﻿Zezì Wecheekeèdeè.
10.
Dǫ ı̨łè Cornelıus wìyeh kǫ̀ta Caesarea nàdè. Italy nèk'e gots'ǫ eghǫǫ-dǫǫ̀-gha-k'àowo elı̨. 
Ededı̨ eyıts'ǫ wèot'ı̨ hazǫǫ̀ Nǫ̀htsı̨ k'èagı̨ı̨t'e ghǫ hòtł'ò agı̨ı̨wǫ. T'aats'ǫǫ̀ dǫ-teèt'ı̨ı̨ ts'àdı xè Nǫ̀htsı̨ ts'ǫ̀ yahtı. 
Įłàà taı nìı̨ɂǫ ekò Cornelıus wenazhıı xègoèht'į̀. Yak'eet'ı̨į̀ yeghǫ nììtła yaɂı̨, yets'ǫ̀ hadı, “Cornelıus!” yèhdı. 
Cornelıus yaɂı̨ t'à, sıì dèhyeh. “Sets'ǫ̀ K'àowo, ayìı ghǫ aı̨dı?” yèhdı. Yak'eet'ı̨į̀ yets'ǫ̀ hadı, “T'aats'ǫǫ̀ Nǫ̀htsı̨ ts'ǫ̀ xàyaı̨htı eyıts'ǫ dǫ-teèt'ı̨ı̨ ts'ànedı t'à Nǫ̀htsı̨ nenadì. 
Kǫ̀ta Joppa ekǫ ts'ǫ̀ dǫ gı̨ı̨hɂa. Ekǫ dǫ Sımon wìyeh, Peter sı gıìhdı, edexè ek'èt'à nagııchı. 
Sımon ewò-sıìhɂı̨ı̨-dǫǫ̀ xè nàdè, wekǫ̀ tıchobàa gà gòɂǫ hǫt'e,” yèhdı. 
Yak'eet'ı̨į̀ yets'ǫǫ̀ ajà tł'axǫǫ̀ Cornelıus edecheekeè nàke gokagoı̨de, eyıts'ǫ eghǫǫ-dǫǫ̀ ı̨łè yegha eghàlaedaa sìı Nǫ̀htsı̨ ghǫ hòtł'ò anıwǫ, eyı sı ts'ǫ̀ goı̨de. 
Yak'eet'ı̨į̀ dàyèhdıı sìı hazǫǫ̀ gots'ǫ̀ hadı, eyı tł'axǫǫ̀ kǫ̀ta Joppa ts'ǫ̀ goèhɂà. 
Ek'èdaedzęę̀, dzętanı ekìıyeè k'e kǫ̀ta ts'ǫ̀ nıwà-lea nagıadè ekò Peter yahtı ha t'à kǫ̀ ka dagòɂǫǫ dekıìtła. 
Sıì deèhdì ajà t'à, t'asìı ghǫ shèhtı̨ ha nıwǫ. Įzhıì bò xàgeht'è ekò Peter wenazhıı agòjà. 
Yak'e ehts'ǫǫ̀ ajà wegha wègoèht'į̀, lìbalà nechàa lanıı dèè k'e ts'ǫ̀ ajà. Wedzıì dı̨ yats'ıtǫ̀ lanì, ı̨dòo gots'ǫ ı̨zhıì ajà yaɂı̨. 
Weyìı tıts'aàdìı łǫ xàɂaa whela, gòo hanıı eyıts'ǫ yat'a k'edèe hazǫǫ̀ xàɂaa sı. 
Wets'ǫ̀ hats'edıì hǫt'e, “Peter nıį̀tła, t'asìı ełàı̨hwhı gà shèı̨tı̨,” ts'edıì hǫt'e. 
Peter hadı, “Sets'ǫ̀ K'àowo, hahłe ha dìì, t'asìı wejıı sìı weghǫ shèhtı̨ whìle,” hadı. 
K'achı̨ wets'ǫ̀ gots'edeè hǫt'e, “Nǫ̀htsı̨ t'asìı nezı̨į̀ yèhdıı sìı wejıı nı̨ı̨dı ha-le,” ts'edıì hǫt'e. 
Taà-eht'aà wexè hagòjà, eyı tł'axǫǫ̀ lìbalà lanıı ı̨dòo yak'e ts'ǫ̀ anajà. 
Peter wenazhıı dàgòjàa sìı ı̨łaà yeghǫ nànıwo ekò k'àowo Cornelıus dǫ ekǫ goèhɂà ı̨lèe sìı Sımon wekǫ̀ nègı̨ı̨de. Mǫ̀ht'a kwı̨į̀ gà nàgeèhza. 
Hòtł'ò hagedıì, “Asį̀į̀ dǫ Sımon wìyeh, Peter gıìhdı, jǫ nàdè?” gedı. 
Peter ı̨łaà nànıwo ekò Yedàyeh Nezı̨ı̨ yets'ǫ̀ hadı, “Sımon, dǫ taı nehagı̨ı̨wǫ. 
Gıts'ǫ̀ hodàı̨tła. Jǫ ts'ǫ̀ ageèhłà ne t'à, gık'èı̨tła ha sìı weghǫ nànewo-le,” yèhdı. 
Eyıt'à Peter ı̨zhıì gots'ǫ̀ hodàèhtła, dǫ nègı̨ı̨de ts'ǫ̀ hadı, “Amìı wekak'eaht'į̀ı̨ sìı eyı aht'e. Ayìı ghǫ jǫ nàwhahde?” gòhdı. 
Dǫ gıts'ǫ̀ hadı, “Cornelıus, eghǫǫ-dǫǫ̀-gha-k'àowo, jǫ ts'ǫ̀ goı̨hɂà. Ededı̨ dǫ ehkw'ı edaa xè Nǫ̀htsı̨ ghǫ hòtł'ò anıwǫ, eyıts'ǫ Israel got'ı̨į̀ hazǫǫ̀ gıghǫneètǫ hǫt'e. Wenazhıı yak'eet'ı̨į̀ yets'ǫ̀ goı̨de ı̨lè, nı̨ wekǫ̀ nàątła ha, yèhdı. Ayìı wets'ǫ̀ haı̨dı ha sìı neèhkw'ǫ ha hǫt'e,” gıìhdı. 
Dǫ eyı kǫ̀ agı̨ı̨t'e ha t'à Peter goyagoèwa. Ek'èdaedzęę̀ k'e Peter gok'èè naèhtła. Kǫ̀ta Joppa gots'ǫ Nǫ̀htsı̨ wecheekeè mǫ̀hdaa goxè agejà. 
Ek'èdaedzęę̀ kǫ̀ta Caesarea nègı̨ı̨de. K'àowo Cornelıus godanaèhɂı̨ ı̨lè. Edèot'ı̨ hazǫǫ̀ eyıts'ǫ weàgı̨ą gı̨ı̨lı̨ı̨ sìı edekǫ̀ ts'ǫ̀ gokàehɂà ı̨lè. 
Peter goyaetłe ekò Cornelıus yets'ǫ̀ èhtła. Yets'ǫ̀ nàgòı̨hgè xè yeghàsǫedı. 
Hanìkò Peter yets'ǫ̀ hadı, “Nàąwo, nexèht'eè dǫ aht'e ne,” yèhdı. 
Peter yets'ǫ̀ gode xè yekǫ̀ goyaèhtła. Goyìı dǫ łǫ dèhkw'e nǫǫ̀. 
Peter gots'ǫ̀ hadı, “Goxı̨ gonàowoò k'ę̀ę̀ dànì goxè hòɂǫǫ sìı wek'èahsǫ hǫt'e. Israel got'ı̨į̀ sìı, dǫ eyıì-le xàɂaa xè aget'ı̨ ha, gıgha wets'àet'ǫ hǫt'e. Hanìkò dǫ wı̨ı̨zìı wejıı wèehsı̨ ha-le sìı Nǫ̀htsı̨ wek'èehsǫǫ̀ asį̀į̀là. 
Eyıt'à jǫ ts'ǫ̀ sekàgòhdì ekò į̀le dehsı̨-le. Ayìı ghǫ jǫ sekàwhahɂà?” Peter gòhdı. 
K'àowo Cornelıus yets'ǫ̀ hadı, “Įdì dı̨ dzęę̀ ekò dıì lagǫ̀ht'e taı nìı̨ɂǫ sekǫ̀ yahtı ekò hǫtsaa dǫ weɂeè k'e saı̨de nàwoo senazhıı wègoèht'į̀. 
Sets'ǫ̀ hadı, ‘Cornelıus, ayìı gha yanehtıı sìı Nǫ̀htsı̨ nıìkw'o hǫt'e, eyıts'ǫ dǫ-teèt'ı̨ı̨ ts'ànedıı sìı yek'èezǫ hǫt'e. 
Yeè kǫ̀ta Joppa ts'ǫ̀ dǫ nehɂa, ekǫ dǫ ı̨łè Sımon wìyeh, Peter sı gıìhdı, wekàı̨hɂà. Sımon, ewò-sıìhɂı̨ı̨-dǫǫ̀ tıchobàa nàdèe ekǫ yexè nàdè hǫt'e,’ yak'eet'ı̨į̀ sèhdı. 
Eyıt'à ekòet'ıì nekàwhıhɂà. Jǫ nàwheętła t'à masì neehwhǫ. Nǫ̀htsı̨ wenadąą̀ hazǫǫ̀ jǫ ts'eèhkw'e, gots'ǫ̀ K'àowo ayìı gots'ǫ̀ haı̨dı ha nèhdıı sìı wets'eèhkw'ǫ ha ts'ı̨ı̨wǫ,” yèhdı. 
Eyıt'à Peter gots'ǫ̀ goı̨de, “Nǫ̀htsı̨ sìı dǫ ı̨łè xàɂaa zǫ gòìhchı nıìle, eyı sìı k'ǫǫ̀t'a wek'èhoèhzà. 
Dǫ hazǫǫ̀ xàɂaa gots'ǫ dǫ wets'ǫ̀ agede ha nıwǫ. Hazǫǫ̀ nèk'e gots'ǫ dǫ Nǫ̀htsı̨ k'èagı̨ı̨t'e xè ehkw'ı geedaa sìı Nǫ̀htsı̨ goxè at'ı̨ hǫt'e. 
Nǫ̀htsı̨ Israel got'ı̨į̀ yatı gots'ǫ̀ ayį̀į̀làa sìı wek'èahsǫ hǫt'e. Zezì dǫ hazǫǫ̀ ts'ǫ̀ k'àowo elı̨ı̨ sìı wets'ıhɂǫ̀ dǫ xè sìghà hòɂǫ hǫt'e. Nǫ̀htsı̨ hanì yatı gots'ǫ̀ ayį̀į̀là ı̨lè. 
Eyıts'ǫ Judea nèk'e hazǫǫ̀ dàgòjàa sìı wek'èahsǫ sǫnaà. Galılee nèk'e t'akwełǫ̀ǫ̀ kèhǫǫ̀wo. Nazareth got'ı̨į̀ Zezì John-Baptıst yek'ètaį̀dzǫ tł'axǫǫ̀ Nǫ̀htsı̨, Yedàyeh Nezı̨ı̨ Zezì k'e ayį̀į̀là. Yedàyeh Nezı̨ı̨ nàtsoò wek'e ajà t'à enıìyah łǫ hòèhtsı̨. Kǫ̀ta yàgòlaa sìı gota k'eetło. Nǫ̀htsı̨ yexè at'ı̨ t'à, dǫ gha nezı̨į̀ eghàlaı̨da eyıts'ǫ dǫ ı̨nìłı̨ı̨ gıts'ǫ̀-èlı̨ı̨ sìı k'aàt'ıì agǫ̀ǫ̀là. 
“Israel got'ı̨į̀ gınèk'e eyıts'ǫ kǫ̀ta Jerusalem dànì eghàlaı̨dàa sìı hazǫǫ̀ weghàts'ı̨ı̨dà hǫt'e. Dechı̨et'aa k'e gedı̨į̀htsò t'à ełaàgį̀ı̨hwho hǫt'e. 
Hanìkò taı dzęę̀ k'ehǫǫwo tł'axǫǫ̀ Nǫ̀htsı̨ naìdà ayį̀į̀là eyıts'ǫ dǫ łǫ gıaɂı̨į̀ agǫ̀ǫ̀là. 
Dǫ hazǫǫ̀ gıaɂı̨ nıìle, Nǫ̀htsı̨ dǫ nàwhehtsı̨ı̨ sìı eyı zǫ gıaɂı̨ hǫt'e. Naìdà tł'axǫǫ̀ goxı̨ wets'aɂı̨ eyıts'ǫ wexè shèts'azhe. 
‘Dǫ ts'ǫ̀ goahde,’ Zezì gòhdı. ‘Dǫ geedaa eyıts'ǫ ełaı̨dèe sìı gısınìyahtı gha Nǫ̀htsı̨ sį̀į̀hchì hǫt'e. Seghǫ godıì t'à dǫ gıts'ǫ̀ goahde ha,’ gòhdı ı̨lè. 
Nakwenàoɂǫǫ hazǫǫ̀ weghǫ dıı hagedı ı̨lè, ‘T'aa gıgha ehkw'ı-ahodıı sìı wıızì dahxà gıhołı̨į̀ gıghǫ nahoezhe ha,’ dek'eèhtł'è,” Peter gòhdı. 
Peter ı̨łaà gots'ǫ̀ gode ekò dǫ hazǫǫ̀ godı gıìkw'oo sìı Yedàyeh Nezı̨ı̨ gık'e ajà. 
Israel got'ı̨į̀ gıgha ehkw'ı-ahodı Peter xè nègı̨ı̨dee sìı, gıgha enıìyah dìì. Dǫ eyıì-le xàɂaa ededı̨ kò Yedàyeh Nezı̨ı̨ gık'e ajà t'à sıì gıgha enıìyah nechà. 
Eyıì-le dǫ xàɂaa goyatıì k'ę̀ę̀ xàyagehtı xè Nǫ̀htsı̨ ghàsǫgeedı, gogıìkw'o. Eyıt'à Peter hadı, 
“Goxèht'eè Yedàyeh Nezı̨ı̨ gık'e ajà t'à, amìı dıı dǫ gık'ètaìdzı̨ ha-le gòhdı ha? 
Zezì-Krı wıızì t'à gık'ètaìdzı̨ ha,” Peter gòhdı. Eyı tł'axǫǫ̀, Peter łatsaa goxè anet'e, gıìhdı. 
