﻿Rome.
3.
Eyıt'à Israel got'ı̨į̀ gı̨ı̨lı̨ı̨ sìı ayìıha eyı gıgha wet'àaɂà hǫt'e? Eyıts'ǫ gıkwǫ̀ nàt'àa sìı ayìıha eyı gıgha wet'àaɂà hǫt'e? 
Eyı gıgha sıì wet'àaɂà hǫt'e! Nǫ̀htsı̨ weyatıì wedeèdlı̨ı̨ k'ègedì ha gıghǫ̀t'ǫ sìı deɂǫ̀ǫ̀ gıgha wet'àaɂà hǫt'e. 
Ekò Israel got'ı̨į̀ mǫ̀hdaa gıgha ehkw'ı-ahodı-le ts'ıhɂǫ̀ Nǫ̀htsı̨ ayìı dàyele ha gòhdıı sìı edeyatıì k'èdì ha-le nì? 
Į̀le, hanì ha honàedı nıìle! Dǫ hazǫǫ̀ hogets'ì nǫǫ̀ kò Nǫ̀htsı̨ sìı t'aats'ǫǫ̀ ehkw'ı gode hǫt'e. Dıı hanì dek'eèhtł'è, “Goı̨de nı̨dè, ehkw'ı zǫ xàyaı̨htı dǫ hazǫǫ̀ yek'èezǫ ha, eyıts'ǫ t'asìı wesınìyanehtı nı̨dè t'aats'ǫǫ̀ neyatıì k'ę̀ę̀ agot'ı̨ hǫt'e,” dek'eèhtł'è. 
Ehkw'ı-le eghàlats'eeda nı̨dè Nǫ̀htsı̨ wexè ehkw'ı hòɂǫǫ sìı dǫ ts'ǫ̀ deɂǫ̀ǫ̀ nezı̨į̀ wègoèht'į̀ hǫt'e. Eyı ghǫ dàts'edı welì? Nǫ̀htsı̨ nàgoehkwa nı̨dè gots'ǫ̀ ehkw'ı-le eghàlaeda at'ı̨ dahwhǫ nì? (Hanì daɂeehke nı̨dè dǫ gǫǫzǫ-le laehsı̨.) 
Hanì honàedı nıìle! Nǫ̀htsı̨ ehkw'ı-le eghàlaeda at'ı̨ nı̨dè, dànì Nǫ̀htsı̨ dǫ hazǫǫ̀ gosınìyaehtı welì? 
Dǫ dıı hadı ha sǫnı, “Hołı̨ı̨ nàowoò k'ę̀ę̀ ehda ts'ıhɂǫ̀ Nǫ̀htsı̨ ehkw'ı godee sìı deɂǫ̀ǫ̀ dǫ gık'èezǫ nı̨dè, dǫ deɂǫ̀ǫ̀ gıghàsǫedı ha. Hanì hòɂǫ nı̨dè, dànìghǫ ı̨łaà hołı̨ı̨-hohtsı̨ı̨-dǫǫ̀ k'ę̀ę̀ sesınìyaetı ha?” hadı ha sǫnı. 
Dǫ ts'ǫ̀ dıı hagedı ha lanì, “Nàowołı̨ı̨ k'ę̀ę̀ ts'ııdà, hanì-ı̨dè wet'à t'asìı nezı̨ı̨ hagode ha,” gedı ha lanì. Dǫ mǫ̀hdaa hogets'ì t'à hats'edı gògedı, hanìkò amìı hanì dǫ hoghàehtǫǫ sìı wek'èxa hoìla agedle ha edegha geèhnǫ hǫt'e. 
Eyıt'à edeghǫ dàts'edı welì? Dǫ eyıì-le xàɂaa sìı gınahk'e ts'ı̨ı̨lı̨ nì? Hanì honàedı nıìle! Israel got'ı̨į̀ eyıts'ǫ dǫ eyıì-le xàɂaa hazǫǫ̀ ełèht'eè hołı̨ı̨ gık'e whela, hòt'a hats'edı ı̨lè. 
Nǫ̀htsı̨ Nı̨htł'è k'e dıı hanì dek'eèhtł'è, “Dǫ wı̨ı̨zìı ehkw'ı edaa gǫ̀hłı̨ nıìle, dǫ hanıı ı̨łè kò gǫ̀hłı̨ nıìle. 
Dǫ wı̨ı̨zìı Nǫ̀htsı̨ wenàowoò nıedì gǫ̀hłı̨-le, eyıts'ǫ dǫ wı̨ı̨zìı Nǫ̀htsı̨ k'èhoezǫ ha nıwǫ-le. 
Dǫ hazǫǫ̀ Nǫ̀htsı̨ ts'ǫǫ̀ agejà, dǫ hazǫǫ̀ nàowo wet'àaɂà-le k'ę̀ę̀ geedaà agejà. Dǫ ı̨łè kò ehkw'ı eghàlaedaa gǫ̀hłı̨-le, dǫ hanıı gots'ìhɂà ha dìì.” 
“Yatı jıı łǫ gıwà ts'ǫ xàewì, eyıts'ǫ t'aats'ǫǫ̀ dǫ ghǫyageeɂà.” “Gòocho nàèdıłı̨ı̨ lagı̨ı̨t'e, yatı t'à dǫ ełaàgehde ha gı̨ı̨wǫ.” 
“Nàdahogeeɂà eyıts'ǫ t'aats'ǫǫ̀ yatıjıı t'à dǫ k'eèyageetı.” 
“Dǫ hagedıı sìı dǫ ełaàgehde gha nàgeghò, 
t'aats'ǫǫ̀ t'asìı wedıhogehtsı̨ xè hoìla hogehtsı̨, 
eyıts'ǫ dànì dǫ ełexè ts'èwhı̨į̀ geedaa sìı gık'èezǫ-le.” 
“Nǫ̀htsı̨ k'èagı̨ı̨t'e ha gı̨ı̨wǫ-le eyıts'ǫ gıts'àejı̨-le,” dek'eèhtł'è hǫt'e. 
Moses wenàowoò k'e ayìı dek'eèhtł'èe sìı dǫ gotł'aà geèhkw'ee sìı gıgha dek'eèhtł'è hǫt'e. Hanì-ı̨dè dǫ wı̨ı̨zìı “Wek'èehsǫ-le,” gedı ha dìì, eyıts'ǫ dıı nèk'e dǫ hazǫǫ̀ dànì gı̨ı̨dàa k'ę̀ę̀ Nǫ̀htsı̨ gosınìyaehtı ha hǫt'e. 
Dǫ wı̨ı̨zìı Moses wenàowoò deghàà k'èdì ha dìì, eyıt'à dǫ wı̨ı̨zìı ehkw'ı eda k'ę̀ę̀ Nǫ̀htsı̨ yesınìyaehtı ha nıìle. Hanìkò Moses wenàowoò ts'ıhɂǫ̀ hołı̨ı̨ hots'ehtsı̨ nǫǫ̀ wek'èts'eezǫǫ̀ ats'ejà. 
Hanìkò dıì sìı Moses wenàowoò wedę dànì Nǫ̀htsı̨ ehkw'ı agohɂı̨ı̨ sìı wek'èts'eezǫǫ̀ agǫ̀ǫ̀là hǫt'e. Moses wenı̨htł'è eyıts'ǫ nakwenàoɂǫǫ gını̨htł'è k'e eyı ghǫ gogı̨ı̨de ı̨lè. 
Amìı Zezì-Krı yegha ehkw'ı adıı sìı Nǫ̀htsı̨ ehkw'ı ayehɂı̨ hǫt'e. Israel got'ı̨į̀ eyıts'ǫ dǫ eyıì-le xàɂaa hazǫǫ̀ gıgha ełèht'eè hǫt'e, gıgha nàowo eładı̨ı̨ gǫ̀hłı̨-le. 
Dǫ hazǫǫ̀ hołı̨ı̨ hogèhtsı̨ hǫt'e. Nǫ̀htsı̨ dànì wexè enıìyah xè degaı wehòhɂǫǫ sìı ts'ǫ nıwà ts'eèhkw'e hǫt'e, 
hanìkò Nǫ̀htsı̨ wesǫnıwǫ ts'ıhɂǫ̀ t'asìı k'èxa-le ehkw'ıì agǫ̀ǫ̀là. Zezì-Krı wet'ǫ̀ǫ̀ Nǫ̀htsı̨ edaxàgole. 
Nǫ̀htsı̨ sìı Zezì gohołı̨į̀ k'èxa ełaàwı ha goghàyı̨ı̨htı̨ hǫt'e. Zezì gohołı̨į̀ k'èxa wedoò xàı̨tł'ı gogha ehkw'ı-ahodı nı̨dè gohołı̨į̀ goghǫ nahoezhe ha hǫt'e. Nǫ̀htsı̨ hanì eghàlaı̨dàa sìı weghàà dànì wexè ehkw'ı ats'ede ha sìı wek'èts'eezǫ gha ayį̀į̀là hǫt'e. Įnę̀ę sìı gots'ǫ̀ ts'èwhı̨į̀ nıwǫ ı̨lè t'à hołı̨ı̨ hots'ehtsı̨ k'èxa ekòet'ıì nàgoı̨hkwa-le ı̨lè. 
Dànì wexè ehkw'ı ats'ede ha sìı dıì wek'èts'eezǫ ha t'à hanì eghàlaı̨dà hǫt'e. Eyıt'à ehkw'ı dıı hanì dǫ sınìyaehtı ha hǫt'e: amìı Zezì yegha ehkw'ı adıı sìı ehkw'ı k'ę̀ę̀ ayele ha hǫt'e. 
Eyıt'à dànì edeghǫ xàdahots'edì welì? Xàdahots'edì ha honàedı nıìle! Ayìı nàowo t'à ehkw'ıì ats'ejà ts'edı welì? Moses wenàowoò k'èts'edì t'à ehkw'ı goıtà ts'edı ha nì? Į̀le ne, hanìkò Zezì gogha ehkw'ı adı t'à ehkw'ı ts'eedaa k'ę̀ę̀ goıtà ha hǫt'e. 
Dıı hanì gogha ehkw'ı-ahodı hǫt'e: Dǫ wegha ehkw'ı-ahodı t'à ehkw'ı awììdlà hǫt'e. Moses wenàowoò k'ę̀ę̀ eda t'à ehkw'ıì ade ha nıìle. 
Nǫ̀htsı̨ sìı Israel got'ı̨į̀ gogha zǫ Nǫ̀htsı̨ elı̨ nì? Asį̀į̀ dǫ eyıì-le xàɂaa, ededı̨ sı gogha Nǫ̀htsı̨ elı̨ nì? Hęɂę, Nǫ̀htsı̨ ı̨łè zǫ gǫ̀hłı̨ ts'ıhɂǫ̀, dǫ eyıì-le xàɂaa ededı̨ sı gogha Nǫ̀htsı̨ elı̨ hǫt'e. 
Israel got'ı̨į̀ gıkwǫ̀ nàt'àa gı̨ı̨lı̨ı̨ sìı Zezì gıgha ehkw'ı-ahodı t'à ehkw'ıì agole ha hǫt'e, eyıts'ǫ dǫ eyıì-le xàɂaa gıkwǫ̀ nàt'à-le sìı ededı̨ sı Zezì gıgha ehkw'ı-ahodı t'à ehkw'ı geedaa k'ę̀ę̀ agole ha hǫt'e. 
Eyıt'à Zezì gogha ehkw'ı-ahodı ts'ıhɂǫ̀ Moses wenàowoò wet'àaɂà-le ade ha nì? Į̀le, hanì ha honàedı nıìle! Moses wenàowoò ı̨łaà gogha ehkw'ı hǫt'e eyıts'ǫ dǫ ts'ǫ̀ hats'edı hǫt'e. 
