﻿Kraisgo Geme Dualali Sę Pedelabo Po Jonbolo Ola Mani.
22.
Tama te ensel mobo bidigo pabo ąį me deli ena ola mawai, te bidibo ula mabo wę, tama te wę te dula ula mu gegemani ebo tiwai ula yai. Tama te ąį aga gomo, te God dali te Sipsip Wai augwali sigo tuni bidi duabo sai pagede te ąį gomo elalubao. 
Tama te ąį te duabo sai pagedu pedalama, tama te ąį te hanu moni pabo tų tomodu mu pabo dao. Te wę sesege u badu me, te wę sesege e badu, tede te bidabo ula mabo ni dabe elalubao. Te ni dabe augwaligo du walobo sogo te kibu be delide te nogo si olama sągą badu si sogo walobo dao. Te tigidali poluade walobo dao. Tama te ni yabego te tigidali tǫde we bidi hani augwali usu ilibo dao. 
Tama tigidali nai Godigo agabolo po hwa pabo po obaso, te nai te hanude ma elalugobeo. Te God dali te Sipsip Wai augwali sigo tuni bidi duabo sai te hanu tomode elalueibao, tama Godigo sę bidi augwaligo aga dali lotu po waibao. 
Tama augwaligo aga gesabidi sueibao, tama agai nogi augwali gebode asęnama elalueibao. 
Tama be ma hulia sogobeo. Tama te lam sole ulade me te giliga ulade me sę yali te sę ma elalugobeo. Menio. Genuai Bidi Godigo aga digi ula augwalibolo mawaibao. Tama augwali te sogo tuni bidi bidada peyu bidada paibao. 
Tama te ensel mobo bidigo enabolo te po wai, “Te nago asęani po tigidali, e po te mu po dao, tama tigidali bidigo e pode homu dąų olama tama teba tiąlubo te usu yaibao. Tama Genuai Bidi God agai po pusumainogo ebo bidigo homu noma bidi hodolomainogo agai aga Mobo Bidi te bidi dabebolo mabo dao. Tama megi agai aga ensel mobo bidi tagala palama, agai sę bidi tigidalibolo te tamadi pedalabo sęde po ola momainogo yai,” te ensel mobo bidigo enabolo te po wai. 
“Odao,” te Jisasgo te po wai. “Te ena dage bidibo madi tamadi asaibao. Tama niwai bidi me deligo agai te e bukude elalubo po wali peyu da, teda te bidi aga wiegi yai homu pemene yaibao.” 
Ena Jon, eno digi te po tigidali odai, tama te nai dabe tigidali eno suai dao. Eno odolama tama eno suai, tama enabolo te nai ola mani ensel mobo bidi sągą pąba eno kidu sugunama, tama agabolo eno lotu po wainogo yai. 
Tiali goli agai enabolo te po wali, “Nago tama tigio! Ena nage dali me, e naga ama dede dali, da deli sę naga ebo dao, augwali te Godigo po ola mabo bidi dabe dao. Tama ena e bukude po wali pabo tigidali bidigo deli sę ebo bidi dao. Nago lotu po God deli dali naga wao,” te ensel bidigo te po wai. 
Tama agai enabolo te po wai, “Te po nago e bukude asęani po, te nago geme dualama dąų wagio. Menio. Te po we bidigo nedemainao. Te bukude wali sę dabe yabo sogo te pąba yagasai dao. 
Tama te dwai kolesaga ebo bidi agai te dwai kolesaga mę ela pomainao. Bidigo dwai meda yai kolesaga ebo, te bidi agai te meda yai kolesaga mę ela pomainao. Tama te wiegi yai doloba pai kolesaga ebo te bidi, agai te wiegi yai doloba pai kolesaga mę ela pomainao. Tama magi sę me isiąma olo mu bidibo bidi, te bidi aga te sę me isiąma aga olo mu mę bidimainao,” te ensel mobo bidigo te po wai. 
Te Jisasgo te po wai, “Odao! Te ena tamadi asaibao. Tama eno te tigidali bidibolo maiabo nai sesaibao. Tama eno te tigidali we bidi deli deli augwalibolo wei ponomainogo, te augwa yali kolesaga te usu nama te tama tiaibao. 
Ena da, ena digi te hasia bididuali bidi dao, ena te nosali sogo mu bididueibao wai bidi mu dao. Ena naga te polasa mu peyu, te ena nosali mu eyu ebo bidi dao. Te ena tigidali nai page bidi, tama eno ebo sę tigidali ela silibo dao,” agai te po wai. 
Te we bidi augwaligo augwa ugwa we telabo bage, te we bidi augwaligo wiegi yai homu yao. Augwaligo te bidabo ula sabo nide te du sabo usu yaibao. Tama augwali te hanu tomoba pabo tųdu pabo usu yaibao. 
Tiali goli te dwai dwai kolesaga ebo bage, augwali te yowi dabe tiwai da, augwali me, te pobi po wabo bidi dabe me, te penani kolesaga ebo we bidi me, te bidi ela mubo bidi dabe me, te tibo god dali lotu po wabo bage, tama te ili po wabo kolesaga godolo eyu wali pabo bidi dabe, te dwai kolesaga wali pabo bidi dabe augwali te Godigo hanu bulu badu bidaibao. 
“Ena Jisas, eno digi eno mobo bidi dageba tagala palai, tama agai te eno po wali pabo we bidi hani dagebolo e po pusumainogo yai. Ena digi ena te polobadu bidai bidi Devit aga hani bidi wąį dao. Tama te kigamu mu pedalobo te genuai hǫ te ena dao,” agai te po wai. 
Te Godigo Mobo Bidi dali, te Kibu Sipsip Waigo we dali sigo te po obao, “Nage asao.” Tama e po odali we bidi tigidali augwaligo me te po wao, “Nage asao.” Tama te wę nogone ebo bidi, aga asomainao. Wę tuainogo ebo bidi, aga aselama, te bidabo ula mabo wę tuagasao, te Godigo agabolo olo mu mawaibao. 
Te ena te bidi Jon dao, tama te e bukude elalubo po, te nosali pedalabo sę po, te po odobo we bidi tigidali augwalibolo eno e bomo yai po megi obao. Niwai bidi me deli agai aga homu wali peyu, tama te gasa po e bukude wasiąwai po agai te po wadolobaso da, teda e bukude wali dwai bidi dolobo nai te Godigo te bidi dolomainogo te bidiba te dwai nai tagala palaibao. 
Me ma, bidi me deligo te e bukude elalubo po, te nosali pedalabo sę po, te po meba agai sela sąyu da, teda Godigo te agabolo maiabo sa muani nai sela sąwaibao. Tama tiyu, te bidigo te bidabo ula mabo nide te du sogobeo. Tama aga te dwai sę isiąbo wiegi yai hanude bidabo madi tede bidigobeo. Te nai side po e bukude elalubao. 
E tigidali sęde po pusali bidi megi agai te po obao, “Mu tama, te ena polo asaibao!” Awe, mu tama dao. Genuai Bidi Jisas, nage asao! 
Te eno homugo te Genuai Bidi Jisas agai da olo mu tau siyu te mabo wiegi yai kolesaga te dage tigidali dali bidao. 
