﻿John.
10.
“Ehkw'ı anaxèehsı̨, dǫ, sahzǫ̀ą k'èhodìı gha enìı̨tǫ k'è goyaetła-le, hanìkò ekǫ-le gots'ǫ goyaèhtła nı̨dè eyı dǫ sìı eeɂį̀ı̨-dǫǫ̀ elı̨ hǫt'e. 
Dǫ enìı̨tǫ k'è goyaetłaa sìı ededı̨ sahzǫ̀ą-k'èdìı-dǫǫ̀ elı̨ hǫt'e. 
Enìı̨tǫ-k'èdìı-dǫǫ̀ yets'ǫ̀ enìxàechı, eyıts'ǫ wesahzǫ̀ą gohaezeh ha egeèhkw'ǫ. Edesahzǫ̀ą gıızì t'à goızı, eyıts'ǫ mǫ̀ht'a xàgoèwa. 
Edets'ǫ sahzǫ̀ą hazǫǫ̀ xàgoèwa tł'axǫǫ̀, ı̨daà gonadąą̀ naetłe. Wesahzǫ̀ą gık'èezǫ t'à gots'ǫ̀ gode nı̨dè gık'èedè. 
Hanìkò dǫ eładı̨ı̨ k'èè agede ha nıìle. Dǫ eładı̨ı̨ gots'ǫ̀ godee nı̨dè gık'èezǫ-le t'à, gıts'ǫǫ̀ natı̨mǫgeedè ha ne,” gòhdı. 
Zezì wet'à nànıts'ewoo godıì t'à dǫ xè godo, hanìkò dàdıì-adıı sìı gınıedì-le. 
Eyıt'à Zezì k'achı̨ hadı, “Ehkw'ı anaxèehsı̨, sı̨ sìı sahzǫ̀ą gıgha enìı̨tǫ laaht'e. 
Dǫ sekwe nègı̨ı̨dee sìı hazǫǫ̀ egeeɂį̀ı̨-dǫǫ̀ agı̨ı̨t'e, eyıt'à sahzǫ̀ą gogeèhkw'ǫ-le. 
Sı̨ enìı̨tǫ laaht'e. Amìı eyı enìı̨tǫ k'è goyaetłaa sìı edaxàweetè ha hǫt'e. Ededı̨ goyaetła xè xàetła ha, hanì-ı̨dè nezı̨į̀ shètı̨ xè wek'èhodì. 
Eeɂį̀ı̨-dǫǫ̀ sìı sahzǫ̀ą deɂį̀ı̨ xè ełaàgòhde zǫ gha at'ı̨, hanìkò sı̨ set'à geeda ha jǫ ahjà, eyıts'ǫ denahk'e gıxè sìghà hòɂǫ gha jǫ ahjà. 
“Sı̨ sahzǫ̀ą-k'èdìı-dǫǫ̀ nezı̨ı̨ aht'e. Sahzǫ̀ą-k'èdìı-dǫǫ̀ nezı̨ı̨ sìı edesahzǫ̀ą gha ełaàwı hǫt'e. 
Sahzǫ̀ą-k'èdìı-dǫǫ̀ gha eghàlaedaa sìı sahzǫ̀ą-k'èdìı-dǫǫ̀ elı̨ nıìle, xàè wets'ǫ sahzǫ̀ą agı̨ı̨t'e-le t'à. Eyıt'à dìga gots'ǫ̀ etłe yeɂį̀ nı̨dè sahzǫ̀ą gots'ǫǫ̀ natı̨mǫeda. Dìga sahzǫ̀ą godzıìhɂà xè ehkègehɂà agohɂı̨. 
Dǫ weèhtł'èe sìı sǫǫ̀mba zǫ k'èxa at'ı̨, eyıts'ǫ sahzǫ̀ą goghǫneètǫ-le t'à sahzǫ̀ą ts'ǫǫ̀ natı̨mǫeda. 
“Sı̨ sahzǫ̀ą-k'èdìı-dǫǫ̀ nezı̨ı̨ aht'e. Sesahzǫ̀ą hazǫǫ̀ gık'èehsǫ, eyıts'ǫ sesahzǫ̀ą sek'ègeezǫ hǫt'e. 
Eyı xèht'eè Setà sek'èezǫ, eyıts'ǫ Setà wek'èehsǫ hǫt'e, eyıts'ǫ sesahzǫ̀ą gıgha ełaehwhı ha. 
Sesahzǫ̀ą eyıì-le gǫ̀hłı̨, jǫ gık'èhodìı gots'ǫ agı̨ı̨t'e-le. Ededı̨ sı goyageehwha ha hǫt'e. Gıts'ǫ̀ gohde nı̨dè, segıìkw'o ha hǫt'e. Hanì-ı̨dè sesahzǫ̀ą hazǫǫ̀ ełexè geèhkw'e ha, eyıts'ǫ gok'èdìı-dǫǫ̀ ı̨łè zǫ gǫ̀hłı̨ ha. 
Sesahzǫ̀ą gıgha ełaehwhı ha t'à Setà seghǫneètǫ hǫt'e. Eyı tł'axǫǫ̀-ı̨dè naìhdà ha hǫt'e. 
Dǫ wı̨ı̨zìı ełaehwhıì asele ha dìì, sı̨ sınì k'ę̀ę̀ ełaehwhı ha hǫt'e. Ełaehwhı ha eyıts'ǫ naìhdà ha sı̨ sets'ǫ̀ hoèlı̨ hǫt'e. Setà hanì seghàhòı̨ɂǫ hǫt'e,” Zezì gòhdı. 
Zezì hanì xàyaı̨htı t'à Israel got'ı̨į̀ k'achı̨ ełek'ę̀ę̀ agı̨ı̨wǫ-le agejà. 
Dǫ łǫ hagedı, “Įnìłı̨ı̨ wets'ǫ̀-èlı̨ eyıts'ǫ ezhı̨ne whelı̨. Ayìıha wets'eèhkw'ǫ lì?” gedı. 
Hanìkò dǫ mǫ̀hdaa hagedı, “Dǫ ı̨nìłı̨ı̨ wets'ǫ̀-èlı̨ı̨ sìı hanì gode ha nıìle. Asį̀į̀ ı̨nìłı̨ı̨, dǫdaà k'aàt'ıì ayehɂı̨?” gedı. 
Gòk'òo-zaà k'e Jerusalem ekǫ Nǫ̀htsı̨kǫ̀-gocho gha dzędeè hołè. 
Zezì Nǫ̀htsı̨kǫ̀-gocho gà k'etło, Solomon wets'ǫ sagòhɂı̨ı̨-k'è ekǫ k'etło. 
Israel got'ı̨į̀ gha k'aodèe gımǫǫ̀ nìı̨de, hagıìhdı, “Dàwhaà nek'eènats'eèhɂı̨ ha? Chrıst wèts'edıı eyı anet'e nı̨dè, gots'ǫ̀ ehkw'ı haı̨dı,” gıìhdı. 
Zezì gots'ǫ̀ hadı, “Hanaxèehsı̨ ı̨lè hanìkò naxıgha ehkw'ı aehsı̨-le. Setà wedahxà enıìyah eghàlaehdaa sìı eyı weghàà sek'èahsǫ ha ı̨lè. 
Hanìkò sesahzǫ̀ą aaht'e-le t'à, naxıgha ehkw'ı-ahodı-le. 
Sesahzǫ̀ą agı̨ı̨t'ee sìı gıts'ǫ̀ gohde nı̨dè segeèhkw'ǫ, gık'èehsǫ eyıts'ǫ sek'èè k'egedè. 
Welǫ whìle ts'ǫ̀ geedaà agehłe ha, ełaàgede hǫı̨lı̨ ha-le. Dǫ wı̨ı̨zìı seghǫ nıgoòwa ha nıìle. 
Setà hazǫǫ̀ t'à gonahk'e elı̨ı̨ sìı, seghàgǫǫla hǫt'e. Dǫ wı̨ı̨zìı Setà ghǫ nıgoòwa ha nıìle. 
Sı̨ eyıts'ǫ Setà sı ı̨łè zǫ lawììt'e,” Zezì gòhdı. 
Israel got'ı̨į̀ gha k'aodèe nàgeehshì ha gı̨ı̨wǫ t'à, k'achı̨ kwe negı̨į̀wa. 
Hanìkò Zezì gots'ǫ̀ hadı, “Setà wedahxà enıìyah deè łǫ naxıdaà eghàlaıhdà hǫt'e, enıìyah dàhòt'ı̨ı̨ k'èxa kwe t'à ełaàsèahwhı ha dahwhǫ?” gòhdı. 
K'aodèe hagedı, “Enıìyah hòwheęhtsı̨ k'èxa ełaànets'èhwhı ha nıìle, hanìkò Nǫ̀htsı̨ k'èch'a xàyanehtı k'èxa kwe t'à ełaànets'èhwhı ha. Nı̨ ekìı dǫ anet'e kò Nǫ̀htsı̨ aht'e, edį̀ı̨dı,” gıìhdı. 
Zezì gots'ǫ̀ hadı, “Nǫ̀htsı̨ Nı̨htł'è k'e dıı hanì dek'eèhtł'è, ‘Naxı̨ sìı nǫ̀htsı̨ laaht'e,’ dek'eèhtł'è. 
Nǫ̀htsı̨ Nı̨htł'è dàdıı sìı wek'èch'a gots'ede ha dìì hǫt'e wek'èts'eezǫ. Dǫ Nǫ̀htsı̨ yatıì gıts'ǫ̀ ajàa sìı Nǫ̀htsı̨ ededı̨ ‘nǫ̀htsı̨,’ gòhdıì goızı nı̨dè, 
Setà edegha dǫ į̀hchìı eyıts'ǫ dıı nèk'e ts'ǫ̀ ayį̀į̀làa sìı, dànì yıızı ha dahwhǫ? Eyıt'à ‘Nǫ̀htsı̨ Weza aht'e,’ dehsı̨ nı̨dè dànìghǫ Nǫ̀htsı̨ k'èch'a gohde sèahdı? 
Setà xèht'eè eghàlaehda-le nı̨dè ehkw'ı aehsı̨ seahwhǫ-le. 
Hanìkò Setà xèht'eè eghàlaehda nı̨dè, naxıgha ehkw'ı aehsı̨-le kò enıìyah ghàlaehdaa sìı eyı weghàà naxıgha ehkw'ı-ahodı welè. Hanì-ı̨dè, Setà sexè at'ı̨ eyıts'ǫ sı̨ Setà xè aht'ı̨ı̨ sìı, eyı wek'èahsǫ xè wenıahdì ha,” Zezì gòhdı. 
K'aodèe k'achı̨ dageechı ha hogeèhdzà, hanìkò gotł'aetła. 
Eyı tł'axǫǫ̀ Zezì ek'èt'à Jordan deh nıɂàa ts'ǫ̀ anajà. John-Baptıst edı̨į̀ dǫ k'ètaìdzǫ ı̨lèe sìı ts'ǫ̀ ajà. Zezì ekǫ wheda ekò 
dǫ łǫ gıts'ǫ̀ède. Hagedı, “John-Baptıst enıìyah hòèhtsı̨-le, hanìkò dıı dǫ ghǫ dàdı ı̨lèe sìı hazǫǫ̀ ehkw'ı hǫt'e nǫǫ̀,” gedı. 
Eyı nèk'e dǫ łǫ Zezì ehkw'ı adı gı̨ı̨wǫǫ̀ agejà. 
