﻿Zezì Wecheekeèdeè.
14.
Iconıum ekǫ Paul eyıts'ǫ Barnabas Israel got'ı̨į̀ gıts'ǫ ełègehdèe-kǫ̀ ts'ǫ̀ agejà, t'aats'ǫǫ̀ hagıat'į̀ k'ę̀ę̀. Ekǫ nezı̨į̀ dǫ ts'ǫ̀ gogı̨ı̨de t'à, Israel got'ı̨į̀ łǫ eyıts'ǫ dǫ eyıì-le xàɂaa łǫ, gıgha ehkw'ı-ahodıì agejà. 
Hanìkò Israel got'ı̨į̀ mǫ̀hdaa gıgha ehkw'ı-ahodı ha gı̨ı̨wǫ-le sìı dǫ eyıì-le xàɂaa Nǫ̀htsı̨ wecheekeè ts'ǫ̀ gınì nezı̨-le agogį̀į̀là. 
Eyıt'à Paul eyıts'ǫ Barnabas whaà gots'ǫ̀ eyı kǫ̀ta agı̨ı̨t'è. Gots'ǫ̀ K'àowo wesǫnıwǫ ghǫ ededageedì-le gogı̨ı̨de eyıts'ǫ Nǫ̀htsı̨ enıìyah hogèhtsı̨į̀ agǫ̀ǫ̀là t'à gıgodıì ehkw'ıı sìı wek'èhoedzǫǫ̀ ayį̀į̀là. 
Eyıt'à kǫ̀godeè dǫ nàdèe sìı łats'ıgı̨ı̨de, dǫ mǫ̀hdaa Israel got'ı̨į̀ ts'ǫ̀ agejà, eyıts'ǫ mǫ̀hdaa Zezì wecheekeèdeè ts'ǫ̀ agejà. 
Dǫ eyıì-le xàɂaa, eyıts'ǫ Israel got'ı̨į̀, gıts'ǫ̀ k'aodèe xè Zezì wecheekeèdeè dagogį̀ı̨hɂa ha, eyıts'ǫ kwe t'à ełaàgogìhde ha, hanì ełexè yatı gèhtsı̨. 
Hanìkò Zezì wecheekeèdeè egıìkw'o t'à Lyconıa nèk'e ts'ǫ̀ agejà. Ekǫ kǫ̀godeè Lystra, Derbe eyıts'ǫ wemǫǫ̀ kǫ̀ta yàgòlaa sìı ı̨łaà godı nezı̨ı̨ t'à dǫ hoghàgogeehtǫ. 
Kǫ̀ta Lystra ekǫ dǫ ı̨łè k'eda-le wheda. Wegǫ̀hłı̨ gots'ǫ ı̨zhıì ts'ǫ̀ wekw'ǫǫ̀ ełaı̨dèe t'à k'eetło whìle. 
Paul gode ekò eyı dǫ yeèhkw'ǫ. Paul hotıì yeghàeda, k'aàt'ıì ade ha wınì nàtsoo yek'èezǫ, 
eyıt'à yets'ǫ̀ hadı, “Nàąwo!” Hayèhdı ts'ǫ̀et'ıì dǫ nıìtła gà k'edaà ajà. 
Paul hanì eghàlaı̨dà dǫ łǫ gıaɂı̨ ekò edeyatıì k'ę̀ę̀ yagìzeh xè hagedı, “Gots'ǫ nǫ̀htsı̨, dǫ nàke lanì gìgaat'ı̨ goghǫ nègı̨ı̨de!” gedı. 
Į̀łak'aà goızì gehtsı̨. Barnabas, Zeus wìyeh agį̀į̀là, eyıts'ǫ Paul, ededı̨ gogha gode elı̨ t'à, Hermes wìyeh agį̀į̀là. 
Gıts'ǫ nǫ̀htsı̨ Zeus wets'ǫ yahtıı-kǫ̀ gocho kǫ̀ta gà nıwà-lea gòɂǫ. Zeus gha yahtıı elı̨ı̨ sìı ekǫ dǫ hazǫǫ̀ xè Barnabas eyıts'ǫ Paul ts'ǫ̀ kǫ̀ ghàgeedı ha nıwǫ t'à, ejıe eyıts'ǫ ı̨t'ǫ̀chàa mǫ̀ht'a gogha nèyı̨ı̨la. 
Hanìkò Barnabas eyıts'ǫ Paul eyı ghǫ egıìkw'o ekò gıgha ehkw'ı-le t'à, edeɂeè edek'e nàgį̀ı̨hdlah. Gezeh xè dǫ nı ts'ǫ̀ tı̨mǫgeède, hagògedı, 
“Dànìghǫ aaht'ı̨? Goxı̨ naxıxèht'eè dǫ ats'ı̨ı̨t'e. Naxıts'ǫ̀ godı nezı̨ı̨ nèts'ı̨ı̨ɂǫ. T'asìı wet'àaɂà-le k'alaahdèe sìı wedę aahłe, Nǫ̀htsı̨ edaa sìı wets'ǫ̀ aahde. Ededı̨ sìı yak'e, dèe, tı eyıts'ǫ t'asìı hazǫǫ̀ weyìı nàdèe sìı yèhtsı̨ hǫt'e. 
Įnę̀ę sìı dıı nèk'e dǫ hazǫǫ̀ edenàowoò k'ę̀ę̀ geeda ı̨lè, hanìkò Nǫ̀htsı̨ edets'ǫ̀ geèlı̨į̀ agǫ̀ǫ̀là. 
Hanìkò dèè k'e t'asìı whelaa sìı weghàà dǫ, Nǫ̀htsı̨ gǫ̀hłı̨ gık'èezǫ hǫt'e. Yat'a gots'ǫ naxıgha chǫh ayehɂı̨ eyıts'ǫ t'asìı dehsheè ayehɂı̨. Eyı weghàà dǫ ts'ǫ̀ wedzeè nezı̨ wek'èts'eezǫ. Weghǫ shèts'ezhe łǫ naxıghàyele eyıts'ǫ naxıdzeè t'à naxınà anaxehɂı̨,” Paul gòhdı. 
Paul hanì nezı̨į̀ dǫ ts'ǫ̀ goı̨de, hanìkò k'àhdzǫ gots'ǫ̀ kǫ̀ ghàgı̨ı̨dì t'e. 
Eyı tł'axǫǫ̀ Israel got'ı̨į̀ mǫ̀hdaa, kǫ̀ta Antıoch eyıts'ǫ kǫ̀ta Iconıum gots'ǫ eyı nègı̨ı̨de. Barnabas eyıts'ǫ Paul k'èch'a gogı̨ı̨de t'à, dǫ hazǫǫ̀ xè nàdahoowo hogèhtsı̨. Paul kwe t'à gııhdè, eyı tł'axǫǫ̀ ełaı̨wo ne gı̨ı̨wǫ t'à eyı kǫ̀ta gots'ǫ xàgeèlì. 
Hanìkò Nǫ̀htsı̨ wecheekeè Paul wemǫǫ̀ nègı̨ı̨de ekò Paul nıìtła gà k'achı̨ kǫ̀godeè ts'ǫ̀ naèhtła. Ek'èdaedzęę̀ k'e Paul eyıts'ǫ Barnabas kǫ̀godeè Derbe ts'ǫ̀ agejà. 
Kǫ̀ta Derbe godı nezı̨ı̨ t'à dǫ hoghàgogeèhtǫ, dǫ łǫ gıgha ehkw'ı-ahodıì agejà. Eyı tł'axǫǫ̀ kǫ̀ta Lystra, Iconıum eyıts'ǫ Antıoch ts'ǫ̀ anagejà. 
Ekǫ Nǫ̀htsı̨ wecheekeè gınì nàtsoò agogele ha gots'ǫ̀ gogı̨ı̨de, hagògedı, “Hoìla łǫ gotehoowıı daats'ǫ̀ Nǫ̀htsı̨ Wenàowoò k'ę̀ę̀ hòɂǫǫ goyats'eedè hǫt'e,” gògedı. 
Paul eyıts'ǫ Barnabas kǫ̀ta k'egıadèe sìı Nǫ̀htsı̨ wecheekeè gha k'aodèe gį̀į̀hchì. Yagehtıı xè edegegǫ t'à Nǫ̀htsı̨ ghàgogį̀ı̨la, Nǫ̀htsı̨ ghǫ gınì nàtso t'à. 
Eyı tł'axǫǫ̀ Pısıdıa nèk'e gok'egı̨į̀de t'à Pamphylıa nèk'e ts'ǫ̀ nègı̨ı̨de. 
Kǫ̀ta Perga, ekǫ Nǫ̀htsı̨ weyatıì t'à dǫ hoghàgogeèhtǫ. Eyı tł'axǫǫ̀ kǫ̀ta Atalıa ts'ǫ̀ agejà. 
Kǫ̀ta Atalıa gots'ǫ kǫ̀godeè Antıoch ts'ǫ̀ nageèɂe. Nǫ̀htsı̨ gok'èdì ha eyıts'ǫ wegha eghàlageeda ha t'à, ekǫ t'akwełǫ̀ǫ̀ Nǫ̀htsı̨ ghàgogį̀ı̨la ı̨lè. Eyı la sìı dıì gıghǫ nǫǫt'e. 
Kǫ̀godeè Antıoch nègı̨ı̨ɂe ekò Nǫ̀htsı̨ wecheekeè hazǫǫ̀ xè ełegıadì. Nǫ̀htsı̨ dànì goxè eghàlaı̨dà eyıts'ǫ dànì Nǫ̀htsı̨ dǫ eyıì-le xàɂaa gınì nàtsoò agǫ̀ǫ̀làa sìı hazǫǫ̀ gots'ǫ̀ hagedı. 
Paul eyıts'ǫ Barnabas ekǫ Nǫ̀htsı̨ wecheekeè xè whaà agı̨ı̨t'è. 
