﻿2 Corınth.
4.
Nǫ̀htsı̨ wesǫnıwǫ dahxà dıı la goghǫ̀t'ǫ hǫt'e, eyıt'à gogha gots'eèdı ha nıìle. 
Hanìkò deɂı̨į̀ k'ehots'eɂa eyıts'ǫ t'asìı weghǫ į̀į̀zhats'ı̨ı̨lı̨ı̨ sìı wedę ha ts'ı̨ı̨wǫ. Dǫ ghǫyats'eeɂà t'à eghàlats'eeda nıìle, eyıts'ǫ Nǫ̀htsı̨ weyatıì ładı̨į̀ ats'ehɂı̨ nıìle. Hanìkò dǫ ededzeè t'à gogeèhkw'ǫ ha ts'ı̨ı̨wǫ t'à Nǫ̀htsı̨ wenadąą̀ nàowo ehkw'ıı ghǫ hotıì ehkw'ı gots'ede hǫt'e. 
Gots'ǫ godı nezı̨ı̨ sìı dǫ mǫ̀hdaa deghàà gınıedì-le t'à gıgha ɂehtł'ı̨ ɂı̨į̀ wheɂǫ lanì, dǫ gıdıhołè ha ts'ǫ̀ gıadèe sìı gıgha hanì hǫt'e. 
Wehłı̨ı̨ dıı nèè gha k'àowo elı̨ı̨ sìı dǫ gıgha ehkw'ı-ahodı-le sìı gınì t'à gıgha xègaat'ı̨-le agǫ̀ǫ̀là. Eyıt'à Zezì-Krı wegodıì nezı̨ı̨ ts'ıhɂǫ̀ dǫ xè dzęh hòɂǫǫ sìı gıgha wègaat'ı̨ ha dìì, eyıts'ǫ Zezì-Krı enıìyah wehòhɂǫ xè hotıì Nǫ̀htsı̨ xèht'eè wègaat'ı̨ı̨ sìı, gınıedì ha dìì hǫt'e. 
Goxı̨ edeghǫ gots'edeè-ats'edı-le, Zezì-Krı, t'asìı hazǫǫ̀ ts'ǫ̀ k'àowo elı̨ı̨ sìı weghǫ gots'edeè-ats'edı. Zezì wets'ıhɂǫ̀ naxıgha eghàlats'eeda hǫt'e. 
Nǫ̀htsı̨ hadı, “Togoòtł'òo yìı gots'ǫ dzęh xàı̨dı̨į̀ awede,” hadıı sìı godzeè yìı dzęh nı̨ı̨dı̨į̀ ayį̀į̀là, eyı ts'ıhɂǫ̀ Zezì-Krı weghàts'eeda nı̨dè Nǫ̀htsı̨ dànì enıìyah elı̨ı̨ sìı wek'èts'eezǫ ats'et'į̀. 
Gozhį̀į̀ kwetǫ lanìı sìı weyìı t'asìı enıìyah k'èts'edì hǫt'e. Eyı t'asìı enıìyah xè nàtsoo sìı Nǫ̀htsı̨ wets'ǫ hǫt'e wek'èhoedzǫ, goxı̨ gots'ǫ nıìle. 
Goxı̨ sìı hazǫǫ̀ gomǫǫ̀ goòɂàa ts'ǫ̀ dǫ gogha hoìla hogehtsı̨, hanìkò anats'et'è nıìle; gogha hoezhì agot'ı̨ kò gogha ahxe whìle ts'ı̨ı̨wǫ-le, 
dǫ dagogį̀ı̨hɂa hanìkò Nǫ̀htsı̨ ɂǫ̀goehdè whìle, dèè k'e ts'ǫ̀ gogeèhde hanìkò godıhogèhtsı̨ whìle. 
Zezì dànì gogha dàı̨ɂàa xè ełaı̨woo sìı t'aats'ǫǫ̀ gozhį̀į̀ yìı edexè k'ets'eɂa hǫt'e, eyı ts'ıhɂǫ̀ Zezì gozhį̀į̀ yìı edaa sìı wek'èedzǫǫ̀ ade ha. 
Goxı̨ ı̨łaà ts'eeda et'ıì t'aats'ǫǫ̀ Zezì wets'ıhɂǫ̀ ełaàts'ede ha gogha hòɂǫ hǫt'e, hanì-ı̨dè gozhį̀į̀ ełaàwı ha sìı weyìı Zezì edaa sìı wek'èedzǫǫ̀ ade ha hǫt'e. 
Eyıt'à goxı̨ t'aats'ǫǫ̀ ełaàts'ede lanì, hanìkò eyı ts'ıhɂǫ̀ naxı̨ sìı aahda gha adlà hǫt'e. 
Dıı hanì dek'eèhtł'è, “Segha ehkw'ı-ahodı t'à weghǫ gohde hǫt'e,” dek'eèhtł'è. Goxı̨ sı eyı xèht'eè gogha ehkw'ı-ahodı t'à weghǫ gots'ede hǫt'e. 
Nǫ̀htsı̨ sìı Zezì-Krı naìdà ayį̀į̀là hǫt'e, goxı̨ sı Zezì xè nats'ìdà agole ha hǫt'e, eyıts'ǫ naxıxè wenadąą̀ nàts'eèhzaà agole ha wek'èts'eezǫ. 
Eyı hazǫǫ̀ sìı wet'àhoahwhı gha agòjà hǫt'e. Hanì-ı̨dè Nǫ̀htsı̨ wesǫnıwǫǫ sìı deɂǫ̀ǫ̀ dǫ łǫ ts'ǫ̀ ade ha, deɂǫ̀ǫ̀ dǫ łǫ Nǫ̀htsı̨ masì gı̨ı̨wǫ ha, eyıts'ǫ enıìyah xè deɂǫ̀ǫ̀ dǫ łǫ Nǫ̀htsı̨ ghàsǫgeedıì agede ha. 
Eyıt'à gogha gots'eèdı nıìle. Gozhį̀į̀ nàtso-le adaade kò dzę taàt'eè goınì t'à denahk'e nàts'etsoò agodaade hǫt'e. 
Whaà-lea gots'ǫ̀ yaazea goxè hoìla hǫt'e, hanìkò wet'à welǫ whìle ts'ǫ̀ goxè sıì enıìyah hòɂǫ gha agot'ı̨ hǫt'e, eyı sìı hazǫǫ̀ t'à denahk'e wet'àaɂà hǫt'e. 
Eyıt'à ayìı wègaat'ı̨ı̨ sìı gha goınì nàtso ats'ı̨ı̨hwhǫ-le, hanìkò ayìı wègaat'ı̨-le sìı gha goınì nàtso ats'ı̨ı̨hwhǫ hǫt'e. T'asìı wègaat'ı̨ı̨ sìı whaà-le gots'ǫ̀ zǫ gha hǫt'e, ekò t'asìı wègaat'ı̨-le sìı welǫ whìle ts'ǫ̀ gha hǫt'e. 
