﻿Kraisgo Geme Dualali Sę Pedelabo Po Jonbolo Ola Mani.
16.
Te eno odali te Moni Lotu Be tempel be tomode te pedauwalidu po me deli pedaliyu te po wai. Agai te nogo a naga olama me badu si ensel mobo bidi i bomonama weyu, te po wai, “Dage deli deli pelama, tama te pou a naga olama me badu nogo si te poude te Godigo homu sębę elalubo te gea sąnama, te tǫba tulalumainao.” 
Te po obaso, te polalubo ensel bidi pelama, aga pou tǫba geligi pai. Tama gelama, tama polo te haniani bomai dwai keni mu te dwai hudigi ebo hasago dąį elalubo bidi augwali tigide pedalai, tama te nigo nigai noma bidi dali lotu po wali bidi augwali tigide me te dwai dwai keni pedalai. 
Tama te tudi badu te si wali ensel bidi me agai pou te tamu ąįba gelai. Tama te tamu ąįde begelama, te isai bidigo kaneme tiwai pedalali. Tama tiyu, te tamu ąįde bidibo ula dali bidibo nai dabe tigidali, augwali isila pai dao. 
Tama te tudi badu te sela wali ensel mobo bidi agai pou te genuai pabo ąį dabeba geleyu, tama te ąį ulu pedalobo digi tigidali me gelai. Tama te ąį tigidali begelama, kaneme pedalali. 
Tama eno odali, te ąį tonalubo ensel mobo bidigo te agai te po wali, “Genuai Bidi, Tigidali Bomo Elalubo God, nage megi bidibo, tama polobadu mu nage bidai bidi, nage te magi dwai sę me esiąyu wiegi yai doloba pai mu bidibo dao. Te nago te bidi dali po tų ebode, te nago te dwai sę ebo bidi dabe augwali dolo mu dagalobo dao. 
Te dwai sę ebo bidi dabe augwaligo te nago po odobo we bidi augwali dali, te nago po pusubo bidi dabe dali ela muyu, tama augwaligo kaneme gea sąwai dao. Tama nago te dwai bidi dabe augwalibolo kaneme mayu, tama augwa te kaneme tumainao. Augwaligo augwa te dwai sę yalide dolo mu te dene sabo dao,” te po te ąį tonalubo ensel bidigo wai. 
Tama eno odali, te Godibolo mabo nai ulubo alta saigo i wali, “Awe, mu tama, Genuai Bidi, Tigidali Bomo Elalubo God, nago te bidi dabe augwali po tųde dagaliyu, tama mu po naga wali peyu nago po tų te dolo mu naga tigidali ebo dao,” te po wai. 
Te tudi badu te me si me si wali te ensel mobo bidigo pou te giligaba gelali, tama Godigo te giligago te bidi dabe augwali domainogo sula tagalalio. 
Tama te genuai giliga nanobo siago te posolo mu eyu, tama te siago te bidi dabe dwai dene mu mawai. Tibaso, augwaligo God nogide posobo po wai, agai te dwai dene mabo nai tonalubo bomo elalubaso, tiali goli augwaligo ge neyu homu begelama God agai nogi ugwaba sabeo. 
Tama te tudi badu te nogo a naga wali ensel mobo bidigo agai pou te dwai hudigi ebo hasago tuni bidi duabo naiba gelai. Tama te hudigi ebo hasa dologode bidali bidi augwali bidibo digi be hulia sabo te dolo pedalai. Tama augwali dwai dene mu sali, tama tilama augwa hamena ma halua tuyu bidai. 
Augwaligo homugo te dene me te keni augwali si dali homu eyu, augwaligo te dagalude bidibo God nogide posobo dwai po wai. Tiali goli augwaligo homu begelama te augwaligo dwai kolesaga ebo tagalama tudiba mubeo. 
Te sę silama, tama te a naga olama me badu nogo deli wali te ensel mobo bidi aga pou te genuai ąį nogi Yufretis te ąįba te gelai. Tama te ąį tigidali wa pela tama te giliga pedalobo badu tuni bidi dabe asabo tų sisilama tonaluai dao. 
Tama eno te dwai haubo noma bidi sela te gedeli tiwai gagawai suali, te me deli aga te genuai dwai hasamanigo pedauwali ą elalubo digi pedalali, tama me deli aga te dwai hudigi ebo hasago pedauwalidu me, me deli te tibo po ola mabo bidigo pedauwali ą elalubo digi tedu pedalai. Augwali sela te tiwai pedalali eno suali. 
Tama te dwai haubo noma bidi augwaligo te bidigo isiąwai sę te bidi noma sabo sę haniani mu ebo dao. Tama augwali te tigidali tǫba te tigidali tuni bidi bidibo digi pelama, te bidigo isiąwai bomo yai sę augwaligo sulama noma somainogo ebo dao. Augwaligo homugo te tuni bidi dabe augwali deliba sisinama, tama augwaligo te Tigidali Bomo Elalubo God dali hwįabo sogo asobo tonalumainogo yaibao. 
(Genuai Bidigo te po wai, “Te po odao. Te ena dageba asabo sogo te ena te nai wi sainogo asobo bidi tiwai geme polo pedalaibao. Tama niwai bidi aga te godege pisąyu da, tama aga ugwa bugagia guduyu, tama aga tigi olo bilisiąyu da, te bidi dabego aga suali te hale me isiąwai, teda te bidi aga homu wiegi yai mu yaibao, te ena asabo sogode.”) 
Tama te dwai haubo noma bidi augwaligo te tuni bidi dabe teba sisinai, te Hibru pogo augwaligo te bulu nogi Armagedon wai. 
Te a naga olama me badu nogo si wali ensel mobo bidigo aga pou te wali elalubo digi gelai. Tama te Moni Lotu Be tempel be tomode te God dulalubo digi tuni bidi bidibo nai tedu te pedauwali me delidu i bomonama wali, tama te i wali te bulu badu pedalai. Agai te po wai, “Te sę megi tama silai dao,” te po wai. 
Tama dagalude be sele eyu, tama be kulu kulu weyu, genuai po me weyu, tama moni genuai dwai tǫ mali yai. Te mali genuai mu yali, tama bidi tǫde bidibo sogo tigidali, te polobadu te tiwai tǫ mali genuai me pedalai menio. Te maligo bomogo te tigidali polobadu yali maligo bomo aiyaba mu elaluali. 
Te genuai hanu tomode te sela pepeda pali, tama te tigidali tǫde hani bidigo hanu te mu dolai. Tama Godigo te genuai hanu Babilon homugo koneani, tama agai te Babilon te wain ąį elalubo kapde ąį tigidali tumainogo yai. Te ąį wain te Godigo agai genuai sębę mu elalubo dao. 
Tama te tigidali dwasianu tamu ąį tomode elaluali ailan bulu dabe te augwali wi pela silai, tama te haniani tǫde elalubo bulu du tigidali augwali tedela pali. 
Tama te genuai talua ge tulubage tulai. Tigidali deli deli badu tulali talu ge tulubage te sęgę te moni masigi tiwai yai. Te talua ge tulubage dagalude asiyu, te bidi tigiba ugwadu tulai. Tama augwali te talua ge tulubagego mu dolai, meba isali. Tama te talua ge tulubagego augwali dolobaso, tama bidi dabego God dali dwai posobo po wali, te talua ge tulubagego augwali dolobo sę te genuai dwai mu ebaso, augwaligo te dwai po Godigo nogide wai. 
