﻿2 Corınth.
6.
Goxı̨ Nǫ̀htsı̨ gha ełexè eghàlats'eedaa ts'ı̨ı̨lı̨ı̨ sìı Nǫ̀htsı̨ wesǫnıwǫ k'ètł'ǫ̀ naxıts'ǫ̀ awede-le, naxèts'edıì naxıghǫnàdats'eetì. 
Nǫ̀htsı̨ ededı̨ dıı hadı, “Naxıts'ǫ̀ sınì nezı̨ı̨ ekò k'e naxeèhkw'ǫ ı̨lè, eyıts'ǫ dǫ edaxàgehłee dzęę̀ k'e naxıts'àehdì ı̨lè,” hadı. Ehkw'ı anaxèehsı̨, dıì sìı Nǫ̀htsı̨ naxıts'ǫ̀ wınì nezı̨ hǫt'e, dıì edaxàgolee dzęę̀ hǫt'e. 
T'asìı wı̨ı̨zìı t'à dǫnì tsį̀ts'ehwhı ha ts'ı̨ı̨wǫ-le, hanì-ı̨dè godı nezı̨ı̨ gha eghàlats'eedaa sìı wets'ıhɂǫ̀ t'asìı nezı̨-le t'à dǫ gok'e nìdahogeeɂà ha-le. 
Hanìkò t'asìı hazǫǫ̀ ghàlats'eeda weghàà Nǫ̀htsı̨ xàè wecheekeè ats'ı̨ı̨t'ee sìı dǫ gık'èezǫ ha: dànì ts'èwhı̨į̀ dats'ı̨ı̨ɂa t'à, dànì goxè hoìla łǫ t'à, dànì gogha dìì agot'į̀ t'à, dànì goxè hoejı̨ k'ehokw'o t'à; 
gokwǫ̀ǫyaà-gogehɂı̨ t'à, dǫ-danìı̨laa-kǫ̀ nègogı̨ı̨le t'à, gots'ıhɂǫ̀ dǫ xè nàdahoowo hogehtsı̨ t'à; la nàtso ghàlats'eeda t'à, łǫ-eht'aà to ts'ete-le eyıts'ǫ dets'eèhdì t'à; 
dànì degaı k'ę̀ę̀ ts'eedaa, Nǫ̀htsı̨ yatıì nıts'eedìı, dǫ xè ts'èwhı̨į̀ hots'èhɂǫǫ xè etegets'eèɂı̨ı̨; dànì Yedàyeh Nezı̨ı̨ k'ę̀ę̀ ts'eedaa eyıts'ǫ dànì hotıì dǫ ghǫnets'eètǫǫ; 
dǫ ts'ǫ̀ ehkw'ı gots'edee t'à, eyıts'ǫ dànì Nǫ̀htsı̨ wedahxà eghàlats'ı̨ı̨dàa t'à; nàowo ehkw'ıı wet'à ełets'egǫ lanì nàgòts'ehnèe eyıts'ǫ gots'ı̨hts'ǫ wet'à-ats'et'ı̨ı̨; 
dǫ goghǫ nezı̨į̀ agedıı hanì-le-ı̨dè gok'adageedèe, goghǫ nezı̨į̀ agedıı hanì-le-ı̨dè goghǫ nezı̨į̀ agedı-le; godzeè t'à ehkw'ı gots'ede hanìkò dǫ mǫ̀hdaa eghǫyaeɂàa-dǫǫ̀ ats'ı̨ı̨t'e gògedı; 
dǫ gok'ègeezǫ kò gok'ègeezǫ-le lanì gots'ǫ̀ nageɂa; ełaàts'ede ha welì lanì hanìkò ı̨łaà ts'eeda hǫt'e; nàgoakwa hanìkò ełaàts'ı̨ı̨dè-le, 
dats'ı̨ı̨ɂà hanìkò t'aats'ǫǫ̀ sìts'eèt'ı̨; etets'eèt'ı̨ hanìkò dǫ łǫ ahxeè lagets'į̀į̀là; t'asìı wı̨ı̨zìı gots'ǫ-le hanìkò t'asìı hazǫǫ̀ gots'ǫ hǫt'e. Eyı hazǫǫ̀ weghàà xàè Nǫ̀htsı̨ wecheekeè ats'ı̨ı̨t'ee sìı dǫ gık'èezǫ ha. 
Naxı̨ Corınth got'ı̨į̀ yàahłı̨ı̨ sìı edèdats'eedı-le xè naxıts'ǫ̀ gots'ı̨ı̨de hǫt'e, eyıts'ǫ godzeè t'à naxıts'ǫ̀ nezı̨į̀ ats'ı̨ı̨wǫ hǫt'e. 
Godzeè t'à t'aats'ǫǫ̀ naxıghǫnets'eètǫ hǫt'e, hanìkò naxı̨ sìı goghǫnıahtǫ gha edèdaahdı. 
Seza laaht'e lanì dıı hanaxèehsı̨ ha: Goxı̨ naxıghǫnets'eètǫ xèht'eè goghǫnıahtǫ ha dehwhǫ, gots'ǫ̀ naxıdzeè nechà aahłe. 
Dǫ gıgha ehkw'ı-ahodı-le sìı gıxè ı̨łè laaht'e-le. Dǫ ehkw'ı geedaa eyıts'ǫ dǫ nàowołı̨ı̨ k'ę̀ę̀ geedaa sìı ełexègı̨ı̨ht'e nıìle. Dzęh eyıts'ǫ togoòtł'òo sìı ełèht'eè nıìle. 
Zezì-Krı eyıts'ǫ wehłı̨ı̨ sìı ełek'ę̀ę̀ agı̨ı̨wǫ nıìle. Dǫ wegha ehkw'ı-ahodıı eyıts'ǫ dǫ wegha ehkw'ı-ahodı-le sìı ełègı̨ı̨ht'e hǫı̨lı̨ nıìle. 
Nǫ̀htsı̨kǫ̀-gocho eyıts'ǫ nǫ̀htsı̨ hòèlı̨ı̨ wets'ǫ yahtıı-kǫ̀ sìı ełek'ę̀ę̀ agı̨ı̨wǫ nıìle. Goxı̨ sìı Nǫ̀htsı̨ edaa wekǫ̀ lats'ı̨ı̨t'e hǫt'e. Nǫ̀htsı̨ dıı hadı ı̨lè, “Gıdzeè yìı nàhdè ha eyıts'ǫ gıta aht'e ha, Gınǫ̀htsı̨ ehłı̨ ha, eyıts'ǫ sets'ǫ dǫ gı̨ı̨lı̨ ha.” 
“Eyıt'à gıgha ehkw'ı-ahodı-le sìı gıta gots'ǫ xàahdè, gıxè aaht'ı̨-le. T'asìı hołı̨ı̨ ne sìı daahchì-le, hanì-ı̨dè sets'ǫ dǫ aahłı̨į̀ anaxehłe ha.” 
“Naxıtà ehłı̨ ha, eyıts'ǫ naxı̨ seza eyıts'ǫ setì aahłı̨ ha, Nǫ̀htsı̨ t'asìı wegha dìì-le sìı hadı,” hǫt'e. 
