﻿Kraisgo Geme Dualali Sę Pedelabo Po Jonbolo Ola Mani.
14.
Te eno ma tonono ebadi, te eno te Kibu Sipsip Wai te Saion bulu dude dolaluali, tama we bidi hauwa umabo mu te 144,000, augwali aga dali dolalubo eno suali. Tama te Kibu Sipsip Waigo nogi dali te aga Ayago nogi dali si, te nogi te we bidi gebode asęai elaluali. 
Tama eno odali, te dagalude wiegi yai po weyu, te kulu kulu asobo po eno odali, te wę asiyu genuai kulu kulu wabo tiwai eyu, tama te dagalude be kulu genuai wabo tiwai yai. Eno odali, te habidi po wabo tiwai yai. Te bidi dabe augwaligo te gita tiwai nai eleyu, te kulu kulu wabo tiwai pedalai. 
Tama te genuai hani we bidi augwaligo gesi balia me deli te tuni bidi God dulalubo gesabidide bidibadi te balia weyu, tama te bidibo ula elalubo hasa me si me si gedude me, te polalubo tobolu bidi augwali gedude me te balia wai. Te we bidi hauwa umabo mu te 144,000 augwali Godigo te tigidali tǫde we bidi bidibo tomode agai augwali dią selama tama ma abelali, te augwaligo te gesi balia wabo koneabo te usu yaibao. Tama niwai gasa bidi agai te balia koneainogo ebo usu munu me egobeo. 
Te bidi dabe augwaligo te meda yai penani ebo kolesaga me ebeo. Menio. Augwali te gasagi yai meda meni yai mu bidali dao. Te tigidali bulu te Kibu Sipsip Wai painogo ebo bulu, te bidi dabe augwaligo me te aga wali naga pabo dao. Godigo augwali te tǫde bidibo we bidi tomode augwali dią siyu ma abelama, tama augwali te Godigo hasia bidi hani bidali God aga digi ma aga te Kibu Sipsip Wai dali sigo sai dao. 
Augwaligo tibo po me deli munu me wabeo. Te augwaligo magi sę me delide te dali dwai sę me deli ebeo. Menio. 
Tama eno suali, gasa ensel mobo bidi te dagalu tomodu sigide mu bola soabo eno suali. Agai te sesemane bidada pabo wiegi yai gesi po elaluai, tama agai te po te tǫde bidibo we bidi augwalibolo pusubo sę elalubo dao. Agai te wiegi yai gesi po pusubo sę te tigidali tǫde bidibo we bidi hanibolo te po pusubo sę eyu, tama te tigidali haniani tigiwali yai bidi dabe dali, tama tigidali haniani hani bidi augwalibolo te wiegi yai gesi po pusubo sę elalubo dao. 
Tama agai i bomonama weyu te po wabo, “Godigo te tigidali we bidi dodolama po tų yabo sogo te pąba pedalalio. Tama tibaso, dage agade wi eyu tama aga nogi ugwaba sao. Tama dagego Godibolo lotu po wao, te agai dagalu dali tǫ dali me, te tamu ąį me, te pusu ąį ulu pedalobo me, te tigidali nai nigali page bidi aga dao,” te dagalude bola soabo ensel mobo bidigo te po wai. 
Te gasa ensel mobo bidi aga te polasa soali ensel bidi wali asai. Te nosali asali ensel bidigo te po wali, “Dolalio, dolalio, te genuai hanu Babilon mu dolalio. Te nogi elaluali hanude bidali we bidi augwaligo bomonama te tigidali haniani tǫde bidali bidi dabebolo te dwai dwai meda yai kolesaga ola mani dao. Te penani sę ebo wego te bidibolo bomai ąį menama, tama te bidigo te ąį tulama aga homu kolesaga dolama, tama agai te we dali penani sę ebogia, te hanu bidigo gasa we bidi te dwai dwai sę ebo kolesaga tomoba kekai dao,” te ensel mobo bidigo te po wai. 
Te gasa sela wali ensel mobo bidi me te polasa soali ensel bidi si wali asai. Agai bomonama i weyu, e tama wali, “Te niwai bidi me deligo te dwai hudigi ebo hasa me, te augwaligo agade augwa nogogo nigali noma dali lotu po weyu te aga nogode ma te gesabidide dąį sali bidi, 
te augwali sibolo lotu po weyu tigide dąį sali bidi agabolo Godigo te bomai ąį wain tiwai mabo te agabolo dene mawaibao. Te wain te Godigo genuai sębę ebo te dao. Godigo te wain ąį te ąį mu dali hasia te si talubeo. Menio. Te sębę te bidibolo dolo mawaibao, aga dali homu dene dwasianu egobeo. Agai sębę ebo te dene sabo kapuba gelama mabo ąįgo wei ponoyu, tama te bidigo tumainogo yaibao. Tama te bidi dwai dene siyu, te posolo mu yai sia dali, te masigi salfade dabo sia bogoli dali, augwali side te dwagila dwai dene mu siyu, te magi dwai sę me isiąbo ensel mobo bidi dabego gedude me, te Kibu Sipsip Waigo gedude te dene saibao. Te bidibolo te dwai posolo yai siago dene mayu, te masigi salfade dabo posolo yai siago me te dene madueibao. 
Tama augwali te dene maiabo sia hano holoyu, tama te hano sesemane bidada pabo sogo holodubadi geaibao. Te dwai hudigi ebo hasa dali, te hasa aga noma dali, te sibolo lotu po wabo bidi dabe augwali te naigo elalubo nogi asęani dąį sali bage, augwali te siade me hulide me te toma me tugobeo, sesemane sogo te dwai dene saibao,” te ensel mobo bidigo te po wai. 
Tama tibaso, Godigo we bidi augwali bomo elama, tama augwaliba pedalabo sęgę bugagia toloyu bidao. Te we bidi augwaligo Godigo bomo yai po wali peyu, tama Jisasde homu mu kęą pai we bidi bidibo dao. 
Tama eno odali, po me deli dagaludu asiyu, te po wai, “Nago e tiwai po asęąo: ‘Megi e tiwai sę gagalobao, te Genuai Bidide wadolali we bidi isibo si, te augwali wiegi yai homu pemene mu yao,’” te po wai. Tama Godigo Tedali Mobo Bidi agai me te po wai, “Awe, mu tama dao. Te augwali tigi dene ebo sę tagaliyu, tama augwali toma tueibao. Augwali olo me pogobeo. Menio. Te augwaligo yali wiegi yai kolesaga, te kolesaga augwali wali paibao,” te po wai. 
Tialima, eno ma tonono bilibadi, tama eno suali, te tedela yai dagalu pǫ me deli elaluai, tama bidi me deli te pǫde dulaluai, te da tǫde bidi tiwai, aga te Godigo Bidi Mu tiwai dao. Te agai tobolude te kapa golgo nigai wiegi yai madi elaluali, tama agai poa pai hwą ge mu agai nogode tolaluai, te gi nai togobo hwą ge dao. 
Tama gasa ensel mobo bidi te Moni Lotu Be tempel bede bidai buluba soali. Agai te dagalu pǫde dulalubo bidi dali bomonama i weyu, te po wali, “Nago hwągo te nai togwao. Tigidali tǫde elalubo nai te inilama tau ela silali dao. Tama megi da, te nai sabo sogo dao,” te po wai. 
Tibaso, te pǫde dulaluali bidi agai te hwą ge nogogo tolaluyu, tama agai te tǫde elalubo inawai nai hwągo togolama sai dao. 
Tama gasa ensel mobo bidi te Moni Lotu Be tempel bedu buluba teda soai. Agai me te poa pai gi nai togobo hwą ge nogode tolalubo dao. 
Tama gasa ensel mobo bidi me ma te nai ula mabo alta saide bidali tagalama asai. Te ensel bidi agai te sia tonalubo bomo elaluai. Te ensel bidi agai te poa pai hwą ge tolalubo ensel mobo bidibolo i bomonama mu wai. Agai te po wali, “Nago naga te poa pai hwą ge selama, tama nago te tǫde te wain bonode walali du tigidali togolama, tama sisinama elaluao. Te tigidali nai polo inilama tau yai dao,” agai te po wai. 
Te po obaso, te ensel bidi agai te hwą ge nogogo selama, tama te wain bonode walali du tigidali togwali, tama deliba sisinama elaluai. Tama agai te bono du dabe te wain agabo te dawai halobage tiwai genuai masigi tomoba sąwai. Te po digi po begelama, te genuai bono du agabo halobage te Godigo genuai sębę dao. 
Tama augwaligo te wain nigibo bono du dabe te genuai halobage tiwai nai tomoba munama, tama te genuai hanu bulu badu elalubadi tama agawai. Tama kaneme te halobage buluba pedaliyu, tama te kaneme te moni pabo ąį tiwai pidubadi, te usu selama nedada pali, te bidi sese nogo si olama sągą badu a naga, te 300 kilomita te tama tiwai yali, tama te edaba holali te ain te kibu hos augwali pedauwalide elalubo, te ainba te kaneme ugwaba sabolali. 
