu dabede bidibo we bidi. God aga te megi bidibo, tama polobadu mu aga bidaluai, tama nosali aga ma asiyu, tama eno homugo te God agai da olo mu tau sabo te kolesaga dali, tama te dwagi yai homu nagame ilibo kolesaga dali te si dageba mao. Tama eno homugo te a naga olama me badu nogo si mobo bidi augwali me, te tuni bidi God aga au yali duabo sia sai pąde bidibo bage, augwaligo me te dwagi yai homu eyu olo tau sabo kolesaga dali, te dwagi yai homu nagame ilibo kolesaga me dagebolo mawaibao. 
Tama Jisas Krais me, agai dagebolo te kolesaga si dagebolo momainao, te eno homugo. Aga te Godide homu kęą pai bidi bidiyu, tama agai Godigo po tigidali dolo mu pusali bidi dao. Aga da te isama, tama isali we bidi dabe tomode bidama, tama aga te hasia mu gų pagede ma hodaloali bidi dao. Aga da, te tigidali tǫde bidibo tuni bidigo polalubo genuai bidi dao. Agai da dali dwagi yai homu eyu godolo mu ebo dao, tama aga isaligo dago dwai sę yali sęgę tigidali sela sąwai dao, tama da megi olo bidibo dao. 
Tama tiyu, agai da tau selama, tama dabolo genuai sę menama, tama da te tuni bidi kingo pris hani bidi dabe nigilama, tama megi da te Jisas aga Aya Godibolo me te lotu po weyu, sesemane sogo aga sę ebo pris bidi dabe bidibao. Tama tibaso, eno homugo agai genuai wiegi yai nogi dali, te we bidi tonalubo bomo dali me bidada peyu, bidada pomainao. Te mu tama dao. 
Suao, Krais aga te dagalu pǫ me tomodu tiąba asaibao, tama tigidali bidi augwa digi gedugo aga te pǫ tomodu tiąba asobo sueibao. Tama te aga tigide enani bidi dabe augwaligo me sueibao. Tama tigidali tǫde we bidi augwaligo aga asobode homu eyu, tama agai augwalibolo dene wei ponaibao homu elama, tama augwali homu sęgę eyu gela waibao. Awe, te tama tiaibao. Mu tama dao. 
Te Tigidali Bomo Elalubo Genuai Bidi God agai aga bidibo pagede te po wai, “Ena da, ena digi te hasia bididuali bidi dao, ena te nosali sogo mu bididueibao wabo bidi mu dao,” agai te po wai. Te God aga te megi bididubao, tama polobadu mu aga bididuai, tama nosali aga ma asaibao. 
Ena Jon, ena duga ama dao. Ena dage dali hodobo te Jisasde wadolama, tama da deli hani elalubaso, tama gasa bage augwaligo dabolo dene dali, sęgę dali mayu elama, tama da tigidali hodobo bomo elama dolaluyu, sęgę bugagia tolobo dao. Tama ena Godigo we bidi tonalubo sę tomode dage dali hodobo bidibao. Tama eno te we bidi dabebolo Godigo po dali, te Jisasgo hania hanilali mu po dali, te po si augwalibolo pusubaso augwaligo ena sela sąnama, ena te tamu ąį tomode elalubo dwasianu tǫ nogi Patmos teba kalabus mugi pali dao. 
Tama ena e bulude bidibadi, ena te moni Sarere ulade digi na tiwai ebadi Godigo Mobo Bidi agai enaba dagana sagaselama, tama ena tudi badu bidi me deligo po dage bomonama weyu i wabo odali, te genuai bu wabo nai yadogoli te biugel bu wabo odai. 
Tama te wali pode te po wai, “Nago naga gedugo subo sę po tigidali te bukude asęnama, te Godigo po odobo we bidi bidibo bulu a naga olama me badu nogo si, te buluba nago te sę po asęna tolao. Nago te po Efesus buluba asęna tolobadi, me te Smerna buluba, me te Pergamum bulu, me Taiataira, me Sardis, me Filadelfia buluba tolobadi, me te Laodisia buluba te po asęna tolao,” weyu te po enabolo wai. 
Tama enabolo te po wali bidi eno begelama suainogo yai. Tama ena gesabidi begelai, tama eno suali, te kapa nogi gol, te golgo nigali lam sole a naga olama me badu nogo si tama munalubo suali. 
Tama eno suali, te sole dabe munalubo tomode bidi me deli te bidi mu tiwai tede dolalubo suai. Tama te bidi aga bobage ugwago sągą halua sai bidi, tama te bidigo tigide eno suai, te kapa golgo nigali nai aga hagawia bagulai nai te eno suai. 
Tama te bidigo tobolu nisi dali tedela mu yai, te kibu sipsip nisi tiwai, tama te tedela dagalu pǫ tiwai yai. Tama te bidigo gedu te sia bogoli ebo tiwai yali. 
Tama te bidigo sągą ula mu yali, te augwaligo te gasagi yai kapa nogi bras te genuai sia dabo digi ulama ąį tiwai pedaluyu, tama te gegemani ebo tiwai aga sągąde te tama tiwai mu yali, Tama eno odali, agai dogonide po wabo te mone sabo ąįgo u wabo tiwai odai. 
Tama te bidigo dolo nogo sawali daide te hǫ a naga olama me badu nogo si elalubo suali. Tama te si badu poai yai bainat hwą ge te hwą mu poa pai, te bidigo pedauwalidu te buluba dią soai. Tama aga gesabidi ula mu yai, te sia bomo elama giligade nanobo tiwai yai. 
Tama eno te bidi sulama, tama ena aga sągą pageba kidu pǫgulai, tama ena te isai bidi pigulali tiwai yai. Tiali goli agai dolo nogo ena tigiba munama, tama agai te po wai, “Nage wi tagalao. Ena da, ena digi te hasia bidaluali bidi dao, ena te nosali sogo mu bidaluaibao wabo bidi mu dao. 
Ena bidibo ula dali bidibao. Polobadu ena isai, tiali goli nago ena bidibo subao, te ena sesemane sogo bidada peyu, bidada pabo ula selama, megi bidibo dao. Tama tibaso, eno bomo elalubao, te isibo kolesaga dali, te isai bidi dabe osogo bidabo madi dali, te si tonalubo bomo eno elalubo dao. 
Tama tibaso, nago te gedugo suali sę po asęąo, te megi pedalobo sę me, te nosali pedalabo sę po me asęąo. 
Tama nago eno dolo nogode te hǫ a naga olama me badu nogo si elalubo suali. Te lam sole gol a naga badi me si tama te me nago suai. Tama te nai dabe geme dualali page e dao: te hǫ a naga olama me badu nogo si wali, te Godigo po wali pabo bulu a naga olama me badu si te bulude bidibo we bidi tau sabo ensel mobo bidi dabe dao. Tama me te a naga olama me nogo si te lam sole po wali, te a naga olama me badu nogo si Godigo po wali pabo we bidi hani dabede po begelama weyu,” agai te po wai dao. 
