﻿Kraisgo Geme Dualali Sę Pedelabo Po Jonbolo Ola Mani.
13.
Te genuai dwai hudigi ebo hasa me deli te tamu ąįdu pedalobo eno suali. Tama te hasago tobolu te a naga me si elaluali, tama agai tobolude te gąų nogo si pedelai elaluali. Te agai gąųde te tuni bidigo mubo te tiwai wiegi yai madi te nogo si elaluali, tama agai tobolu deli delide asęani dwai nogi elaluai. Tama te nogi deli deli page e tama tiwai: te God dali haniani dwai posobo po wali te tobage nogi po asęai elaluai. 
Te dwai dwai kolesaga eyu te hudigi ebo hasa megi eno suali, te moni hasa nogi lepat tiwai, tama te hasago sągą te gasa moni hudigi ebo hasa nogi bea, te beago sągą tiwai, tama te hasa agai penani te moni hasa lainogo penani tiwai yai. Tama te genuai dwai hasamanigo aga bomo te dwai hudigi ebo hasabolo mawai. Agai te dwai hasa aga tuni bidi aga tiwai nigilama bidali, tama agai we bidi tonalubo genuai bomo me te dwai hudigi ebo hasabolo mawai. 
Tama augwaligo te hudigi ebo hasago tobolu me delide elama isali tiwai eno suali ąǫ yai. Tiali goli te tobolude keni pedela selama, tama usu ma yai. Tama tigidali tǫde bidibo we bidi augwaligo te sę te dwai hudigi ebo hasade pedalobo sulama, tama augwali noma genuai siyu, tama augwali aga wali pai. 
Te genuai dwai hasamanigo agai bomo te dwai hudigi ebo hasabolo mobaso, te we bidi tigidali augwaligo te hasamanibolo aga nogi ugwaba sabo po wai. Tama augwaligo te dwai hudigi ebo hasabolo me aga nogi ugwaba sabo po weyu, augwaligo te po wai, “Niwai bidi aga te dwai hudigi ebo hasa tiwai dawe? Niwai bidigo aga dali hwįbo usu egowe? Bidi menio,” augwaligo te po wai. 
Tama Godigo te dwai hudigi ebo hasa sula tagalali, tama agai dwai dwai po ola biliyu, God dali posobo po weyu, “Ena, ena digi ena God dao,” te tobage dwai po weyu bidai. Tama tiyu, agai te dwai kolesaga eyu, te we bidi tonalubo sę yabo bomo te polua bidi sese si olama me si, te 42 polua tama te usu nama elaluai. 
Tama agai pedauwalidu dwai dwai po weyu, God dali posobo po wabo gagalali. Agai Godigo nogide posobo po weyu, tama Godigo bulu dali me te po wali, tama te Godigo hani dagalude bidibo hani augwali dali me te dwai posobo po wai. 
Tama Godigo aga sula tagaliyu ebaso, tama agai te Godigo we bidi dali wąbi hwįyu, tama augwali bomo aiyaba elaluai. Tama tiyu, aga te tigidali bidi hani tuni bidi bidainogo eyu, te tigidali tǫde me, te tigidali po wabo me, te tigidali haniani tigi yai bidi dabego tuni bidi aga bidainogo Godigo aga tama osogo sula tagalali. 
Tama te we bidigo polobadu ela muani kibu sipsip wai agai te genuai buku elaluyu bidibo dao. Tama te bukude agai te agade konealubo po dąų wali we bidi augwaligo nogi agai asęai dao, te polobadu mu, te Godigo te tǫ nigisiąbadi, tama augwali isisąma gamonaibao. Tiali goli te bukude nogi asęsąwai we bidi, augwali tigidali augwaligo te moni hasa lepat tiwai yai dwai hudigi ebo hasa aga nogi ugwaba siyu, tama agabolo lotu po waibao. 
Olo elalubo bidi, agai e po bugagia odao. 
Niwai bidi me deli te boi bidigo aga nogo dunama tama aga kalabusiba muabo sa muani bidi, te aga te kalabusiba pomainao. Niwai bidi me deli aga te poa pai gaia gego elabo sa muani bidi, te bidi augwaligo te ge hwągo mu ela mueibao. Te tiwai kolesaga augwalibolo pedalobaso da, teda te Godigo we bidi augwaligo Godide augwa homu bugagia kęą pai we bidi bidiyu, tama augwaligo te sęgę bugagia tolao. 
Tama eno te gasa dwai hudigi ebo hasa me te tǫdu eda buluba holobo suai. Te genuai hasago gąų si aga tobolude elaluai te kibu sipsipgo gąų tiwai, tama agai po wabo te genuai dwai hasamanigo po wabo tiwai po wai. 
Te nosali pedalali genuai dwai hudigi ebo hasa agai te hasia te dwai hudigi ebo hasago sę yabo bomo tigidali sai, tama agai sę te bomogo te hasia hudigi ebo hasago gesabide te sę yai. Agai te mani bomogo te tǫde we bidi tigidali augwaligo te hasia hudigi ebo hasabolo aga nogi ugwaba sabo po wabo sę ilali, te hasia hasa polobadu gasa bidigo aga te ela muainogo yali dwai keni te pedala sai. 
Tama te nosali pedalali dwai hudigi ebo hasa agai te haniani genuai sę te bidi noma sabo sę yai. Te we bidi noma sabo sę agai yali e dao, te tǫde we bidi augwali gedude agai te dagaludu sia dabo bogoli e tǫba dulubo sę idu geai. 
Tama tiyu, tama Godigo agai te haniani noma sabo sę te hasia hudigi ebo hasago gedude emainogo sula tagalali, tama te hasago te kolesaga ebogo te tǫde we bidi ili po ola mawai. Te hasago te we bidi augwalibolo te po wai, “Dagego nigo te hasia dwai hudigi ebo hasa usu selama noma nigiyu, te agai nogi ugwaba somainogo yao. Te hasa polobadu augwaligo aga te poa pai ge hwągo elali, tiali goli aga bidibo ula dali bidai,” agai te po wai. 
Tama Godigo te nosali pedalali dwai hudigi ebo hasa aga sula tagaliyu, tama te hasa agai te bidibo ula elalubo mobo te we bidigo nigali hudigi ebo hasa noma tomoba ponai, tama te dwai hasa nomago po wabo gagalali. Tama tiyu, niwai bidi meba augwaligo te hasa noma dali aga nogi ugwaba sabo po wabo hagela eyu da, agai te bidi dabe augwali ela muani. 
Tama te nosali pedalali dwai hudigi ebo hasago po bomonama obaso tama “Te tigidali we bidigo dolo nogode, ma gebode, te dąį ilao,” te po wai. Te nogi meni yai bidi dali, te nogi yai bidi augwali me, tama te masigi hauwa munalubo bidi dali, te magi nai meni yai bidi augwali me, te olo bidibo bidi dali, te magi nai sisąma olo mu sę ebo bidi dabe dali, augwali tigidali te dąį sali, te dolo nogode ma augwaligo gebode. 
Tama niwai bidi agai te dwai hudigi ebo hasago nogi dąį te elalusiąyu, ma agai nogi ma agai nogigo namba te elalusiąwani da, teda te bidi agai te bidi dabe augwali dali nai abelegio, tama augwaligo aga dali nai abelamuo. Augwalide habu selalio. 
Dago homude te po pagede bugagia kone palao. Te nogode me, gebode me asęani dąį, te bidigo nogi meni, te nedebo namba naga asęani. Tama te namba da te 666 dao. Tama te namba 666 po digi po begelama tama bidigo nogi pedalaibao, te namba tomode te bidigo nogi gea pelama elalubo. Tama tibaso, dagego tede hania homugo kone palao. 
