﻿Kraisgo Geme Dualali Sę Pedelabo Po Jonbolo Ola Mani.
19.
Tama te sogo nosali eno odali, te genuai dagalude bidibo we bidi hani tiwai moni i wabo odali. Augwaligo te po wai, “Dago God nogi ugwaba sao! Dago God agaduba deligo naga te we bidi ma dobola sabo sę yabo bomo elalubao. Agai genuai nogi dali bomo dali elalubo dao. 
Magi baso meni, te po tų ebode God agai te mu po naga wali peyu, doloba pai kolesaga te po tų ebode ebo dao. Te genuai penani we agai te tǫde we bidi agai te penani ebo kolesagago mu dolai dao. Tibaso, Godigo aga dali po tų elama, tama dwai dene wei agabolo ponai dao. Te we agai Godigo sę bidi dabe augwali ela mubaso, tama Godigo agai te dwai sę ebo wei ponoyu, te penani we aga dene mawai dao,” augwaligo te po wai. 
Tama augwaligo i e tama ma wai, “Dago God nogi ugwaba sinao! Te genuai hanu sia dabo hano ebo, te sesemane sogo te hano ugwaba holobo dao!” te po wai. 
Tama te bidi sese olama me si me si tama polalubo tobolu bidi dali, te bidibo ula elalubo hasa me si me si te augwali kidu sugunama, Godibolo lotu po wali, te aga te tuni bidi duabo wiegi yai nai saide dulalubadi augwaligo agabolo te po wai, “Mu tama dao. Dago God nogi ugwaba sinao!” te po wai. 
Tama Godigo te tuni bidi dulalubo te naidu i ola asiyu te po wali, “Dage Godigo sę bidi dabe, dage God dali wi ebo we bidi dali, te dage olo bidi me, te dage nogi yai bidi me, te dage tigidaligo Godigo nogi ugwaba sao,” te po wai. 
Tama eno odali, te genuai we bidi hani sisinama bidibo digi po me deli tiwai pedalai. Ma, te ąį hauwa kulu kulu weyu u wabo tiwai yai. Tama te dagalu be kulu wabo tiwai genuai u wabo tiwai yai, te eno odali. Te augwaligo i bomonama wai, “Dago God nogi ugwaba sao! Genuai Bidi, aga e dago God, te Tigidali Bomo Elalubo Bidi, megi aga te tuni bidi mu bidibao. 
Te megi dago bugagia homu pemene eyu, tama dago wiegi yai mu ela pidu geyu, tama aga nogi ugwaba sao! Magi baso menio. Te Kibu Sipsip Waigo we sabo bodolu megi pedalalio. Tama aga we sisilama bidibao. 
Tama Godigo te webolo te tedela yai bobobage ugwa menama, te wiegi yai ugwa te ula mu yai, tama meda mu meni yai, tama agai te ugwa aga tigide muaibao,” augwaligo te po wai. (Te wiegi yai tedela mu yai ugwa te Godigo we bidigo ebo wiegi yai doloba pai kolesaga dao.) 
Tama te ensel mobo bidigo enabolo te po wali, “Nago te po asęąo: te we bidi dabe augwali Godigo te genuai nai tubo digi asomainogo i wai, te Kibu Sipsip Wai aga we kębode te sogo te i wali we bidi augwali wiegi yai homu pemene eyu bidaibao,” agai te po wai. Tama olama, agai enabolo te po me wai, “E po, eno nagebolo tama wali po, e po te Godigo wali mu po dao,” te ensel bidigo enabolo te po wai. 
Tialima, ena te ensel mobo bidi sągą pąba kidu sugunama, tama eno gesabidi tǫba munama, tama eno aga dali lotu po wabo homu yai. Tiali goli agai enabolo te po wai, “Nago tama tigio! Ena nage dali, nago ama dede dali deli sę ebo bidi dao. Dagego konealubo po Jisasde dąų olama, agai nogi haninama pusubo dao. Nago God deli dali naga lotu po wao. Te Jisasde gasa bidibolo po pusubo we bidi, te Godigo Mobo Bidi agai augwali homu hodolama, tama augwaligo te po pusubo dao. Te Mobo Bidigo te tobage sę naga te Godigo nosali yabo sę po pusubo bidi dali me ebo dao,” agai te po wai. 
Te eno suali, dagalu tų genuai dawali, tama tedela yai kibu hos me deli tede bidibo eno suali. Bidi te kibu hosde dulaluali. Te bidi agai sę te we bidi po tų ebode dagaliyu da, tama agai boi bidi dabe dali wąbi hwįbaso da, teda agai te mu po dali, te wiegi yai doloba pai kolesaga dali si naga wali peyu, agai te sę si bugagia ebo dao. Tama tibaso, agai nogi si elalubao, me nogi “Godide homu kęą pai bidi.” 
Tama te gasa nogi te “Mu po naga wabo bidi.” Tama agai gedu te sia bogoli ebo tiwai yali, tama agai tobolude te tuni bidigo mubo wiegi yai madi hauwa muai elaluai. Tama agai tigide po me deli asęai elaluali, te aga nogi dao. Te agaduba deligo naga te nogi page koneani, tama gasa bidi dabe augwaligo te nogi me konebeo. 
Tama agai muani bobage ugwa te kanemego ąį telawai dao. Tama augwaligo agai nogi e tama wai: “Godigo po dao.” 
Te dagalude bidibo ami bidi dabe augwaligo te augwa tedela yai bidi duabo kibu hos dabede dulaluali, tama augwali te bidi wali pai. Tama augwali tigide te tedela yai meda mu meni yai wiegi yai bobobage ugwa gudali. 
Tama te bobage poabi hwą ge me deli te augwa polalubo bidigo pedauwalide munaluai, tama te hwą ge buluba teda soai. Tama te hwą gego agai te tigidali tǫde we bidi hani elaibao. Tama agai te ain wąbi nogogo tulama, tama te we bidi hani augwali te ain dono wąbigo tonalueibao. Tama agai augwali tonaluyu, tama te Tigidali Bomo Elalubo God agai te we bidi dali moni dwai sębę ebaso, te bidi agai augwalibolo dwai dene mu mawaibao, te bomo yai ąį wain nigibo bidigo te wain bono du dabe te masigi halobage tomoba munama, tama agai sągągo agalalubo tiwai yaibao. 
Te aga nogi asęani aga ugwade me te sągą telede me elaluai. Te nogi asęani e tama tiwai, tigidali tuni bidigo Tuni Bidi, te tigidali genuai bidi kingo Genuai Bidi King dao. 
Tama te sogo eno suali, te ensel mobo bidi me deli te giliga ge pąde te dagalude dolaluai. Agai te dagalude ugwadu bola bilibo tigidali ba dabe dali bomonama i weyu, tama agai te po wai, “Dage te Godigo genuai nai tubo digi sisinagasao. 
Dagego te tuni bidi king dabego tigi mi tuyu, tama te ami bidi polalubo bidi dabego tigi mi me tuyu, tama te ami bomai bidi dabego tigi mi me tuyu, te hos dabe mi dali, te hosde duawali bidi dabego tigi mi me tuao. Tama dagego te tigidali Godigo po sela sąwani bidigo tigi mi tuao, te olo mu bidibo bidi me, te masigi sisąbo sę ebo bidi me, te nogi meni yai bidi dali te nogi yai bidi, te augwali tigidaligo tigi mi tuagasao,” te ensel mobo bidigo te po te ba dabebolo wai. 
Tama eno suali, te polobadu suali dwai hudigi ebo hasa dali, te haniani tǫde tuni bidi dabe dali augwali eno suali, te augwa ami bidi dabe dali, te augwali deliba sisinai elaluai. Augwaligo te kibu hosde dulalubo bidi dali wąbi hwįainogo yai, te aga ami bidi dabe dali augwaligo hwįainogo eyu deliba sisinagasali. 
Tiali goli agai te dwai hudigi ebo hasa dali, te ili po wabo po ola mabo bidi dali, augwali si kalabus ilai. Te tibo po wabo sę ebo bidi agai te bidigo isiąwai bomo yai sę hauwa te hudigi ebo hasago gedude te sę yai, tama agai te tebo kolesagade te bidi tibo po ola mayu, augwali te hudigi ebo hasago dąį augwa tigide selama, te hudigi ebo hasa nomade lotu po omainogo yai. Te hudigi ebo hasa dali te tibo po ola mabo bidi augwali si te bidibadi, tama augwaligo te bidi si te genuai bagua si dedage pageba aiyaba mu sąwai dao. Tama te dedagede te posolo yai sia dabo masigi salfa elalubao. 
Tama te kibu hosde dulaluali bidi, agai te pedauwalide elaluali bobage hwą gego te augwali sigo ami bidi dabe ela muai. Tama tigidali ba dabe augwaligo te bidi dabe tigi mi tuali, tama augwali tabi mu pągąna pai dao. 
