﻿Dànì Kèhoį̀wo.
22.
Sìghaı̨waà hoòwo tł'axǫǫ̀ Abraham Nǫ̀htsı̨ yeèhdzà. “Abraham,” yèhdı yets'ǫ̀ gode. “Hęɂę, neèhkw'ǫ,” Abraham yèhdı. 
Nǫ̀htsı̨ hayèhdı, “Neza ı̨łàet'ee Isaac weghǫneę̀tǫǫ sìı yeè Morayah nèk'e ts'ǫ̀ edexè awı̨ı̨le. Ekǫ shìh ı̨łè nets'ǫ̀ haehsı̨ ha sìı weka neza ełaı̨whı gà sets'ǫ̀ wek'eı̨hk'ǫ̀ ha,” yèhdı. 
Eyıt'à k'omǫǫ̀dǫǫ̀ et'ıì Abraham nıìtła gà edetłı̨tsoa k'e nèɂı̨ı̨wa. Wecheekeè nàke eyıts'ǫ weza Isaac edexè agǫ̀ǫ̀là. Nǫ̀htsı̨ ts'ǫ̀ t'asìı k'egeehk'ǫ̀ gha tso agı̨į̀là tł'axǫǫ̀, Nǫ̀htsı̨ edı̨į̀ ts'ǫ̀ aąde ha yèhdıı sìı ts'ǫ̀ agejà. 
Taı dzęę̀ k'e Abraham ı̨daà k'eet'į̀ là yahdaà nıwà shìh wègaat'ı̨. 
Abraham edecheekeè gots'ǫ̀ hadı, “Jǫ tłı̨tsoa xè godaahkw'e. Dǫzhìa weamı ı̨daà ehtła ha. Ekǫ Nǫ̀htsı̨ ts'ǫ̀ yadıhtı tł'axǫǫ̀ naxıts'ǫ̀ anawìde ha,” gòhdı. 
Abraham kǫ̀ dèk'ǫ̀ǫ gha tso nıį̀wa gà weza nayage gha yek'e nèyı̨ı̨wa. Ededı̨ t'aa kwetǫ yìı kǫ̀kwıì eyıts'ǫ beh k'ele. Nàke geet'eè ı̨daà nagıadè ekò, 
Isaac edetà ts'ǫ̀ hadı, “Età.” “Seza, ayìı?” Abraham yèhdı. “Kǫ̀kwıì eyıts'ǫ tso k'ets'ele hanìkò Nǫ̀htsı̨ ts'ǫ̀ sahzǫ̀ązaa k'ets'eehk'ǫ̀ ha sìı welaedì?” edetà èhdı. 
Abraham yets'ǫ̀ hadı, “Seza, Nǫ̀htsı̨ wets'ǫ̀ sahzǫ̀ązaa k'ets'eehk'ǫ̀ ha sìı ededı̨ goghàyehtè ha hǫt'e,” edeza èhdı. Hadı tł'axǫǫ̀ nàke geet'eè ı̨daà łegeèhtła. 
Nǫ̀htsı̨ edı̨į̀ ts'ǫ̀ aąde ha yèhdıı sìı ekǫ nègı̨ı̨de ekò Abraham kwe ełeka nèyı̨ı̨wa t'à kwe-ladà whehtsı̨, yeka tso nìı̨wa. Edeza xèwhezhà gà tso ka nèyı̨ı̨htı̨. 
Eyı tł'axǫǫ̀ edeza ełaehwhı ha beh nıìchì. 
Hanìkò gots'ǫ̀ K'àowo weyak'eet'ı̨į̀ yak'e gots'ǫ yets'ǫ̀ whezeh, “Abraham! Abraham!” yèhdı hǫt'e. “Hęɂę, neèhkw'ǫ,” Abraham yèhdı. 
“Dǫzhìa ełaı̨hwhı-le,” yèhdı. “T'asawı̨ı̨le-le. Neza ı̨łàet'ea nets'ǫ sìı sech'à wek'ènedì-le t'à sıì Nǫ̀htsı̨ k'èanet'e nǫǫ̀!” yak'eet'ı̨į̀ yèhdı. 
Abraham ı̨daà k'eet'į̀ là sahzǫ̀ą werezhıì wedè gogho ta eht'èèko yaɂı̨. Yets'ǫ̀ ehtła gà sahzǫ̀ą nıìchì. Ełaàyį̀ı̨hwho gà kǫ̀-dèk'ǫ̀ǫ k'e edeza tł'axǫǫ̀ Nǫ̀htsı̨ ts'ǫ̀ yek'enı̨hk'ǫ. 
Eyıt'à Abraham eyı shìhka sìı “Gots'ǫ̀ K'àowo Goghàyehtè Ha” wìyeh ayį̀į̀là. Dıı dzęę̀ ts'ǫ̀, “Gots'ǫ̀ K'àowo weshìhka goghàyehtè ha,” ts'edı. 
K'achı̨ gots'ǫ̀ K'àowo weyak'eet'ı̨į̀ yak'e gots'ǫ Abraham ts'ǫ̀ ezeè hǫt'e, 
“Gots'ǫ̀ K'àowo nets'ǫ̀ dıı hadı: Sıızì t'à yatı nàtsoo nexè whıhtsı̨ hǫt'e. Hanì eghàlaneedà k'èxa eyıts'ǫ neza ı̨łàet'ea sech'à wek'ènedì-le k'èxa, 
hotıì nexè sìghà hòɂǫǫ̀ agohłe ha. Nets'ıhɂǫ̀ǫ-dǫǫ̀ sıì łǫ t'à yat'a whǫ̀ lageètłǫ ha, eyıts'ǫ tabàa ewaà lageètłǫ ha. Dǫ naxıts'ǫ̀ xànıgı̨ı̨ɂaa gıts'ǫ kǫ̀godeè gòlaa sìı nets'ıhɂǫ̀ǫ-dǫǫ̀ goghǫ gìhchı ha. 
Sek'èanet'e k'èxa nets'ıhɂǫ̀ǫ-dǫǫ̀ gıts'ıhɂǫ̀ dıı nèk'e dǫ hazǫǫ̀ xàɂaa xè sìghà hòɂǫ ha,” yak'eet'ı̨į̀ yèhdı. 
Eyı tł'axǫǫ̀ Abraham wecheekeè nàke ı̨dè geèhkw'ee sìı gots'ǫ̀ naèhtła. Ełexè Bersheba nèk'e ts'ǫ̀ geède, ekǫ Abraham nàı̨dè. 
Sìghaı̨waà hoòwo tł'axǫǫ̀ Abraham ts'ǫ̀ hagedı, “Mılkah ededı̨ sı gomǫ whelı̨. Nechı Nahor gha dǫzhìa nìı̨la. 
Gıza dıı hageètłǫ: Uz t'akwełǫ̀ǫ̀ wegǫ̀hłı̨, wek'è Buz, eyıts'ǫ wek'è Kemuyel (ededı̨ sìı Aram wetà hǫt'e), 
Kesed, Hazo, Pıldash, Jıdaf, eyıts'ǫ Betuyel,” gedı. 
Betuyel, Rebekah wetà hǫt'e. Mılkah, Abraham wechı Nahor wets'èkeè, hazǫǫ̀ t'à dǫzhìı ek'èdı̨ Nahor gha nìı̨la. 
Nahor wets'èkeè dek'aɂį̀ whedaa sìı Reyumah wìyeh. Ededı̨ sı weza gǫ̀hłı̨: Tabah, Gaham, Tahash, eyıts'ǫ Makah gìyeh. 
